Hechos (Tlen apóstoles kichijkej) 5:1-42
-
Ananías uan Safira (1-11)
-
Apóstoles kichiuaj miak milagros (12-16)
-
Kintsakuaj uan kinkixtiaj kampa tsaktoyaj (17-21)
-
Sampa kinuikaj ininixpa Tekichiuanij katli kipiaj más Tlanauatili (21-32)
-
Moneki tijneltokasej Dios uan amo maseualmej (29)
-
-
Tlen Gamaliel kiijtoua (33-40)
-
Tlajtolmoyauaj kajkalpa (41, 42)
5 Itstoya se tlakatl katli motokaxtiyaya Ananías uan isiua motokaxtiyaya Safira. Inijuantij kinamakakej se tlali.
2 Pero Ananías mokauilik se kentsi tomij para ya uan amo aka kiiljuik, san isiua kimatiltik. Uan nopa seyok kentsi tomij kinuikilik apóstoles.
3 Yeka Pedro kiiljuik: “Ananías, ¿kenke tijkajki Satanás ma kichiua ximosemaka xijkajkayaua ichikaualis Dios,* uan kiampa ichtakatsi timokauilik se achi tomij tlen tijselik kema tijnamakak motlal?
4 Nopa tlali eliyaya moaxka kema ayamo tijnamakayaya. Uan kema tijnamakak ueltoskia tijchiuas tlen tijnekiyaya ika nopa tomij, ¿axke? ¿Kenke ipan moyolo timoiljuik tijchiuas nopa tlamantli? Amo tikinkajkayajtok maseualmej; tijkajkayajtok Dios”.*
5 Kema Ananías kikajki tlen Pedro kiiljuik, nimantsi uetski tlalchi uan mijki. Uan nochi katli kimatkej tlen panotoya, momajmatijkej.
6 Uajka nopa telpokatlakamej moketskej, kipijkej ika yoyomitl, kikixtijkej uan kitlalpachotoj.*
7 Kemaya panotoya se eyi hora kalakito isiua, katli amo kimatiyaya tlake panotoya.
8 Pedro kiiljuik: “Xinechiljui, ¿inkinamakakej nopa tlali ika ipati kej intechiljuijkej?”. Safira kinankilik: “Kena, kej nopa tijnamakakej”.
9 Uajka Pedro kiiljuik: “¿Kenke ta uan moueue inmoiljuijkej inkikajkayauasej ichikaualis Jehová?* ¡Xikita! Katli kitlalpachotoj moueue itstokej puertajteno, uan ta nojkia mitskixtisej”.
10 Nimantsi nopa siuatl uetski iixpa Pedro uan mijki. Kema nopa telpokamej kalakitoj, kipantijkej miktoya, uajka kikixtijkej uan kitlalpachojkej nechka kampa kitlalpachojtoyaj iueue.
11 Yeka nochi tlaneltokanij tlen tlanechikoli uan nochi katli kimatkej tlen panotoya, tlauel momajmatijkej.
12 Uan apóstoles kichiuayayaj miak milagros* uan uejueyij tlamantli ininixpa maseualmej, uan mosentiliyayaj tlamapa kampa kiiljuiyayaj Tlaketsalmej tlen Salomón.
13 Maske nopa sekinok maseualmej amo kinekiyayaj mosentilisej ininuaya, nochi kuali kamanaltiyayaj tlen inijuantij.
14 Uan nojua momiakilijtiajkej katli tlaneltokayayaj ipan toTeko, tlauel miakej tlakamej uan siuamej.
15 Maseualmej hasta kinkixtiyayaj katli mokokouayayaj* ipan ueyi ojtli uan nopaya kintlaliyayaj ipan camas pilsiltsitsij* uan ipan tlapechtli, kiampa kema Pedro panoskia, kinasiskia maske san iekauil* uan mochikauaskiaj.
16 Nojkia yauiyayaj miakej maseualmej tlen nochi altepemej tlen mokauayaya nechka Jerusalén, kinuikayayaj katli mokokouayayaj uan katli tlaijiyouiyayaj pampa kinpixtoyaj amo kuali ajakamej,* uan nochi mochikauayayaj.
17 Pero nopa sumo sacerdote uan nochi katli itstoyaj iuaya, katli kineltokayayaj inintlamachtil saduceos,* moketstejkej ika kualantli.
18 Uajka kinitskijkej apóstoles uan kintsajkej ipan nopa tlatsaktli tlen nopa altepetl.
19 Pero ika tlayoua, iángel Jehová* kaltlapok kampa tsaktoyaj, kinkixtik uan kiniljuik:
20 “Xiakaj ipan teokali uan nojua xikinkamanaljuikaj maseualmej nochi tlen moneki kimatisej tlen ni nemilistli”.*
21 Kema kikajkej nopa, yajkej ipan teokali ika ijnalok uan pejkej tlamachtiaj.
Uajka nopa sumo sacerdote uan katli itstoyaj iuaya asitoj uan kinsentilijkej Tekichiuanij katli kipiaj más Tlanauatili* uan nochi katli kinyakanayayaj israeleuanij. Uan tlatitlankej ma kinualikakaj apóstoles katli kintsaktoyaj.
22 Pero kema nopa tlamokuitlauianij asitoj nopaya, amo kinpantijkej kampa kintsaktoyaj. Uajka tlakuepilijkej uan teiljuitoj.
