1. ¿Ipan tlake moneki timosentlalisej tijchiuasej?

 MASKE tlauel tikikneliaj Jehová uan tijnekij kuali tijtekipanosej, moneki timosentlalisej ipan tlen techpaleuis kuali ma titlaneltokakaj, kej tijnextisej kuajkuali tlamantli, tijyekosej tijchiuasej sekinok tlamantli uan tikitasej kenijkatsa tikinpaleuisej sekinok. b

2. ¿Kenke moneki timosentlalisej titlatekipanosej uan nelia tijchiuasej?

² Tijnekij tijyolpakiltisej toTata Jehová, yeka timosentlaliaj titlatekipanosej uan tijchiuaj kampeka kiampa tijchiuasej. Ya tlauel yolpaki kema tijtekipanouaj ika tlen tijmatij tijchiuasej. Nojkia, tijnekij kuali titlatekipanosej pampa tijnekij nojua tlauel tikinpaleuisej toikniuaj (1 Tes. 4:9, 10). Tlaj tijpiaj miak xiuitl titlatekipanojtokej o amo, nochi moneki tijchiuasej kampeka nojua kuali titlaneltokasej. Ma tikitakaj kenijkatsa uelis tijchiuasej.

3. Kej kiijtoua 1 Timoteo 4:12-16, ¿tlake kiiljuik Pablo ma kichiua Timoteo?

³ Kema apóstol Pablo kiijkuiljuilik nopa achtoui amatlajkuiloli, Timoteo ipa tlatekipanouayaya kej ueuejtlakatl, maske nojua eliyaya telpokatl. Ipan nopa tonali Pablo kiiljuik nojua ma kichijto kampeka kuali tlatekipanos (xijpoua 1 Timoteo 4:12-16). Tlaj timoiljuiaj ipan tlen kiiljuik, tikitasej Pablo kinekiyaya Timoteo nojua ma kichiua ome tlamantli. Se, nojua monekiyaya kinextis nopa kuajkuali tlamantli, kej tlaiknelili, kuali tlaneltokas uan kuali monejnemiltis. Uan ome, nojua monekiyaya kuali tlapouas, tetlajtolmakas uan kuali tlamachtis. Ipan ni tlamachtili tikitasej kenijkatsa techpaleuia tlen Timoteo kichijki uan  nojkia tikitasej kenijkatsa tlaj timosentlaliaj tijchiuasej tlen kena tiuelij techpaleuis nojua kuali ma titlaneltokakaj. Nojkia, tikitasej se keski tlamantli tlen uelis tijchiuasej ipan toTeotsij itlanechikol.

4. Kej kiijtoua Filipenses 2:19-22, ¿kenke Jehová tlauel kitekiuik Timoteo?

⁴ Jehová tlauel kitekiuik Timoteo pampa kinextiyaya kuajkuali tlamantli (xijpoua Filipenses 2:19-22). Ika tlen Pablo kiijtok kinextik Timoteo amo moueyimatiyaya, amo tetlauelkauayaya, amo tlatsiuiyaya uan eliyaya temachtli. Nojkia, teikneliyaya uan kitekipachouayaya tlen kinpanoyaya toikniuaj. Yeka, ya tlauel kiikneliyaya Timoteo uan nojua kimakak se keski tekitl tlen ouij (1 Cor. 4:17). Tlaj tojuantij nojkia tijnextiaj nopa kuajkuali tlamantli tlen Jehová kipaktia, ya tlauel techiknelis, uan nojua techtekiuis ipan tlanechikoli (Sal. 25:9; 138:6).

5. 1) ¿Kenijkatsa uelis tijmatisej tlake moneki tijpatlasej ipan tonemilis? 2) ¿Tlake kichiua tosiuaikni uan kiampa kinextia kitekipachoua tlen kinpano sekinok? Xikita tlaixkopinkayotl.

⁵ Ma timosentlalikaj ipan se tlamantli. Ma tikiljuikaj Jehová ma techpaleui tijmatisej tlake nojua uelis tijpatlasej ipan tonemilis uan kiampa kuali tijtekipanosej. Ma tikitakaj tlake kuajkuali tlamantli nojua techpoloua uan ma timosentlalikaj tijnextisej. Uelis timotlatsintokisej: “¿Nojua moneki nijnextis nechtekipachoua tlen kinpano sekinok o nojua moneki nikinpaleuis? ¿Amo nima nikualani uan nima nitetlapojpoljuia?”. Tlaj amo tijmatij kenijkatsa tielij, ma tikiljuikaj se touampo ma techiljui tlake moneki tijpatlasej (Prov. 27:6).

6. ¿Tlake techpaleuis nojua tijnextisej se kuali tlamantli ipan tonemilis?

