Nopa fariseos kikualankaitayayaj Jesús uan kitemoliyayaj kenijkatsa kiitskisej. Kiijtouayayaj amo kinamikiyaya techikauas ipan sábado. Se sábado, Jesús kiitak ipan ojtli se tlakatl katli tlajtlaniyaya tomij uan amo ueliyaya tlachia pampa kej nopa tlakatki. Yeka Jesús kiniljuik itokilijkauaj: “Xikitakaj kenijkatsa toTeotsij ichikaualis kipaleuis ni tlakatl”. Uajka Jesús kiatilik kentsi tlali ika ichajcha uan kitlalilik ipan iixteyoljuaj, uan kiiljuik: “Xia uan ximoixteyolpajpakati ipan nopa ameli Siloé (o Siloam)”. Nopa tlakatl kichijki tlen Jesús kiiljuik uan uelki tlachia.

Maseualmej tlauel yolpajkej uan kiijtojkej: “¿Ni tlakatl eli katli moseuiyaya ojtipa uan tlajtlaniyaya tomij? ¿O ni seyok tlakatl?”. Nopa tlakatl kiniljuik: “Na ni eli katli amo nitlachiayaya”. Uan kitlajtlanijkej: “¿Uan kenke nama titlachia?”. Ya kinpouilik tlen panotoya. Uajka kiuikakej kampa fariseos ma kiniljuiti tlen kipanotoya.

Nopa tlakatl kiniljuik: “Jesús kiatilik kentsi tlali ika ichajcha uan kitlalik ipan noixtiyoljuaj, uan nechiljuik ma nimoixteyolpajpakati. Nijchijki, uan nama ueli nitlachia”. Nopa fariseos kiijtojkej: “Tlaj Jesús techikaua ipan sábado, uajka amo toTeotsij kimaka ichikaualis”. Uan sekinok kiijtouayayaj: “Tlaj toTeotsij amo kimaka ichikaualis, uajka, ¿kenijkatsa ueli techikaua?”.

Nopa fariseos kinnotskej nopa tlakatl itatauaj uan kintlajtlanijkej:  “¿Kenke nama inmokone tlachia?”. Itatauaj majmauiyayaj, pampa fariseos kiijtojtoyaj tlaj se akajya kineltokaskia Jesús kikixtiskiaj tlen sinagoga. Yeka kiijtojkej: “Amo tijmatij. Inmojuantij xijtlajtlanilikaj”. Fariseos nojua kitlajtlanijkej nopa tlakatl, uan ya kinnankilik: “Ya niinmechiljuik nochi. ¿Kenke nojua innechtlajtlaniaj?”. Nopa fariseos kualankej uan kikixtijkej.

Teipa, Jesús kiitato nopa tlakatl uan kitlajtlanik: “¿Titlaneltoka ipan Mesías?”. Nopa tlakatl kinankilik: “Tlaj nijmatiskia ajkia nopa Mesías, nitlaneltokaskia ipan ya”. Jesús kiiljuik: “Na ni Mesías”. ¿Timoiljuia Jesús kinextik kuali iyolo ika nopa tlakatl? Kichikajki uan kipaleuik ma tlaneltoka.