Tlen kiijkuilok Lucas 12:1-59

  • lninlevadura fariseos (1-3)

  • Xijmakasi Dios uan amo maseualmej (4-7)

  • Kema se akajya kiijtoua eli itokilijka Cristo (8-12)

  • Neskayotl tlen nopa tlatominpixketl katli uiuitik (13-21)

  • “Ayokmo ma inmechtekipacho inmonemilis” (22-34)

    • “Inmojuantij katli amo inmiakej” (32)

  • Kuali xitlachixtokaj (35-40)

  • Nopa tlayakankatlatekipanojketl katli temachtli uan katli amo (41-48)

  • Ualajtok para kinxelos maseualmej (49-53)

  • Moneki tijkuamachilisej tlen pano ipan ni tonali (54-56)

  • Kenijkatsa mosenkauas se kualantli (57-59)

12  Uajka, mosentilijtoyaj tlauel miakej maseualmej uan mokuatetsopayayaj. Uan Jesús pejki kiniljuia itokilijkauaj: “Ximomokuitlauikaj tlen ininlevadura* fariseos,* pampa inijuantij kipiaj ome ininxayak. 2  Pampa nochi tlen tlauel kuali kitlatijtokej* teipa nesis, uan tlen eltok ichtakatsi teipa momatis. 3  Yeka, nochi tlen inkiijtouaj kampa tsintlayoua, kakistis kampa onka tlauili; uan tlen ichtakatsi inkiijtouaj kalijtik, tematiltisej desde kalkuitlapa.* 4  Nouampoyouaj,* nojkia niinmechiljuia: amo xikinmakasikaj katli uelis inmechmiktisej pero teipa ayokmo tleno uelis kichiuasej. 5  Na niinmechnextilis ajkia kinamiki inkimakasisej. Xijmakasikaj katli kema ya inmechmiktik, kipia tlanauatili para inmechmajkauas ipan Gehena.* Kena, niinmechiljuia, yaya xijmakasikaj. 6  Kinnamakaj makuiltij piltototsitsij ika ome centavos* tlen amo tlauel ipati, ¿axke? Pero Dios* amo kiilkaua yon se tlen inijuantij. 7  Pero ya nojkia kimati hasta keski inmotsonkal inkipiaj. Amo ximajmauikaj. Inmojuantij más inmopati que miakej piltototsitsij. 8  ”Na niinmechiljuia, tlaj se akajya kiijtoua eli notokilijka ininixpa sekinok, katli eli iKone se Maseuali* nojkia kiijtos eli itokilijka ininixpa iángeles Dios. 9  Pero tlaj se akajya nechuejkamajkaua ininixpa sekinok, nojkia kiuejkamajkauasej ininixpa iángeles Dios. 10  Uan nochi katli kitlaijiljuisej katli eli iKone se Maseuali, Dios kintlapojpoljuis; pero katli kiixpanos ichikaualis Dios* ika tlen kiijtos, ya amo kitlapojpoljuis. 11  Kema inmechuikasej kampa miakej mosentiliaj* o kampa tekichiuanij uan tlanauatianij, amo ximokuesokaj pampa inmoiljuijtosej kenijkatsa inmotenpaleuisej* o tlake inkiijtosej, 12  pampa ichikaualis Dios kichiuas xikilnamikikaj ipan nopa tlalochtli* tlake moneki inkiijtosej”. 13  Uajka, se tlen nopa miakej maseualmej kiiljuik: “Tlamachtijketl, xikiljui noikni nojkia ma nechmaka tlen totata techkauilijtejki”. 14  Ya kinankilik: “Tlakatl, ¿ajkia nechtekitlalik para niinmechtlajtolsenkauas o niinmechtlaxexeljuilis?”. 15  Uajka kiniljuik: “Kuali xitlachixtokaj uan amo xijnekikaj inkipiasej miak tlamantli, pampa maske se akajya kipia miak tlamantli, nochi tlen kipia amo uelis kichiuas ma yolto”. 16  Uajka kinpouilik ni neskayotl: “Ipan itlal se tlakatl katli tlatominpiayaya, tlauel tlaelki. 17  Yeka pejki moiljuia: ‘¿Tlake nijchiuas pampa amo nijpia kanke nikajokuis tlen nijpixkas?’. 18  Uajka kiijtok: ‘Ya ni tlen nijchiuas: nijxoleuas* kampa nikajokui tlen nijpixka uan nijchijchiuas sekinok más uejueyi, uan nopaya nikajokuis nochi tlen nijpixkas uan nochi tlen nijsentilis. 19  Teipa nimoiljuis: “Nikajoktok miak tlamantli tlen kuali tlen uejkauas miak xiuitl; amo nimotekipachos, nitlakuas, nikis* se tlenijki uan niyolpakis” ’. 20  Pero Dios kiiljuik: ‘Tiuiuitik, ni youali timikis, ¿uan ajkia mokauilis nochi tlen tikajojki?’. 21  Kiampa kipano katli kisentilia miak tlamantli tlen pajpatiyo, pero iixpa Dios amo tleno kipia”. 22  Uajka kiniljuik itokilijkauaj: “Yeka niinmechiljuia, ayokmo ma inmechtekipacho inmonemilis, ika tlen inkikuasej; o inmotlakayo, ika tlen inmokentisej. 23  Pampa tonemilis eli más ipati que tlen tijkuasej, uan totlakayo que tlen timokentisej. 24  Kuali xikintlachilikaj kakalomej:* amo tokaj yon pixkaj, amo kipiaj kanke kiajokuisej inintlakualis, pero Dios kintlamaka. ¿Amo más inmopati que ne totomej? 25  ¿Ajkia tlen inmojuantij, tlaj motekipachoua, uelis kichiuas nojua ma uejkaua se kentsi* inemilis? 26  Tlaj amo ueli inkichiuaj yon ni tlamantli tlen amo ueyi, ¿kenke inmechtekipachoua sekinok tlamantli? 27  Kuali xijtlachilikaj kenijkatsa moskaltia xochitl. Amo tekitij chikauak yon tlajtsomaj; pero niinmechiljuia, maske tlanauatijketl Salomón kipixtoya miak tlamantli yejyektsitsij, amo kema moyoyontik kej inijuantij. 28  Uajka, tlaj Dios kinyejyekchiua pilxiuitsitsij tlen ixua kuatitla maske nima pilini uan teipa kitlatiaj, ¡nojua más inmechmakas inmoyoyo tlen inmokentisej, inmojuantij katli kentsi intlaneltokaj! 