Jehová kinnauatia katli mosenkajtokej ma elikaj “temachmej” (Salmo 31:23). Ni tlauel ipati, pampa tlaj mokajkayauaskiaj ayokmo kuali itstoskiaj. Uan tlaj amo mokajkayauaj, tlauel kinpaleuis ma moiknelikaj.

Ipan ni tonali, katli mosenkajtokej kimatij ouij itstosej sansejko. Yeka, tlaj tijneki nochipa kuali tiitstos iuaya mosiua o moueue, moneki tijchiuas ome tlamantli.

TLEN KIIJTOUA BIBLIA: “Xijmatikaj kejatsa inkitlapejpenisej [tlen tlauel ipati]” (Filipenses 1:10). Moneki tlauel tijpatiitas mosiua o moueue ipan monemilis, yeka nochipa xijtemo kenijkatsa kuali initstosej.

Jehová kineki san xikixtokato mosiua o moueue uan kineki sansejko xiyolpaktokaj (Eclesiastés 9:9). Ya amo kineki xijtlauelkaua mosiua o moueue, kineki nochipa xikita kenijkatsa uelis tijyolpakiltis (1 Corintios 10:24). Xijnextili mosiua o moueue nelia tijpatiita uan nelia tijneki ma itsto mouaya.

TLEN UELISKIA TIJCHIUAS:

• Nochipa xiitsto iuaya mosiua o moueue uan nochipa xikita tlake kipoloua

• Xikita tlen inmechpoloua inomej uan amo san tlen ta mitspoloua

TLEN KIIJTOUA BIBLIA: “Intla se tlakatl kiita se siuatl uan ipan itlalnamikilis kineki tlen ueli kichiuas iuaya, ya momekatijki iuaya ipan iyolo” (Mateo 5:28). Tlaj se akajya moiljuia kichiua tlen ueli tlamantli iuaya seyok, kiijtosneki ya kikajkayajtok isiua o iueue.

Jehová kiijtoua moneki tijmokuitlauis moyolo (Proverbios 4:23; Jeremías 17:9). Yeka, moneki kuali tijtlapejpenis tlake tijtlachilis (Mateo 5:29, 30). Xijchiua kej Job, katli mosentlalik amo kema kitlachiliskia se siuatl uan moiljuiskia kichiua tlamantli tlen amo kuali iuaya (Job 31:1). Ximosentlali amo kema tikitas pornografía. Uan amo kema xikixtoka seyok siuatl o seyok tlakatl.

TLEN UELISKIA TIJCHIUAS:

• Ma kiitakaj nelia timosentlalijtok tiitstos san iuaya mosiua o moueue

• Xijtlepanita tlen kiyolmati mosiua o moueue, uan tlaj amo kipaktia kej timouika iuaya se akajya, ayokmo ximouika iuaya