1-3. ¿Kenke kikajkej ininteki miakej toikniuaj katli senkistok tlatekipanouayayaj?

ROBERT uan Mary Jo kiijtouaj: “Kema 21 xiuitl titlatekipanojtoyaj kej misioneros, totatauaj mokokojkej. Tlauel tiyolpakiyayaj kema kiampa titlatekipanouayayaj. Maske nojkia techpaktiyaya tikinmokuitlauisej totatauaj, tlauel timoyolkokojkej kema tijkajkej kampa tiitstoyaj pampa ya timochanmajtoyaj”.

² William uan isiua Terrie, kiijtouaj: “Kema tijmatkej ayokmo ueliskia titlakuepilisej kampa titlatekipanouayayaj pampa timokokouayayaj, pejki timochokiliaj. Tijmatkej amo kema ueliskia tijchiuasej tlen tlauel tijnekiyayaj, tijtekipanosej Jehová ipan seyok altepetl”.

³ Alexéi kiijtoua: “Maske kuali tijmajtoyaj katli techkualankaita kinekiyayaj kitsakuasej kali Betel kampa nitlatekipanouayaya, tlauel amo kuali nijyolmatki kema kiampa panok uan monejki tijkauasej Betel”.

4. ¿Tlake tlajtlanili tijnankilisej ipan ni tlamachtili?

⁴ Amo san inijuantij kiampa kinpanotok, pampa tlauel miakej toikniuaj katli itstoyaj Betel uan sekinok toikniuaj katli senkistok tlatekipanouayayaj nojkia monejki momatisej kichiuasej seyok tlamantli. * Uelis nopa toikniuaj tlauel ouij kimatkej kikauasej ininteki, katli tlauel kinpaktiyaya kichiuasej uan tlauel kipatiitayaya. ¿Tlake uelis kinpaleuis? ¿Kenijkatsa uelis tikinpaleuisej? Kej monankilis ni tlajtlanili, nochi tlauel techpaleuis kema mopatlas se keski tlamantli ipan tonemilis.

5. ¿Kenijkatsa tijyolmatij kema tijkauaj kampa titlatekipanouayayaj?

⁵ Kema titlatekipanouaj ipan Betel o ipan sekinok tekitl ipan toTeotsij itlanechikol, timomatij kampa tiitstokej uan tikinikneliaj maseualmej katli nopaya itstokej. Yeka, tlauel timoyolkokouaj kema moneki tijkauasej tlen tijchiuaj. Tikintemouaj katli mokauaj uan techtekipachoua kenijkatsa itstokej, uan nojua tlauel timotekipachouaj kema tikinkajteuaj pampa peuaj tetlatsakuiltiaj kampa tiitstoyaj (Mat. 10:23; 2 Cor. 11:28, 29). Uan nojkia ouij tijmatij tijpeualtisej titlatekipanosej kampa momajtokej kichiuasej seyok tlamantli, uan nojkia kiampa pano maske titlakuepiliaj ipan toaltepe. Robert uan Mary Jo kiijtouaj: “Ayokmo timomatiyayaj tijchiuasej se keski tlamantli kej momajtoyaj kichiuaj ipan toaltepe uan amo timomatiyayaj titlajtolmoyauasej ipan totlajtol. Tijyolmatiyayaj kejuak amo nopaya titlakatkej”. Nojkia, uelis kemantika amo techaxilis totomij. Uan yeka uelis timotekipachosej uan timokuesosej. ¿Tlake techpaleuis kema kiampa techpanos?

6. ¿Kenijkatsa timonechkauiaj ika Jehová?

⁶ Ma timonechkauikaj ika Jehová (Sant. 4:8). ¿Kenijkatsa tijchiuaj ni? Kema timotemachiaj ipan ya, katli “technankilia kema timomaijtouaj” (Sal. 65:2). Uan Salmo 62:8 kiijtoua: “Xijpouilikaj [o xikiljuikaj] nochi tlen eltok ipan inmoyolo”. Jehová amo san uelis kichiuas tlen titlajtlaniaj, ya uelis kichiuas miak tlamantli tlen amo timoiljuiaj (Efes. 3:20). Jehová amo san kichiua tlen tikiljuiaj kema timomaijtouaj. Ya uelis kisenkauas tokuesoljuaj ika tlamantli tlen amo timoiljuiaj; tlamantli tlen amo kema tijchiaj.