29  Yeka ayokmo tlauel xijtemojtokaj tlake inkikuasej uan tlake inkiisej, uan ayokmo tlauel ximotekipachokaj. 30  Pampa nochi ni tlamantli tlauel kintekipachoua maseualmej katli amo kitekipanouaj Dios, pero inmoTata kuali kimati inmojuantij moneki inkipiasej nochi ni tlamantli. 31  Yeka, achtoui xijtemokaj iTlanauatijkayo Dios uan teipa inkiselisej nochi ni tlamantli. 32  ”Amo ximajmauikaj, inmojuantij* katli amo inmiakej, pampa inmoTata kineki inmechmakas iTlanauatijkayo. 33  Xijnamakakaj tlen inkipiaj uan xikinpaleuikaj katli amo tleno kipiaj. Ximochijchiuilikaj pilmorraltsitsij tlen uejkauas kampa inkiajokuisej tomij, ni eli nochi tlamantli tlen kuali tlen inkisentilijtokej ipan iluikak uan tlen amo kema tlami, kampa yon se tlachtejketl monechkauia uan kampa amo kisaj pilokuiltsitsij* uan kipalanaltiaj. 34  Pampa kampa eltos tlen inkipatiitaj, nopaya nojkia eltos inmoyolo. 35  ”Ximokualtlalijtokaj uan ximoyoyontijtokaj, uan xijtlatijtokaj* inmotlauil; 36  xielikaj kej tlakamej katli kichiaj ininteko ma tlakuepili tlen nenamiktili,* para nimantsi kikaltlaposej kema ualas uan kaltajtakanis. 37  ¡Yolpakij nopa tlatekipanouanij katli ininteko kinpantiki tlamokuitlauijtokej! Temachtli niinmechiljuia, ya moyoyontis kej se tlatekipanojketl, kiniljuis ma moseuikaj kampa mesa uan kintlamakas. 38  Uan tlaj ualas ika tlajkoyoual* o kema neltlayoua* uan kinpantiki tlachixtokej, ¡inijuantij yolpakisej! 39  Xijmajtokaj ni: tlaj katli iaxka se kali kimatiskia tlake hora ualas nopa tlachtejketl, amo kikauaskia ma kalaki ichaj. 40  Nojkia inmojuantij, nochipa kuali xitlachixtokaj, pampa katli eli iKone se Maseuali* uala ipan se hora kema amo inkichiaj”. 41  Uajka Pedro kitlatsintokik: “NoTeko, ¿tikijtoua ni neskayotl san para tojuantij o para nochi?”. 42  Uan toTeko kiijtok: “¿Ajkia nelia eli nopa tlayakankatlatekipanojketl katli temachtli uan tlalnamiki, katli iteko kitekitlalik ipan ichaj ma kinyakana nopa sekinok itlatekipanojkauaj para ma kintlamaka kema kinamiki? 43  ¡Yolpakis nopa tlatekipanojketl tlaj kema asiki iteko, kipantiki kichijtok nopa! 44  Nelia niinmechiljuia: kitekimakas ma kiyakana* nochi tlen iaxka. 45  Pero tlaj se tonali nopa tlatekipanojketl peua moiljuia ipan iyolo ‘Noteko tlauel uejkaua’ uan peua kinmakilia* nopa sekinok tlatekipanouanij, uan peua tlakua, tlai uan moiuintia, 46  iteko nopa tlatekipanojketl ualas ipan se tonali kema ya amo kichia uan ipan se hora kema ya amo kimati, uan tlauel chikauak kitlatsakuiltis uan kitlalis kampa itstokej katli amo temachmej. 47  Uajka, nopa tlatekipanojketl katli kikuamachilik tlen iteko kinekiyaya pero amo mokualtlalik yon kichijki tlen kinauatik, tlauel kimakilisej. 48  Pero katli amo kikuamachilik uan kichijki tlen amo kuali, amo tlauel kimakilisej. Pampa tlaj se akajya kiselia miak tekitl, moneki kichiuas, uan tlaj se akajya kiyakana miak tlamantli, maseualmej kichiasej nochi kuali ma kichiua. 49  ”Niualajtok nijlemenaltiko se tlitl ipan Tlaltipaktli, ¿uan tlake más nijnekis tlaj ya tlatlatok? 50  Pero moneki nikixnamikis se tlaouijkayotl,* ¡uan nimokuesojtos hasta kema tlamis! 51  ¿Inmoiljuiaj niualajtok para nijchiuas nochi kuali ma mouikakaj ipan Tlaltipaktli? Niinmechiljuia amo. Niualajtok para nikinxelos. 52  Pampa desde nama, ipan se kali kampa itstosej makuiltij, moxelosej: eyij kinkualankaitasej omej uan omej kinkualankaitasej eyij. 53  Se tetaj kiijixnamikis ikone uan ikone kiijixnamikis itata, se tenaj kiijixnamikis iichpoka uan se ichpokatl kiijixnamikis inana, teyexna kiijixnamikis iyex uan se yeyojtli* kiijixnamikis iyexna”. 54  Uajka nojkia kinkamanaljuik nopa miakej maseualmej, uan kiniljuik: “Kema inkiitaj motlalia mixtli kampa onkalaki Tonati, nimantsi inkiijtouaj ‘Uetsiki atl’, uan kiampa pano. 55  Uan kema inkiitaj tlaajaka ika sur, inkiijtouaj ‘Tlauel tlatotonias’, uan kiampa pano. 56  Inkipiaj ome inmoxayak, inkimatij tlake kineki kiijtos tlen nesi ipan Tlaltipaktli uan ipan iluikaktli, ¿uan kenke amo inkikuamachiliaj tlake kiijtosneki tlen pano ipan ni tonali? 57  ¿Kenke amo inkikuamachiliaj tlen moneki inkichiuasej? 58  Ximoiljui ni, kema tia iuaya katli timokualanijtok kampa tekichijketl, xijchiua kampeka tijsenkauas nopa kuesoli kema inyauij ipan ojtli, kiampa amo mitstemaktilis ika tekichijketl, nopa tekichijketl mitstemaktilis ika tetsajketl uan nopa tetsajketl mitstsakuas. 59  Temachtli nimitsiljuia, amo tikisas hasta kema titlamitlaxtlauas nochi tomij”.*

