TLAXELOLI 3
Kema techyolkokouaj: Kemantika “[tij]teljuiaj seyok” pampa techyolkokok
“Maske amo kimatiyaya ajkia kitlachtekilijtoya, se tosiuaikni kiijtok na nikichtekilik tomij. Kema toikniuaj kimatkej, sekij na nechneltokakej uan sekinok yaya kineltokakej. Teipa nopa tosiuaikni kimatki na amo nijtlachtekilijtoya. Maske kinejki ma nijtlapojpoljui, na tlauel nimoyolkokojtoya, yeka nimoiljuik amo kema nijtlapojpoljuiskia.” (Linda)
¿NOJKIA tijyolmati kej Linda? Ya tlauel moyolkokok pampa se tosiuaikni kikauilik kitlachtekilik. Nelia tlauel amo kuali tijyolmatij kema sekij toikniuaj ayokmo kitekipanouaj Jehová san pampa kinchiuiliaj tlen amo kuali. ¿Ya nopa mitspanotok?
¿Uelis se akajya “techiyokakauas tlen iteiknelijkayo toTeko”?
Kema se toikni techchiuilia tlen amo kuali, uelis tlauel tikouijmatij tijtlapojpoljuisej, pampa tijmatij se Cristo itokilijka kinamiki techiknelis (Juan 13:34, 35). Yeka, tlauel amo kuali tijyolmatij kema se toikni katli iuaya timonechikouaj techyolkokoua o techchiuilia se tlamantli tlen amo kuali (Salmo 55:12).
Biblia kiijtoua kemantika se akajya moyolkokoua pampa seyok kichiuilia se tlenijki (Colosenses 3:13). Kema tojuantij techpano nopa, uelis tlauel ouij tijmatij tikilkauasej tlen techchiuilijtokej. Yeka, ¿tlake uelis techpaleuis? Ma tikitakaj eyi tlamantli tlen Biblia tetlajtolmaka.
Jehová kiita nochi tlen techpano. Jehová nochipa kiita tlake techpano, kej kema titlaijiyouiaj pampa techchiuiliaj tlen amo kuali (Hebreos 4:13). Uan ya nojkia kiyolkokoua (Isaías 63:9). Jehová amo kikaua se kuesoli, se tlaouijkayotl o seyok tlamantli, yon se toikni ma ‘techiyokakaua tlen iteiknelijkayo’ (Romanos 8:35, 38, 39). Tojuantij nojkia amo kinamiki tijkauasej se tlenijki o se akajya ma techiyokakaua tlen itlaiknelijkayo Jehová.
Titetlapojpoljuisej amo kiijtosneki kuali tikitaj tlen techchiuiliaj. Kema tijtlapojpoljuiaj se akajya amo kiijtosneki kuali tikitaj tlen techchiuilik o tikijtosej amo tlauel mokuapolok. Xikilnamiki maske Jehová amo kema kuali kiita se tlajtlakoli, ya tetlapojpoljuia san kema kinamiki (Salmo 103:12, 13; Habacuc 1:13). Jehová “axuejkaua kualantok”, yeka kineki ma tijchiuakaj kej ya uan ma titetlapojpoljuikaj (Salmo 103:9; Mateo 6:14).
Tlauel kuali tijyolmatij kema amo uejkaua tikualantokej. ¿Kenke tikijtouaj nopa? Ximoiljui tijtlalana san ika se moma se tetl tlen ietika se kilo. Maske achtoui tijmatis amo etik, ¿tlake panoskia tlaj uejkauas tijtlalantos, uelis se keski minutos, se o miak horas? Tlauel timakuatiskia. Maske nopa tetl san kej ipa ietika, tlaj uejkauas tijtlalantos, tijmatis tlauel moetilia. Nojkia kiampa pano kema uejkaua tikualantokej o nochipa tikilnamiktokej tlen techchiuiliaj, tlaj amo tikilkauaj tlauel amo kuali tijyolmatij. Yeka, Jehová techiljuia amo kinamiki tikualantosej, pampa kimati kiampa kuali tiitstosej (Proverbios 11:17).
Tlauel kuali tijyolmatij kema amo uejkaua tikualantokej
“Eliyaya kejuak Jehová nechnojnotsayaya”
¿Tlake kipaleuik Linda ayokmo kualantos iuaya nopa tosiuaikni? Ya tlauel kipaleuik tlen Biblia kiijtoua, uan kuali moyoliljuik kenke moneki titetlapojpoljuisej (Salmo 130:3, 4). Uan tlauel kipaleuik kema kiilnamijki kenijkatsa tlaj tojuantij tikintlapojpoljuiaj sekinok, Jehová nojkia techtlapojpoljuis (Efesios 4:32–5:2). Kema nopa tosiuaikni moyoliljuia kenijkatsa kipaleuik nopa textos, kiijtoua: “Eliyaya kejuak Jehová nechnojnotsayaya”.
Teipa Linda ayokmo kualantoya, kitlapojpoljuik nopa tosiuaikni uan nama kuali mouampojchijtokej. Linda nojua kitekipanoua toTeotsij. Jehová nelia kineki ta nochipa xijtekipanojto.