7. 1) ¿Tlake techpaleuis ma timonechkauikaj ika Jehová? 2) Kej kiijtoua Hebreos 6:10-12, ¿tlake panos tlaj nojua tijtekipanojtosej Jehová?

⁷ Nojkia tlauel techpaleuis ma timonechkauijtokaj ika Jehová tlaj mojmostla tijpouasej Biblia uan timoyoliljuisej ipan tlen tijpouaj. Se toikni katli eliyaya misionero, kiijtoua: “Moneki nochipa timomachtijtosej ininuaya tochampoyouaj uan timomachtisej tlen moixtoma ipan tlanechikoli, sanse kej tijchiuayayaj kampa titlatekipanouayayaj”. Ma tijchiuakaj kampeka tlauel titlajtolmoyauasej ininuaya toikniuaj tlen tlanechikoli kampa nama tiitstokej. Jehová amo kinilkaua katli kitekipanouaj uan amo kitlauelkauaj, maske uelis nama ayokmo uelij kichiuaj kej achtouia (xijpoua Hebreos 6:10-12).

8. ¿Kenijkatsa techpaleuia 1 Juan 2:15-17 amo ma tijnekikaj titlapijpiasej?

 ⁸ Amo tijnekisej titlapijpiasej. Amo kema ma tijkauakaj sekinok tlamantli tlen onka kampa Satanás tlanauatia ma techtsakuili tijtekipanojtosej Jehová (Mat. 13:22). Amo ma tikintlakakilikaj touampoyouaj, tochampoyouaj o sekinok maseualmej katli techiljuiaj ma tijtemokaj se tekitl kampa kuali techtlaxtlauisej (xijpoua 1 Juan 2:15-17). Ma timotemachikaj ipan Jehová, pampa “kema más moneki”, ya uelis techmakas tlen techpaleuis kuali ma titlaneltokakaj, kuali ma tijyolmatikaj uan ma tijpiakaj tlen ika timopanoltisej (Heb. 4:16; 13:5, 6).

9. Kej kiijtoua Proverbios 22:3, 7, ¿kenke amo kinamiki timotlaneuisej tomij tlaj amo moneki, uan tlake techpaleuis kuali ma tijtlapejpenikaj tlen tijchiuasej?

⁹ Amo ximotlaneui tomij tlaj amo moneki (xijpoua Proverbios 22:3, 7). Kema moneki tiitstotij sejkanok, kisa tlauel patiyo, uan yeka uelis tijnekisej timotlaneuisej miak tomij. Yeka, amo ma titlakijkixtikaj pampa teipa ouij tijmatisej tikixtlajtiasej nopa tlamantli tlen amo monekiyaya. Nojkia, kema mokokoua se tlen tochampoyouaj uan moneki tijmokuitlauijtosej, uelis tijmatisej ouij timoiljuisej keski tomij monekis ma timotlaneuikaj. Kema techpanos ni, moneki tikilnamikisej tlaj timomaijtosej ika Jehová, techpaleuis kuali ma tijtlapejpenikaj tlake tijchiuasej. Jehová techmakas tlaseuilistli uan nopa techpaleuis kuali ma timoiljuikaj tlake tijchiuasej (Filip. 4:6, 7; 1 Ped. 5:7).

10. ¿Tlake techpaleuis ma tikinpiakaj sekinok touampoyouaj?

¹⁰ Ma timouikakaj kuali ininuaya touampoyouaj uan tochampoyouaj. Ma tikiniljuikaj touampoyouaj nochi tlen tijyolmatij uan tlen techpano, uan nojua kiampa kinamiki tijchiuasej tlaj nojkia kinpanok kej tojuantij. Nopa kichiuas kuali ma tijyolmatikaj (Ecl. 4:9, 10). Maske nojua kuali timouikaj ininuaya touampoyouaj katli tikinkajtejkej, moneki tikintemosej sekinok touampoyouaj. Yeka, moneki tojuantij ma timouampojchiuakaj ininuaya sekinok. Ma tikiniljuikaj tlake tlateochiualistli tijselijtokej, kiampa kiitasej tlauel tiyolpakij pampa tijtekipanouaj Jehová. Maske sekij toikniuaj amo kikuamachilisej kenke tlauel techpaktia senkistok titlatekipanosej, sekij tlauel kinpaleuis tlen tijchiuaj uan uelis kinekisej mouampojchiuasej touaya. Maske kiampa tijchiuasej, moneki timomokuitlauisej uan kiampa amo tikamanaltisej san tlen tojuantij o san tlen tijchijtokej ipan Jehová itlanechikol, yon tikijtosej se tlenijki tlen amo techpaleuis.