Tlen ijkuilijtok tlatsintla

^ Kanajya kiijtouaj “inintlasonejkayo”.
^ Xikita fariseos.
^ Kanajya kiijtouaj “kiiyantokej”.
^ Kanajya kiijtouaj “kalpani”.
^ O “Noamigos”.
^ Xikita Gehena.
^ Ika griego “ome asarion”. Se asarion kitlaniyaya se akajya kema tekitiyaya 45 minutos.
^ Kanajya kiijtouaj “toTeotsij”.
^ O “espíritu santo”.
^ O uelis “kampa tlaueyichiuaj judíos”.
^ Kanajya kiijtouaj “inmomanauisej”.
^ Kanajya kiijtouaj “tlatoktsi”.
^ Kanajya kiijtouaj “nijsosolos”.
^ Kanajya kiijtouaj “nikijis”.
^ O “cuervos”.
^ O “uelis kipiuilis ome mistitl (o se codo)”.
^ O “nopilborregojuaj”.
^ Ika griego kiampa kiiljuiaj se piltlapialtsi katli nesi kej se pilpapalotsi tlen kikuajkua yoyomitl.
^ Kanajya kiijtouaj “xijtlikuiltijtokaj”.
^ O “boda”, “kampa mosenkajkej”.
^ Uelis nechka las 9 ika tlayoua hasta tlajkoyoual.
^ Uelis nechka tlajkoyoual hasta las 3 kema nojua tlayouatok.
^ O “ma kimokuitlaui”.
^ O “kinteuia”.
^ Ika griego “moneki nechatsonpoliuiltisej”.
^ Kanajya kiijtouaj “teyex”.
^ Ika griego “leptón”. Tlen kitlaniyaya se akajya kema tekitiyaya 5 minutos.
TRADUCCIÓN DEL NUEVO MUNDO DE LAS SANTAS ESCRITURAS
Lucas 12
náhuatl de la huasteca
Xijpoua Biblia ipan internet.
https://cms-imgp.jw-cdn.org/img/p/1001061103/univ/art/1001061103_univ_sqr_xl.jpg
nwt