Tlen kiijkuilok Juan 3:1-36
3 Itstoya se tlakatl katli eliyaya fariseo* uan motokaxtiyaya Nicodemo, se katli kinyakanayaya judíos.
2 Ya kiitato Jesús ika tlayoua uan kiiljuik: “Tlamachtijketl,* tijmatij tieli se tlamachtijketl katli Dios* kititlantok, pampa yon se tlakatl ueli kichiua nopa milagros* tlen ta tijchiua tlaj Dios amo itstok iuaya”.
3 Jesús kinankilik: “Temachtli nimitsiljuia, tlaj se akajya amo sampa tlakati,* amo uelis kiitas iTlanauatijkayo Dios”.
4 Nicodemo kiiljuik: “¿Kenijkatsa uelis sampa tlakatis se akajya kema ya ueuentsi? Amo uelis kalakis iijtiko inana uan tlakatis ika ompa, ¿axke?”.
5 Jesús kinankilik: “Temachtli nimitsiljuia, tlaj se akajya amo tlakati ika atl uan ika ichikaualis Dios,* amo uelis kalakis ipan iTlanauatijkayo Dios.
6 Katli tlakajtok tlen itatauaj eli ininkone maseualmej, uan katli tlakajtok ika ichikaualis Dios eli ikone Dios.
7 Amo ximosentlachili pampa nimitsiljuik ‘Inmojuantij moneki sampa intlakatisej’.
8 Ajakatl tlailpitsa kampa kineki, uan maske tijkaki, amo tijmati kanke uala yon kanke yaui. Kiampa pano ika nochi katli tlakajtokej ika ichikaualis Dios”.
9 Uajka, Nicodemo kitlatsintokik: “¿Kenijkatsa uelis panos ni tlamantli?”.
10 Jesús kinankilik: “¿Ta titlamachtijketl ipan Israel uan amo tijmati ni tlamantli?
11 Temachtli nimitsiljuia, tikijtouaj tlen tijmatij uan titematiltiaj tlen tikitstokej, pero inmojuantij amo inkiseliaj tlen titematiltiaj.
12 Tlaj niinmechiljuijtok tlamantli tlen onka ipan Tlaltipaktli uan amo inkineltokaj, ¿kenijkatsa inkineltokasej tlaj niinmechiljuis tlamantli tlen onka ipan iluikak?
13 Nojkia, amo aka tlejkotok iluikak, san katli temotok tlen iluikak, katli eli iKone se Maseuali.*
14 Uan sanse kej Moisés kitlananki nopa kouatl* ipan uaktok tlali, nojkia kiampa moneki kitlananasej katli eli iKone se Maseuali,
15 kiampa nochi katli tlaneltokasej ipan ya, kipiasej nemilistli tlen amo kema tlamis.*
16 ”Pampa Dios nelia tlauel kiniknelik katli itstokej ipan Tlaltipaktli, yeka temaktilik iKone iyojtsi uan kiampa nochi katli tlaneltokasej ipan ya amo kintsontlamiltisej, uan kipiasej nemilistli tlen amo kema tlamis.*
17 Pampa Dios amo kititlanki iKone ipan Tlaltipaktli para kintlajtolsenkauas* katli itstokej ipan Tlaltipaktli, kititlanki para nochi maseualmej ma momakixtikaj ika ya.
18 Katli tlaneltoka ipan ya, amo kitlajtolsenkauasej.* Uan katli amo tlaneltoka, ya kitlajtolsenkajtokej pampa amo tlaneltokatok ipan itoka iKone Dios, katli iyojtsi.
19 Ika ni kintlajtolsenkauasej: nopa tlauili ualajki ipan Tlaltipaktli, uan maseualmej amo kiiknelijkej tlauili, kiiknelijkej tsintlayouilotl, pampa kichiuayayaj tlen amo kuali.
20 Pampa katli kichiua tlen amo kuali kikualankaita tlauili, uan amo yaui kampa tlauili, kiampa amo nesis tlen kichiua.
21 Pero katli kichiua tlen melauak yaui kampa tlauili, kiampa ika tlen kichiua kuali nesis para kichiua tlen Dios kineki”.
22 Teipa, Jesús uan itokilijkauaj yajkej ipan pilaltepetsitsij tlen Judea, uan nopaya mokajki ininuaya se keski tonali uan teatsonpoliuiltiyaya.
23 Juan nojkia teatsonpoliuiltiyaya ipan Enón, nechka Salim, pampa nopaya onkayaya miak atl, uan maseualmej yauiyayaj uan moatsonpoliuiltiyayaj;
24 pampa Juan ayamo kitsajtoyaj.
25 Uajka itokilijkauaj Juan mokamaijixnamijkej iuaya se judío tlen kenijkatsa se akajya motlapajpakchiua iixpa Dios.
26 Teipa yajkej uan kiiljuijkej Juan: “Tlamachtijketl,* xikita, nopa tlakatl katli itstoya mouaya ipan ne seyok nali ueyatl Jordán, katli titematiltik tlen ya, teatsonpoliuiltia uan nochi yauij kampa ya”.
27 Juan tlanankilik: “Amo aka kiselia se tlenijki tlaj amo kimakatokej tlen iluikak.
28 Inmojuantij inkikajkej kema nikijtok ‘Na amo nieli Cristo, na san nechtitlankej ma nitlayakana’.
29 Nopa ichpokatl elis isiua nopa telpokatl katli mosiuajtis iuaya. Pero kema iuampox* katli mosiuajtis itstok inechka uan kikaki, tlauel yolpaki kema kikaki kamanalti. Yeka nama tlauel niyolpaki.
30 Iteki moneki momiakilijtias pero noteki moneki kaxantias”.*
31 Katli uala tlen uejkapa, eli más ueyi que nochi sekinok. Katli uala tlen Tlaltipaktli eua ipan Tlaltipaktli uan kamanalti tlen nikaj onka. Katli uala tlen iluikak, eli más ueyi que nochi sekinok.
32 Uan tematiltia tlen kiitstok uan kikaktok, pero amo aka kiselia tlen tematiltia.
33 Katli kineltoka tlen yaya tematiltia, kipannextia para Dios kiijtoua tlen melauak.
34 Pampa katli Dios kititlanki, tepouilia tlen Dios kiijtoua, pampa Dios temaka ichikaualis ika pakilistli.*
35 ToTata Dios kiiknelia iKone uan kimaktilijtok imako nochi tlamantli.
36 Katli tlaneltoka ipan iKone Dios, kipia nemilistli tlen amo kema tlamis,* pero katli amo kineltoka iKone amo kipias nemilistli uan ikualankayo Dios mokaua ipan ya.
Tlen ijkuilijtok tlatsintla
^ Ika griego “Rabí”.
^ Kanajya kiijtouaj “toTeotsij”.
^ Ika griego “tlaneskayotl”.
^ O uelis “amo tlakati tlen uejkapa”.
^ O “espíritu santo”.
^ Xikita katli eli iKone se Maseuali.
^ Kanajya kiijtouaj “okuili”.
^ O “itstosej para nochipa”.
^ O “itstosej para nochipa”.
^ O “kintlatsakuiltis”.
^ O “kitlatsakuiltisej”.
^ Ika griego “Rabí”.
^ O “iamigo”.
^ Kanajya kiijtouaj “tlantias”.
^ O “uan amo kitlasojmati”, “uan amo eli itskuimitl”.
^ O “itstos para nochipa”.
