Maske tijchiuas miak tlamantli pampa tijneki tiyolpakis ininuaya mochampoyouaj, kemantika inmechpanos se keski tlamantli tlen kichiuas ximokuesokaj (Eclesiastés 9:11). Kema kiampa inmechpanos, toTeotsij nochipa inmechpaleuis. Tlaj inkichiuasej tlen Biblia tetlajtolmaka, uelis inkiijiyouisej kuesoli maske kemantika tlauel ouij.

TLEN KIIJTOUA BIBLIA: “Xikiljuikaj toTeko nochi inmokuesol uan xijkauakaj imako, pampa yajaya inmechmokuitlauia” (1 Pedro 5:7). Nochipa xikilnamikto toTeotsij amo kichiua ma tijpiakaj kuesoli (Santiago 1:13). Tlaj tijnechkauis, ya nochipa mitspaleuis (Isaías 41:10). “Xijpouilikaj nochi tlen eltok ipan inmoyolo.” (Salmo 62:8.)

Tlaj mojmostla tijpouas uan timomachtis Biblia nojkia timoyolchikauas. Tlaj tijchiuas, tikitas kenijkatsa Jehová nelnelia “techyoltlalia ipan nochi [...] tlaouijkayotl” (2 Corintios 1:3, 4; Romanos 15:4). Uan Jehová nojkia kiijtoua ‘mitsmakas tlaseuilistli ipan moyolo’ (Filipenses 4:6, 7, 13).

TLEN UELISKIA TIJCHIUAS:

• Xikiljui Jehová ma mitspaleui kuali tijyolmatis uan timoiljuis tlen kuali

• Kuali ximoiljui tlake ueliskia tijchiuas

TLEN KIIJTOUA BIBLIA: “Se tlakatl tlen tlalnamiki nochipa kineki kimachilis tlamantli yankuik. Nochipa tlakaktok para kikakis más tlalnamikilistli” (Proverbios 18:15). Moneki tijmatis tlake kinpoloua mochampoyouaj, yeka ximonojnotsa ininuaya uan kuali xikintlakakili (Proverbios 20:5).

Uan tlaj mikis se tlen mochampoyouaj, amo xipinaua timochokilis pampa mitsyolkokoua, xikilnamiki Jesús nojkia “chokak” (Juan 11:35; Eclesiastés 3:4). Nojkia moneki kuali tikochis (Marcos 6:31). Tlaj kej nopa tijchiuas, mitspaleuis amo tlauel timokuesos.

TLEN UELISKIA TIJCHIUAS:

• Nochipa ximonojnotsa ininuaya mochampoyouaj, kiampa kema kipiasej se kuesoli, kinekisej mitsiljuisej

• Ximonojnotsa ininuaya katli nojkia kinpanok se kuesoli kej ta mitspanotok

TLEN KIIJTOUA BIBLIA: “Se [kuali touampo] temachtli techiknelia nochipa. Kema onka tlaouijkayotl techpaleuia keja eliskia se toikni” (Proverbios 17:17). Maske mouampoyouaj kinekij mitspaleuisej, uelis amo kimatij kenijkatsa kichiuasej, yeka xikiniljui kenijkatsa uelis mitspaleuisej (Proverbios 12:25). Nojkia xikiniljui toikniuaj ma mitspaleuikaj ika Biblia, kiampa uelis tikijiyouis se kuesoli (Santiago 5:14).

Tlauel mitspaleuisej mouampoyouaj katli motemachiaj ipan toTeotsij uan kineltokaj nelia kichiuas tlen kiijtojtok. Nojkia kuali tijyolmatis tlaj tikinyolchikauas katli mokuesojtokej. Xikiniljui kenke timotemachia ipan Jehová uan tlake kiijtojtok techmakas. Nochipa xikinpaleuijto sekinok uan amo xikintlalkaui toikniuaj, pampa inijuantij tlauel mitsikneliaj uan kinekij kuali xiitsto (Proverbios 18:1; 1 Corintios 15:58).

TLEN UELISKIA TIJCHIUAS:

• Xikiljui se mouampo tlake mitspano uan xijkaua ma mitspaleui

• Kuali xikijto tlake mitspano uan kenijkatsa tijneki ma mitspaleuikaj