23 Inijuantij kiijtojkej: “Tijpantijkej nopa tlatsaktli kuali tsaktok, uan katli tlamokuitlauiyayaj ijkatoyaj puertajteno, pero kema kaltlapojkej amo aka itstoya”.
24 Kema inintlayakanka tlamokuitlauianij tlen teokali uan sacerdotes katli kipiayayaj tlanauatili kikajkej nopa, amo kimatkej tlake kichiuasej pampa amo kimatiyayaj tlake panoskia teipa.
25 Pero se akajya asito uan kiniljuik: “¡Xikitakaj! Nopa tlakamej katli inkintsaktoyaj nama itstokej ipan teokali uan kinmachtiaj maseualmej”.
26 Uajka inintlayakanka tlamokuitlauianij uan katli kipaleuiyayaj, yajkej uan kinuikakej apóstoles, pero amo kinmakilijkej, pampa kinmakasiyayaj maseualmej ma kintepachokaj.*
27 Uan kinuikakej ininixpa Tekichiuanij katli kipiaj más Tlanauatili.* Uajka sumo sacerdote kintlatsintokik.
28 Kiniljuik: “Xitlauak tiinmechnauatijkej ayokmo xitlamachtikaj ipan itoka nopa tlakatl. Pero inkimoyajtokej inmotlamachtil ipan nochi Jerusalén uan inmosentlalijtokej intechtlajtlakoltisej pampa mijki nopa tlakatl”.
29 Pedro uan sekinok apóstoles tlanankilijkej: “Moneki tijneltokasej Dios kej totlanauatijka uan amo maseualmej.
30 IninDios totatauaj katli uejkajkia itstoyaj kiyolkuik* Jesús, katli inmojuantij inkimiktijkej kema inkikuapilojkej ipan se kuauitl.
31 Dios kiuejkapantlalik uan kitlalik ika imanejmak kej Tlayakanketl uan Temakixtijketl,* kiampa nochi katli euaj Israel uelis moyolkuepasej uan kintlapojpoljuisej inintlajtlakoljuaj.
32 Tojuantij tikitstokej nochi ni tlamantli uan nojkia ichikaualis Dios, tlen Dios kinmakatok katli kineltokaj kej tlanauatijketl”.
33 Kema kikajkej nopa, tlauel kualankej uan kinejkej kinmiktisej.
34 Pero se fariseo* katli motokaxtiyaya Gamaliel, katli tlamachtiyaya iTlanauatil Moisés uan nochi kitlepanitayayaj, moketski kampa mosentilijtoyaj Tekichiuanij katli kipiaj más Tlanauatili* uan tlanauatik ma kinkixtikaj se tlalochtli* nopa tlakamej.
35 Uajka kiniljuik katli nopaya itstoyaj: “Tlakamej katli ineuaj Israel, kuali ximoiljuikaj tlen inkinekij inkinchiuilisej ni tlakamej.
36 Xikilnamikikaj, amo panotok miak tonali ualajki Teudas uan kiijtouayaya kipiayaya tlanauatili, uan se 400 tlakamej pejkej kitokiliaj. Pero kema kimiktijkej, nochi katli kitokiliyayaj mosemankej* uan tlanki nochi iteki.
37 Teipa, ipan nopa tonali kema kichijkej censo, ualajki Judas katli euayaya Galilea, uan miakej kitokilijkej. Ni tlakatl nojkia mijki, uan nochi katli kitokiliyayaj mosemankej.
38 Uajka ika tlen panotok, niinmechiljuia xikinkauakaj ni tlakamej uan ayokmo xikinkuatotonikaj.* Pampa tlaj ni tlamachtili o ni tekitl ininaxka maseualmej, uajka tlamis.
39 Pero tlaj iaxka Dios, amo uelis inkichiuasej ma tlami. Uan hasta uelis inmoteuisej iuaya Dios”.
40 Uajka kichijkej tlen kiniljuijtoya. Kinnotskej apóstoles, kinmakilijkej, kinnauatijkej ayokmo ma tlamachtikaj ipan itoka Jesús uan kinkajkej ma yakaj.
41 Apóstoles kiskej ininixpa Tekichiuanij katli kipiaj más Tlanauatili,* uan yolpaktoyaj pampa Dios kikajtoya ma tlaijiyouikaj pampa kamanaltiyayaj tlen itoka Jesús.
42 Uan mojmostla ipan teokali uan kajkalpa amo kikaxaniliyayaj* tlamachtisej uan tematiltisej nopa kuali tlamachtili para Jesús eli nopa Cristo.
Tlen ijkuilijtok tlatsintla
^ O “espíritu santo”.
^ Kanajya kiijtouaj “toTeotsij”.
^ Kanajya kiijtouaj “kitokatoj”.
^ Ika griego “tlaneskayotl”.
^ Kanajya kiijtouaj “kokoyaj”.
^ Kanajya kiijtouaj “tsikitetsitsij”.
^ Kanajya kiijtouaj “iakauilo”.
^ O “demonios”.
^ Kiijtosneki nopa nemilistli tlen amo kema tlamis.
^ Kanajya kiijtouaj “ma kinmotlakaj ika tetl”.
^ Ika griego “kitlananki”.
^ O “Temanauijketl”.
^ Kanajya kiijtouaj “tlatoktsi”.
^ O “moxelojkej”.
^ Kanajya kiijtouaj “xikinkuesolmakakaj”.
^ Kanajya kiijtouaj “amo kikauayayaj”.
