1. ¿Tlake kichiuaj miakej toikniuaj uan kiampa nojua tlatekipanosej?

 NECHKA tlamis tlen amo kuali uan tijpiaj miak tekitl (Mat. 24:14; Luc. 10:2; 1 Ped. 5:2). Nochi tijnekij tlauel tijtekipanosej Jehová. Yeka sekij mosentlalijtokej tlatekipanosej kej precursores, ipan Betel o kampa kichijchiuaj kali kampa titlaueyichiuaj. Uan sekinok toikniuaj kichiuaj kampeka tlatekipanosej kej tlapaleuianij o ueuejtlakamej (1 Tim. 3:1, 8). Jehová tlauel yolpaki kema kinita nochi toikniuaj mosentlalijtokej tlatekipanosej (Sal. 110:3; Is. 6:8).

2. ¿Kenijkatsa uelis tijyolmatisej tlaj amo tiuelij titlatekipanouaj kampa tijnekiskiaj?

² Tlaj ya panotok se keski xiuitl uan ayamo tijchiuaj tlen timosentlalijtokej, uelis kichiuas ma timoyolkokokaj. Uelis nojkia kiampa tijyolmatij pampa amo tiuelij tijchiuaj se keski tlamantli ipan Jehová itlanechikol, uelis pampa ya tiuejueyij o techtsakuilia sekinok tlamantli (Prov. 13:12). Kiampa kipanok Melissa, * katli kipaktijtoskia tlatekipanos ipan Betel o yas Kampa kinmachtiaj katli senkistok tlatekipanouaj. Ya kiijtoua: “Ayokmo uelis kiampa nitlatekipanos pampa ya nijpia miak xiuitl. Yeka kemantika nimoyolkokoua pampa nijmati ayokmo kiampa uelis nijchiuas”.

3. ¿Tlake moneki kichiuasej se keskij toikniuaj uan kiampa kichiuasej tlen mosentlalijtokej?

³ Maske itstokej se keskij telpokamej katli kipiaj chikaualistli, tlaj kinekij kichiuasej se keski tekitl ipan tlanechikoli achtoui moneki kuali tlaneltokasej uan kinextisej se keski kuajkuali tlamantli. Maske tlauel tlalnamikij, mosentlalijtokej uan tlauel yolpakij, uelis nojua moneki kinextisej kipiaj ininyolo, kuali kichiuasej ininteki o tlatlepanitasej. Tlaj kichiuaj kampeka kinextisej kuajkuali tlamantli, uelis kiselisej  se tekitl kema amo moiljuijtokej. Ma tikitakaj tlen kipanok Nick. Kema kipixtoya 20 xiuitl tlauel mokuesok pampa amo kitekimakakej kej tlapaleuijketl. Ya kiijtoua: “Nimoiljuik amo nijchiuayaya kej kinamiki se tlamantli”. Maske kiampa kipanok, nochipa kichijki kampeka mosentlalis nojua kuali tlatekipanos uan kichiuas tlen kena ueliyaya. Nama tlatekipanoua kej se tlen Katli kiyakanaj Betel.

4. ¿Tlake tikitasej ipan ni tlamachtili?

⁴ ¿Timoyolkokouaj pampa amo tiuelij tijchiuaj tlen timosentlalijtokej? Tlaj kiampa techpano, ma tikiljuikaj Jehová tlen tijyolmatij (Sal. 37:5-7). Nojkia, ma tikiniljuikaj toikniuaj katli miak xiuitl tlatekipanojtokej tlake uelis nojua tijchiuasej uan ma tijchiuakaj kampeka tijchiuasej tlen techiljuisej. Nopa uelis techpaleuis titlatekipanosej kampa tojuantij tijnekij. Uan, ¿tlake tijchiuasej tlaj techpano kej Melissa? ¿Tlake techpaleuis nojua tiyolpakisej? Ipan ni tlamachtili tikitasej eyi tlamantli tlen techpaleuis tijnankilisej ni tlajtlanili: 1) ¿Tlake techpaleuis ma tiyolpakikaj? 2) ¿Tlake uelis tijchiuasej tlaj tijnekij nojua tiyolpakisej? 3) ¿Tlake uelis timosentlalisej tijchiuasej tlaj nojua tijnekij tlauel tiyolpakisej?

5. Kej kiijtoua Eclesiastés 6:9, ¿ipan tlake moneki timosentlalisej tlaj tijnekij tiyolpakisej?

⁵ Tlaj tijnekij tiyolpakisej, moneki tijchiuasej tlen kiijtoua Eclesiastés 6:9 (xijpoua). Kema tiyolpakij “ika tlen tijpiaj” amo tijnekisej tijpiasej sekinok tlamantli, uan tiyolpakisej kej tiitstokej. Uan kema tijnekisej tijpiasej tlamantli tlen amo tiuelij, kichiuas nochipa ma tijnekikaj tlen amo kema tijpiasej. ¿Tlake tijyekouaj? Tlaj tijnekij nelia tiyolpakisej moneki timosentlalisej ipan tlen tijpixtokej uan amo ipan tlen amo tijpiaj.

