Tlen kiijkuilok Mateo 10:1-42
10 Uajka kinsentilik 12 itokilijkauaj uan kinmakak tlanauatili para kinkixtisej amo kuali ajakamej,* uan nojkia para kinchikauasej katli kipixtoyaj tlen ueli kokolistli uan tlen ueli tlakuajkualojkayotl.
2 Ya ni inintoka nopa 12 apóstoles: achtoui Simón (katli nojkia itoka Pedro) uan iikni Andrés; Santiago uan Juan, katli eliyayaj ikoneuaj Zebedeo;
3 Felipe uan Bartolomé; Tomás uan Mateo katli tlainamayaya impuestos; Santiago ikone Alfeo, uan Tadeo;
4 Simón, katli tlauel kipaktiyaya tlatekipanos uan Judas Iscariote (katli teipa kitemaktilik Jesús).
5 Jesús kintitlanki nopa 12 apóstoles, uan kej ni kiniljuik: “Amo xiakaj ipan ojtli tlen onasi ipan sekinok altepemej uan amo xikalakikaj ipan yon se altepetl tlen Samaria.
6 Más kuali, miakpa xikintemotij israeleuanij katli elij kej pilborregojtsitsij tlen mokuapolojtokej.
7 Xikijtojtiakaj: ‘Nopa Tlanauatijkayotl tlen eltok iluikak, ya monechkauijtok’.
8 Xikinchikauakaj katli mokokouaj,* xikinyolkuikaj katli miktokej, xikinchikauakaj katli kipiaj lepra* uan xikinkixtikaj amo kuali ajakamej. Amo inmechinankej tlen inkiselijkej, uajka nojkia amo xitlainamakaj.
9 Amo xijuikakaj oro, plata yon cobre ipan inmotsinkechilpika,*
10 uan nojkia amo xijuikakaj kuetlaxmorral kampa inmotlatejtemilisej yon ome inmoyoyo, yon inmohuaraches yon inmokuatopil; pampa se tekitiketl kinamiki ma kimakakaj tlen kikuas.
11 ”Kema inkalakisej ipan se altepetl o se pilaltepetsi, xijtemokaj hasta inkipantisej ajkia kinamiki inmechtlakakilis, uan nopaya ximokauakaj* hasta kema inyasej sejkanok.*
12 Kema inkalakisej techaj, xikintlajpalokaj* katli nopaya itstokej.
13 Tlaj kuali inmechselisej, kiselisej se tlateochiualistli,* pero tlaj amo, uajka nopa tlateochiualistli mokauas para inmojuantij.
14 Tlaj ipan se kali o ipan se altepetl amo inmechseliaj yon inmechtlakakiliaj, kema inkisasej, ximoikxitsejtselokaj para ma tepeui tlaltejpoktli.*
15 Nelnelia niinmechiljuia, ipan nopa Tonali kema Dios* tetlajtolsenkauas, más ouij kimatisej katli itstokej ipan nopa altepetl que katli itstoyaj ipan Sodoma uan Gomorra.
16 ”Xikitakaj, niinmechtitlani kej pilborregojtsitsij kampa itstokej lobos. Uajka xitlajtlachixtokaj kej kouamej* uan nojkia xielikaj inmaxojtsitsij kej palomas.
17 Ximomokuitlauikaj pampa maseualmej inmechuikasej kampa tekichiuanij uan inmechuitekisej kampa tlaueyichiuaj judíos.
18 Uan pampa inelij notokilijkauaj, inmechuikasej ininixpa gobernadores uan tlanauatianij. Kiampa uelis inkiniljuisej inijuantij uan sekinok maseualmej tlen inkineltokaj.
19 Uan kema inmechtemaktilisej, amo ximoiljuijtokaj tlake inkiijtosej o kenijkatsa inkiijtosej, pampa kema asis nopa tonali, inmechiljuisej tlen moneki inkiijtosej.
20 Pampa amo san inmojuantij inkamanaltisej: ichikaualis* inmoTata inmechmatiltis tlake kinamiki inkiijtosej.
21 Nojkia, se akajya kitemaktilis iikni para ma kimiktikaj, uan se tetaj kitemaktilis ikone, uan konemej kinijixnamikisej inintatauaj uan kichiuasej ma kinmiktikaj.
22 Nochi maseualmej inmechkualankaitasej pampa inelij notokilijkauaj. Pero katli kiijiyouijtos hasta itlamia, momanauis.*
23 Kema inmechtlaijiyouiltisej ipan se altepetl, xiakaj ipan seyok; pampa temachtli niinmechiljuia, amo intlamitlajtolmoyauasej ipan nochi altepemej tlen Israel, pampa nima asiki katli eli iKone se Maseuali.*
24 Se katli momachtia amo más kitlepanitaj kej itlamachtijka, yon se tlatekipanojketl amo más kitlepanitaj kej iteko.
25 Tlauel kuali tlaj se katli momachtia elis kej itlamachtijka uan tlaj se tlatekipanojketl elis kej iteko. Tlaj katli iaxka nopa kali kiiljuiaj Belcebú,* katli itstokej ichaj, ¡nojkia kiampa kiniljuisej!