11. ¿Tlake techpaleuis nojua ma tiyolpakikaj tiitstosej iuaya tosiua o toueue?

¹¹ Tlaj tijkajkej kampa titlatekipanouayayaj pampa tosiua o toueue mokokoua, amo ma tijtlajtlakoltikaj. Uan tlaj tojuantij timokokouaj, amo ma timoiljuikaj totlajtlakol yon ma timoiljuikaj tijtsakuilijkej toueue o tosiua. Ma tikilnamikikaj  ‘sanse totlakayo’ uan tijtenkauilijkej Jehová nochipa timomokuitlauiskiaj ipan nochi tonemilis (Mat. 19:5, 6). Uan tlaj tijpixkej se pilkonetsi maske amo timoiljuijtoyaj tlaj tijpiaskiaj, ma tijnextilikaj tokone san ya tlauel tijpatiitaj uan amo tlen tijkajkej. Nochipa ma tikiljuikaj Jehová tlauel techteochijki kema tijpixkej (Sal. 127:3-5). Nojkia ma tikiljuikaj kenijkatsa techpanok yejyektsitsij tlamantli kema senkistok titlatekipanouayayaj, pampa nopa uelis kiyololinis nojkia ma tlatekipano kej tojuantij tijchijkej.

12. 1) ¿Kenijkatsa uelis tikinpaleuisej katli senkistok tlatekipanouaj ipan totlanechikol? 2) ¿Kenijkatsa uelis tikinpaleuisej katli kinmakaj seyok tekitl?

¹² Ipan miak tlanechikoli, nochi toikniuaj kiitaj kenijkatsa kinpaleuisej katli senkistok tlatekipanouaj uan kiampa uelis nojua nopaya tlatekipanojtosej. Uan nojkia sejse toikniuaj kichiuaj kampeka ininselti kiitasej kenijkatsa kinpaleuisej. Kinyolchikauaj nojua ma tlatekipanojtokaj, kinmakaj tomij o sekinok tlamantli tlen kitekiuisej, o inijuantij kinmokuitlauiliaj ininchampoyouaj. ¡Nelia tlauel kuali nochi tlen kichiuaj! (Gál. 6:2). ¿Uan tlake uelis tijchiuasej tlaj ipan totlanechikol asiki se toikni katli senkistok tlatekipanouayaya? Amo ma timoiljuikaj kipatlakej kampa tlatekipanouayaya pampa amo kuali kichijki iteki o pampa kichijki tlen amo kuali. * Kinamiki ma tijyolchikauakaj pampa kikajki ma kipatlakaj. Ma tijselikaj ika miak tlaiknelili uan ma tikiljuikaj tlauel kuali tlen kichijtok, maske nama uelis ayokmo sanse tlatekipanos pampa mokokoua. Ma tijchiuakaj kampeka tikixmatisej, uan ma tijyekokaj nochi tlen ya kimati, tlen momachtijtok uan tlen kuali kichiua.

13. ¿Kenijkatsa uelis tijpaleuisej se toikni katli asi ipan totlanechikol?

 ¹³ Kema asis se toikni, uelis kitemos kanke itstos, kenijkatsa nemis, kitemos tekitl o sekinok tlamantli tlen kitekiuis. Tojuantij uelis tikiljuisej kanke tlakouas, tlake tlajtlanij tekichiuanij uan kenijkatsa kiixtlauasej o kikouasej se keski tlamantli. Uan tlauel moneki ma tijkuamachilikaj tlen ya kiyolmati uan amo tijtekneltiitasej. Uelis ya o se tlen ichampoyouaj kipia se kokolistli. O uelis mokuesoua pampa mijki se akajya katli tlauel kiikneliyaya. * Uan maske amo tleno kiijtoua, uelis tlauel moyolkokoua pampa kintemoua iuampoyouaj. Maske panos miak tonali, kemantika nojua amo kuali kiyolmatis o nojua mokuesos.

14. ¿Kenijkatsa toikniuaj kipaleuijkej se tosiuaikni ma momati kampa nama tlajtolmoyauayaya?

