1. ¿Ipan tlake tlamantli uelis titekitisej iuaya Jehová?

KEMA Jehová techchijchijki, kinekiyaya ma titekitikaj iuaya kema kichiuaskia tlen mosentlalijtoya. Maske nama titlajtlakolchiuanij, katli kuali tijtekipanouaj toTeotsij uelis mojmostla titekitisej iuaya. Biblia kiijtoua “sansejko titekitij iuaya toTeko” kema titlajtolmoyauaj uan tikinpaleuiaj sekinok ma mochiuakaj Jesús itokilijkauaj (1 Cor. 3:5-9). Nelia se ueyi tlateochiualistli pampa toTeotsij, katli kipia nochi chikaualistli, techkaua ma titekitikaj iuaya ipan se tekitl tlen tlauel kipatiita. Nojkia uelis titekitisej iuaya Jehová ipan sekinok tlamantli. Ipan ni tlamachtili tikitasej kenijkatsa uelis tijchiuasej nopa kema tikinpaleuiaj tochampoyouaj uan toikniuaj, kema kuali titeseliaj uan kema titlapaleuiaj ipan toTeotsij itlanechikol o kema nojua tlauel senkistok titlatekipanouaj (Col. 3:23).

2. ¿Kenke amo kinamiki tikitasej tlen tojuantij tijchiuaj ika tlen sekinok kichiuaj?

² Kema tikixtontiasej ni tlamachtili, amo ma tikitakaj tlen tojuantij tijchiuaj kema tijtekipanouaj Jehová ika tlen sekinok kichiuaj. Moneki tikilnamikisej toxiui, tochikaualis, tlen tiuelij tijchiuaj uan kej tiitstokej amo eli sanse ika sekinok. ToTeotsij kichijki apóstol Pablo ma kiijkuilo ni: “Moneki sejse tojuantij ma timotekitlachilikaj para tikitasej intla iixpa toTeko kuali timonejnemiltiaj o  axtle. Uan intla kuali tonemilis, uajka ma tipakikaj, pero axaka ma paki san pampa kichijtok tlen achi kuali kej se iikni tlen tlajtlakolchijtok” (Gál. 6:4).

3. ¿Kenke uelis tikijtosej katli kinmokuitlauiaj ininchampoyouaj nojkia tekitij iuaya Jehová?

³ Jehová kineki itekipanojkauaj ma kinmokuitlauikaj ininchampoyouaj. Miakej moneki tekitisej uan kiampa kinmakasej ininchampoyouaj tlen ika mopanoltisej. Uan miakej siuamej mokauaj ininchaj pampa moneki kiniskaltisej ininkoneuaj. Uan sekij toikniuaj moneki kinmokuitlauisej inintatauaj katli ya ueuejtixtokej. Nochi ni tlamantli moneki tijchiuasej. Biblia kiijtoua: “Intla se axkineki kimakas itata, o inana, o sekinok ichampoyouaj tlen kimonekilia, uajka ika ya nopa kiijtoua ayok kineltoka toTeko. Uan kichijtok más fiero kej se tlakatl tlen axkema kineltokatok toTeko” (1 Tim. 5:8). Tlaj moneki tijchiuasej se keski tlen ni tlamantli, uajka uelis amo tiuelij tijtekipanouaj Jehová kej tojuantij tijnekiskiaj. Amo ma timotekipachokaj, Jehová kipaktia kema kiita tikinmokuitlauiaj tochampoyouaj (1 Cor. 10:31).

4. ¿Kenijkatsa tetajmej uelis kinextisej kiachtouitlaliaj toTeotsij iTlanauatijkayo, uan tlake pano kema kiampa kichiuaj?

