¿KENKE TLAUEL MONEKI? Katli motemachiaj yasej iluikak uan katli itstosej ipan Tlaltipaktli kiniljuiaj maseualmej kejuak ma kiikaj “nopa atl tlen temaka yolistli tlen yankuik para nochipa” (Ap 22:17). Nopa “atl” kiixnextia nochi tlamantli tlen Jehová kichijtok uan kiampa kinmanauis maseualmej tlen tlajtlakoli uan mikilistli. Tlaj tijnekij tikinpaleuisej maseualmej ma kikauakaj tlen momajtokej kichiuaj uan tlen kineltokaj, moneki kuali tijmatisej kenijkatsa tikinixtomilisej nopa kuali tlamachtili uan kiampa kuali techtlakakilisej (Ap 14:6).

¿TLAKE UELISKIA TIJCHIUAS?

• Kuali xijtlapejpeni tlake tlamachtili uan tlake textos tijtekiuis kema titlajtolmoyauas kampa tiitstok, kiampa asis ipan ininyolo tlen tikinmachtis. Uelis tijtekiuis kampa kiijtoua “Tlen ueliskia tikijtos” o uelis tijtekiuis seyok tlamachtili tlen mitspaleuijtok kema titlajtolmoyaua. ¿Tlake tlamachtili o textos kinpaktia maseualmej? ¿Tlake tlamantli kintekipachoua maseualmej? ¿Tlake tlamachtili kinpaktia tlakamej, uan tlake kinpaktia siuamej?

• Kema tikinnojnotsas maseualmej kampa tiitstok, ximoiljui tlake momajtokej kichiuaj uan kenijkatsa motlajpalouaj (2Co 6:3, 4).

• Kuali xijtekiui videos uan amatlajkuiloli tlen tlauel tijtekiuiaj kema titlamachtiaj, kiampa uelis tijtekiuis kema se akajya kuali mitstlakakilis.

• Xijkixti amatlajkuiloli uan videos ipan tlajtoli tlen maseualmej kamanaltij kampa tiitstok.

• Kema titlajtolmoyauas ximoiljui tlake tlamachtili uelis kipaleuis sejse maseuali (1Co 9:19-23). Ximoiljui, ¿tlake tikijtoskia tlaj tijmatiskia nopa maseuali motekipachoua pampa mijki se akajya katli tlauel kiikneliyaya?

ACHTOUI XIKITA NOPA VIDEO, UAN TEIPA XIJNANKILI NI TLAJTLANILI:

• ¿Ika tlake tlamachtili kipeualtik toikni?

• ¿Tlake kipanoyaya nopa maseuali?

• ¿Tlake texto ueliskia kipaleuis nopa maseuali, uan kenke?

• ¿Kenijkatsa tijpatla tlen timoiljuijtoya tikijtos kema tijnojnotsa se maseuali pampa tijneki kuali ma mitstlakakili?