Tlen kiijkuilok Lucas 22:1-71
-
Sacerdotes kitemoliaj kenijkatsa kimiktisej Jesús (1-6)
-
Tlakualchijchiuaj para iyojtsi Pascua (7-13)
-
ITlakualis toTeko (14-20)
-
“Katli nechtemaktilis itstok nouaya kampa mesa” (21-23)
-
Chikauak mokualaniaj pampa kinekij kimatisej ajkia eli más ueyi (24-27)
-
Jesús kichiua se tlajtolsenkauali para elisej tlanauatianij (28-30)
-
Jesús kiijtoua Pedro kiijtos amo kiixmati (31-34)
-
Moneki mokualchijchiuasej; nopa ome espadas (35-38)
-
Jesús momaijtoua ipan tepetl tlen Olivos (39-46)
-
Jesús kiitskiaj (47-53)
-
Pedro kiijtoua amo kiixmati (54-62)
-
Kipinajtiaj Jesús (63-65)
-
Kitlajtolsenkauaj Tekichiuanij katli kipiaj más Tlanauatili (66-71)
22 Monechkauiyaya nopa Iljuitl tlen Pantsi tlen Amo Kipia Levadura,* tlen kiiljuiaj Pascua.
2 Uan sacerdotes katli kipiayayaj tlanauatili uan escribas* kitemoliyayaj kenijkatsa kimiktiskiaj Jesús, pampa kinmakasiyayaj maseualmej.
3 Uajka Satanás kalajki ipan Judas, katli motokaxtiyaya Iscariote uan eliyaya se tlen nopa 12 apóstoles,
4 uan ya kamanaltito ininuaya sacerdotes katli kipiayayaj tlanauatili uan katli kinyakanayayaj tlamokuitlauianij tlen teokali para kiitas kenijkatsa kinmaktiliskia Jesús.
5 Inijuantij tlauel kinpaktik tlen kiniljuik uan mokajkej kimakaskiaj tomij.
6 Ya nojkia kuali kiitak uan pejki kitemolia kenijkatsa ueliskia kinmaktilis Jesús kema amo itstoskiaj miakej maseualmej.
7 Uajka asik nopa tonali kema mochiua Iljuitl tlen Pantsi tlen Amo Kipia Levadura, kema moneki kimiktisej nopa tlapiali para Pascua.
8 Yeka Jesús kintitlanki Pedro uan Juan, uan kiniljuik: “Xiakaj uan xitlakualtlalikaj para tijkuasej nopa tlakualistli tlen kikuaj ipan Pascua”.
9 Inijuantij kitlatsintokijkej: “¿Kanke tijneki ma titlakualtlalitij?”.
10 Ya kiniljuik: “Xikitakaj, kema inkalakisej ipan altepetl, inmechnamikis se tlakatl katli kiuika se komitl ika atl. Xijtokilikaj uan xikalakikaj ipan nopa kali kampa kalakiti.
11 Uan xikiljuikaj katli iaxka nopa kali: ‘ToTlamachtijka mitsiljuia: “¿Kanke eltok nopa cuarto kampa uelis nijchiuas Pascua ininuaya notokilijkauaj?” ’.
12 Uan nopa tlakatl inmechnextilis se ueyi cuarto tlen eltok uejkapa, tlen kipia nochi tlen moneki. Nopaya xijsenkauakaj Pascua”.
13 Inijuantij yajkej uan kipantijkej nochi kej ya kiniljuijtoya; uajka kisenkajkej* nochi tlen monekiyaya para Pascua.
14 Kema asik hora, moseuik kampa mesa ininuaya iapóstoles.
15 Uan kiniljuik: “Tlauel nijnekiyaya nijkuas inmouaya ni tlakualistli ipan Pascua kema ayamo peua nitlaijiyouia...;
16 pampa niinmechiljuia ayokmo nijkuas hasta kema nochi tlen kiijtosneki ni tlakualistli moaxitis ipan iTlanauatijkayo Dios”.
17 Uan kema kiselik se copa, kitlaskamatilik Dios* uan kiniljuik: “Xikikaj* uan ximopanoltilijtiakaj,
18 pampa niinmechiljuia, ayokmo nikis vino hasta kema ualas iTlanauatijkayo Dios”.
19 Teipa kikuik se pantsi, kitlaskamatilik Dios, kitlajkoitak, kinmakak uan kiniljuik: “Ni kiixnextia notlakayo tlen nitemaktilis para inmechpaleuis. Xijchijtokaj ni para inkinextisej innechilnamikij”.
20 Nojkia, kema ya tlakuajtoyaj, sanse kichijki ika nopa copa. Kiniljuik: “Ni copa kiixnextia nopa yankuik tlajtolsenkauali, tlen kipia ipati ika noeso, tlen toyauis para inmechpaleuis.
21 ”Pero xikitakaj, katli nechtemaktilis itstok nouaya kampa mesa.
22 Pampa nelia, katli eli iKone se Maseuali* kitokilia iojui kej kiixtlalijtokej. Pero, ¡teikneltik katli kitemaktilis!”.