⁴ Tetajmej nojkia tekitij iuaya Jehová kema kinpaleuiaj ininkoneuaj ma mosentlalikaj tlauel kitekipanosej toTeotsij. Kema pano se keski xiuitl, nopa konemej senkistok tlatekipanouaj uan kinkajteuaj ininchampoyouaj. Sekij elij misioneros, sekij elij precursores katli tlatekipanouaj kampa amo itstokej miakej tlajtolmoyauanij uan sekinok tlatekipanouaj Betel. Uan pampa uejka itstokej, ininchampoyouaj amo uelij nochipa kinitaj. Maske kinekiskiaj kinitasej, tetajmej katli kuali tlaneltokaj kinyolchikauaj ininkoneuaj uan kiniljuiaj nojua ma tlatekipanojtokaj. ¿Kenke kiampa kichiuaj? Pampa tlauel yolpakij kimatisej ininkoneuaj kiachtouitlaliaj toTeotsij iTlanauatijkayo (3 Juan 4). Miakej tetajmej uelis kiyolmatij kej Ana, katli kiijtok kitlanejtijtoya Jehová ikone Samuel. Nelia tlauel kuali kema tetajmej kiitaj kej se tlateochiualistli kema kiampa tekitij iuaya toTeotsij (1 Sam. 1:28).

5. ¿Kenijkatsa uelis titlapaleuisej ipan tlanechikoli? (Xikita nopa achtoui tlaixkopinkayomej).

⁵ ¿Tlake uelis tijchiuasej tlaj amo tlauel moneki ma tikinpaleuikaj tochampoyouaj? Uelis tikinpaleuisej katli ya uejueyij, katli mokokouaj o katli kinpoloua sekinok tlamantli. Nojkia uelis tikinpaleuisej katli kinmokuitlauiaj ni toikniuaj. ¿Ueliskia timoiljuisej ipan totlanechikol uan tikitasej ajkia moneki ma tijpaleuikaj? Ma timoiljuikaj se tosiuaikni kimokuitlauia itata katli ya ueuejtixtok. ¿Ueliskia tojuantij tiitstosej iuaya itata uan kiampa tosiuaikni uelis kichiuas sekinok tlamantli? Nojkia uelis tikiljuisej se akajya tojuantij tijuikasej tlanechikoli, tijuikasej hospital kema yas kiitati se tlen ichampoyouaj, tijtlakouisej o seyok tlamantli tlen monekis. Kiampa titekitisej iuaya Jehová kema ya kinankilis tlen kitlajtlaniaj kema momaijtouaj (xijpoua 1 Corintios 10:24).

6. ¿Tlake kiijtosneki kuali titeselisej?

⁶ Katli tekitij iuaya toTeotsij nojkia tlauel kuali teseliaj. Ipan Escrituras Griegas Cristianas, nopa tlajtoli “inkinselisej ika kuali” kiijtosneki tijpiasej kuali toyolo ininuaya “tlen uejka euanij” o katli amo tikinixmatij (Heb. 13:2). Ipan Biblia onka miak tlapoualistli tlen techmachtia kuali ma titeselikaj (Gén. 18:1-5). Kualtiaskia timomatisej nochipa tikinpaleuisej sekinok, maske sekij amo elij “toikniuaj ipan Cristo” (Gál. 6:10).

7. ¿Kenke moneki kuali tikinselisej toikniuaj katli senkistok tlatekipanouaj uan kipaxalouaj totlanechikol?

⁷ ¿Uelis titekitisej iuaya Jehová kema kuali  tikinselisej toikniuaj katli senkistok tlatekipanouaj uan kipaxalouaj totlanechikol? (Xijpoua 3 Juan 5, 8). Kema techpaxalouaj, techpaleuia nochi ma timoyolchikauakaj (Rom. 1:11, 12). Ma tikitakaj tlen kipanok se toikni katli itoka Olaf. Uejkajkia, kema eliyaya telpokatl, ipan itlanechikol kinpaxalok toikni katli tepaxaloua chijchikuasej metstli, uan amo kana mokauaskia. Nopa toikni amo mosiuajtijtoya. Olaf kintlajtlanik itatauaj, katli amo kitekipanouayayaj Jehová, tlaj ueliskia mokauas ininchaj. Itatauaj kinejkej ma mokaua nopaya uan kiiljuijkej Olaf ya kochiskia ipan sofá. Tlauel kuali pampa kiampa kichijki. Olaf kiilnamiki tlen panok: “Toikni uan na mojmostla ijnalok timeuayayaj uan tlauel techpaktiyaya tikamanaltisej tlen se keski tlamantli kema titlakuayayaj. Pampa tlauel nechyolchikajki, nojkia nijnejki senkistok nitlatekipanos”. Ipan 40 xiuitl tlen panotok, Olaf tlatekipanojtok kej misionero ipan miak altepemej.