⁶ Ma tijchiuakaj kampeka tijchiuasej tlen timosentlalijtokej. ¿Kenijkatsa? Ma tijtemokaj tlamachtili tlen nopa kuajkuali tlamantli tlen tijnekij tijnextisej. Se neskayotl, tlaj nojua tijnekij titetlapojpoljuisej, tlauel techpaleuis tlaj tijpouaj ipan Biblia uan timoyoliljuiaj tlen kichijkej se keskij katli tetlapojpoljuijkej uan katli amo. Tlen Jesús kichijki tlauel techpaleuia, pampa ya nochipa tetlapojpoljuik (Luc. 7:47, 48). Ya san mosentlaliyaya ipan tlen ueliyayaj kichiuaj sekinok, uan amo san kiitayaya kema mokuapolouayayaj. Jesús amo elki kej fariseos, katli amo kinpatiitayayaj  maseualmej (Luc. 18:9). Uan kema ya timoyoliljuijtosej ipan tlen kichijkej, ma timotlatsintokikaj: “¿Kenijkatsa nikinita sekinok? ¿Nikita nopa kuajkuali tlamantli tlen kinextiaj?”. Tlaj ouij tijmatij tijtlapojpoljuisej se akajya, kualtiaskia tikijkuilosej nopa kuajkuali tlamantli tlen kinextia, uan timotlatsintokisej: “¿Kenijkatsa kiita Jesús? ¿Kitlapojpoljuiskia?”. Tlaj kiampa tijchiuasej, techpaleuis ma tijpatlakaj kej timoiljuiaj. Maske uelis ouij tijmatisej tijtlapojpoljuisej se akajya katli techchiuilik tlen amo kuali, tlaj tijchiuaj kampeka, techpaleuis nojua ma titetlapojpoljuikaj.

7. Kej kiijtoua Proverbios 22:29, ¿kenijkatsa Jehová kintekiuia katli kimatij kichiuasej se tlenijki?

⁷ Nojkia, uelis timosentlalisej tijyekosej se yankuik tlamantli. Ximoiljui ipan nochi toikniuaj katli tlapaleuiaj kema mochijchiua kali Betel, Kali kampa mochiua uejueyi tlanechikolistli uan kali kampa timosentiliaj. Ni toikniuaj kimatij kichiuasej sejse tekitl pampa tekitikej ininuaya katli ipa kiampa tekititoyaj. Kej nesi ipan tlaixkopinkayomej, toikniuaj uan tosiuaikniuaj momachtiaj uan kiampa kiyekouaj kenijkatsa kikualchijchiuasej se tlenijki kampa titlaueyichiuaj. Jehová, “nopa Tlanauatijketl tlen tlanauatis para nochipa”, uan Jesús, “nopa Tlanauatijketl tlen kinnauatia nochi tlanauatianij”, kintekiuiaj ni toikniuaj ma kichiuakaj ni uan sekinok tekitl (1 Tim. 1:17; 6:15; xijpoua Proverbios 22:29). Yeka, tijnekij titekitisej uan tijtekiuisej tlen tijmatij uan kiampa tijuejkapantlalisej Jehová, uan amo tojuantij (Juan 8:54).

8. ¿Tlake techpaleuis tijmatisej ipan tlake moneki timosentlalisej?

⁸ Ma timosentlalikaj ipan se tlamantli. ¿Ipan tlake uelis timosentlalisej? Ma timokamanaljuikaj ininuaya ueuejtlakamej o iuaya toikni katli tepaxaloua chijchikuasej metstli, uan kiampa techiljuisej tlake tlamantli nojua uelis tijchiuasej. Tlaj techiljuiaj kuali ma titlamachtikaj o kuali ma tikamanaltikaj tlaixpa, ueliskia tikintlatsintokisej tlake tlamantli ueliskia tijpatlasej. Teipa, ma tijchiuakaj tlen techiljuisej. ¿Kenijkatsa uelis tijchiuasej?

9. ¿Tlake uelis techpaleuis tijchiuasej tlen timosentlalijtokej?

⁹ Ma tijchiuakaj kampeka tijchiuasej tlen timosentlalijtokej. Ma timoiljuikaj tijnekij nojua kuali titlamachtisej. ¿Tlake uelis tijchiuasej? Uelis timomachtisej pilamochtsi Ximomachti kuali titlapouas uan kuali titlamachtis. Nojkia, kema ayamo tijpanoltiaj nopa tlamachtili, uelis tikiljuisej se toikni katli kuali tlamachtia ma techtlakakili uan ma techiljui tlake nojua uelis tijchiuasej. Tlaj nima timokualchijchiuaj, techpaleuis kuali ma titlamachtikaj uan toikniuaj kiitasej tijchiuaj se kuali tekitl uan tielij titemachmej (Prov. 21:5; 2 Cor. 8:22).

