Tlen kuali uan tlen amo kuali: Biblia uelis kuali techyakanas
Tlaj kema tijtlapejpenisej tijchiuasej se tlamantli timoyakanasej ika tlen tojuantij timoiljuiaj o ika tlen sekinok moiljuiaj, amo kuali kisas tlen tijchiuasej. Biblia kiijtoua kenke kiampa pano. Uan nojkia techiljuia kenijkatsa tiyolpakisej ika tlen tijchiuasej ipan tonemilis. Yeka uelis timotemachisej Biblia kuali techyakanas.
MONEKI DIOS MA TECHYAKANA
Biblia kiijtoua Jehová a moneki techyakanas pampa amo techchijchijki para toselti ma timoyakanakaj (Jeremías 10:23). Yeka, kichijki ipan Biblia ma moijkuilo tlen techpaleuis kuali ma tijtlapejpenikaj tlen tijchiuasej. Ya tlauel techiknelia uan amo kineki ma tijtlapejpenikaj se tlamantli tlen kichiuas ma titlaijiyouikaj (Deuteronomio 5:29; 1 Juan 4:8). Ya uelis kuali techyakanas pampa techchijchijki, tlauel tlalnamiki uan kuali techixmati (Salmo 100:3; 104:24). Pero Dios amo kema kichiualtia se akajya ma moyakana ika itlanauatiljuaj.
Jehová kinmakak Adán uan Eva nochi tlen kinpaleuiskia ma yolpakikaj (Génesis 1:28, 29; 2:8, 15). Nojkia kinmakak se keski tlanauatili tlen amo ouij, pero kikajki inijuantij ma kitlapejpenikaj tlaj kichiuaskiaj o amo (Génesis 2:9, 16, 17). Tlauel amo kuali tlen kichijkej Adán uan Eva pampa moyakankej ika inintlalnamikilis uan amo ika tlen Jehová kiniljuijtoya (Génesis 3:6). ¿Uan kenijkatsa tiitstokej pampa toselti timoyakanaj? ¿Kuali tiitstokej? Amo. Tlen panotok kinextijtok tlaj amo timoyakanaj ika Dios itlanauatiljuaj, amo kema tijpiasej tlaseuilistli yon tiyolpakisej (Eclesiastés 8:9).
Biblia uelis techpaleuis kuali ma tijtlapejpenikaj tlen tijchiuasej maske kampa ueli tieuaj (2 Timoteo 3:16, 17; xikita nopa recuadro “ Se libro tlen nochi techpaleuia”). Ma tikitakaj kenijkatsa techpaleuia.
Xikita kenke tikijtouaj Biblia eli “itlajtol Toteko” (1 Tesalonicenses 2:13). Ipan jw.org xikita nopa video ¿Ajkia kichijki ma moijkuilo Biblia?
DIOS TECHYAKANA IKA BIBLIA
Biblia kiijtoua kenijkatsa Jehová kinpaleuik se keskij maseualmej katli uejkajkia itstoyaj. Kema tijpouaj, techpaleuia ma tijmatikaj tlake tlamantli Dios kiita techpaleuis o amo (Salmo 19:7, 11). Uajka, Biblia techpaleuia ipan tonemilis uan uelis nochipa ika timoyakanasej.
Ma tikitakaj tlen kiijtoua Proverbios 13:20: “Se tlakatl tlen nemi ininuaya tlen tlalnamikij mochiuas tlalnamiki. Pero aki nemi ininuaya uiuimej, kipantis ajkeya kinpojpostekis iomiyouaj”. Tlen kiijtoua ni texto tlauel techpaleuia, sanse kej tlapaleuik uejkajkia. Pero nojkia onka sekinok textos tlen tlauel techpaleuis (xikita nopa recuadro “ Tlen Biblia kiijtoua nochipa techpaleuia”).
Uelis timotlatsintokia: “¿Kenijkatsa uelis nimotemachis nelia nechpaleuis tlen Biblia kiijtoua?”. Ipan seyok tlamachtili tikitasej kenijkatsa kinpaleuijtok se keskij maseualmej.
