1. ¿Kenke tlauel techpaleuia kema tikijtouaj kenijkatsa tijyekojkej tlen melauak?

 “¿KENIJKATSA tijyekok tlen melauak?”. Uelis miakpa techtlajtlanijtokej kema tikinixmatij sekinok toikniuaj. Tlauel techpaktia tijkakisej kenijkatsa kiixmatkej Jehová uan pejkej kiikneliaj. Uan tojuantij nojkia tlauel techpaktia tikiniljuisej (Rom. 1:11). Kema kiampa tijchiuaj, techpaleuia ma tikitakaj tijpiaj se ueyi tlateochiualistli pampa tielij Jehová itlajtoltemakauaj. Nojkia techpaleuia ma timosentlalijtokaj tijneltokasej “tlen melauak”, ni kiijtosneki nochipa tijnekisej timonejnemiltisej kej Jehová kipaktia uan tijyolpakiltisej (3 Juan 3).

2. ¿Tlake tikitasej ipan ni tlamachtili?

² Ipan ni tlamachtili tikitasej se keski tlamantli tlen kichiua ma tijpatiitakaj tlen melauak. Nojkia tikitasej kenijkatsa uelis tijnextijtosej tijpatiitaj. Uan ni techpaleuis tlauel ma tijtlaskamatilikaj Jehová pampa techpaleuik ma tijmatikaj tlen melauak (Juan 6:44). Uan nojkia nojua tlauel tijnekisej tikinmachtisej sekinok.

3. ¿Tlake kichiua tlauel ma tijpatiitakaj tlen melauak?

³ Onka miak tlamantli tlen kichiua ma tijpatiitakaj tlen melauak. Uan nojua tlauel tijpatiitaj pampa tikikneliaj Jehová, katli nochipa kiijtoua tlen melauak. Ipan Biblia tijyekojtokej ya kipia miak chikaualistli uan kichijchijki iluikaktli uan Tlaltipaktli. Jehová eli toTata katli tlauel  techiknelia uan kitekipachoua tlen techpano (1 Ped. 5:7). Uan tijmatij ya tlauel tetlasojtla, kipia ueyi iyolo, tlauel teiknelia uan kiijtoua tlen melauak (Éx. 34:6). Nojkia kipaktia tlen xitlauak (Is. 61:8). Jehová kiyolkokoua kema kiita titlaijiyouiaj, yeka kiixtlalijtok se tonali kitsontlamiltis nochi tlen techtlaijiyouiltia (Jer. 29:11). ¡Tlauel tijnekij ma asi nopa tonali! Yeka tlauel tikikneliaj Jehová.

4, 5. ¿Kenke Pablo kiijtok tlen tijchiaj tijselisej eli kejuak se tepostli tlen moatsintlanoua?

⁴ Nojkia tijpatiitaj tlen melauak pampa techpaleuia ipan tonemilis. Ma tikitakaj se neskayotl: ipan Biblia tijyekojtokej teipa kuali tiitstosej. Apóstol Pablo kinejki kiijtos tlauel ipati tlen tijselisej teipa, yeka kiijtok: “Tlen tijchiaj tijselisej eli kejuak se tepostli tlen moatsintlanoua, tlen nelia temachtli uan tetik” (Heb. 6:19, TNM). Sanse kej se tepostli tlen moatsintlanoua kipaleuia se barco, tlen tijchiaj tijselisej techpaleuia nojua ma titlaneltokatokaj uan techyolchikaua kema tikixnamikij tlaouijkayotl.

⁵ Maske Pablo kiniljuik ni tlajtoli toikniuaj katli kintlapejpenijtokej yasej iluikak, nojkia techpaleuia katli timotemachiaj tiitstosej ipan yankuik Tlaltipaktli (Juan 3:16). Nelnelia tlauel techpaleuijtok pampa tijmatij teipa tiitstosej nochipa.

6, 7. ¿Kenijkatsa kipaleuik Yvonne kimatis tlen nelia panos teipa?

⁶ Ma tikitakaj tlen kipanok tosiuaikni Yvonne. Itatauaj amo kimachtijkej tlen melauak, yeka kema nojua eliyaya siuapil kimakasiyaya mikis. Se tonali kipojki se amochtli tlen kiijtouayaya: “Se tonali ayokmo tiitstosej, pampa nochi timikisej”. Ni tlajtoli kichijki tlauel ma mosentlachili, ya kiijtoua: “Tlen nijpojki kichijki ayokmo kuali ma nikochi pampa san nimoiljuijtoya tlen panoskia teipa. Nimoiljuiyaya: ‘Tlaj amo onka se tlamantli tlen uelis nijselis teipa, uajka ¿kenke niitstok?ʼ. ¡Na amo nijnekiyaya nimikis!”.