6. ¿Tlake tlapoualistli tikitasej, uan tlake tijyekosej?

⁶ Nochi techpaktia tijchiuasej sekinok tlamantli. Uajka, ¿uelis tiyolpakisej san ika tlen tijpixtokej? Miakej moiljuiaj amo pampa nochipa techpaktia tijpiasej sekinok tlamantli. Nopa amo nelia pampa kena uelis tiyolpakisej san ika tlen tijpixtokej. ¿Kenijkatsa uelis tijchiuasej? Ma tikitakaj nopa tlapoualistli tlen talentos tlen Jesús kiijtok ipan Mateo 25:14-30. Nopaya tijyekosej tlake uelis tijchiuasej tlaj tijnekij nojua tlauel tiyolpakisej, maske kemantika mopatla kej tiitstokej.

7. Xikijto nopa tlapoualistli tlen Jesús kiijtok tlen nopa talentos.

⁷ Ipan nopa tlapoualistli, Jesús kiijtok se tlakatl yajki paxaloto. Kema nechka kisteuaskia, kinnotski itekipanojkauaj, kinmakak se keski talentos uan kiniljuik ma kimiakilikaj nopa tomij. * Se itekipanojka kimakak makuili talentos, seyok kimakak ome uan seyok kimakak se, uan nochi kinmajmakak kej kinamiki. Nopa omej achtoui itekipanojkauaj tlauel kuali moiljuijkej kenijkatsa kitekiuisej nopa tomij, yeka kimiakilijkej. Uan nopa seyok amo tleno kichijki ika tlen kimakakej, yeka iteko ayokmo kitekimakak.

8. ¿Kenke nopa achtoui tlatekipanojketl tlauel yolpajki?

⁸ Uelis nopa achtoui tlatekipanojketl katli kimakakej nopa makuili talentos kiitak iteko tlauel kipatiitayaya uan motemachiyaya ipan ya uan yeka kimakak  miak tomij. ¿Moyolkokok nopa tlatekipanojketl katli kimakakej san ome talentos? Maske ueltoskia kiampa kichiuas pampa amo kimakakej sanse kej nopa achtoui tlatekipanojketl, ya kichijki se tlamantli. Ma tikitakaj.

9. Kej kiijtoua Mateo 25:22, 23, ¿tlake amo kiijtok Jesús tlen nopa tlakatl katli kimakakej ome talentos?

⁹ (Xijpoua Mateo 25:22, 23). Jesús amo kiijtok tlaj nopa tlatekipanojkej kualanki uan moyolkokok pampa san kimakakej ome talentos. Nojkia, amo kiijtok tlaj nopa tlatekipanojketl kiijtok: “¿San ya ni nechmakasej? ¡Na nojkia kuali nitlatekipanoua kej katli kimakakej makuili talentos! Tlaj amo nechpatiitaj, uajka nijtlajpachos ni tomij uan nijchiuas noteki”.

10. ¿Tlake kichijki katli kimakakej ome talentos?

¹⁰ Sanse kej katli kimakakej makuili talentos, katli kimakakej ome talentos nojkia tlauel tekitik uan kikuepilik iteko ompa imiaka tomij tlen kimakatoyaj. Yeka, iteko nojua tlauel kitekimak uan kipatiitak iteki pampa kuali kej kitekiuik nopa tomij.

11. ¿Tlake uelis tijchiuasej uan kiampa nojua tiyolpakisej?

¹¹ Tlauel techpaleuis ma tiyolpakikaj tlaj tijchiuaj kampeka kuali tijtekipanosej Jehová kampa ya kineki. Ma tijchiuakaj kampeka tlauel titlajtolmoyauasej uan ma timotekiuijtokaj ipan tlanechikoli (Hech. 18:5; Heb. 10:24, 25). Kuali ma timokualchijchiuakaj tlen moixtomas ipan tlanechikoli, kiampa kema titlanankilisej uelis tikinyolchikauasej toikniuaj. Tlaj  ipan tlanechikoli monekis tikixtomasej se tlamachtili, uajka kuali ma timokualchijchiuakaj. Nojkia, tlaj toikniuaj techiljuiaj ma tijchiuakaj se tekitl, nima uan kuali ma tijchiuakaj. Amo kema ma timoiljuikaj nopa tekitl amo tlauel ipati uan san tijchiuasej kej tojuantij tijnekij. Nochipa ma tijchijtokaj kampeka kuali tijchiuasej se keski tekitl (Prov. 22:29). Tlaj tlauel timotekiuijtosej ipan nopa tekitl tlen tijselisej, techpaleuis tijchiuasej tlen timosentlalijtokej, uan nopa kichiuas tlauel ma tiyolpakikaj (Gál. 6:4). Uan amo timoyolkokosej kema se toikni kitekimakasej ipan tlanechikoli, maske tijnekiskiaj tijpiasej nopa tekitl (Rom. 12:15; Gál. 5:26).

