Sejse xiuitl, tijchiuaj uan tijmoyauaj miak millones tlen Biblias uan sekinok amatlajkuiloli tlen amo monamaka. Tijchiuaj uan tijkualchijchiuaj kali kampa timosentiliaj uan kali Betel. Tikinpaleuiaj ika se kentsi tomij katli itstokej Betel uan misioneros, uan tijtitlanij tlapaleuili kampa tetlasojsoljuilia se chikauak ajakatl o seyok tlamantli. ¿Kanke tijkuij tomij tlen ika tikixtlauaj nochi?

Amo titetlajtlaniaj diezmo yon amo titetlajtlanijtinemij tomij. Maske motekiuia miak tomij ika tlen titlajtolmoyauaj, amo titetlajtlaniaj tomij. Kipano se 100 xiuitl, kema Tlen Tematiltia kiski ika ompa, kinextik timotemachiaj Jehová nochipa techpaleuis. Nojkia kiijtok: “[Katli tiitstokej ipan ni religión] amo kema titetlajtlanijtinemisej tomij yon amo titetlajtlanijtinemisej ma techpaleuikaj”. Uan kej nopa panotok (Mateo 10:8).

Nochi tikixtlauaj ika tlen maseualmej temakaj ika nochi ininyolo. Miakej tlauel kipatiitaj kema titlamachtiaj ika Biblia uan techpaleuiaj ika inintomij tlen temakaj ika nochi ininyolo. Uan tojuantij tijtekiuiaj tonali, tochikaualis uan totomij uan kiampa tijchiuaj tlen toTeotsij kineki ipan nochi Tlaltipaktli (1 Crónicas 29:9). Kampa timosentiliaj uan ipan uejueyi tlanechikolistli onka pilkuakajontsitsij kampa se uelis kitlalis tomij, tlaj se kineki temakas. O uelis kichiuas ipan Internet kampa jw.org. Miakej katli temakaj amo kipiaj miak tomij. Uejkajkia kej nopa kichijki se siuatl katli ayokmo kipiayaya iueue, yeka Jesús kuali kiitak kema kitlalik ome piltomintsitsij ipan kuakajo kampa teokali (Lucas 21:1-4). Se nojkia uelis kiajokuis se achi tomij uan temakas “keja ipa moyoliljuijtok para temakas” (1 Corintios 16:2; 2 Corintios 9:7).

Timotemachijtokej Jehová nochipa kinyololinis katli kinekij kiueyichiuasej ika ‘tlamantli tlen kipiaj’, uan kej nopa nojua tlapaleuijtosej ma momoyaua toTeotsij iTlajtol uan ma moaxiti tlen ya kineki (Proverbios 3:9).

• ¿Kenke Jehová itlajtoltemakauaj amo kej sekinok religiones?

• ¿Kenijkatsa motekiuia nopa tomij tlen maseualmej temakaj ika nochi ininyolo?