8. ¿Kenke moneki tijnextisej kuali toyolo ininuaya sekinok maske achtoui amo techtlaskamatij? Xikijto se neskayotl.

⁸ Maske achtoui amo kipatiitasej tlen tijchiuaj, ika miak tlamantli uelis tijnextisej tijpiaj kuali toyolo ininuaya katli amo tikinixmatij. Ma tikitakaj se neskayotl. Ipan España, se tosiuaikni kimachtiyaya Yésica, se siuatl katli eua Ecuador. Kema kimachtijtoya, Yésica pejki tlauel mochokilia. Tosiuaikni kitlajtlanik tlake kipanoyaya, uan ya kiiljuik kema nojua itstoya Ecuador, se tonali amo tleno kipixtoya tlen kikuaskia. San pilatsi kimakayaya ipilsiuapil. Kema kinauajtoya uan kinekiyaya kikochtekas, pejki momaijtoua. Se kentsi teipa, omej tosiuaikniuaj kikaltajtakanitoj. Yésica tlauel amo kuali kinnojnotski uan kitsayanki nopa pilamochtsi tlen kimakayayaj. Uan kinkualankailjuik: “¿Ya ni nijmakas nopilsiuapil ma kikua?”. Maske tosiuaikniuaj kinekiyayaj kiyoltlalisej, ya nojua tlauel kualanki. Teipa, inijuantij kikauilitoj kaltentipa se chikiuitl tlen kipixtoya tlakualistli. Nama, tlauel yolpaki kema kiilnamiki kenijkatsa nopa tosiuaikniuaj kinextijkej kuali ininyolo iuaya. Uan nojkia moyolkokoua pampa toTeotsij kena kinankilik uan ya amo kinejki kitlakakilis. Yésica mosentlalik kitekipanos Jehová, uan uelki kichijki nopa pampa tosiuaikniuaj kipaleuijkej (Ecl. 11:1, 6).

9, 10. 1) Ipan altepetl Israel, ¿kema kintlajtlanijkej israeleuanij ma tlapaleuikaj? 2) ¿Ipan tlake tekitl uelis titlapaleuisej ipan tlanechikoli?

⁹ Uejkajkia, ipan altepetl Israel miakpa kintlajtlanijkej israeleuanij ma tlapaleuikaj (Éx. 36:2; 1 Crón. 29:5; Neh. 11:2). Ipan ni tonali, ika tlen tiuelij tijchiuaj, ika totonal uan totomij uelis tikinpaleuisej toikniuaj. Tlaj tijchiuasej, tlauel tiyolpakisej uan tijselisej miak tlateochiualistli.

¹⁰ ToTeotsij iTlajtol nojkia kiniljuia tlakamej ma tekitikaj iuaya Jehová, uan yeka kinyolchikaua ma tlatekipanokaj kej tlapaleuianij uan ueuejtlakamej (1 Tim. 3:1, 8, 9; 1 Ped. 5:2, 3). Katli kichiuaj nopa nelia kinekij kinpaleuisej toikniuaj kuali ma tlaneltokakaj uan nojkia kinpaleuisej ipan sekinok tlamantli (Hech. 6:1-4). ¿Techtlatsintokijtokej ueuejtlakamej tlaj tijnekij titlapaleuisej kej tlaselianij, titemakasej amatlajkuiloli o tikitasej kanke titlajtolmoyauasej, titlapaleuisej kema kikualchijchiuaj kali kampa timosentiliaj o ipan sekinok tekitl? Katli kichijtokej ni tekitl uelis techiljuisej kenijkatsa se akajya tlauel yolpaki kema kinpaleuia sekinok ika nopa piltekitsitsij.

11. ¿Kenijkatsa kipaleuik se tosiuaikni pampa mouampojchijki ininuaya katli kinixmatki kema kichijchiuayayaj kali kampa timosentiliaj?

