1, 2. Kej kiijtoua Salmo 34:8, ¿tlake moneki tijchiuasej tlaj tijnekij tikitasej Jehová tlauel teiknelia?

MA TIMOILJUIKAJ se akajya techmaka ma tijyekokaj se tlakualistli tlen amo kema tijkuajtokej. Maske uelis timoiljuisej kenijkatsa iajuiyaka, moneki tojuantij tijyekosej uan amo san tikitasej, tikijnekuisej, tikitasej kej kichijchijkej o tijtlajtlanisej katli ipa kiyekojtok.

² Uelis nojkia kiampa techpanos kema san tijpojtokej ipan Biblia o amatlajkuiloli kenijkatsa Jehová tlauel teiknelia o kema tijkakij kenijkatsa toikniuaj tlauel kinteochijtok. Tlaj tijnekij tikitasej kenijkatsa Jehová tlauel teiknelia, moneki tijchiuasej kampeka tijtekipanosej (xijpoua Salmo 34:8). Ma timoiljuikaj tijnekij senkistok tijtekipanosej Jehová, yeka moneki tijpatlasej se keski tlamantli ipan tonemilis. Uan maske uelis miakpa tijpojtokej kema Jesús kiijtok tlaj tikachtouitlaliaj tijtekipanosej Jehová ya techmakas tlen moneki, uelis amo kema tikitstokej kenijkatsa techteochijtok (Mat. 6:33). Maske amo tikitstokej, tijchiuaj kampeka amo tlauel titlakojkouasej yon tlauel titekitisej, uan timosentlaliaj tlauel titlajtolmoyauasej pampa timotemachiaj ipan tlen Jesús kiijtok. Kema kiampa tijchiuaj, tikitaj Jehová nelia tlauel techmokuitlauia uan tikitaj ya tlauel techiknelia.

3. Kej kiijtoua Salmo 16:1, 2, ¿ajkia inijuantij tlauel kinteochiua Jehová?

³ Jehová kiniknelia nochi maseualmej, maske amo kitekipanouaj (Sal. 145:9; Mat. 5:45). Uan nojua tlauel kinteochiua katli kiikneliaj uan kitekipanouaj ika nochi ininyolo (xijpoua Salmo 16:1, 2). Ma tikitakaj kenijkatsa Jehová techpaleuijtok.

4. ¿Kenijkatsa Jehová kinextia kiniknelia katli peuaj kiixmatij?

 ⁴ Kema tijchiuaj tlen Jehová kiijtoua, tlauel techpaleuia ipan tonemilis. Kema tikixmatkej uan tikiknelijkej, techpaleuik ma tijpatlakaj kej timoiljuiyayaj uan kej timonejnemiltiyayaj, uan techpaleuik ma timonechkauikaj ika ya (Col. 1:21). Uan kema timotemaktilijkej uan timoatsonpoliuiltijkej, tijpixkej kuali totlalnamikilis uan nojua kuali timouampojchijkej iuaya, kiampa kinextik nojua tlauel techiknelia (1 Ped. 3:21).

5. ¿Kenijkatsa Jehová kinextia kipia ueyi iyolo kema titlajtolmoyauaj?

⁵ Kema titlajtolmoyauaj nochipa tikitaj Jehová kinextia kipia ueyi iyolo. ¿Nojkia tlauel tipinaua kej se keskij toikniuaj? Uelis kema ayamo timomachtiyaya Biblia amo kema timoiljuijtoya tlaj se tonali tijkamanaljuiskia tlen Biblia se akajya katli amo tikixmati. Uan nama uelis nochipa kiampa tijchiua pampa Jehová mitspaleuijtok xitlajtolmoyaua ika pakilistli. Uelis tikitstok kenijkatsa Jehová mitspaleuijtok ipan sekinok tlamantli. Se neskayotl, uelis mitspaleuik amo nima tikualanis kema tijkamanaljuiyaya se akajya katli amo kinejki mitstlakakilis, kema mitspaleuik xikilnamiki se texto kema tijkamanaljuik se akajya katli kuali mitstlakakilik o kema mitspaleuik titlajtolmoyauas kampa maseualmej amo kinejkej mitstlakakilisej (Jer. 20:7-9).

6. ¿Kenijkatsa Jehová kinextia kipia ueyi iyolo kema techmachtia?

