Hechos (Tlen apóstoles kichijkej) 18:1-28
18 Teipa, Pablo kistejki Atenas uan asito Corinto.
2 Nopaya kipantik se judío, katli motokaxtiyaya Áquila, uan euayaya ipan tlali Ponto. Áquila uan isiua Priscila, namanok asitoyaj Italia pampa Claudio tlanauatijtoya nochi judíos ma kisakaj tlen Roma. Uajka Pablo yajki kampa itstoyaj,
3 uan pampa ueliyayaj kichiuaj sanse tekitl, mokajki ininchaj uan tekitik ininuaya. Inijuantij kichijchiuayayaj yoyonkali.
4 Nochi sábados, Pablo tlamachtiyaya kampa tlaueyichiuaj judíos uan kinpaleuiyaya judíos uan griegos ma tlaneltokakaj.
5 Kema Silas uan Timoteo temokej Macedonia, Pablo mosentlalik kimoyauas itlajtol Dios. Kinmatiltiyaya judíos uan kinnextiliyaya Jesús eli nopa Cristo.
6 Pero inijuantij kisentokilijkej kinajnankiliaj uan kitlaijiljuiaj, yeka Pablo kitsejtselok iyoyo uan kiniljuik: “Inmojuantij inmotlajtlakol tlaj inmikisej pampa na ayokmo notlajtlakol. Desde nama nias nikinmatiltiti katli amo elij judíos”.
7 Uajka kistejki* uan kalajki ichaj Ticio Justo, se tlakatl katli kiueyichiuayaya Dios* uan ichaj motskitoya ika nopa kali kampa tlaueyichiuaj judíos.
8 Pero Crispo, katli tlayakanayaya kampa tlaueyichiuaj judíos, uan nochi katli itstoyaj ichaj tlaneltokakej ipan toTeko. Uan miakej katli euayayaj Corinto kikajkej nopa kuali tlamachtili uan pejkej tlaneltokaj uan moatsonpoliuiltijkej.
9 Nojkia, ika tlayoua toTeko kiiljuik Pablo ipan se tlanextilili kej se temiktli: “Amo ximajmaui. Nojua xitekamanaljuijto uan amo ximotenkaxani,
10 pampa na niitstok mouaya uan amo aka mitschiuilis tlen amo kuali. Ipan ni altepetl itstokej miakej katli kinekij nechneltokasej”.
11 Uajka nopaya mokajki se xiuitl uan tlajko uan kinmachtiyaya itlajtol Dios.
12 Kema Galión eliyaya gobernador tlen tlali Acaya, judíos mosentikapaleuijkej para kiitskisej Pablo uan kiuikakej kampa tekichiuanij.
13 Kiijtouayayaj: “Ni tlakatl kinmachtia maseualmej para ma kiueyichiuakaj Dios, pero amo tlamachtia kej totlanauatil kiijtoua”.
14 Kema Pablo peuaskia kamanaltis, Galión kiniljuik judíos: “Tlaj ni tlakatl kichijtok tlen amo xitlauak uan tlen tlauel amo kuali, monekiskia kuali niinmechtlakakilis.
15 Pero tlaj inmokualanijtokej ika se keski tlajtoli,* ika tokajyotl uan ika nopa tlanauatili tlen inkipiaj, inmojuantij xijsenkauakaj. Na amo nijneki nielis juez tlen ni kuesoli”.
16 Uan kinkixtik kampa tetlajtolsenkauayayaj.
17 Uajka nochi inijuantij kiitskijkej Sóstenes, katli tlayakanayaya kampa tlaueyichiuaj judíos, uan pejkej kimakiliaj kampa tetlajtolsenkauayayaj. Pero Galión yon kentsi amo kinejki mokalakis ipan nopa kuesoli.
18 Pablo nojua mokajki se keski tonali. Teipa kinnauatijtejki* toikniuaj uan tlejkok ipan barco ininuaya Priscila uan Áquila para asitij Siria. Ipan Cencreas moxinki para kinextis kitenkauilijtoya Dios se tlamantli.
19 Kema asitoj Éfeso, kinkajtejki nopaya. Pero ya kalajki kampa tlaueyichiuaj judíos uan pejki kinpaleuia ma kikuamachilikaj iTlajkuilol Dios.
20 Maske kiiljuijkej nojua ma mokaua, ya amo kinejki,
21 kinnauatijtejki uan kiniljuik: “Tlaj Jehová* kinekis, sampa niinmechitas”. Uan ipan Éfeso tlejkok ipan barco
22 uan temok Cesarea. Uajka tlejkok* uan kintlajpalok toikniuaj tlen tlanechikoli. Teipa temok Antioquía.
23 Kema mokajki se keski tonali nopaya, kistejki uan panotiajki ipan sejse altepetl tlen eltoya ipan tlali Galacia uan Frigia uan kinyolchikajtiajki nochi Jesús itokilijkauaj.
24 Uajka ipan Éfeso asito se judío katli motokaxtiyaya Apolos, katli euayaya Alejandría. Ya ueliyaya kuali kamanalti uan kuali kiixmatiyaya iTlajkuilol Dios.
25 Kuali kimachtijtoyaj iojui Jehová* uan kipixtoya ichikaualis Dios,* yeka kamanaltiyaya ika nochi iyolo uan xitlauak tlamachtiyaya tlen Jesús, pero san kimatiyaya nopa atsonpoliuilistli tlen Juan tematiltijtoya.
26 Ya amo majmauiyaya kinkamanaljuis katli itstoyaj kampa tlaueyichiuaj judíos, uan kema Priscila uan Áquila kikajkej, kiuikakej iyoka uan xitlauak kiixtomilijkej iojui Dios.
27 Nojkia, pampa kinekiyaya yas tlali Acaya, toikniuaj kintlajkuiljuilijkej Jesús itokilijkauaj para kiniljuisej kuali ma kiselikaj. Kema asito nopaya, tlauel kinpaleuik katli mochijtoyaj tlaneltokanij pampa Dios kinextijtoya ueyi iyolo ika inijuantij,*
28 pampa ininixpa miakej, xitlauak kinextik judíos mokuapolojtoyaj, uan kinnextiliyaya ika iTlajkuilol Dios, Jesús eli nopa Cristo.
Tlen ijkuilijtok tlatsintla
^ Kiijtosneki kistejki kampa tlaueyichiuaj judíos.
^ Kanajya kiijtouaj “toTeotsij”.
^ Kanajya kiijtouaj “kamanali”.
^ Kanajya kiijtouaj “kinmakajki”.
^ Uelis tlejkok para Jerusalén.
^ O “espíritu santo”.
^ O “kinmakatoya tlateochiualistli tlen amo kinamiki kiselisej”.
