María eliyaya Elisabet iteixmatka uan itstoya ne Galilea ipan altepetl Nazaret. María nechka monamiktiskia iuaya José, katli eliyaya kuaxinketl. Kema Elisabet tlanemiltiyaya chikuasej metstli, nopa iluikaejketl Gabriel kipaxaloto María, uan kiiljuik: “María, Jehová kuali mitsita”. Ya amo kikuamachilik, yeka nopa iluikaejketl kiiljuik: “Tikonekuis uan tijpias se mopilkone. Uan moneki tijtokaxtis Jesús. Ya elis se tlanauatijketl uan iTlanauatijkayo uejkauas nochipa”.

María kiijtok: “¿Kenijkatsa nikonepias tlaj amo nimonamiktijtok?”. Gabriel kinankilik: “Jehová nochi ueli kichiua. Mitsmakas itonal uan kej nopa tijpias mokone. Moteixmatka Elisabet nojkia kipias se pilkonetsi maske ya nanatsi”. Uajka María kiijtok: “Na niitekipanojka Jehová. Ma nechpano kiampa kej tinechiljuijtok”.

María kipaxaloto Elisabet, katli itstoya ipan se altepetl  tlen mokauayaya tepeixko. Kema María asito uan kitlajpalok Elisabet, ipilkone Elisabet pejki mojmolinia iijtiko. Uan Elisabet kiselik toTeotsij itonal uan kiijtok: “María, Jehová tlauel mitsteochijtok. Nelia se ueyi tlateochiualistli ma nechpaxalo inana noTeko”. María kiiljuik: “Nijueyichiua Jehová ika nochi noyolo”. María mokajki eyi metstli Elisabet ichaj, uan teipa tlakuepilik Nazaret.

Kema José kimatki María kipiaskia se ikone, ayokmo kinekiyaya mosiuajtis iuaya. Yeka se iluikaejketl kinojnotski José ipan se temiktli, uan kiiljuik: “Amo ximajmaui timosiuajtis iuaya pampa ya amo tlajtlakolchijtok”. Uajka, José mosiuajtik iuaya María uan kiuikak ichaj.