⁶ Jehová nojkia kinextia kipia ueyi iyolo kema techmachtia kuali ma titlajtolmoyauakaj (Juan 6:45). Ipan tlanechikoli tlen sejse semana technextiliaj videos kampa techmachtiaj kenijkatsa nojua kuali titlajtolmoyauasej uan techiljuiaj ma tijchiuakaj kampeka kiampa tijchiuasej. Tlauel techpaleuis tlaj kiampa tijchiuasej kampa titlajtolmoyauaj, maske uelis kemantika timajmauij. Nojkia, ipan tlanechikoli uan ipan uejueyi tlanechikolistli techiljuiaj ma tijpatlatiakaj kej titlajtolmoyauaj, kiampa amo titlajtolmoyauasej kej ipa tijchiuayayaj uan Jehová kiteochiuas nopa tekitl. Nama, ma tikitakaj kenijkatsa Jehová techteochiua kema tijchiuaj kampeka tijtekipanosej, maske kemantika eli ouij. Nojkia tikitasej tlake uelis tijchiuasej uan kiampa tijchiuasej tlen timosentlalijtokej.

7. ¿Tlake tlateochiualistli tijseliaj kema tijchiuaj kampeka nojua tlauel titlatekipanosej?

⁷ Timonechkauiaj ika Jehová. Ma tikitakaj tlen kipanok se ueuejtlakatl katli itoka Samuel, * ya iuaya isiua tlatekipanouaj Colombia. Maske tlauel yolpakiyayaj kema itstoyaj ipan inintlanechikol, nojua kinekiyayaj tlauel tlatekipanosej kampa amo itstoyaj miakej toikniuaj. Yeka monejki kikauasej se keski tlamantli. Samuel kiijtoua: “Tijchijkej tlen kiijtoua Mateo 6:33 uan ayokmo tijkojkej tlen amo monekiyaya. Tlauel ouij tijmatkej tijkajteuasej tochaj pampa tijchijchijtoyaj kej tojuantij techpaktiyaya uan amo titlauikayayaj”. Kampa tlatekipanotoj kiitakej ueliskiaj mopanoltisej san ika se kentsi tomij. Samuel nojkia kiijtoua: “Tikitstokej kenijkatsa Jehová techyakana uan technankilia kema timomaijtouaj. Tikitaj ya tlauel yolpaki ika tlen tijchiuaj uan tlauel techiknelia. ¡Amo kema kiampa tikitstoyaj!”. ¿Nojkia uelis tijchiuas kampeka nojua tlauel titlajtolmoyauas? Tlaj kiampa tijchiuas, mitspaleuis nojua ximonechkaui ika Jehová uan ya nochipa mitsmokuitlauis (Sal. 18:25).

8. ¿Tlake tijyekouaj tlen kichijkej Iván uan Viktoria?

 ⁸ Kema tijtekipanouaj Jehová kichiua tlauel ma tiyolpakikaj. Ma tikitakaj tlen kinpanok Iván uan isiua Viktoria, katli tlatekipanouaj kej precursores ipan Kirguistán. Inijuantij kipatlakej se keski tlamantli pampa kinejkej tlatekipanosej kampa kintitlaniskiaj, kej kampa kichijchiuaj kali kampa titlaueyichiuaj. Iván kiijtoua: “Tlauel chikauak titekitiyayaj. Uan maske ika tiotlak tlauel tisiajtoyaj, tlauel tiyolpaktoyaj pampa ipan nopa tonali tijtekipanojtoyaj Jehová. Nojkia, tlauel tiyolpakij kema tikinilnamikij nochi toikniuaj katli tikinixmatkej uan nojkia tlen nopaya techpanok” (Mar. 10:29, 30).

9. ¿Tlake kichijtok se tosiuaikni katli kimati ouij tlajtolmoyauas, uan kenijkatsa kipaleuijtok?

⁹ Tlauel tiyolpakij kema tijtekipanouaj Jehová maske kemantika ouij kej tiitstokej. Se neskayotl, ipan África Occidental itstok se tosiuaikni katli itoka Mirreh, katli ayokmo kipia iueue uan ya ueyi. Tosiuaikni tekitiyaya kej tepajtijketl, uan kema ayokmo tekitik pejki tlatekipanoua kej precursora. Ya tlauel omiyokuajkualo, yeka san se hora tlajtolmoyaua kajkalpa. Maske kiampa kipano, ueli tlajtolmoyaua kampa nemij miakej. Nojkia, kinpaxaloua miakej maseualmej uan sekij kinmachtia, uan kemantika kinnojnotsa ika teléfono. ¿Tlake kipaleuik nojua tlauel ma kitekipano Jehová? Ya kiijtoua: “Tlauel nikiniknelia Jehová uan Jesús. Yeka, nochipa nikiljuia Jehová ma nechpaleui nojua tlauel nijtekipanos” (Mat. 22:36, 37).

