¡Nechka tiitstosej ipan se yankuik Tlaltipaktli!
ToTeotsij kichijchijki Tlaltipaktli pampa kineki maseualmej katli kineltokasej ma itstokaj nochipa (Salmo 37:29). Yeka, Adán uan Eva kinkajki ipan xochimili Edén uan kiniljuik ma kimokuitlauikaj, uan kinekiyaya ikoneuaj nojkia kiampa ma kichiuakaj (Génesis 1:28; 2:15).
Ipan ni tonali ayokmo tiitstokej kej toTeotsij kinekiyaya. Maske kiampa panotok, ya nojua kineki kichiuas Tlaltipaktli ma eli se xochimili. Kej ya tikitakej, toTeotsij amo kitsontlamiltis Tlaltipaktli, ya kichiuas ma itstokaj nopaya san katli kineltokasej. ¿Kenijkatsa tiitstosej kema ya mochijtos tlen toTeotsij techtenkauilijtok?
Tlanauatis ipan nochi Tlaltipaktli
Nechka toTeotsij iTlanauatijkayo tlen eltok iluikak tlanauatis ipan nochi Tlaltipaktli, uan nochi maseualmej itstosej ika pakilistli, tlaseuilistli uan yolpakisej ika nopa tekitl tlen kipiasej. ToTeotsij kitekimakak Jesús ma tlanauati. Ya amo eli kej tlanauatianij tlen ni tonali pampa nochipa kineki kuali ma itstokaj sekinok. Jesús tlauel teiknelia, yeka kema tlanauatis tlauel kintlasojtlas maseualmej uan kichiuas tlen xitlauak (Isaías 11:4).
Maseualmej kuali mouikasej
Ipan nopa tonali ayokmo aka techikoitas pampa nochi maseualmej tlauel kuali mouikasej (Apocalipsis 7:9, 10). Nochi katli itstosej ipan Tlaltipaktli san toTeotsij kiueyichiuasej uan tlauel moiknelisej. Nochi sansejko titekitisej uan amo timokualanisej, kiampa tijchiuasej Tlaltipaktli ma eli se xochimili, kej toTeotsij mosentlalijtoya kichiuas (Salmo 115:16).
Maseualmej uan tlen onka ipan Tlaltipaktli tlauel kuali eltos
Kema toTeotsij iTlanauatijkayo peuas kinauatis Tlaltipaktli, ya kichiuas ma uetsi atl o tonas, uan ayokmo panos kej nama (Salmo 24:1, 2). Kema Jesús itstoya ipan Tlaltipaktli kitlakaualtik ajakatl, kiampa kinextik ika toTeotsij ichikaualis uelis kichiuas miak tlamantli (Marcos 4:39, 41). Kema ya tlanauatis amo aka majmauis pampa ayokmo tetlasosoljuilis se tlenijki. Nojkia, toTeotsij iTlanauatijkayo kichiuas maseualmej uan tlapialmej ma itstokaj ika tlaseuilistli, uan ayokmo aka kinempolos Tlaltipaktli (Oseas 2:18).
Amo aka mokokos uan nochi kipiasej tlen kikuasej
Nochi tlauel kuali tiitstosej. Yon se maseuali amo mokokos, ueuejtias yon mikis (Isaías 35:5, 6). Tiitstosej ipan se Tlaltipaktli kampa amo tlasokiyo uan tlayejyejka, kej kampa itstoyaj Adán uan Eva. Nojkia, kampa ueli onkas tlauel miak tlakualistli uan nochi tijpiasej tlen tijkuasej, kej onkayaya ipan xochimili Edén (Génesis 2:9). Ipan nopa yankuik Tlaltipaktli panos kej toTeotsij kintenkauilik israeleuanij: “Inkikuasej tlen nochi tlen inkinekisej hasta inixuisej” (Levítico 26:4, 5).
