Tlen Pablo kitlajkuiljuilik Filemón 1:1-25
1 Na niPablo, katli nechtsaktokej pampa nijneltoka Cristo Jesús, uan toikni Timoteo, timitstlajkuiljuiliaj ta Filemón, totlapaleuijka katli timitsikneliaj,
2 nojkia tosiuaikni Apfia, uan Arquipo katli tlatekipanoua touaya kej se Cristo isoldado, uan nochi toikniuaj katli mosentiliaj mochaj:
3 ToTata Dios* uan toTeko Jesucristo ma kipiakaj ueyi ininyolo ika inmojuantij* uan ma inmechpaleuikaj kuali ximouikakaj ininuaya.
4 Nochipa nijtlaskamatilia noDios kema nimomaijtoua* uan nimitsilnamiki,
5 pampa nojua nijkaktok kuali titlaneltoka uan tikiknelia toTeko Jesús uan nochi katli Dios kintlapejpenijtok.*
6 Nimomaijtoua pampa nijneki nopa tlaneltokili tlen tijpia sanse kej sekinok, ma mitspaleui tikitas nopa tlamantli tlen kuali tlen tijselijtokej ika Cristo.
7 Noikni, tlauel niyolpajki uan nechyolchikajki kema nijmatki titeiknelia, pampa tlen tijchijtok kinyolchikajtok sekinok katli Dios kintlapejpenijtok.
8 Yeka, maske ueliskia nimitsnauatis xijchiua tlen kuali pampa nijpia tlanauatili kej se Cristo iapóstol,
9 nijneki nimitstlajtlanis ika nochi noyolo, pampa nijmati titeiknelia, pampa na Pablo, ya niueuentsi uan nama nojkia nechtsaktokej pampa nijneltoka Cristo Jesús.
10 Nimitskamanaljuia para nijtenpaleuis* nokone Onésimo, katli nimochijki kej itata kema nechtsaktoyaj.
11 Achtouia amo elki se kuali tlatekipanojketl, pero nama kena nechpaleuia na uan nojkia ta.
12 Nijtitlani para sampa ma tlakuepili mochaj, yaya katli tlauel nikiknelia.
13 Nechpaktiskia nojua ma mokaua nouaya para ma kichiua nopa tekitl tlen ta tijchiuaskia, uan ma nechpaleui kampa nitsaktok pampa nijmoyaua nopa kuali tlamachtili.
14 Pero amo nijneki nijchiuas yon se tlamantli tlen ta amo tijnekis, kiampa tijchiuas ni kuali tlamantli ika nochi moyolo uan amo pampa nimitschiualtia.
15 Uelis yeka ayokmo itstoya mouaya se keski tonali, kiampa teipa ueliskia tlakuepilis uan nochipa itstos mouaya,
16 ayokmo kej motlatekipanojka, nama kej se moikni katli tikiknelia. Na tlauel nikiknelia, pero ta más tikiknelis pampa nama sampa itstos mouaya uan sansejko inkitekipanosej toTeko.
17 Uajka, tlaj tinechita kej se mouampox,* kuali xijseli, sanse kej na tinechseliskia.
18 Uan nojkia, tlaj mitschiuilik se tlamantli tlen amo kuali o mitstlauikilia, xikita kejuak na nimitstlauikilia.
19 Na Pablo nimitstlajkuiljuilia ika nomax: na nimitskuepilis tlen Onésimo mitstlauikilia (pero xikilnamiki ta tinechtlauikilia hasta monemilis).
20 Kena noikni, xijchiua tlen nimitsiljuia pampa nojkia tijtekipanoua toTeko, xinechyolchikaua kej se Cristo itokilijka.
21 Nimotemachia tijchiuas tlen nimitsiljuia, yeka nimitstlajkuiljuilia pampa nijmati nojkia tijchiuas sekinok tlamantli tlen amo nikijkuilok nikaj.
22 Nojkia nijneki nimitsiljuis xijtemo kanke uelis nimokauas, pampa nimotemachia sampa nitlakuepilis kampa inmojuantij pampa inmomaijtojtokej.
23 Mitstlajpaloua Epafras, katli nojkia tsaktok nouaya pampa kineltoka Cristo Jesús.
24 Nojkia mitsontlajpalouaj Marcos, Aristarco, Demas uan Lucas, katli tlatekipanouaj nouaya.
25 ToTeko Jesucristo ma kinexti ueyi iyolo ika inmojuantij* pampa inkipiaj kuali inmoyolo.
Tlen ijkuilijtok tlatsintla
^ Kanajya kiijtouaj “toTeotsij”.
^ O “ma inmechmakakaj tlateochiualistli tlen amo kinamiki inkiselisej”.
^ Kanajya kiijtouaj “nimotlatlajtia”.
^ O “tlatsejtseloltikej”.
^ Kanajya kiijtouaj “nijmanauis”.
^ O “moamigo”.
^ O “ma inmechmaka tlateochiualistli tlen amo kinamiki inkiselisej”.