10. Kej kiijtoua 1 Pedro 5:10, ¿kenijkatsa kinpaleuia Jehová katli nojua kinekij tlauel tlatekipanosej?

¹⁰ Jehová nojkia techmachtia. Kenny, se precursor katli tlatekipanoua ipan altepetl Mauricio, kiitak Jehová nelia kinmachtia itekipanojkauaj. Kema pejki momachtia Biblia, kitlajkokajki universidad, yeka teipa moatsonpoliuiltik uan pejki senkistok tlatekipanoua. Ya kiijtoua: “Nijchiua kampeka nijchiuas kej tlajtolpanextijketl Isaías, katli kiijtok: ‘Na nias. Na xinechtitlani’ ” (Is. 6:8). Kenny, tlatekipanok kampa kichijchiuaj kali kampa titlaueyichiuaj uan nojkia tlapaleuijtok kampa kitlajtolkuepaj amatlajkuiloli. Ya kiijtoua: “Nechmachtijkej uan kiampa uelki nijchiua sejse tekitl tlen nechmakakej”. Toikni amo san momachtik kuali kichiuas iteki, nojkia kiyekok sekinok tlamantli. Nojkia kiijtoua: “Monejki nikitas tlake tlamantli amo ueli nijchiua uan nojua nijnextis sekinok kuajkuali tlamantli, kiampa nojua kuali nijtekipanoskia Jehová” (xijpoua 1 Pedro 5:10). ¿Uelis tijpatlas se keski tlamantli uan tijkauas Jehová ma mitsmachti kenijkatsa tijtekipanos?

11. ¿Tlake kichijkej se keskij tosiuaikniuaj pampa kinejkej tlajtolmoyauasej, uan kenijkatsa kinpaleuijtok? (Xikita tlaixkopinkayotl ipan ipantsajka).

¹¹ Katli miak xiuitl kitekipanojtokej Jehová nojkia uelis kiyekosej sekinok tlamantli tlen kinpaleuia kuali ma tlajtolmoyauakaj. Kema pejki momoyaua COVID-19, ueuejtlakamej tlen se tlanechikoli tlen Corea del Sur, kiijtojkej: “Miakej toikniuaj katli moiljuiyayaj ayokmo uelij tlajtolmoyauaj pampa mokokouaj, nama tlauel tlajtolmoyauaj ika videollamada. Eyij tosiuaikniuaj katli kipiaj kipano 80 xiuitl kiyekojkej kitekiuisej celular o tableta, uan kemantika mojmostla tlajtolmoyauaj” (Sal. 92:14, 15). ¿Mitspaktiskia nojua tlauel titlajtolmoyauas uan tikitas kenijkatsa Jehová kipia kuali iyolo? Ma tikitakaj se keski tlamantli tlen mitspaleuis tijchiuas tlen timosentlalijtok.

12. ¿Tlake kintenkauilia Jehová kinmakas katli motemachiaj ipan ya?

¹² Nochipa ximotemachi ipan Jehová. Tlaj timotemachiaj ipan ya uan tijchiuaj kampeka  tijtekipanosej, ya nochipa tlauel techteochiuas (Mal. 3:10). Tosiuaikni Fabiola, katli eua Colombia, kiitak kenijkatsa Jehová nelia techteochiua. Ya kinekiyaya, kema moatsonpoliuiltiskia, nima tlatekipanos kej precursora. Maske kiampa kinekiyaya kichiuas, amo ueliyaya pampa monekiyaya tekitis uan kiampa kinpaleuis iueue uan eyij ikoneuaj. Yeka kema ayokmo tekitiskia pampa ya kiaxitijtoya ixiui, kiiljuik Jehová ika nochi iyolo ma kipaleui. Ya kiijtoua: “Maske tlauel uejkaua kinankiliaj nopa solicitud kampa titlajtlanij ma techtlaxtlauikaj maske ayokmo titekitij o pensión, na nimantsi nechnankilijkej, san panotoya se metstli nitlajtlantoya. Nelnelia nimosentlachilik”. Kema panok ome metstli, tosiuaikni pejki tlatekipanoua kej precursora. Nama, kipia kipano 70 xiuitl uan tlatekipanojtok kipano 20 xiuitl kej precursora. Kinpaleuijtok chikueyij maseualmej ma moatsonpoliuiltikaj. Nojkia kiijtoua: “Maske kemantika tlauel nisiaui, Jehová nechpaleuijtok nikaxitis nopa horas tlen moneki nijchiuas”.