⁷ Kema Yvonne moichpokachijki, kinixmatki Jehová itlajtoltemakauaj. Ya kiijtoua: “Pejki nijneltoka teipa uelis niitstos nochipa ipan se yankuik Tlaltipaktli”. Kema kimatki tlen melauak tlauel kipaleuik. Nojkia kiijtoua: “Nama ya ueli nikochi pampa ayokmo san nimoiljuijtok tlen panos teipa o tlaj nimikis”. Kej tikitaj, Yvonne tlauel kipatiita tlen melauak, uan nojkia kipaktia kiniljuis sekinok tlen motemachia kiselis teipa (1 Tim. 4:16).

8, 9. 1) ¿Kenijkatsa nopa tlakatl tlen Jesús kiijtok kinextik kipatiitayaya tlen kipantik? 2) ¿Kenijkatsa tikita tlen melauak?

⁸ Nopa kuali tlamachtili tlen toTeotsij iTlanauatijkayo nojkia eli tlen melauak uan eltok ipan Biblia. Jesús kiixnextik ika se tlamantli tlen tlauel ipati. Ya kiijtok: “Nelkuali eltok kema toTeko tlen itstok iluikak tlanauatis. Uan kema tlakamej kimachiliaj para nelia kuali nopano, kichiuasej keja se tlakatl tlen kipantia miak tomij [o tlamantli tlen patiyo, TNM] ipan se mili. Uan kema kipantik, nimantsi sampa kitlalpachok. Teipa ika pakilistli yajki uan kinamakak nochi tlen kipixtoya uan kikojki nopa mili” (Mat. 13:44). Maske nopa tlakatl amo kitemojtinemiyaya nopa “tlamantli tlen patiyo”, kema kipantik kinamakak nochi tlen kipixtoya uan kiampa uelki kikoua. ¿Kenke kiampa kichijki? Pampa kiitak san nopa “tlamantli tlen patiyo” eliyaya tlauel ipati uan amo kej tlen kipixtoya.

 ⁹ ¿Nojkia tijpatiita pampa tijmati tlen melauak? Uelis kena. Tlauel tiyolpakij pampa tijtekipanouaj Jehová uan timotemachiaj tiitstosej nochipa kema iTlanauatijkayo tekichiuas. Uan amo tleno tlen nama onka uelis kichiuas kiampa ma tijyolmatikaj. Amo elis san tlapik tlaj tijkauasej miak tlamantli pampa tijnekij timouampojchiuasej ika Jehová. Uan tlauel tiyolpakij pampa tijmatij kiyolpakiltia tlen tijchiuaj (Col. 1:10).

10, 11. ¿Tlake kipaleuik Michael ma kipatla inemilis?

¹⁰ Miakej toikniuaj kikajtokej miak tlamantli pampa kinejkej kiyolpakiltisej Jehová. Sekij ayokmo momachtijkej tlen kichiuaskia tlauel ma kinixmatikaj, ayokmo kinejkej tlapijpiasej uan sekinok kikajkej nochi tlen kichiuayayaj. Ya nopa kichijki Michael, katli itatauaj amo kimachtijkej tlen melauak. Kema nojua eliyaya telpokatl, momachtik tlateuis. Ya kiijtoua: “Kuali nijyolmatiyaya pampa kuali nitlateuiyaya. […] Nijmatiyaya amo aka nechtlaniskia”. Kema pejki momachtia Biblia, kiitak Jehová amo kipaktia tlasisinijkayotl (Sal. 11:5). Ya kiijtoua: “Toikni iuaya isiua katli nechmachtijkej amo kema nechiljuijkej ayokmo ma nitlateui. San mosentlalijkej nechmachtisej tlen melauak”.

¹¹ Kema Michael nojua kiyekojtiajki sekinok tlamantli, kipaleuik nojua tlauel ma kiikneli Jehová. Kema kiyekok Jehová kintlasojtla itekipanojkauaj, asik ipan iyolo. Michael kiitak monekiyaya kitlapejpenis se keski tlamantli tlen kipatlaskia inemilis. Ya kiijtoua: “Maske nijmatiyaya eliskia tlauel ouij nijkauas karate, tlaj kiampa nijchiuaskia, nijyolpakiltiskia Jehová, uan tlen nijchiuaskia amo eliskia san tlapik”. Michael kipatiitak pampa kimatki tlen melauak, uan nopa kipaleuik ma kipatla inemilis (Sant. 1:25).

12, 13. ¿Kenijkatsa tlen tlamachtia Biblia kipaleuik Mayli?

¹² Biblia kinextia tlen melauak eli tlauel ipati, yeka kiixnextia kej se tlauili tlen kuali tlauia kampa tsintlayoua (Sal. 119:105; Efes. 5:8). Mayli, katli eua Azerbaiyán, tlauel kitlaskamati pampa Biblia kipaleuik ma kipanti se kuali ojtli. Ichampoyouaj kineltokayayaj ome religión: itata eliyaya musulmán uan inana judía. Mayli kiijtoua: “Maske nijneltokayaya itstok toTeotsij, amo nijkuamachiliyaya miak tlamantli. Yeka nimotlatsintokiyaya: ‘¿Kenke techchijchijki toTeotsij? ¿Kinamiki ma tiitstokaj ika miak tlaouijkayotl uan teipa nojua ma techtlaijiyouiltikaj ipan tlitl?’. Maseualmej kiijtouaj pano tlen amo kuali pampa kiampa kineki toTeotsij, yeka nimoiljuiyaya: ‘¿Techita toTeotsij kej se ajauili uan amo kitekipachoua kema titlaijiyouiaj?’”.