¹¹ Katli tlapaleuiaj ipan se keski tekitl tlen kichiua toTeotsij itlanechikol, mouampojchiuaj ininuaya sekinok toikniuaj katli amo  kinixmatiyayaj. Ma tikitakaj tlake kipanok Margie, se tosiuaikni katli tlatekipanojtok 18 xiuitl kema mochijchiua yajyankuik kali kampa timosentiliaj. Ipan nochi nopa xiuitl, kinmachtijtok miakej tosiuaikniuaj katli nojua ichpokamej kenijkatsa kuali kichiuasej ininteki. Moiljuia ipan nopa tonali kema kinpaleuia, tlauel kuali tlaj omej moyolchikauaj (Rom. 1:12). Uan kema kiixnamijki tlaouijkayotl, nochi iuampoyouaj tlauel kiyolchikajkej. ¿Ipa titlapaleuijtokej kema mochijchiua se yankuik kali kampa timosentiliaj? Uelis titlapaleuisej maske amo tijmatij kenijkatsa mochiua se tekitl.

12. ¿Kenijkatsa uelis titlapaleuisej kema se tlenijki kintlasojsoljuilia toikniuaj?

¹² Kema se tlenijki tetlasojsoljuilia, toTeotsij itekipanojkauaj uelis kinextisej tekitij iuaya Jehová kema kinpaleuiaj toikniuaj ika miak tlamantli, kej kema temakaj tomij (Juan 13:34, 35; Hech. 11:27-30). Nojkia uelis tlapaleuisej kema kinkualchijchiuilisej ininchaj. Gabriela, se tosiuaikni katli eua Polonia, ayokmo kipixki ichaj pampa tlauel tlatemik kampa itstoya. Tlauel kuali kiyolmatki kema toikniuaj tlen sekinok tlanechikoli katli nechka itstoyaj yajkej kipaleuiaj. Ya kiijtoua: “Amo nijneki nikilnamikis tlake nijpolok, pampa san eli tlamantli tlen nempoliui. Nijneki nikijtos tlake nijpixki teipa. Tlen nechpanok nechnextilik nelia eli se ueyi tlateochiualistli tiitstosej ipan tlanechikoli uan nopa kichiua tlauel ma tiyolpakikaj”. Miakej toikniuaj kiijtouaj nojkia tlauel kuali kiyolmatij pampa kinpaleuijtokej kema se tlenijki kintlasojsoljuilijtok. Uan katli tekitij iuaya Jehová uan kinpaleuiaj sekinok kema pano nopa, nelia tlauel yolpakij (xijpoua Hechos 20:35; 2 Corintios 9:6, 7).

13. ¿Kenijkatsa techpaleuia nojua tlauel ma tikiknelikaj Jehová kema titlapaleuiaj? Xikijto se neskayotl.

¹³ Se tosiuaikni katli itoka Stephanie uan sekinok tlajtolmoyauanij tlauel yolpajkej kema kinpaleuijkej sekinok toikniuaj katli asitoyaj Estados Unidos pampa ipan ininaltepe onkayaya tlauilankayotl. Kitemojkej uan kikualchijchijkej kampa mokauaskiaj toikniuaj. Ya kiijtoua: “Tlauel kuali tijyolmatkej kema tikitakej kenijkatsa yolpakiyayaj  uan tetlaskamatiliyayaj pampa kiitakej kenijkatsa toikniuaj tlauel kinikneliaj. Maske moiljuiaj san tojuantij tikinpaleuijkej, inijuantij nojkia tlauel techpaleuijkej. Pampa moikneliaj, sansejko itstokej, kuali tlaneltokaj uan pampa motemachiaj ipan Jehová, kichijtok nojua tlauel ma tikiknelikaj toTeotsij. Uan nopa techpaleuijtok ma tijpatiitakaj nochi tlen Jehová itlanechikol techmakatok”.

14, 15. 1) ¿Tlake kiijtok tlajtolpanextijketl Isaías? 2) ¿Kenijkatsa uelis tijchiuasej kej Isaías?