13, 14. ¿Tlake techpaleuis ma timotemachikaj ipan Jehová uan nojua tijnekisej tijtekipanosej?

¹³ Xijyeko tlen kichijkej katli motemachijkej ipan Jehová. Ipan Biblia onka miak neskayotl kampa kiijtoua se keskij maseualmej kichijkej kampeka kuali kitekipanosej toTeotsij. Miakpa monejki achtoui inijuantij kitekipanosej Jehová uan teipa ya tlauel kinteochijki. Kiampa kipanok Abraham, katli achtoui monejki kikajteuas ichaj “yonke axkimatiyaya kanke asiti”, uan teipa Jehová kiteochijki (Heb. 11:8). Nojkia, Jehová kiteochijki Jacob  kema tlanki moteuia iuaya nopa iluikaejketl (Gén. 32:24-30). Uan kema israeleuanij nechka kiseliskiaj nopa tlali tlen kintenkauilijtoyaj uelkej kiixkotonaj nopa ueyatl Jordán kema sacerdotes kalajkej atitla, maske tlauel chikauak panoyaya (Jos. 3:14-16).

¹⁴ Nojkia, uelis tijyekosej tlen kichijtokej toikniuaj ipan ni tonali katli motemachijtokej ipan Jehová uan kichijtokej kampeka nojua tlauel tlatekipanosej. Se neskayotl, toikni Payton uan isiua Diana kinpaktia kipouasej tlamachtili kampa kiijtoua kenijkatsa sekinok tlauel tlatekipanojtokej, kej kampa kiijtoua “Se ofrecieron para ayudar”. * Payton kiijtoua: “Kema tijpouayayaj nopa tlamachtili, kejuak tikitayayaj se akajya katli tlauel kipaktia se tlakualistli. Nopa kichiuayaya ma tijnekikaj nojkia kiampa titlatekipanosej uan tikitasej kenijkatsa Jehová kipia kuali iyolo”. Kema panok tonali, toikni iuaya isiua yajkej tlatekipanotoj kampa amo itstokej miakej tlajtolmoyauanij. ¿Tijpojtok se tlen nopa tlamachtili? ¿O tikitstok nopa videos Tlauel kuali tlaj tijtekipanos toTeotsij uan Titlajtolmoyauaj ipan nochi altepemej tlen eltok ipan jw.org? Ni tlamachtili uan ni videos mitspaleuis nojua tijnekis tlauel titlatekipanos.

15. ¿Kenijkatsa techpaleuia kema tikinpiaj kuali touampoyouaj?

¹⁵ Kuali xikintlapejpeni mouampoyouaj. Tlaj amo kema tijyekojtokej se tlakualistli, uelis tijnekisej tijkuasej tlaj tiitstokej ininuaya katli kena kinpaktia. Kiampa pano kema nochipa tiitstokej ininuaya katli kinpaktia kitekipanosej Jehová pampa uelis kichiuas nojkia ma tijnekikaj titlatekipanosej. Kiampa kinpanok Kent uan Verónica. Toikni kiijtoua: “Touampoyouaj uan tochampoyouaj techiljuiyayaj tlauel kuali tlaj senkistok titlatekipanosej. Nochipa tiitstoyaj ininuaya katli kiachtouitlaliyayaj kitekipanosej Jehová, nopa techpaleuik amo tijmakasisej kiampa tijchiuasej”. Ipan ni tonali, Kent uan Verónica tlatekipanouaj kej precursores especiales ipan Serbia.