23 Uajka pejkej motlatsintokiaj ajkia kichiuaskia nopa.
24 Uan pejkej chikauak mokualaniaj pampa kinekiyayaj kimatisej ajkia eliyaya más ueyi.
25 Pero Jesús kiniljuik: “Tekichiuanij tlanauatiaj ipan altepemej kej inijuantij kinekij, uan katli kipiaj tlanauatili kiniljuiaj kuali tlakamej kema kinchiuiliaj sekinok tlen kuali.
26 Pero inmojuantij amo kinamiki kiampa inelisej. Más kuali, katli eli más ueyi tlen inmojuantij ma mochiua kej katli más telpokatl, uan katli tlayakana ma mochiua kej katli tlatekipanoua.
27 Pampa, ¿ajkia eli más ueyi? ¿Katli tlakua o katli kiteka tlakualistli? ¿Amo eli más ueyi katli tlakua? Pero na niitstok inmouaya kej katli kiteka tlakualistli.
28 ”Inmojuantij inelij katli nochipa initstokej nouaya kema nikixnamiktok tlaouijkayotl.
29 Uan na nijchiua se tlajtolsenkauali inmouaya para inelisej tlanauatianij, sanse kej noTata kichijtok se tlajtolsenkauali nouaya,
30 para intlakuasej uan inkiisej se tlenijki kampa nomesa ipan noTlanauatijkayo, uan inmoseuisej ipan uejueyi sillas uan inkintlajtolsenkauasej nopa 12 uejueyi familias* tlen Israel.
31 ”Simón, Simón, xikita Satanás ya tlajtlanki ma kikauilikaj para inmechtsejtselos nochi kej ineliskiaj trigo.
32 Pero na nijtlajtlanijtok Dios ma mitspaleui amo ma kaxani motlaneltokilis. Uan ta, kema titlakuepilis, xikinyolchikaua moikniuaj”.
33 Uajka ya kiiljuik: “NoTeko, nimokualtlalijtok para ma nechtsakuakaj mouaya uan hasta para nimikis mouaya”.
34 Pero Jesús kinankilik: “Pedro, nimitsiljuia, nama nopa kuapele* amo tsajtsis hasta kema expa tikijtos amo tinechixmati”.
35 Nojkia kiniljuik: “Kema niinmechtitlanki uan niinmechiljuik amo xijuikakaj kampa inkiajokuij tomij yon kuetlaxmorral kampa inmotlatejtemilisej yon inmohuaraches, amo tleno inmechpolok, ¿axke?”. Inijuantij kinankilijkej: “¡Amo!”.
36 Uajka kiniljuik: “Pero nama, katli kipia kampa kiajokui tomij, ma kiuika, uan nojkia se kuetlaxmorral kampa motlatejtemilis; uan katli amo kipia se espada,* ma kinamaka iyoyo tlen ika moajkoluijkoma* uan ma mokoui se.
37 Pampa niinmechiljuia moneki moaxitis ipan na ni tlamantli tlen ijkuilijtok: ‘Kiitakej kej se tlajtlakolchijketl’. Uan nopa ya moaxitia ipan na”.
38 Uajka inijuantij kiiljuijkej: “ToTeko, xikita, nikaj eltok ome espadas”. Ya kinnankilik: “San ika nopa kualtitok”.
39 Kema kiski, yajki ipan tepetl tlen Olivos kej momajtoya kichiua, uan itokilijkauaj kitokilijkej.
40 Kema asitoj, kiniljuik: “Nikaj ximokauakaj uan ximomaijtojtokaj,* kiampa amo inuetsisej ipan tlajtlakoli”.
41 Uan ya mouejkatlalik se kentsi, iuejkaka kej kema kimajkauaj se tetl. Motlankuaketski uan pejki momaijtoua,
42 kiijtouayaya: “NoTata, tlaj uelis, xinechkixtili ni copa.* Pero amo ma mochiua tlen na nijneki, ma mochiua tlen ta tijneki”.
43 Uajka monextik se ángel tlen iluikak uan kiyolchikajki.
44 Pero ya tlauel mokuesojtoya, yeka nojua más chikauak momaijtouayaya, uan iitonal mochijki kej estli tlen chipiniyaya tlalchi.
45 Kema tlanki momaijtoua, moketski uan yajki kampa itstoyaj itokilijkauaj uan kinpantito kochtokej, siajtoyaj pampa tlauel mokuesojtoyaj.
46 Uan kiniljuik: “¿Kenke inkochtokej? Ximoketsakaj uan nochipa ximomaijtojtokaj para amo inuetsisej ipan tlajtlakoli”.
47 Kema nojua kamanaltitoya, asikoj miakej maseualmej. Tlayakanayaya se tlen nopa 12 apóstoles, katli motokaxtiyaya Judas, uan kinechkauik Jesús para kitsoponis.
