Nopa carta tlen kintitlanilijkej Cristo itokilijkauaj tlen Galacia 4:1-31
4 Nama niinmechiljuia, tlaj katli kiaxkatisej nochi nojua eli se pilokichpiltsi, uajka eli kej se tlatekipanojketl maske iaxka nochi,
2 pampa nojua kimokuitlauiaj tlamokuitlauianij uan tlayakankatlatekipanouanij hasta nopa tonali tlen itata kiixtlalik.
3 Tojuantij nojkia, kema tieliyayaj tikonemej nojkia kejuak tieliyayaj tlatekipanouanij pampa timoiljuiyayaj uan timonejnemiltiyayaj kej katli itstokej ipan ni Tlaltipaktli.
4 Pero kema moaxitik nopa tonali tlen Dios* kiixtlalijtoya, kititlanki iKone, katli tlakatki tlen se siuatl uan kichijki tlen kiijtoua nopa Tlanauatili,
5 para ma kinkoua uan ma kinmakixti katli kichiuayayaj tlen kiijtoua nopa Tlanauatili, uan kiampa Dios ueliskia techselis kej tiikoneuaj.
6 Uan inmojuantij inelij ikoneuaj Dios, yeka ya kiualtitlantok ipan toyolo nopa chikaualistli* tlen kimakak iKone, uan nopa chikaualistli kichiua chikauak ma tikijtokaj: “¡Abba,* Pa!”.
7 Uajka, ayokmo tieli se tlatekipanojketl, nama tieli ikone Dios. Uan tlaj tieli ikone Dios, nojkia tijselis tlen yaya mitsaxkatis.
8 Pero kema inmojuantij amo inkiixmatiyayaj Dios, inkintekipanouayayaj tlen amo nelnelia elij dioses.
9 Pero tlaj nama ya inkiixmatij Dios, o más kuali tikijtosej, tlaj Dios ya inmechixmati, ¿kenke sampa inkinekij inkitokilisej tlamantli tlen amo ipati tlen eltok ipan ni Tlaltipaktli?
10 Inmojuantij iniljuichiuaj ipan se keski tonali, metstli, kema ipoual* se tlamantli uan xiuitl, pampa inmoiljuiaj tlauel ipati.
11 Nimotekipachoua pampa uelis san tlapik nijchijki kampeka niinmechpaleuis.
12 Noikniuaj, niinmechtlajtlania xielikaj kej na, pampa na nojkia nielki kej inmojuantij. Inmojuantij amo kema innechchiuilijkej tlen amo kuali.
13 Pero inmojuantij inkimatij para nimokokok* uan yeka uelki niinmechmatiltia nopa kuali tlamachtili ika achtoui uelta.
14 Uan maske niinmechouijmakak kema nimokokouayaya,* inmojuantij amo innechtlauelkajkej yon innechijixkej.* Amo, inmojuantij innechselijkej kej se iángel Dios uan kej Cristo Jesús.
15 ¿Kanke yajki nopa pakilistli tlen achtouia inkipixtoyaj? Pampa temachtli nijmati, tlaj inueltoskiaj, inmokixtilijtoskiaj inmoixteyol uan innechmakatoskiaj.
16 ¿Uan nama inmoiljuiaj niinmechkualankaita pampa niinmechiljuia tlen melauak?
17 Inijuantij tlauel kinekij inmechyoltlanisej, pero amo pampa kinekij inmechchiuilisej tlen kuali. Kinekij ximouejkatlalikaj tlen na, uan kiampa inkinekisej inkintokilisej.
18 Pero kuali para se akajya nochipa ma kichijto kampeka inmechyoltlanis para inmechchiuilis tlen kuali, uan amo ma kichiua san kema na niitstok inmouaya
19 nopilkoneuaj, katli sampa nitlaijiyouia por inmojuantij kej se siuatl katli kuajkualo kema kipias ipilkone, uan kiampa nitlaijiyouijtos hasta kema inelisej kej Cristo.
20 Tlauel nechpaktiskia niitstos namantsi inmouaya uan amo chikauak niinmechnojnotsas kej namantsi nijchijtok, pampa amo nijmati kenke kiampa intlachiuaj.
21 Inmojuantij, katli inkinekij inkichiuasej tlen kiijtoua nopa tlanauatili, xinechiljuikaj, ¿amo inkikakij tlen kiijtoua nopa Tlanauatili?
22 Ximoiljuikaj ipan ni tlamantli, ijkuilijtok para Abrahán kinpixki omej ikoneuaj, se ika nopa siuatl katli eliyaya tlatekipanojketl uan seyok ika nopa siuatl katli amo eliyaya tlatekipanojketl.*
23 Ikone nopa tlatekipanojketl tlakatki kej nochi maseualmej, pero ikone katli amo eliyaya tlatekipanojketl tlakatki pampa Dios ipa kitenkajtoya.
24 Nochi tlen panok uelis tikijtosej kiixnextia tlen teipa panoskia, pampa nopa siuamej kiixnextiaj ome tlajtolsenkauali. Se mochijki ipan tepetl Sinaí, kejuak kintlakatiltia tlatekipanouanij uan eli kej Agar.
25 Agar kiixnextia nopa tepetl Sinaí, tlen eltok ipan tlali Arabia, uan kiijtosneki altepetl Jerusalén tlen nama eltok, pampa ya uan ikoneuaj kejuak elij tlatekipanouanij.
26 Pero nopa Jerusalén tlen eltok uejkapa, amo eli se tlatekipanojketl uan yaya eli tonana.
27 Pampa ijkuilijtok: “Xiyolpaki, siuatl katli amo ueli tikinpia mokoneuaj. Xikuatsajtsi ika pakilistli, siuatl katli amo kema tijmachilijtok nopa tlakuajkualojkayotl kema tlakati se pilkonetsi. Pampa ikoneuaj nopa siuatl katli kitlauelkajtokej elij más miakej que ikoneuaj nopa siuatl katli kipia iueue”.
28 Kena noikniuaj, inmojuantij intlakatkej pampa Dios kiampa kitenkajki, sanse kej panok ika Isaac.
29 Pero sanse kej ipan nopa tonali nopa konetl katli tlakatki kej nochi maseualmej pejki kitlaijiyouiltia nopa konetl katli tlakatki ika ichikaualis Dios,* nojkia kiampa pano ipan ni tonali.
30 Pero, ¿tlake kiijtoua iTlajkuilol Dios? “Xijkuapeua* nopa tlatekipanojketl iuaya ikone. Tlen kiaxkatisej ikone nopa siuatl katli amo eli tlatekipanojketl amo kixelos ika ikone nopa tlatekipanojketl”.
31 Yeka noikniuaj, amo tielij ikoneuaj se siuatl katli eli tlatekipanojketl, tielij ikoneuaj se siuatl katli amo eli tlatekipanojketl.
Tlen ijkuilijtok tlatsintla
^ Kanajya kiijtouaj “toTeotsij”.
^ O “espíritu”.
^ Se tlajtoli ika hebreo o arameo tlen konemej kitekiuiyayaj para kinnojnotsasej inintatauaj ika tlaiknelili uan tlatlepanitakayotl.
^ O “tlapouali”.
^ Kanajya kiijtouaj “nimokokolismakak”.
^ Kanajya kiijtouaj “nikokoya”.
^ O “amo innechchajchakej (innechchijchakej)”.
^ O “katli majkajtok”.
^ O “espíritu santo”.
^ Kanajya kiijtouaj “Xijkixti”.