16. Kej kiijtoua Lucas 12:16-21, ¿kenke moneki tijchiuasej kampeka tijkauasej se keski tlamantli?

¹⁶ Xijchiua kampeka tijkauas se keski tlamantli uan kiampa tijtekipanos Jehová. Tlaj tijnekij tijyolpakiltisej Jehová amo moneki tijkauasej nochi tlamantli tlen techpaktia (Ecl. 5:19, 20). Tlaj amo tijchiuaj kampeka tijkauasej se keski tlamantli uan tijtekipanosej Jehová, ueliskia techpanos kej nopa tlakatl katli kiijtok Jesús, katli amo kinejki kitekipanos toTeotsij pampa amo kinejki kikauas tlen kipixtoya (xijpoua Lucas 12:16-21). Toikni Christian, katli itstok Francia, kiijtoua: “Amo kuali nijtekipanouayaya Jehová yon nikinmokuitlauiyaya nochampoyouaj pampa san nimotekiuijtoya ipan sekinok tlamantli”. Ya uan isiua mochijkej precursores uan yeka monejki kikauasej ininteki. Teipa, pejkej kinamakaj xapo uan sekinok tlamantli tlen ika tlapajpakaj, kiampa kipixkej tlen ika mopanoltisej. ¿Kinpaleuik pampa kiampa kichijkej? Christian kiijtoua: “Nojua tlauel techpaktiyaya titlajtolmoyauasej kema tikitayayaj katli tikinmachtiyayaj uan katli sampa tikinpaxalouayayaj kiyekouayayaj miak tlamantli tlen Jehová”.

17. ¿Kenke sekij amo kinekij kipatlasej kej tlajtolmoyauaj?

¹⁷ Xijchiua kampeka tijpatlas kej titlajtolmoyaua (Hech. 17:16, 17; 20:20, 21). Shirley se precursora, katli eua Estados Unidos, kipatlak kej tlajtolmoyaua pampa pejki COVID-19. Kema pejki ni kokolistli  majmauiyaya tlajtolmoyauas ika teléfono, uan kema kinpaxalok toikni katli tepaxaloua chijchikuasej metstli, kinpaleuik kiampa ma tlajtolmoyauakaj. Yeka nama kiampa kichiua. Ya kiijtoua: “Maske achtouia nimajmauiyaya kiampa nitlajtolmoyauas, nama tlauel nechpaktia. Ueltok tikamanaltij ininuaya miakej maseualmej uan amo kej kema tiauiyayaj ininchaj”.

18. ¿Tlake techpaleuis nojua tlauel titlatekipanosej maske ouij tijmatisej?

¹⁸ Ximoiljui tlake uelis tijchiuas uan xijchiua. Kema tijpiaj se kuesoli, tikiljuiaj Jehová ma techpaleui uan kuali timoiljuiaj kenijkatsa tikixnamikisej (Prov. 3:21). Sonia, katli tlatekipanoua kampa itstokej san se keskij toikniuaj katli kamanaltij romaní ipan Europa, kiijtoua: “Nechpaktia nikijkuilos tlen nimosentlalijtok nijchiuas uan nijtlalia nopa amatl kampa uelis nikitas. Kampa nimoxiljuia, nijpepechojtok se tlaixkopinkayotl tlen ome ojtli tlen moixnamiki. Yeka, kema moneki nijtlapejpenis se tlenijki, achtoui nijtlachilia nopa tlaixkopinkayotl uan nikita tlake uelis panos tlen nijtlapejpenis”. Uan kema Sonia kipia se tekipacholi, kichiua kampeka yolpakis. Nojkia kiijtoua: “Kema mopatla nonemilis eli kej se tepamitl tlen amo nechkauilia ma nijchiua tlen nimosentlalijtok o kemantika eli kejuak se puente tlen nechpaleuia. Kej nijyolmati kichiua kiampa ma nikita se keski tlamantli”.

19. ¿Kenijkatsa uelis tijnextisej tijtlaskamatij nochi tlen Jehová techmakatok?

¹⁹ Jehová nochipa tlauel techteochiua. Uelis tijnextisej tijtlaskamatij kema tijchiuaj kampeka tijueyichiuasej (Heb. 13:15). Kiampa tijnextiaj kema tijchiuaj kampeka nojua tlauel titlajtolmoyauaj. Jehová tlauel techteochiuas tlaj kiampa tijchiuasej. Yeka, mojmostla ma tikitakaj kenijkatsa Jehová kinextia kipia kuali iyolo. Kiampa tijchiuasej kej Jesús kichijki, kema kiijtok: “Kema nijchiua ipakilis noTata tlen nechtitlanki uan kema nijtlamichiua iteki, nechmaka chikaualistli keja tlakualistli nechmakaskia” (Juan 4:34).