10. Xikijto ika se neskayotl tlake moneki tijchiuas tlaj ouij tijmati tijchiuas se tlenijki.

¹⁰ Nojua ma tijchijtokaj kampeka kuali tijchiuasej nopa tlamantli tlen tijmatij ouij. Ma tikitakaj tlen kipanok toikni Garry, katli kimatiyaya ouij kuali tlapouas. Toikni kiijtoua maske tlauel pinauayaya tlapouas ipan tlanechikoli, ya nojua kichijki kampeka kiampa kichijtos. Tlauel kipaleuik tlen toikniuaj kiiljuijkej uan tlen kiijtoua amatlajkuiloli, yeka nama kipanoltia tlamachtili ipan tlanechikoli, ueyi tlanechikolistli tlen se tonali uan tlen eyi tonali.

11. Kej Timoteo, ¿tlake techpaleuis nojua ma tijchiuakaj se keski tekitl ipan tlanechikoli?

 ¹¹ ¿Kuali kamanaltiyaya Timoteo tlaixpa uan kuali tlamachtiyaya? Maske Biblia amo kiijtoua, tijmatij kichijki nochi tlen Pablo kiiljuik. Yeka, uelis ika yolik kiyekojtiajki se keski tlamantli uan nopa kipaleuik kuali ma kichiua iteki (2 Tim. 3:10). Tlaj tijyekouaj kuali tijchiuasej se tekitl kej Timoteo, techpaleuis kuali ma tijchiuakaj se tekitl ipan tlanechikoli.

12. ¿Kenijkatsa mitspaleuijtokej?

¹² ¡Tlauel tiyolpakij kema toikniuaj techpaleuiaj! Se neskayotl, kema tiitstokej ipan hospital, tlauel techyolchikaua kema techpaxalouaj toikniuaj Katli kamanaltij ininuaya tepajtianij o Katli kinpaxalouaj kokoyanij ipan hospitales. O kema tikixnamikij tlaouijkayotl, tlauel tijtlaskamatij kema se ueuejtlakatl kikixtia tonali, techtlakakilia uan techyolchikaua. Uan, tlaj monekis ma techpaleuikaj kema tijmachtiaj se akajya, tlauel tiyolpakij kema se precursor katli miak xiuitl kiampa tlatekipanojtok, yaui touaya uan techiljuia tlake nojua moneki tijchiuasej. Jesús kiijtok: “Más pakilistli kiselia tlen temaka se tlenijki, uan axkeja tlen kiselia” (Hech. 20:35). Nochi ni toikniuaj tlauel yolpakij kema techpaleuiaj. Uan tojuantij nojkia tiyolpakisej tlaj kiampa tijchiuasej. Tlaj nojua tijnekij tijtekipanosej Jehová, ¿tlake moneki tijchiuasej?

13. ¿Tlake moneki tikilnamikisej kema timosentlalisej tijchiuasej se tlenijki?

¹³ Ma timosentlalikaj tijchiuasej san se tlamantli. Uelis timoiljuiaj: “Nojua nijnekiskia nijchiuas se keski tekitl ipan tlanechikoli”. Maske kiampa timoiljuiaj, uelis tijmatij ouij tijpeualtisej uan amo tikitaj tlaj ya tijchijkej o amo. Yeka, tlauel techpaleuis tlaj timosentlalisej san ipan se tlamantli. Uelis tikijkuilosej ipan tlake timosentlalijtokej uan tlake techpaleuis tijchiuasej.

14. ¿Kenke kema timosentlalia tijchiuas se tlamantli moneki tias kampa mitstitlanij?

¹⁴ Amo tijmatij tlake techpanos sejse tonali. Yeka, tlauel ipati tikilnamikisej nopa tlamantli kema timosentlalisej tijchiuasej se tlenijki. Se neskayotl, Pablo  kinpaleuijtoya maseualmej tlen Tesalónica ma mochiuakaj Cristo itokilijkauaj, uan uelis kinekiyaya mokauas nopaya uan kiampa kinpaleuiskia toikniuaj katli pejtoyaj tlaneltokaj. Maske kiampa kinekiyaya kichiuas, ikualankaitakauaj amo kikajkej ma mokaua (Hech. 17:1-5, 10). Tlaj mokajtoskia ipan Tesalónica, uelis toikniuaj kinpanoskia tlen amo kuali. Pablo nojua kichijki sekinok tlamantli maske mopatlak inemilis, yeka teipa kititlanki Timoteo ma kinyolchikauati toikniuaj (1 Tes. 3:1-3). Toikniuaj tlen Tesalónica tlauel yolpajkej kema kiitakej Timoteo kinejki yas tlatekipanoti kampa kititlaniskiaj.