48 Pero Jesús kiiljuik: “Judas, ¿tinechtsoponik para tinechtemaktilis na katli nieli iKone se Maseuali?”.*
49 Kema katli itstoyaj inechka kiitakej tlen panoskia, kitlatsintokijkej: “ToTeko, ¿moneki tikinteuisej ika espada?”.
50 Se tlen inijuantij kiteuik itlatekipanojka sumo sacerdote uan kitsontekilik inakas tlen inejmak.
51 Uan Jesús kiijtok: “¡Ya xijkaua!”. Uan kiitskilik inakas nopa tlatekipanojketl uan kichikajki.
52 Nojkia yajtoyaj kitemotoj nopa sacerdotes katli kipiayayaj tlanauatili, inintlayakankauaj tlamokuitlauianij tlen teokali uan katli kinyakanayayaj judíos. Uajka Jesús kiniljuik: “¿Inualajtokej ika espadas uan ika kuauitl kejuak nieliskia se tlachtejketl?
53 Mojmostla niitstoya inmouaya kampa teokali, uan amo innechitskijkej. Pero ni eli inmohora uan nopa hora kema tlanauatiaj katli itstokej ipan tsintlayouilotl”.
54 Uan kiitskijkej, kiuikakej uan kikalakijkej ichaj sumo sacerdote. Uan Pedro kinuejkatokilijtiajki.
55 Inijuantij tlipitskej tlajtlajko tlen nopa kalixpamitl uan moseuijkej sansejko. Pedro nojkia moseuijtoya ininuaya.
56 Uajka se ichpokatl katli nopaya tlatekipanouayaya kiitak moseuijtoya tliteno, kitlachilik uan kiijtok: “Ni tlakatl nojkia nemiyaya iuaya”.
57 Uan Pedro kiijtok amo. Kiiljuik: “Aui, na amo nikixmati”.
58 Teipa, seyok maseuali kiitak uan kiiljuik: “Ta nojkia tieli se tlen inijuantij”. Pedro kinankilik: “Tío, na amo nieli”.
59 Kema panok se hora, seyok pejki miakpa kiniljuia: “¡Temachtli ni tlakatl nojkia nemiyaya iuaya! Nima nesi eua Galilea”.
60 Uan Pedro kiiljuik: “Tío, amo nijmati tlake tikijtoua”. Uan nimantsi, kema nojua kamanaltitoya, se kuapele tsajtsik.*
61 Uajka toTeko moikankuepki* uan kiixtlachilik Pedro, uan ya kiilnamijki tlen toTeko kiiljuijtoya: “Nama, kema se kuapele ayamo tsajtsitos, ta expa tikijtos amo tinechixmati”.
62 Uan kiski kalixpa uan tlauel chokak pampa tlauel moyolkokok.
63 Nopa tlakamej katli kimokuitlauijtoyaj Jesús, pejkej kipinajtiaj uan kimakiliaj.
64 Teipa kiixtsajkej uan miakpa kiiljuiyayaj: “Tlaj tieli se teokamanalojketl,* ¡xikijto ajkia mitsmakilik!”.
65 Uan kiiljuiyayaj miak tlamantli tlen amo kuali tlen ika kiixpanoyayaj Dios.
66 Kema tlaneski, mosentilijkej tlakamej katli ya uejueyij tlen nopa altepetl, ni eliyayaj sacerdotes katli kipiayayaj tlanauatili uan escribas. Inijuantij kiuikakej Jesús kalijtik kampa mosentiliyayaj Tekichiuanij katli kipiayayaj más Tlanauatili,* uan kiiljuijkej:
67 “Xitechiljui tlaj ta tieli Cristo”. Ya kinnankilik: “Maske niinmechiljuiskia, amo kema inkineltokaskiaj.
68 Nojkia, tlaj na niinmechtlatsintokiskia se tlenijki, inmojuantij amo innechnankiliskiaj.
69 Pero, desde nama uan teipa, katli eli iKone se Maseuali* moseuijtos ika imanejmak Dios katli kipia chikaualistli”.
70 Uajka nochi kitlatsintokijkej: “¿Ta tieli iKone Dios?”. Ya kinnankilik: “Kena, inmojuantij inkiijtouaj”.
71 Inijuantij kiijtojkej: “¿Kenke tijnekij más testigos? Tojuantij tijkaktokej tlen kiijtojtok”.
Tlen ijkuilijtok tlatsintla
^ Kanajya kiijtouaj “Tlasonejkayotl”.
^ O “kikualtlalijkej”.
^ Kanajya kiijtouaj “toTeotsij”.
^ Kanajya kiijtouaj “xikijikaj”.
^ Xikita katli eli iKone se Maseuali.
^ O “tribus”.
^ Kanajya kiijtouaj “kuanaka”.
^ Se espada eli kej se machete tlen onkak tlatentili.
^ Xikita tlen ika moajkoluijkomayayaj.
^ Kanajya kiijtouaj “ximotlatlajtijtokaj”.
^ Nopa copa kiixnextia Dios kikauaskia ma miki pampa kiijtoskiaj kitlaijiljuijtoya Dios.
^ Xikita katli eli iKone se Maseuali.
^ Kanajya kiijtouaj “uikak”.
^ O “ikantlachixki”.
^ O “profeta”.
^ Xikita katli eli iKone se Maseuali.
