Tlen kiijkuilok Juan 9:1-41
9 Kema panotiauiyaya, kiitak se tlakatl katli amo tlachiayaya pampa kiampa tlakajtoya.
2 Uan itokilijkauaj kitlatsintokijkej: “Tlamachtijketl,* ¿ajkia tlajtlakolchijki uan yeka ni tlakatl kiampa tlakatki? ¿Ya o itatauaj?”.
3 Jesús kinnankilik: “Ya amo tlajtlakolchijki yon itatauaj, ni panok para monextis ipan ni tlakatl tlen Dios* ueli kichiua.
4 Moneki tijchiuasej iteki katli nechualtitlanki kema nojua tlatlanestok. Nechka tlatlayouas uan amo aka uelis tekitis.
5 Kema nojua niitstos ipan Tlaltipaktli, nielis kej se tlauili tlen kintlauilia maseualmej”.
6 Kema tlanki kiijtoua nopa, chajchak* tlalchi uan ika ichajchak kichijki sokitl. Teipa kitlalilik ipan iixteyol nopa tlakatl
7 uan kiiljuik: “Xia ximoixteyolpajpakati ipan akomoli tlen Siloam” (tlen kiijtosneki “tlen kititlantokej”). Uajka nopa tlakatl yajki, moixteyolpajpakato uan kema tlakuepilik, ya ueliyaya tlachia.
8 Uajka ikalnechkauaj uan katli nochipa kiitayayaj motlaejeuiliyaya* pejkej kiijtouaj: “Ya eli nopa tlakatl katli moseuiyaya uan motlaejeuiliyaya, ¿axke?”.
9 Sekij kiijtouayayaj: “Kena, ya eli”. Sekinok kiijtouayayaj: “Amo ya, pero sanse nesi”. Uan nopa tlakatl kiijtouayaya: “Kena, na nieli”.
10 Yeka kitlatsintokijkej: “¿Kenijkatsa uelki titlachia?”.
11 Ya kinnankilik: “Nopa tlakatl katli motokaxtia Jesús kiatilik sokitl, nechtlalilik ipan noixteyol uan nechiljuik: ‘Xia Siloam uan ximoixteyolpajpakati’. Uan na niajki, nimoixteyolpajpajki uan uelki nitlachia”.
12 Uajka kitlatsintokijkej: “¿Kanke itstok nopa tlakatl?”. Ya tlanankilik: “Amo nijmati”.
13 Inijuantij kiuikakej nopa tlakatl kampa fariseos.*
14 Eliyaya sábado* kema Jesús kichijki nopa sokitl uan kichijki ma tlachia.
15 Uajka fariseos nojkia pejkej kitlatsintokiaj kenijkatsa ueltoya tlachia. Ya kiniljuik: “Nechtlalilik sokitl ipan noixteyol, nimoixteyolpajpajki uan nama ueli nitlachia”.
16 Uan se keskij fariseos pejkej kiijtouaj: “Ni tlakatl amo kititlantok Dios pampa amo kitlepanita tonali sábado”. Sekinok kiijtouayayaj: “¿Kenijkatsa se tlajtlakolchijketl ueli kichiua milagros* kej nopa?”. Sekij kiijtouayayaj se tlamantli uan sekinok seyok.
17 Uan sampa kiiljuijkej katli amo tlachiayaya: “¿Tlake timoiljuia tlen ne tlakatl katli kichijki xitlachia?”. Ya kinnankilik: “Eli se teokamanalojketl”.*
18 Pero nopa judíos amo kineltokakej tlaj nopa tlakatl achtouia amo ueliyaya tlachia uan nama kena, hasta kema kinnotskej itatauaj.
19 Uan kintlatsintokijkej: “¿Ya ni inmokone katli inkiijtouaj amo ueliyaya tlachia pampa kiampa tlakatki? Uajka, ¿kenke nama ueli tlachia?”.
20 Uan itatauaj kinnankilijkej: “Tijmatij ya ni eli tokone uan kema tlakatki amo tlachiayaya.
21 Pero amo tijmatij kenke nama ueli tlachia, yon tijmatij ajkia kichijki ma tlachia. Yaya xijtlatsintokikaj pampa ya ueyi uan moneki iselti tlanankilis”.