Itstosej ika tlaseuilistli uan amo aka majmauis
Kema toTeotsij iTlanauatijkayo tekichijtos ipan Tlaltipaktli nochi kichiuasej tlen xitlauak, nochi moiknelisej uan kipiasej tlen moneki. Ayokmo onkas tlauilankayotl yon itstosej katli moueyimatij uan kichiuaj san tlen inijuantij kinekij. Biblia kiijtoua: “Sejse tlakatl mosiyajkauas ika pakili itsala se ikuatlatok uan sejse ixokomekamil temakas hasta mokauas. Ayok aka kintemajmatis” (Miqueas 4:3, 4).
Nochi kipiasej ininchaj uan tekitl
Nochi kipiasej ininchaj uan amo aka kinkuilis, uan nochi yolpakisej ika tlen kichiuasej. Biblia kiijtoua katli itstosej ipan yankuik Tlaltipaktli “axtekitisej para tlakuasej ininkualankaitakauaj” (Isaías 65:21-23).
Tlauel kuali techmachtisej
Biblia kiijtoua: “Nopa tlali temitos ika tlakamej tlen kiixmatij toTeko” (Isaías 11:9). Nochi uelis tikitasej kenijkatsa toTeotsij tlauel tlalnamiki uan nojkia nochi tlen ya kichijchijtok. Tlen tijyekojtiasej kichiuas ma tijnekikaj tijchiuasej tlen kuali, uan amo tijchiuasej tepostli tlen ika temiktisej (Isaías 2:4). Tijchiuasej tlen techpaleuis sansejko ma tiitstokaj uan tijmokuitlauisej Tlaltipaktli (Salmo 37:11).
Nemilistli tlen axkema tlamis
ToTeotsij tlauel kuali kej kichijchijki Tlaltipaktli. Kiampa kichijki pampa kinekiyaya nochipa ma itstokaj maseualmej uan mojmostla ma yolpakikaj (Salmo 37:29; Isaías 45:18). Yeka, teipa “kitlamiltis mikistli para nochipa” (Isaías 25:8). Nojkia, Biblia kiijtoua “ayok kema aki mikis, niyon mokuesos, niyon chokas, niyon mokokos” (Apocalipsis 21:4). Kema toTeotsij kitlamiltis nochi tlen amo kuali, uelis itstosej nochipa katli kinmanauis ipan nopa tonali, uan nojkia nopa tlauel miakej katli moyolkuisej (Juan 5:28, 29; Hechos 24:15).
Maske ipan ni tonali toTeotsij iTlanauatijkayo ayamo tlanauatia ipan Tlaltipaktli, tlauel miakej maseualmej kichiuaj kampeka kuali monejnemiltisej. Maske tlajtlakolejkej kichiuaj kampeka kichiuasej ipan ininnemilis kej Toteotsij kineki ma monejnemiltikaj ipan Xochimili. ¿Kenijkatsa kichiuaj? Kema kiixmatij toTeotsij Jehová uan iKone, Jesús (Juan 17:3).
Nechka tlamis tlen amo kuali. Yeka, tlaj tijneki tijmatis tlake tijchiuas uan kiampa uelis timomanauis uan tiitstos ika pakilistli ipan se yankuik Tlaltipaktli, xikiljui se Jehová itlajtoltemajka ma mitsmachti Biblia ika amatlajkuiloli Nochipa xiitsto, uan amo mitsinamasej.
Tlen nojkia mitspaktis tikitas
TLEN TEMATILTIA
¿Tlake kichiuas toTeotsij iTlanauatijkayo?
Jesús kimatiyaya san toTeotsij iTlanauatijkayo kisenkauas nochi kuesoli tlen onka ipan Tlaltipaktli. ¿Tlake tlamantli ya kichijtok uan kiampa kichiua ma timotemachikaj ipan nopa Tlanauatijkayotl?
TLEN TEMATILTIA
ToTeotsij iTlanauatijkayo: Kichiuas tlen xitlauak
Chikuasej tlamantli tlen kichiuas toTeotsij iTlanauatijkayo tlen kinextia kichiuas nochipa tlen xitlauak.
