Kema tlaauaktoya, Jehová kiiljuik Elías: “Xia altepetl Sarepta. Nopaya itstok se siuatl katli ayokmo kipia iueue, yaya mitstlamakas”. Kema asito ipan nopa altepetl, Elías kiitak nopa siuatl kipejpenayaya kuauitl, uan kiiljuik ma kimaka se kentsi atl. Kema nopa siuatl kikuito nopa atl, Elías kiiljuik: “Nojkia xinechualikili se achi pantsi”. Nopa siuatl kinankilik: “Amo nijpia pantsi, amo tleno uelis nimitsmakas. San nijpixtok se achi harina uan se kentsi aceite tlen ika nijchijchiuas tlen tijkuasej nokone uan na”. Uajka Elías kiiljuik: “Jehová kiijtojtok tlaj ta tinechchijchiuilis se pantsi pilsiltsi, amo tlamis nopa harina yon nopa aceite hasta nopa tonali kema sampa tlaauetsis”.

Nopa siuatl yajki ichaj uan kisenkajki nopa pantsi tlen kimakaskia itlajtolpanextijka Jehová. Jehová kichijki tlen kiijtojtoya. Uan nopa siuatl uan ikone nochipa kipixkej tlen kikuaskiaj kema tlaauaktoya. Nopa harina uan aceite tlen kipixtoya, amo kema tlanki.

 Teipa, panok se kuesoli. Ipilkone nopa siuatl kipixki se kokolistli uan mijki. Nopa siuatl kiiljuik Elías ma kipaleui. Elías kitlalantejki nopa pilokichpiltsi, uan kiuikak uejkapa ipan nopa kali. Teipa, kitejki ipan se tlapechtli, uan kiiljuik toTeotsij: “Jehová, nimitstlajtlania, xijyolkui ni pilokichpiltsi”. ¿Ipa moyolkuitoya se akajya? Amo. Yeka, tlaj Jehová kiyolkuiskia nopa pilokichpiltsi, nochi mosentlachiliskiaj. Uan nojkia, pampa nopa siuatl uan ikone amo eliyayaj israeleuanij.

Uajka nopa pilokichpiltsi pejki tlaijiyotilana uan moyolkuik. Elías kiiljuik nopa siuatl: “¡Xikita! Mokone yoltok”. Nopa siuatl tlauel yolpajki uan kiiljuik Elías: “Nama nelia nijmati, ta tiitlatekipanojka toTeotsij. Tlen tikijtoua uala tlen Jehová, yeka nochi tlen tikijtoua moaxitia”.