Nopa carta tlen kintitlanilijkej Cristo itokilijkauaj tlen Roma 3:1-31
3 Uajka, tlaj se akajya eli judío, ¿kenijkatsa kipaleuia nopa? ¿Kenijkatsa kipaleuia tlaj mochiuilia circuncisión?*
2 Kena tlapaleuia ipan nochi tlamantli. Achtoui, nopa judíos kinmatiltijkej itlajtol Dios.*
3 Uajka, tlaj se keskij judíos amo tlaneltokakej, ¿kiijtosneki Dios amo eli temachtli?
4 ¡Amo! Dios nochipa eli temachtli maske nochi maseualmej istlakatij, kej ijkuilijtok: “Para nochi tlen tikijtos ma kinexti tieli tixitlauak uan titlatlanis kema mitstlajtolsenkauasej”.
5 Pero, tlaj tijchiuaj tlen amo kuali uan nopa kipankixtia Dios kichiua tlen kuali, ¿tlake tikijtosej? ¿Kichiua Dios tlen amo kuali kema kinextia ikualankayo? (Nikamanalti kej maseualmej moiljuiaj).*
6 ¡Amo! Tlaj amo kiampa kichiuaskia, ¿kenijkatsa Dios kintlajtolsenkauas katli itstokej ipan Tlaltipaktli?
7 Pero tlaj niistlakati uan nopa istlakatili tlen nikijtoua kichiua ma nesi Dios kiijtoua tlen melauak* uan kichiua nojua más ma kiueyichiuakaj, ¿uajka kenke Dios nechita kej se tlajtlakolchijketl?
8 ¿Uan kenke amo tikijtouaj “Ma tijchiuakaj tlamantli tlen amo kuali uan kiampa tijselisej tlen kuali”? Sekij maseualmej techistlakauiaj uan kiijtojtinemij para kiampa tikijtouaj. Yeka inijuantij kena kinamiki ma kintlatsakuiltikaj.
9 Uajka, ¿tojuantij tijudíos más tikualmej que sekinok? ¡Amo! Pampa kej ya tikijtojkej, judíos uan nojkia griegos, nochi titlajtlakolejkej.
10 Kiampa ijkuilijtok: “Amo itstok yon se tlakatl katli kichiua tlen xitlauak, yon se;
11 amo itstok yon se katli kimachilia tlake moneki mochiuas; amo itstok yon se katli kitemoua Dios.
12 Nochi mokuapolojtokej, nochi tlen kichiuaj amo tlapaleuia, amo aka kinextia kipia kuali iyolo, yon se”.
13 “Ininkechtla eli kej se mijkaostotl tlen tlapojtok; tlakajkayauaj ika ininnenepil”. “Tlen kisa ipan inintenxipal eli kej ininpajyo kouamej”.*
14 “Uan ika ininkamak san tlatelchiuaj uan san tekualankanojnotsaj”.
15 “Inijuantij moikxiisiuiltiaj para temiktisej”.*
16 “Kampa yauij, techiuiliaj tlen amo kuali uan tetlaijiyouiltiaj,
17 uan amo kiixmatij nopa ojtli tlen kinpaleuia ma itstokaj ika tlaseuilistli”.
18 “Amo kiitaj moneki kimakasisej Dios”.
19 Nojkia, tijmatij nochi tlen kiijtoua nopa Tlanauatili moijkuilok para nochi katli moyakanaj ika nopa Tlanauatili, kiampa ayokmo tleno kiijtosej uan kimatisej kinamiki Dios ma kintlatsakuilti.
20 Yeka, Dios amo aka kiitas xitlauak iixpa san pampa kichiua tlen kiijtoua nopa Tlanauatili, pampa ika nopa Tlanauatili kuali tijmatij tlake eli nopa tlajtlakoli.
21 Pero nama, tlen Dios kiita xitlauak monextia maske amo motekiuia Tlanauatili, kej kiijtoua nopa Tlanauatili uan tlen kiijkuilojkej Teokamanalouanij,*
22 uan Dios kinita xitlauakej kema tlaneltokaj ipan Jesucristo, kena, nochi katli tlaneltokaj. Pampa ya amo techikoiknelia.
23 Pampa nochi tlajtlakolchijtokej uan amo yajatij* kinextiaj nopa yejyektsitsij tlamantli tlen Dios kinextia,
24 uan eli se regalo pampa Dios kinextia ueyi iyolo ika inijuantij* uan yeka kinita xitlauakej pampa Cristo Jesús tlaxtlajki para kinmakixtis.
25 Dios temaktilik kej se ofrenda* para sampa kuali ma mouikakaj iuaya pampa tlaneltokaj ipan ieso Jesús. Kichijki nopa para kinextis kichiua tlen xitlauak pampa Dios kipixki iyolo uan yeka kintlapojpoljuik inintlajtlakoljuaj tlen uejkajkia kichijkej.
26 Pero nojkia kinextia kichiua tlen xitlauak ipan ni tonali, pampa kiita eli xitlauak katli tlaneltoka ipan Jesús.
27 Uajka, ¿uelis timoueyimatisej ika se tlamantli? Amo uelis. ¿Tlake tlanauatili amo techkaua ma timoueyimatikaj? ¿Nopa tlanauatili tlen kiijtoua tlake moneki tijchiuasej? Amo, eli nopa tlanauatili tlen kiijtoua moneki titlaneltokasej.
28 Pampa nama tikitaj Dios kiita xitlauak se akajya pampa tlaneltoka uan amo pampa kichiua tlen kiijtoua nopa tlanauatili.
29 ¿O Dios san eli ininDios judíos? ¿Amo nojkia eli ininDios katli amo elij judíos? Kena, nojkia eli ininDios katli amo elij judíos.
30 Dios eli san setsi, yeka katli mochiuilijtokej circuncisión* uan katli amo, kinitas xitlauakej pampa tlaneltokaj.
31 Uajka, ¿tijchiuaj nopa tlanauatili ayokmo ma kipia ipati pampa titlaneltokaj? ¡Amo! Tojuantij tijnextiaj kipia ipati nopa tlanauatili.
Tlen ijkuilijtok tlatsintla
^ Xikita circuncisión.
^ Kanajya kiijtouaj “toTeotsij”.
^ O “monejneuiliaj”.
^ O “eli temachtli”.
^ Kanajya kiijtouaj “okuilimej”.
^ Ika griego “kitoyauasej estli”.
^ Kiijtosneki nochi tlen eltok ipan iTlajkuilol Dios ika Hebreo.
^ O “uelij”.
^ O “kinmaka tlateochiualistli tlen amo kinamiki kiselisej”.
^ Kanajya kiijtouaj “tlakajkaualistli”.
^ Xikita circuncisión.
