”Inijuantij amo san kintlajpalouayayaj katli nopaya panoyayaj, nojkia kinpaktiyaya kinitasej nochichiuaj. Se tonali itstoya se siuatl katli itoka Elaine, uan ya kinmakak galletas. Yeka, nochichiuaj nochipa nechtilanayayaj kema nopaya nipanoyaya, pampa kinekiyayaj galletas.

”Uan kej panotiajki tonali, nochichiuaj kinpakti nopa gelletas, uan na nechpaktik nikintlakakilis se kentsi Jehová itlajtoltemakauaj. Miakpa san uejkatsi nikintlajpalouayaya. Ya nijpiayaya kipano 70 xiuitl, uan amo kuali nijmatiyaya tlake kineltokayayaj. Nojkia, pampa ipan sekinok iglesias nikitstoya kichiuaj tlen amo kinamiki, yeka amo nijnekiyaya sekinok ma nechmachtikaj.

”Teipa, nikinitak sekinok Jehová itlajtoltemakauaj katli nojkia tlajtolmoyauayayaj ika carritos ipan nopa altepetl. Nojkia kuali tenojnotsayayaj uan nochipa nechnankiliyayaj ika Biblia tlen nikintlajtlaniyaya, yeka pejki nimotemachia ipan inijuantij.

”Se tonali, Elaine nechtlajtlanik: ‘¿Timoiljuia chichimej eli se nemaktli tlen toTeotsij techmakatok?’. Uan na nikiljuik: ‘Kena’. Teipa, nechpouilik tlen kiijtoua Isaías 11:6-9. Maske ipan nopa tonali amo nijuikak yon se amatlajkuiloli, mopatlak miak tlamantli.

”Teipa, maske amo uejka tikamanaltiyayaj, pejki nikintlatsintokia miak tlamantli tlen ouij. Nechiljuijkej ma nijpoua amochtli Mateo uan ma nitlami ipan Hechos, nopa nechpaleuiskia ma nijkuamachili tlake monekiyayaj nijchiuas tlaj nijnekiyaya nimonejnemilitis kej Jesús. Teipa, pejki nijpoua. Uan ipan 2016 pejki nimomachtia ininuaya Brent uan Elaine.

”San nijchixtoya tonali kema nimomachtiskia uan niaskia tlanechikoli. Niyolpakiyaya uan nijtlaskamatiliyaya Jehová pampa uelki nimomachtia Biblia. Uan kema panok se xiuitl, nimoatsonpoliuiltik. Nama nijpia 79 xiuitl, uan nijmati niitstok ipan se kuali ojtli. Nijtlaskamati Jehová pampa nechpaleuik ma nikinixmati toikniuaj katli sansejko kitekipanouaj”.