Nabucodonosor kinuikak Babilonia nopa tlayakananij tlen Judá, uan kiiljuik nopa tlayakanketl Aspenaz ma kinyakana. Nojkia kiiljuik ma kintlapejpeni katli kipixtoyaj chikaualistli uan tlalnamikiyayaj. Nopa telpokamej kinmachtiskiaj eyi xiuitl, pampa kinekiyayaj nojkia ma tlayakanakaj ipan Babilonia. Kinmachtiskiaj ma kipouakaj, ma kiijkuilokaj uan ma kamanaltikaj tlajtoli acadio tlen babiloniaeuanij kitekiuiyayaj. Nojkia kikuaskiaj nopa tlakualistli tlen kikuayaya tlanauatijketl. Nauij telpokamej katli nojkia kintlapejpenijkej motokaxtiyayaj Daniel, Ananías, Misael uan Azarías. Azpenas kinpatilik inintoka, uan kintokaxtlalik: Beltsasar, Sadrac, Mesac uan Abed Nego. ¿Timoiljuia tlen kinmachtiskiaj kichiuaskia ma kitlauelkauakaj Jehová?

 Ni nauij telpokamej kinekiyayaj kineltokasej Jehová. Kimatiyayaj amo kinamikiyaya kikuasej nopa tlakualistli tlen kinmakaskiaj, pampa Jehová tlanauatijtoya amo ma kikuakaj se keski tlamantli. Yeka kiiljuijkej Aspenaz: “Timitstlajtlaniaj, amo xitechmaka nopa tlakualistli tlen kikua motlanauatijka”. Aspenaz kinnankilik: “Tlaj amo kuali intlakuasej, uan nopa tlanauatijketl kiitas amo inkipiaj chikaualistli, nechmiktis”.

Daniel moiljuik tlen ueliskiaj kichiuasej. Kiiljuik Aspenaz: “San xitechmaka tlen tlaki milaj uan atl. Uan teipa tikitas kenijkatsa tiitstosej tojuantij uan kenijkatsa itstosej ne sekinok telpokamej katli kikuasej itlakualis motlanauatijka”. Aspenaz kichijki tlen Daniel kiiljuik.

Kema panok matlaktli tonali, san Daniel uan iuampoyouaj kuali nesiyayaj, uan nopa sekinok telpokamej kej ipa itstoyaj. Jehová tlauel yolpajki pampa kineltokakej. Jehová kimakak Daniel miak tlalnamikilistli, kiampa ueliskia kiixtomas tlen sekij kitemikiyayaj o tlen kiitayayaj kejuak ipan temiktli.

Kema tlanki nopa eyi xiuitl, Aspenaz kinuikak nopa telpokamej kampa itstoya Nabucodonosor. Kema nopa tlanauatijketl monojnotski ininuaya, kiitak san Daniel, Ananías, Misael uan Azarías tlauel tlalnamikiyayaj, uan nopa sekinok amo. Yeka kintlapejpenik ma tlatekipanokaj kej tlayakananij ipan itlanauatijkayo. Kema Nabucodonosor kinekiyaya kichiuas se tlenijki, kiniljuiyaya nopa telpokamej ma kitlajtolmakakaj. Maske itstoyaj tlakamej katli tlalnamikiyayaj uan kitekiuiyayaj magia, Jehová kichijki san Daniel tlauel ma tlalnamiki.

Maske Daniel, Ananías, Misael uan Azarías amo itstoyaj ipan ininaltepe, amo kema kiilkajkej eliyayaj Jehová itekipanojkauaj. Uan ta, ¿nochipa tijneltokas Jehová maske amo tiitstos ininuaya motatauaj?