Nopa carta tlen kintitlanilijkej hebreos 7:1-28
7 Pampa ni Melquisedec, tlanauatijketl tlen Salem uan sacerdote tlen Dios* katli Más Ueyi, yajki kinamikito Abrahán, katli tlakuepiliyaya kema kinmiktito nopa tlanauatianij; ya kiteochijki
2 uan Abrahán kimakak se diezmo tlen nochi tlen kiuikayaya. Achtoui, itoka motlajtolkuepa kej “tlanauatijketl tlen kichiua tlen xitlauak”; ya nojkia eli tlanauatijketl tlen Salem, tlen kiijtosneki “tlanauatijketl tlen tlaseuilistli”.
3 Amo ijkuilijtok ajkia elki itata yon inana, yon ajkia inijuantij elkej itatauaj katli uejkajkia itstoyaj, yon kema tlakatki yon kema mijki, pero pampa kichijkej ma eli achi sanse kej iKone Dios, nojua eli sacerdote para nochipa.
4 Xikitakaj kenijkatsa tlauel ipati eliyaya nopa tlakatl, katli totata Abrahán katli uejkajkia itstoya kimakak se diezmo tlen más kuali tlen moaxkatijtoya.
5 ITlanauatil Moisés kiijtoua para ikoneuaj Leví katli kintekimakaj kej sacerdotes kipiaj tlanauatili para kintlajtlanisej diezmo ininikniuaj israeleuanij, maske inijuantij nojkia elij iteipaixuiuaj Abrahán.
6 Pero nopa tlakatl Melquisedec, katli amo eliyaya se tlen iteipaixuiuaj Leví, kiselik nopa diezmo tlen Abrahán kimakak uan nojkia kiteochijki Abrahán, katli Dios kitenkauilijtoya kiteochiuaskia.
7 Uan nochi uelis kiijtosej para katli kipia más tlanauatili kiteochiua katli amo tlauel kipia.
8 Nojkia, nopa levitas katli kiseliaj nopa diezmo elij tlakamej katli mikij, pero nopa seyok eli se tlakatl katli iTlajkuilol Dios kiijtoua temachtli yoltok.
9 Uan ueliskia tikijtosej hasta Leví, katli kiselia nopa diezmo, ya tlaxtlajtok nopa diezmo ika Abrahán,
10 pampa Leví ayamo tlakatiyaya tlen itata Abrahán kema Melquisedec yajki kinamikito.
11 Yeka, tlaj nopa sacerdotes katli elij iteipaixuiuaj Leví ueliskiaj kichiuasej maseualmej ayokmo ma kipiakaj tlajtlakoli (pampa ni eli se tlamantli tlen kipia nopa Tlanauatili tlen kinmakakej israeleuanij), ¿kenke monekiskia ma nesi se sacerdote katli kiijtoskiaj eli sacerdote sanse kej Melquisedec uan amo sanse kej Aarón?
12 Pampa tlaj mopatla tlen kichiuayayaj nopa sacerdotes, nojkia moneki mopatlas nopa Tlanauatili.
13 Pampa nopa tlakatl tlen katli moijtoua kichiuaskia ni tlamantli ualajki tlen seyok ueyi familia,* uan amo aka tlen nopa ueyi familia tlatekipanojtok ipan tlaixpamitl.
14 Uan xitlauak tijmatij para toTeko eliyaya se iteipaixui Judá, uan Moisés amo kiijtok itstoskiaj sacerdotes tlen nopa ueyi familia.
15 Uan nojua más kuali nesi kema asi seyok sacerdote katli eli sanse kej Melquisedec,
16 katli amo mochijtok sacerdote pampa tlakatki ipan nopa ueyi familia tlen kiijtoua nopa Tlanauatili, mochijki sacerdote pampa kipia nopa tetikayotl tlen kichiua ma kipia nemilistli tlen amo aka uelis kitsontlamiltis.
17 Pampa ya ni tematiltiaj tlen ya: “Ta tieli sacerdote para nochipa sanse kej elki Melquisedec”.
18 Uajka nopa tlanauatili tlen achtouia eltoya ayokmo kipia ipati pampa amo kipia tetikayotl uan amo tepaleuia.
19 Pampa iTlanauatil Moisés amo aka kipaleuik ayokmo ma kipia tlajtlakoli, pero kema asiko tlen achi más kuali tlen tijchiaj tijselisej, kena techkixtilik, uan ika nopa timonechkauiaj ika Dios.
20 Nojkia, nopa mochijki ika tlen Dios kitenkajki
21 (kena, pampa itstokej tlakamej katli mochijtokej sacerdotes maske Dios amo tlatestigojketstok, pero ni tlakatl mochijtok sacerdote pampa Dios tlatestigojketski uan kiiljuik: “Jehová* kitenkajtok, uan amo kipatlas tlen kiijtok: ‘Ta tieli sacerdote para nochipa’”),
22 yeka Jesús mochijtok kej se tlamantli tlen kinextia para temachtli mochiuas se tlajtolsenkauali* tlen más kuali.
23 Nojkia, sacerdotes amo nochipa kipiayayaj nopa tekitl pampa mikiyayaj, yeka monejki itstosej miakej sacerdotes para motekipatlatiasej.
24 Pero pampa Jesús nochipa itstok, amo aka kitekipatlas kej sacerdote.
25 Yeka nojkia kuali kimati kenijkatsa senkistok kinmakixtis* katli monechkauiaj kampa Dios ika ya, pampa nochipa itstos para kintenpaleuis.*
26 Pampa moneki tijpiasej se sumo sacerdote kej ya: katli amo tetlauelkaua, katli amo kimati kichiuas tlen amo kuali, katli eli tlapajpaktik, katli moiyokatlalijtok tlen nochi tlajtlakolchiuanij uan katli kiuejkapantlalijtokej más uejkapa que iluikaktli.
27 Ya amo eli sanse kej nopa sekinok sumos sacerdotes, pampa amo moneki mojmostla temaktilis tlapialmej, achtoui por ya itlajtlakoljuaj uan teipa por maseualmej inintlajtlakoljuaj, pampa ya kichijki nopa san sempatsi uan para nochipa kema motemaktilik.
28 Pampa nopa Tlanauatili kintekitlalia kej sumos sacerdotes tlakamej katli tlajtlakolejkej, pero kema Dios ya techmakatoya nopa Tlanauatili, tlatestigojketski kitekitlaliskia kej sumo sacerdote se iKone, katli mochijtok senkistok kuali* para nochipa.
Tlen ijkuilijtok tlatsintla
^ Kanajya kiijtouaj “toTeotsij”.
^ O “tribu”.
^ O “se kamanali”.
^ O “kinmanauis”.
^ Kanajya kiijtouaj “kintemanauis”.
^ O “asitok”.