15. Xikijto ika se neskayotl, tlake uelis panos ika tlen timosentlalijtokej tijchiuasej tlaj mopatlas tonemilis.

¹⁵ Uelis tijyekosej miak tlamantli ika tlen Pablo kipanok uan tlen kipanok ipan Tesalónica. Maske uelis tijnekij tijchiuasej se tekitl ipan Jehová itlanechikol, kemantika mopatla tonemilis uan ayokmo tiuelij tijchiuaj (Ecl. 9:11). ¿Tlake ueliskia tijchiuasej? Ma tijchiuakaj seyok tekitl tlen kena tiuelij. Kiampa kichijkej Ted uan Hiedi. Kema se tlen inijuantij tlauel mokokok, ayokmo uelkej tlatekipanouaj Betel. Inijuantij tlauel kiikneliyayaj Jehová, yeka nima kiitakej kanke ueliskiaj tlatekipanosej. Achtoui, tlatekipanojkej kej precursores regulares, teipa kej precursores especiales, uan Ted kimachtijkej kenijkatsa ueliskia kinpaxalos tlanechikolmej kema amo itstoskia toikni katli tepaxaloua. Teipa, Ted uan Hiedi ayokmo uelkej kinpaxalouaj tlanechikolmej pampa ya uejueyi eliyayaj. Maske achtoui moyolkokojkej, teipa kiitakej ueliskiaj kichiuasej sekinok tekitl. Ted, kiijtoua: “Tijyekojtokej amo san timosentlalisej ipan se tekitl, nojkia uelis tijchiuasej sekinok ipan Jehová itlanechikol”.

16. ¿Tlake techmachtia Gálatas 6:4?

¹⁶ Amo uelis tijnauatisej nochi tlen pano ipan tonemilis. Yeka, tlauel techpaleuis tlaj tikilnamikisej Jehová amo techpatiita san pampa tijpiaj se tekitl. Nojkia, amo techpaleuis tlaj san tikitasej nopa tekitl tlen kipiaj sekinok. Hiedi kiijtoua: “Tlaj san tikitaj tlen sekinok kichiuaj, ayokmo tijpiasej tlaseuilistli” (xijpoua Gálatas 6:4). Yeka, tlauel ipati tikitasej kenijkatsa nojua titlatekipanojtosej uan tikinpaleuisej sekinok. c

17. ¿Tlake uelis tijchiuasej tlaj tijnekij tijselisej sekinok tekitl?

¹⁷ Tlaj amo tlauel titlapijpiaj yon timotlaneuij tomij, techpaleuis ma tijpiakaj  sekinok tekitl ipan tlanechikoli. Ma timosentlalikaj tijchiuasej tlen techpaleuis teipa ma tijpiakaj sekinok tekitl. Se neskayotl, tlaj tijneki titlatekipanos kej precursor regular, achtoui moneki timochiuas precursor auxiliar. O tlaj tijneki titlatekipanos kej tlapaleuijketl, uelis nojua tlauel titlajtolmoyauas, tikinpaxalos toikniuaj katli uejueyij uan katli mokokouaj. Tlen tijchiuas, mitspaleuis teipa xijpia sekinok tekitl. Maske kiampa titlatekipanos o amo, nochipa ximosentlali tlauel kuali tijtekipanos Jehová (Rom. 12:11).

18. ¿Tlake techmachtia tlen kichijki Beverley? (Nojkia xikita tlaixkopinkayotl).

¹⁸ Nochi uelis timosentlalisej tijchiuasej se keski tekitl maske timoiljuisej ayokmo tiuelij pampa ya tiuejueyij. Ma tikitakaj tlen kichijtok tosiuaikni Beverley, katli kipia 75 xiuitl. Ya tlauel mokokoua yeka amo kuali nejnemi. Uan kema nechka moilnamikiskia Cristo imikilis, ya kinekiyaya nojua tlauel tlajtolmoyauas. ¿Tlake kichijki? Beverley mosentlalik kichiuas tlen kena ueliskia, uan kema kichijki nelnelia tlauel yolpajki. Tlen kichijki kinpaleuik sekinok toikniuaj nojkia ma kinekikaj tlauel tlajtolmoyauasej. Jehová tlauel yolpaki ika tlen kichiuaj toikniuaj katli ya uejueyij, maske uelis kiixnamikij se tlenijki (Sal. 71:17, 18).

19. ¿Ipan tlake uelis timosentlalisej tijchiuasej?

¹⁹ Ma timosentlalikaj tijchiuasej tlen kena tiuelisej, uan nojua ma tijnextikaj kuajkuali tlamantli tlen Jehová kipaktia. Ma tijyekokaj tijchiuasej sekinok tlamantli uan kiampa toTeotsij uelis techtekiuis ipan itlanechikol. Ma tijchiuakaj kampeka tikitasej kenijkatsa tikinpaleuisej toikniuaj. d Tlaj kiampa tijchiuasej Jehová techteochiuas, uan sanse kej Timoteo, sekinok kiitasej kuali titlaneltokaj (1 Tim. 4:15).