¹⁴ ¿Techpaktiskia nojua tlauel tijtekipanosej o titekitisej iuaya Jehová? ¿Tijnekiskiaj tiasej kampa toTeotsij itlanechikol kiita nojua monekij tlajtolmoyauanij? Maske amo moneki tiasej uejka uan kiampa tijnextisej titemakaj tlen tijpiaj, miakej toikniuaj kena uelij yauij uejka uan kiampa nojua tlauel kitekipanouaj Jehová. Inijuantij kiijtouaj sanse kej Isaías kema Jehová tlatsintokak: “¿Ajkeya nijtitlanis keja se tlayolmelajketl kampa notlakauaj? ¿Ajkeya yas para tojuantij?”. Uan Isaías tlanankilik: “Na nias. Na xinechtitlani” (Is. 6:8). Tlaj tiuelij tijchiuasej nopa, ¿nojkia tijnekij titlanankilisej kej Isaías kema monekis ma titlapaleuikaj? ¿Tlake tekitl moneki ma mochiua ipan ni tonali?

¹⁵ Tijmatij tlauel moneki titlajtolmoyauasej uan tikinpaleuisej sekinok ma mochiuakaj Jesús itokilijkauaj. Jesús kiijtok: “Itstokej miak tlakamej tlen kichiaj para kikakisej notlajtol, pero san axmiakej tlakamej para yasej kiniljuitij. Eltok keja onka se ueyi pixkistli pero san itstokej se omej tlatekipanouanij para kisentilisej. Uajka xijtlajtlanikaj toTeko ma kintitlani más tlatekipanouanij ma teiljuikaj itlajtol pampa nopa pixkistli iaxka” (Mat. 9:37, 38). ¿Uelis titlatekipanosej kej precursores kampa monekij tlajtolmoyauanij? ¿Uelis tijpaleuisej seyok toikni kiampa ma tlatekipano? Miakej toikniuaj kinekij kinextisej tlauel kinikneliaj Jehová uan maseualmej, yeka tlatekipanouaj kej precursores kampa monekij tlajtolmoyauanij. ¿Timoiljuiaj ipan sekinok tlamantli tlen uelis tijchiuasej uan kiampa senkistok titlatekipanosej? Tlauel tiyolpakisej tlaj kiampa tijchiuasej.

16, 17. ¿Tlake sekinok tlamantli uelis kichiuasej katli kinekij nojua tlauel kitekipanosej Jehová?

¹⁶ ¿Tijnekiskiaj titlatekipanosej se keski metstli o san se keski tonali ipan Betel o kampa mochijchiua kali kampa timosentiliaj? Nochipa monekij toikniuaj katli kinekij tlatekipanosej ipan tlen ueli tekitl tlen kinmakasej. Uelis monekis ma titlapaleuikaj ipan se tekitl tlen tojuantij amo timomajtokej tijchiuaj o tlen amo kema tijchijtokej. Maske tijchiuasej tlen ueli tekitl, Jehová tlauel kipatiita kema ika nochi toyolo tijchiuaj se tekitl tlen moneki (Sal. 110:3).

¹⁷ Tlaj tijnekij nojua tijyekosej kenijkatsa kuali tijtekipanosej Jehová, uelis teipa tiasej Kampa kinmachtiaj tlajtolmoyauanij o Escuela para Evangelizadores del Reino. Nopaya kinmachtiaj toikniuaj tlakamej uan siuamej katli senkistok tlatekipanouaj, kiampa toTeotsij itlanechikol nojua tlauel kintekimaka. Katli yauij momachtiaj nopaya moneki kiselisej ika nochi ininyolo tlen ueli tekitl tlen kinmakasej kema kisasej tlen nopa escuela. ¿Tijnekiskiaj tiasej ipan nopa escuela uan kiampa nojua tlauel titlatekipanosej o tijselisej sekinok tekitl? (1 Cor. 9:23).

18. ¿Tlake tijselisej tlaj mojmostla titekitisej iuaya Jehová?

¹⁸ Katli tijtekipanouaj Jehová tijnekij titemakasej tlen tijpiaj ika nochi toyolo, tijnextisej titeikneliaj, tijpiaj kuali toyolo ininuaya sekinok uan tikinpaleuisej. Ni kichiua kuali ma tijyolmatikaj, ma tijpiakaj pakilistli uan tlaseuilistli (Gál. 5:22, 23). Maske amo nochi sanse kej tiitstokej, nochi uelis tiyolpakisej tlaj titemakasej tlen tijpiaj kej Jehová kichiua uan tlaj titekitisej iuaya (Prov. 3:9, 10).