12. ¿Tlake kichijkej Melissa uan Nick, uan kiampa nojua tlauel yolpajkej?

¹² Melissa, katli tikijtojkej ipan párrafo 2, kinekiyaya tlatekipanos ipan Betel o yas Kampa kinmachtiaj katli senkistok tlatekipanouaj. Maske ayokmo uelki kiampa kichiua, ya kiijtoua: “Nijchijtok kampeka kuali nitlatekipanos kej precursora uan nitlajtolmoyauas kajkalpa, ipan teléfono o ika sekinok tlamantli. Nopa nechpaleuijtok nojua tlauel ma niyolpaki”. Uan, ¿tlake kichijki Nick, katli tikijtojkej ipan párrafo 3? Maske moyolkokok pampa amo kitekimakakej kej tlapaleuijketl, kichijki se keski tlamantli. Ya kiijtoua: “Nimosentlalik ipan tlen kena ueliyaya nijchiua. Yeka, nochipa nitlajtolmoyauayaya uan kuali nitlanankiliyaya ipan tlanechikoli. Nojkia, nijtitlanki se amatlajkuiloli ipan Betel, uan kema panok se xiuitl nechtlanejkej nopaya ma nitlatekipanoti”.

13. Kej kiijtoua Eclesiastés 2:24, ¿tlake ueliskia panos tlaj tijchiuaj kampeka nojua kuali titlatekipanosej?

¹³ Tlaj tijchiuaj kampeka kuali titlatekipanosej, teipa uelis nojua tlauel techtekimakasej, kej kipanok Nick. O uelis techpanos kej Melissa, maske amo titlatekipanosej kampa tijnekiskiaj, tlauel tiyolpakisej uan kuali tijyolmatisej (xijpoua Eclesiastés 2:24). Nojkia, tlauel tiyolpakisej pampa nochi tlen tijchiuasej kiyolpakiltis Jesús.

14. ¿Tlake moneki tikilnamikisej?

¹⁴ Tlaj ya tijchiuaj kampeka titlatekipanouaj, ¿ayokmo moneki tijchiuasej yon se tlamantli uan kiampa nojua tlauel titlatekipanosej? Amo. Nojua moneki timosentlalisej kuali titlajtolmoyauasej, kuali titlamachtisej uan tijchiuasej sekinok tlamantli tlen kinpaleuis toikniuaj. Tlaj amo timoueyimatij uan kuali timoiljuiaj tlake tijchiuasej, techpaleuis tijchiuasej tlen timosentlalijtokej. Nojkia, techpaleuis ma tikinpaleuikaj sekinok uan amo ma timosentlalikaj san ipan tojuantij (Prov. 11:2; Hech. 20:35).

15. ¿Tlake uelis timosentlalisej tijchiuasej tlaj tijnekij nojua tlauel tiyolpakisej?

¹⁵ ¿Tlake uelis timosentlalisej tijchiuasej ipan toTeotsij itlanechikol? Ma tikiljuikaj Jehová ma techpaleui tikitasej ipan tlen kena tiuelij tijchiuaj (Prov. 16:3; Sant. 1:5). ¿Uelis timosentlalisej  titlatekipanosej kej precursores auxiliares, regulares, ipan Betel o kampa kichijchiuaj kali kampa titlaueyichiuaj? ¿Uelis tijyekosej seyok tlajtoli uan kiampa tiasej kampa amo itstokej miakej tlajtolmoyauanij? Tlaj nojua tijnekij tijmatisej sekinok tlamantli kampa uelis titlatekipanosej, uelis tikitasej amochtli Organizados para hacer la voluntad de Jehová ipan tlamachtili 10 uan ma timokamanaljuikaj ininuaya  ueuejtlakamej. * Tlaj tijchiuaj kampeka tijchiuasej tlen timosentlalijtokej, kichiuas tlauel ma tiyolpakikaj uan toikniuaj kiitasej kenijkatsa titlatekipanouaj.

16. ¿Tlake uelis tijchiuasej tlaj amo tiuelij tijchiuaj tlen timosentlalijtokej?