22 Itatauaj kiampa tlanankilijkej pampa kinmakasiyayaj judíos; pampa judíos ya kiijtojtoyaj kinkixtiskiaj kampa tlaueyichiuaj nochi katli kiijtoskiaj Jesús eli Cristo.
23 Yeka itatauaj kiijtojkej: “Ya ueyi, yaya xijtlatsintokikaj”.
24 Uajka, sampa kinotskej katli achtouia amo tlachiayaya uan kiiljuijkej: “Xijueyichiua Dios. Tijmatij nopa tlakatl eli se tlajtlakolchijketl”.
25 Ya kinnankilik: “Na amo nijmati tlaj eli se tlajtlakolchijketl. Na san nijmati achtouia amo ueliyaya nitlachia uan nama kena”.
26 Uajka kitlatsintokijkej: “¿Tlake mitschiuilik? ¿Kenijkatsa kichijki xitlachia?”.
27 Nopa tlakatl kinnankilik: “Ya niinmechiljuik, pero inmojuantij amo innechtlakakilijkej. ¿Kenke sampa inkinekij ma niinmechiljui? ¿Nojkia inkinekij inmochiuasej itokilijkauaj?”.
28 Kema kikajkej nopa, kiiljuijkej ika kualantli: “Ta tiitokilijka nopa tlakatl, pero tojuantij tiitokilijkauaj Moisés.
29 Tijmatij Dios kinojnotski Moisés, pero ne tlakatl amo tijmatij kanke kiski”.
30 Nopa tlakatl kinnankilik: “Amo ueli nijneltoka, yaya kichijki ma nitlachia uan inmojuantij amo inkimatij kanke kiski.
31 Tijmatij Dios amo kintlakakilia katli tlajtlakolchiuaj, pero katli kimakasij Dios uan kichiuaj tlen ya kineki, kena kintlakakilia.
32 Amo kema tijkaktoyaj tlaj se akajya kichijtoya ma tlachia se katli amo tlachiayaya pampa kiampa tlakatki.
33 Tlaj Dios amo kiualtitlantoskia ni tlakatl, amo tleno ueliskia kichiuas”.
34 Uajka, kiiljuijkej: “Ta katli titlakatki ika miak tlajtlakoli, ¿tijneki titechmachtis tojuantij?”. Uan kikixtijkej.*
35 Jesús kimatki para kikixtijtoyaj nopa tlakatl, uan kema kipantik, kitlatsintokik: “¿Titlaneltoka ipan katli eli iKone se Maseuali?”.*
36 Ya kinankilik: “Noteko, ¿ajkia eli? Xinechiljui, kiampa uelis nitlaneltokas ipan ya”.
37 Jesús kinankilik: “Ta ya tikitstok, uan namantsi tikamanaltitok iuaya”.
38 Uajka nopa tlakatl kiiljuik: “NoTeko, nitlaneltoka ipan ya”. Uan motlankuaketski iixpa.
39 Uan Jesús kiijtok: “Niualajtok ipan Tlaltipaktli para ma kintlajtolsenkauakaj maseualmej, kiampa katli amo tlachiaj tlachiasej, uan katli tlachiaj, ayokmo tlachiasej”.
40 Nopa fariseos katli nojkia itstoyaj nopaya, kikajkej uan kiiljuijkej: “¿Timoiljuia nojkia amo titlachiaj?”.
41 Jesús kinnankilik: “Tlaj amo intlachiaskiaj, amo inkipiaskiaj tlajtlakoli. Pero inmojuantij inkiijtouaj ‘Tojuantij titlachiaj’, yeka inkipiaj tlajtlakoli”.
Tlen ijkuilijtok tlatsintla
^ Ika griego “Rabí”.
^ Kanajya kiijtouaj “toTeotsij”.
^ Kanajya kiijtouaj “chijchak”.
^ Kanajya kiijtouaj “motlajtlaniyaya tomij”.
^ Ika griego “tlaneskayotl”.
^ O “profeta”.
^ Kanajya kiijtouaj “kikuapejkej”.
^ Xikita katli eli iKone se Maseuali.