26 Yeka amo xikinmakasikaj; pampa tlen motlatijtok,* teipa nesis, uan tlen eltok ichtakatsi, teipa momatis.
27 Tlen niinmechiljuia kampa tsintlayoua, xikijtokaj kampa tlatlanestok; uan tlen niinmechiljuia ichtakatsi, xikijtokaj desde kalkuitlapa.*
28 Uan amo xikinmakasikaj katli uelis inmechmiktisej pero amo uelis kitsontlamiltisej inmonemilis.* Achi kuali, xijmakasikaj katli uelis kitsontlamiltis inmonemilis uan inmotlakayo ipan Gehena.*
29 Kinnamakaj omej piltototsitsij ika se centavo* tlen amo tlauel ipati, ¿axke? Pero inmoTata kimati kema se tlen nopa piltototsitsij temo* tlalchi.
30 Uajka, ya nojkia kimati hasta keski inmotsonkal inkipiaj.
31 Yeka amo ximajmauikaj. Inmojuantij más inmopati que miakej piltototsitsij.
32 ”Tlaj se akajya kiijtoua eli notokilijka ininixpa sekinok, na nojkia nikijtos iixpa noTata katli itstok iluikak, kena eli notokilijka.
33 Pero tlaj se akajya kiijtos amo eli notokilijka ininixpa sekinok, na nojkia nikijtos iixpa noTata katli itstok iluikak, ya amo eli notokilijka.
34 Amo ximoiljuikaj niualajtok para nijchiuas nochi kuali ma mouikakaj; niualajtok ika se espada* tlen kichiuas maseualmej ma moxelokaj ika tlen nitlamachtia.
35 Niualajtok para nijchiuas ma moxelokaj. Se telpokatl kiijixnamikis itata, se ichpokatl kiijixnamikis inana uan se yeyojtli* kiijixnamikis iyexna.
36 Kena, se akajya kikualankaitasej katli itstokej ichaj.
37 Katli más kiiknelia itata o inana uan amo na, amo kinamiki elis notokilijka; uan katli más kiiknelia itelpoka o iichpoka uan amo na, amo kinamiki elis notokilijka.
38 Uan katli amo kineki kiuikas nopa kuauitl tlen ika tlaijiyouis* yon nechtokilis, amo kinamiki elis notokilijka.
39 Katli kinekis kimanauis inemilis, kipolos, uan katli kipolos inemilis pampa nechneltoka, kipantis.
40 ”Katli inmechselis, nojkia nechselia na, uan katli nechselia, nojkia kiselia katli nechualtitlanki.
41 Katli kiselia se akajya pampa eli teokamanalojketl,* kiselis se tlateochiualistli kej kiselia se teokamanalojketl; uan katli kiselia se akajya katli kichiua tlen kuali, kiselis se tlateochiualistli kej kiselia katli kichiua tlen kuali.
42 Uan nelia niinmechiljuia, tlaj se akajya kimakas maske san se vaso atl sesek, se tlen ni katli amo moueyimatij pampa eli notokilijka, nelia niinmechiljuia ya nojkia kiselis se tlateochiualistli”.
Tlen ijkuilijtok tlatsintla
^ O “demonios”.
^ Kanajya kiijtouaj “kokoyaj”.
^ Ipan inintsinkechilpika kipixtoya kampa ueliyayaj kikalakiaj tomij.
^ O “xikochikaj”.
^ Kanajya kiijtouaj “oksejko”, “sejkoyok”.
^ Kema judíos motlajpalouayayaj, kiijtouayayaj: “Xijpia tlaseuilistli”.
^ O “tlaseuilistli”.
^ Kanajya kiijtouaj “tlalpopoxtli”, “tlalkuanextli”.
^ Kanajya kiijtouaj “toTeotsij”.
^ Kanajya kiijtouaj “okuilimej”.
^ O “iespíritu”.
^ O “momakixtis”.
^ Xikita katli eli iKone se Maseuali.
^ Nojkia kiampa kiiljuiaj Satanás, katli kinyakana amo kuali ajakamej.
^ Kanajya kiijtouaj “miyantok”.
^ Kanajya kiijtouaj “kalpani”.
^ Ika griego “se asarion”. Tlen kitlaniyaya se akajya kema tekitiyaya 45 minutos.
^ O “moseuia”.
^ Se espada eli kej se machete tlen onkak tlatentili.
^ Kanajya kiijtouaj “teyex”.
^ Xikita kuauitl kampa tetlaijiyouiltiaj.
^ O “profeta”.
