Nopa ompa carta tlen kintitlanilijkej Cristo itokilijkauaj tlen Corinto 2:1-17
2 Pampa nimosentlalijtok amo nijchiuas sampa ximokuesokaj kema nias niinmechpaxaloti.
2 Pampa tlaj nijchiuas ximokuesokaj, ¿ajkia kichiuas ma niyolpaki? San itstos katli nijchijki ma mokueso.
3 Yeka niinmechtlajkuiljuilik nopa tlamantli, kiampa kema nias inkichiuasej ma niyolpaki uan amo ma nimokueso, pampa nimotemachia tlen kichiua ma niyolpaki, nojkia kichiua nochi xiyolpakikaj.
4 Pampa nitlaijiyouiyaya uan nimoyolkuesouayaya, yeka nichokayaya kema niinmechtlajkuiljuilik. Pero amo nijchijki para ximokuesokaj, nijchijki para xijmatikaj tlauel niinmechiknelia.
5 Uajka, tlaj se akajya teyolkokojtok amo san na nechyolkokojtok, inmechyolkokojtok se kentsi nochi inmojuantij maske sekij más kinyolkokojtok (pero amo nijneki tlauel nikamanaltis tlen ni tlamantli).
6 Miakej tlen inmojuantij tlauel inkitlalnamiktijtokej nopa tlakatl, uajka ika nopa ya kuali.
7 Nama moneki inkitlapojpoljuisej ika nochi inmoyolo uan inkiyoltlalisej, kiampa amo tlauel moyolkokos pampa tlauel mokuesojtos.
8 Yeka niinmechiljuia* xijnextilikaj inkiikneliaj.
9 Pampa nojkia niinmechtlajkuiljuilik para nikitas tlaj inkichiuaj nochi tlen inmechnauatiaj.
10 Tlaj inmojuantij inkitlapojpoljuiaj se akajya ika se tlamantli tlen kichijki, na nojkia nijtlapojpoljuia. Uan nochi tlen na nitetlapojpoljuijtok (tlaj monejki nitetlapojpoljuis) nijchijki para niinmechpaleuis kuali xiitstokaj iixpa Cristo,
11 kiampa Satanás amo techkajkayauas pampa kuali tijmatij tlake kitekiuia para techmasiltis.
12 Kema niasito altepetl Troas para nijmoyauas nopa kuali tlamachtili tlen Cristo, kejuak motlapok se puerta para nitlatekipanos ipan iteki toTeko,
13 pero achi nimokuesok pampa amo nijpantik noikni Tito. Yeka, nikinnauatijtejki* uan niajki Macedonia.
14 ¡Tlauel tijtlaskamatiliaj Dios!* Ya nochipa techyakana kejuak ipan se marcha* iuaya Cristo, kej soldados katli ya tlakuepiliaj kampa tlatlanitoj ipan se guerra, uan nojkia ika tojuantij kichiua ejeliuis* ma kimatikaj tlen Dios tlamachtia, kej kema momoyaua se tlamantli tlen ajuiyak mijyotia.
15 Pampa tojuantij katli titematiltiaj tlen Cristo, Dios techita kej se tlamantli tlen ajuiyak mijyotia, tlen kinasi katli yauij ipan se ojtli kampa kinmakixtisej* uan nojkia katli yauij ipan se ojtli kampa kintsontlamiltisej.
16 Katli kintsontlamiltisej, kiijnekuij kejuak poteui kej se tlamantli tlen miktok, uan kichiua ma mikikaj, pero katli momakixtisej kiijnekuij kej se tlamantli tlen ajuiyak mijyotia uan kichiua ma kipiakaj nemilistli. ¿Uan ajkia kimati kichiuas ni tlamantli?
17 Tojuantij uelis tijchiuasej, pampa amo tijnamakatinemij* itlajtol Dios, kej miakej kichiuaj. Amo, tojuantij techtitlanki Dios para ma tikamanaltikaj ika tlen melauak iixpa ya uan nojkia iuaya Cristo.
Tlen ijkuilijtok tlatsintla
^ O “niinmechyololinia”.
^ Kanajya kiijtouaj “nimomakajki”.
^ Kanajya kiijtouaj “toTeotsij”.
^ O “desfile”.
^ Kanajya kiijtouaj “kampa ueli”.
^ O “kinmanauisej”.
^ O “amo timotomintlaniliaj ika”.
