Kema Adán uan Eva kinkixtijkej tlen nopa xochimili Edén, teipa kinpixkej miakej ininkoneuaj. Nopa achtouiejketl motokaxtik Caín, ya tekitiyaya milaj. Teipa tlakatki Abel, ya kinmokuitlauiyaya borregojmej.

Se tonali, Caín uan Abel kimakakej se tlakajkaualistli Jehová. ¿Tijmati tlake eli se tlakajkaualistli? Eli se tlamantli tlen kimakayayaj toTeotsij. Jehová tlauel kipaktik tlen Abel kimakak, uan tlen Caín kimakak amo kipaktik. Yeka Caín tlauel kualanki. Maske Jehová kiiljuik Caín tlaj nojua kualantos ueliskia kichiuas se tlamantli tlen amo kuali, ya amo kitlakakilik.

Teipa, Caín kiiljuik Abel: “Ma tiakaj milaj”. Uan kema itstoyaj ininseltsitsij, Caín kimakilik iikni uan kimiktik.  ¿Tlake kichijki Jehová? Kitlatsakuiltik Caín. Kiiljuik uejka ma yaui, kampa ayokmo itstoskia ininuaya ichampoyouaj uan ayokmo kema tlakuepiliskia.

Ni techmachtia uelis kemantika tikualanisej kema se tlamantli amo kisas kej tijnekiyayaj. Yeka tlaj tijmachiliaj nojua tlauel tikualantokej o sekinok techiljuiaj nesi tikualantokej, moneki nimantsi ma timoyoltlalikaj, kiampa amo tijchiuasej se tlamantli tlen amo kinamiki.

Abel tlauel kiikneliyaya Jehová uan kuali monejnemiltik. Yeka Jehová nochipa kiilnamiktos. Kema toTeotsij kichiuas Tlaltipaktli se xochimili, kiyolkuis Abel.