¹⁴ Tlauel kipaleuis ma momati kampa nama itstok tlaj titlajtolmoyauasej iuaya uan tlaj tijyolchikauasej ika tlen tijchiuaj. Se tosiuaikni katli miak xiuitl tlatekipanok ipan seyok altepetl, kiijtoua: “Kampa achtoui nitlatekipanouayaya, mojmostla nikinmachtiyaya maseualmej. Uan kampa teipa niasito, ouij nijmatiyaya nitepouilis se texto o nitenextilis se video. Maske nechpanoyaya nopa, toikniuaj tlen tlanechikoli nechtlaneuiyayaj kema yauiyayaj kinpaxalouaj o kinmachtiaj maseualmej. Kema nikitayaya toikniuaj amo majmauiyayaj uan ika pakilistli kinmachtiyayaj maseualmej katli teipa nojkia kitekipanoyayaj toTeotsij, nechpaleuik ma nikita kej kinamiki kampa nama nitlajtolmoyauayaya. Nijyekok kenijkatsa nikamanaltis ininuaya maseualmej. Nochi nopa tlamantli kichijki sampa ma niyolpaki”.

15. ¿Tlake techpaleuis ma tiyolpakikaj maske ayokmo tijchiuaj tlen achtouia tijchiuayayaj?

¹⁵ Uelis tiyolpakisej ipan se yankuik tekitl tlen techmakasej. Amo ma timoiljuikaj amo kuali tijchijkej nopa tekitl tlen tijpixtoyaj o nama ayokmo tlauel topati. Ma tijchiuakaj kampeka tikitasej kenijkatsa Jehová techpaleuia uan nojua ma titlajtolmoyajtokaj. Ma tijchiuakaj kej achtoui Cristo itokilijkauaj, maske kampa ueli itstoyaj,  “teiljuijkej itlajtol toTeko” (Hech. 8:1, 4). Tlaj nojua tlauel titlajtolmoyajtosej, uelis panos se keski kuajkuali tlamantli. Ma timoiljuikaj ipan se keskij precursores tlen kinkixtijkej ipan se ueyi altepetl uan yajkej ipan seyok kampa tlauel monekiyayaj tlajtolmoyauasej ipan inintlajtol. San ipan se keski metstli, kampa ueli pejkej mosentiliaj se keskij maseualmej katli nojkia kamanaltiyayaj nopa tlajtoli pampa precursores kinkamanaljuijtoyaj.

16. ¿Tlake techpaleuis ma tiyolpakikaj ipan nopa yankuik tekitl tlen tijchiuaj?

¹⁶ “Nopa pakilistli tlen techmaka toTeko, techmaka chikaualistli” (Neh. 8:10). Maske tlauel timomajtokej kampa titlatekipanouaj uan tijpatiitaj, amo ya nopa kinamiki kichiuas ma tiyolpakikaj, kinamiki tiyolpakisej pampa kuali timouampojchijtokej iuaya Jehová. Uajka, nojua kuali ma timouikakaj iuaya Jehová uan ma timotemachijtokaj ya techmakas tlalnamikilistli, techyakanas uan techpaleuis. Ma tikilnamikikaj pejki tijpatiitaj kampa titlatekipanouayayaj pampa timosentlalijkej ika nochi toyolo tikinpaleuisej maseualmej. Jehová techpaleuis sampa kiampa ma tijyolmatikaj kampa nama tiitstokej tlaj tijchiuasej nopa tekitl ika nochi toyolo (Ecl. 7:10).

17. ¿Tlake moneki tikilnamiktosej tlen nopa tekitl tlen nama tijpiaj?

¹⁷ Moneki tikilnamiktosej amo kema tlamis tijtekipanosej Jehová, uan se tekitl tlen techmakaj ipan itlanechikol amo uejkauas. Ipan Xochimili, uelis ayokmo tijchiuasej nopa tekitl tlen nama tijchiuaj. Alexéi, katli tikijtojkej achtouia, moiljuia nochi tlen nama kichiua kipaleuis teipa. Ya kiijtoua: “Maske nijmajtoya Jehová nelia itstok uan nopa Xochimili nelia eltos, nojua nimoiljuiyaya uejkauaskia se kentsi. Nama nikita Jehová itstok noixmelak uan nijyolmati nechka niitstos ipan nopa yankuik Tlaltipaktli” (Hech. 2:25). Maske nojua tijchiuaj o ayokmo se tekitl, nojua ma timonechkauijtokaj ika Jehová. Ya amo kema techtlauelkauas; maske kampa ueli tiitstosej, nochipa techpaleuis ma tiyolpakikaj tlaj tijchijtosej kampeka nojua tijtekipanojtosej ika nochi toyolo (Is. 41:13).