MASEUALMEJ

¿Tlake kiijtoua Biblia? ToTeotsij “Kichijchijki [Tlaltipaktli] uan kikualtlalik para ipan ma itstokaj tlakamej” (ISAÍAS 45:18).

TLALTIPAKTLI

¿Tlake kiijtoua Biblia? “Nochi tlakamej tlen ama itstokej mikisej uan sekinok tlakatisej. [...] Pero ni Tlaltipaktli, kena, ya nopa nochipa mokaua” (ECLESIASTÉS 1:4).

¿TLAKE KIIJTOSNEKI? Biblia kiijtoua amo kema kitsontlamiltisej Tlaltipaktli uan nochipa itstosej maseualmej. Uajka, ¿tlake kiijtosneki kema kiijtoua tlamis Tlaltipaktli?

XIMOILJUI NI: Biblia kiijtoua kema tlamis Tlaltipaktli elis sanse kej kema Noé itstoya. Ipan nopa tonali maseualmej tlauel mosisiniyayaj (Génesis 6:13). Maske kiampa kichiuayayaj, Noé kichiuayaya tlen toTeotsij kinekiyaya, yeka kinmanauik ya uan ichampoyouaj kema kintsontlamiltik katli amo kualmej ika miak atl. Biblia kiijtoua: “ToTeko uejkajkia kintsontlamiltik tlen itstoyaj ipan Tlaltipaktli ika atl” (2 Pedro 3:6). Ipan nopa tonali tlanki Tlaltipaktli. Uajka, ¿tlake tlanki? Amo kitsontlamiltijkej Tlaltipaktli, san maseualmej katli amo kualmej. Uajka, kema Biblia kiijtoua tlamis Tlaltipaktli, amo kiijtosneki nelnelia tlamis, san kintsontlamiltisej nochi katli amo kuali monejnemiltiaj uan tlen kichijtokej.

KUESOLI UAN TLEN AMO KUALI

¿Tlake kiijtoua Biblia? “Ayok uejkauas noja itstosej axkuajkualmej, teipa yonke titlachias kampa itstoyaj, axkema sampa tikinpantis. Pero tlakamej tlen moiknonekij iixpa toTeko itstosej ipan nopa kuali tlali uan tlauel pakisej” (SALMO 37:10, 11).

¿TLAKE KIIJTOSNEKI? Kema ya uetstoya tlauel miak atl, maseualmej sampa pejkej kichiuaj tlen amo kuali uan sampa kintlaijiyouiltijkej sekinok. Yeka, toTeotsij nechka kitlamiltis nochi tlen amo kuali. Katli kiijkuilok se salmo kiijtok: “Ayok uejkauas noja itstosej axkuajkualmej”. ToTeotsij ika iTlanauatijkayo kitlamiltis nochi tlen amo kuali, iTlanauatijkayo eltos iluikak, uan kinnauatis katli kineltokasej.

XIMOILJUI NI: ¿Tlake kinpanos tlanauatianij? ¿Kipaleuisej toTeotsij iTlanauatijkayo? Biblia kiijtoua kiijixnamikisej (Salmo 2:2). Uajka, ¿tlake panos? ToTeotsij iTlanauatijkayo kintsontlamiltis nochi tlanauatianij uan “nopa tlanauatijketl tlen toTeko kitlalijtos uejkauas para nochipa” (Daniel 2:44). Uajka, ¿kenke ayokmo tlanauatisej maseualmej?

¿Tlake kiijtoua Biblia? “Se tlakatl axiaxka iyolis, niyon axyajaya [...] iojui” (JEREMÍAS 10:23).

¿TLAKE KIIJTOSNEKI? ToTeotsij amo kinchijchijki maseualmej ininselti ma monauatikaj. Yeka, amo uelij kinnauatiaj sekinok yon kisenkauaj kuesoli.

XIMOILJUI NI: Nopa enciclopedia Britannica Academic kiijtoua nochi tlanauatianij amo uelij kitlamiltiaj “tlaijiyouilistli, mayantli, kokolistli, kema tetlasojsoljuilia se tlenijki, tlauilankayotl uan sekinok tlamantli tlen techtlaijiyouiltia”. Nojkia kiijtoua: “Sekij [...] moiljuiaj san uelis kitlamiltis nochi ni tlaouijkayotl se tlanauatijketl katli kiyakanas nochi Tlaltipaktli”. Uan maske nochi tlanauatianij mosentikapaleuiskiaj, amo ueliskiaj kitlamiltisej nochi nopa tlaouijkayotl pampa amo elij xitlauakej. San ToTeotsij iTlanauatijkayo uelis kitlamiltis.

Uajka, maseualmej katli kipiaj kuali ininyolo amo kinamiki majmauisej pampa Biblia kiijtoua san kitsontlamiltisej tlen amo kuali, uan toTeotsij kiyankuilis Tlaltipaktli. Kej tikitaj, panos miak tlamantli tlen tlauel kuali.

¿Kema mochiuas ni? Ipan seyok tlamachtili kiixtomas tlen Biblia kiijtoua.