¹⁶ Tlaj ipan ni tonali amo tiuelij titlatekipanouaj kej tijnekiskiaj, uajka ma tijchiuakaj tlen kena tiuelij. Ma tikitakaj se keski tlamantli tlen uelis tijchiuasej.

17. Kej kiijtoua 1 Timoteo 4:13, 15, ¿tlake moneki kichiuas se toikni uan kiampa kuali tlamachtis?

¹⁷ (Xijpoua 1 Timoteo 4:13, 15). Se toikni tlakatl katli ya moatsonpoliuiltijtok, moneki kichiuas kampeka kuali tlapouas uan kuali tlamachtis. ¿Kenke moneki kiampa kichiuas? Pampa tlaj kiampa kichiua, tlauel kinpaleuis toikniuaj katli kitlakakilisej. Yeka, toikni moneki mosentlalis momachtis uan kichiuas tlen kiijtoua pilamochtsi Ximomachti kuali titlapouas uan kuali titlamachtis. Moneki kuali momachtis sejse tlamachtili, uan ipan ichaj moneki kichiuas kejuak ya tlamachtijtok uan ipan tlanechikoli moneki kichiuas tlen kiyekojtok. Nojkia, uelis kiiljuis toikni katli tetlajtolmaka * o sekinok ueuejtlakamej katli “ika nochi ininchikaualis tlakamanalouaj uan tlamachtiaj” ma kipaleuikaj kiitas tlake nojua uelis kichiuas (1 Tim. 5:17). Toikni amo kinamiki san mosentlalis kichiuas tlen kiijtoua nopa pilamochtsi, moneki kiitas tlake uelis kinpaleuis toikniuaj uan kiampa nojua kuali tlaneltokasej uan kichiuasej  ipan ininnemilis. Tlaj kiampa kichiuas, ya uan toikniuaj tlauel yolpakisej.

18. ¿Tlake techpaleuis tijchiuasej tlen timosentlalijtokej ipan tlajtolmoyaualistli?

¹⁸ Nochi moneki titlajtolmoyauasej uan tikinpaleuisej sekinok ma elikaj Cristo itokilijkauaj (Mat. 28:19, 20, TNM; Rom. 10:14, TNM). ¿Tijnekiskiaj nojua kuali tijchiuasej nopa tekitl tlen techmakatokej? Tlauel techpaleuis tlaj timomachtiaj pilamochtsi Kuali titlamachtis, uan ma timosentlalikaj tijchiuasej tlen tijyekouaj. Nojkia, tlauel techpaleuis tlen kiijtoua pilamatsi Tlen tijchiuasej ipan tlanechikoli Kej Timonejnemiltiaj uan Titlajtolmoyauaj uan videos tlen kipanoltiaj sejse semana kampa nesi kenijkatsa nojua kuali titlajtolmoyauasej, uan ma tijpatlakaj kej titlajtolmoyauaj. Tlaj tijchiuaj kej nopaya techtlajtolmakaj, techpaleuis kuali ma titlamachtikaj uan ma tiyolpakikaj (2 Tim. 4:5).

19. ¿Tlake techpaleuis tijnextisej sekinok kuajkuali tlamantli?

¹⁹ Nochipa ma tikilnamiktokaj tlauel ipati nojua timosentlalisej tijnextisej sekinok kuajkuali tlamantli (Gál. 5:22, 23; Col. 3:12; 2 Ped. 1:5-8). ¿Tlake uelis techpaleuis? Se neskayotl, tlaj nojua tijnekij kuali titlaneltokasej, uajka uelis tijpouasej se keski tlamachtili kampa kiijtoua tlake moneki tijchiuasej. Nojkia, uelis tikitasej videos tlen eltok ipan JW Broadcasting^® kampa nesi kenijkatsa toikniuaj kuali tlaneltokakej kema kiixnamijkej tlaouijkayotl. Teipa, ma tikitakaj kenijkatsa uelis tijchiuasej kej inijuantij kichijkej.

20. ¿Tlake uelis tijchiuasej uan kiampa nojua tlauel tiyolpakisej uan amo timoyolkokosej?

²⁰ Maske nochi tijnekiskiaj nojua tlauel kuali titlatekipanosej, kemantika amo tiuelij. Ipan yankuik Tlaltipaktli tijtekipanosej Jehová kej tojuantij tijnekij uan amo tleno techtsakuilis. Maske ayamo asi nopa tonali, ma tijchiuakaj kampeka tijchiuasej tlen kena tiuelij, nopa techpaleuis amo ma timoyolkokokaj uan nojua tlauel ma tiyolpakikaj. Ma tikilnamikikaj, tlen tijchiuasej kiueyichiuas toTeotsij katli tlauel yolpaki (1 Tim. 1:11). Yeka, ma tipakikaj ika tlen kena tiuelij tijchiuaj ipan Jehová itlanechikol.