¹³ Mayli nojua kitemok kenijkatsa monankilia tlen motlatsintokiyaya. Teipa, pejki momachtia uan mochijki se tlen Jehová itlajtoltemakauaj. Ya kiijtoua: “Biblia xitlauak tlamachtia, yeka nechpaleuik ma nijpatla tlen nimoiljuiyaya uan ma nijpia tlaseuilistli”. Kej ni tosiuaikni, nochi katli tijtekipanouaj Jehová tijueyichiuaj pampa techpaleuijtok ma tinemikaj “kampa itlauil tlen kuajkualtsi” (1 Ped. 2:9).

14. ¿Tlake uelis tijchiuasej uan kiampa nojua tijpatiitasej tlen melauak? (Xikita recuadro “ Sekinok neskayotl”).

¹⁴ Ipan ni párrafos tikitstokej se keski neskayotl tlen kinextia tlauel ipati tlen melauak, uan uelis timoiljuiaj ipan  sekinok. ¿Ueliskia timosentlalisej tijtemosej sekinok tlamantli tlen techpaleuis nojua ma tijpatiitakaj tlen melauak? Tlaj tlauel tijpatiitasej, tijnekisej tijnextisej ipan tonemilis.

15. ¿Kenijkatsa uelis tijnextisej tijpatiitaj tlen melauak?

¹⁵ Uelis tijnextisej tlauel tijpatiitaj tlen melauak tlaj nochipa timomachtiaj Biblia uan amatlajkuiloli. Maske miak xiuitl tijtekipanojtokej Jehová o amo, nochipa tijyekojtiauij sekinok tlamantli. Nopa achtoui pilamochtsi Tlen Tematiltia tlen kiski ika inglés, kiijtok: “Tlen melauak eli kej se pilxochitsi tlen eltok ipan tonemilis, uan uelis kiijiyomiktis sekinok xiuitl tlen kiixnextia tlen amo melauak. Tlaj tijneki tijpantis, moneki kuali titlachixtos; [...] tlaj tijneki tijpias, moneki timopachos tijtekis. Xijchijto kampeka tijpias sekinok xochitl uan amo san setsi. [...] Nojua xijtemo”. Tlauel techpaleuis tlaj tijchiuasej kampeka timomachtisej Biblia.

16. ¿Tlake tlamantli mitspaleuijtok kuali ximomachti? (Proverbios 2:4-6).

¹⁶ Maske amo nochi techpaktia titlapouasej  uan timomachtisej, Jehová kineki nojua ma timomachtijtokaj uan kiampa kuali tijkuamachilisej tlen melauak (xijpoua Proverbios 2:4-6). Tlauel techpaleuis tlaj kuali timomachtisej. Toikni Corey kiijtoua kema momachtia Biblia, san mosentlalia ipan se versículo. Ya kiijtoua: “Nijpoua notas tlen eltok kampa tlami iamayo, nijtemoua textos tlen mouika ika nopa versículo uan nijtemoua sekinok tlamachtili. […] Kiampa nijyekoua miak tlamantli ipan tlen nijpoua”. Maske uelis amo timomachtiaj sanse kej kichiua toikni, tlaj tijkixtiaj tonali uan tijchiuaj kampeka kuali timomachtisej, tijnextisej tijpatiitaj tlen melauak (Sal. 1:1-3).

17. ¿Tlake kineki kiijtos tijchiuasej tlen melauak? (Santiago 1:25).

¹⁷ Amo moneki san tijmatisej tlen melauak, nojkia moneki tijchiuasej ipan tonemilis. Kema kiampa tijchiuasej, techpaleuis tlauel ma tiyolpakikaj (xijpoua Santiago 1:25). ¿Tlake techpaleuis tijmatisej tlaj tijchiuaj tlen melauak? Se toikni kiijtok moneki tikitasej tlake tlamantli kuali tijchiuaj uan tlake nojua moneki tijpatlasej. Pablo kiijtok: “Moneki mojmostla ma tinejnemikaj keja kiijtoua nochi [toTeotsij] iTlajtol tlen ya tijmajtokej” (Filip. 3:16).

18. ¿Kenke tijchiuaj kampeka tijtokilisej “tlen melauak”?

¹⁸ Ma timoiljuikaj kenijkatsa techpaleuia pampa tijchiuaj kampeka tijtokilisej “tlen melauak”. Amo san techpaleuia ipan tonemilis, nojkia tijyolpakiltiaj Jehová uan toikniuaj (Prov. 27:11; 3 Juan 3). ¡Nelia kichiua ma tijpatiitakaj uan ma tijchiuakaj ipan tonemilis tlen melauak!