Jehová kineki ma tijpouilikaj nochi tekipacholi uan kuesoli tlen tijpiaj (Salmo 55:22). Uelis tijpouilisej Jehová se ueyi kuesoli tlen tijpiaj o se kuesoli tlen sekinok uelis moiljuiaj amo tlauel ipati. Tlaj tojuantij techtekipachoua, Jehová nojkia. Tlaj timomaijtos, mitspaleuis xijpia tlaseuilistli ipan motlalnamikilis (Filipenses 4:6, 7).

Kema tijpiaj se kokolistli ipan totlalnamikilis uelis timomachiliaj tiitstokej toselti, kemantika sekij amo kikuamachiliaj tlen techpano (Proverbios 14:10). ToTeotsij kena techkuamachilia uan kuali techtlakakilia kema tijpouiliaj tlen tijyolmatij, yeka uelis tijpouilisej nochi tlen tijyolmatij. Jehová kiita tlen techpano, kimati kenijkatsa titlaijiyouiaj uan tlake tlamantli ouij tijmatij. Yeka, kineki ma tijpouilikaj nochi tlen techtekipachoua (2 Crónicas 6:29, 30).

Kema timomaijtouaj, timotemachiaj Jehová nelia kineki techpaleuis. Nojkia uelis timotemachisej kej ni tlakatl katli kiijkuilok Biblia, ya kiiljuik toTeotsij: “Ta tikitstok nochi nokuesol, tikixmajtok nochi tlen nopantitok” (Salmo 31:7). Kema tijmatij Jehová kiita tlen techpano, techmaka chikaualistli uan kiampa ueli tikijiyouiaj tlen techpano. Ya amo san kiita kenijkatsa titlaijiyouiaj, san ya kuali kikuamachilia tlen techpano uan techpaleuia ma tijpantikaj ipan Biblia tlen uelis techyolchikauas.