1. ¿Tlake kichijtokej miakej telpokamej?

 SEJSE xiuitl tlauel miakej telpokamej uan ichpokamej moatsonpoliuiltiaj, ¿nojkia kiampa tijchijki? Tlaj ya timoatsonpoliuiltik, Jehová tlauel yolpaki uan nojkia toikniuaj (Prov. 27:11). Ximoiljui ipan nochi tlen tijchijtiualajtok. Uelis miak xiuitl timomachtijtok Biblia, uan yeka timotemachia nelia eli toTeotsij iTlajtol. Nopa mitspaleuijtok nojua kuali xikixmati uan xikikneli Jehová. Yeka tijnejki tijmaktilis monemilis uan timoatsonpoliuiltis. ¡Tlauel kuali pampa kiampa tijchijki!

2. ¿Tlake tikitasej ipan ni tlamachtili?

² Uelis kema ayamo timoatsonpoliuiltiyaya, tikixnamijki se keski tlaouijkayotl tlen kichijki xijnexti tlaj nelia kuali titlaneltoka. Uan kej panotias xiuitl, nojua tikixnamikis sekinok tlaouijkayotl. Satanás kichiuas ayokmo xikikneli Jehová uan xijtlauelkaua (Efes. 4:14). Amo xijkaua kiampa ma kichiua. ¿Tlake mitspaleuis amo xijtlauelkaua Jehová uan tijchiuas tlen tijtenkauilijtok? Moneki nojua tijchijtos kampeka kuali timomachtis tlen mitspaleuis kuali xitlaneltoka (Heb. 6:1). Ipan ni tlamachtili tikitasej kenijkatsa uelis tijchiuas.

3. ¿Tlake nojua moneki kichiuas se akajya maske ya moatsonpoliuiltik?

³ Kema se akajya moatsonpoliuiltia, moneki kichiuas tlen apóstol Pablo kintlajtolmakak toikniuaj tlen Éfeso. Kiniljuik monekiyaya elisej kej se tlakatl katli kuali tlalnamiki (Efes. 4:13). Ya kinekiyaya kiniljuis nojua ma kichijtokaj  kampeka kuali tlaneltokasej. Pablo kiixnextik ni tlamantli ika se okichpil katli moskaltijtia. Maske se pilkonetsi kichiua itatauaj ma yolpakikaj, amo nochipa kiampa itstos pampa moskaltis uan ayokmo kichiuas “tlen konemej kichiuaj” (1 Cor. 13:11). Tojuantij nojkia kiampa techpano: maske ya timoatsonpoliuiltijkej, moneki nojua tijchijtosej kampeka kuali titlaneltokasej. Ma tikitakaj se keski tlamantli tlen mitspaleuis.

4. Kej kiijtoua Filipenses 1:9, ¿tlake kuajkuali tlamantli mitspaleuis nojua kuali xitlaneltoka uan kenke?

⁴ Xijchiua tlen mitspaleuis nojua tikiknelis Jehová. Maske tlauel tikiknelia toTeotsij, uelis tijchiuas nojua ma moskalti nopa tlaiknelili. ¿Tlake mitspaleuis? Ipan Filipenses 1:9 (xijpoua) Pablo kiijtok tlake uelis tijchiuas. Ya momaijtok pampa kinekiyaya toikniuaj tlen Filipos nojua tlauel ma kiiknelikaj toTeotsij. Ni kinextia tojuantij nojkia uelis tlauel tikiknelisej Jehová. Tlaj kiampa tijnekij tijchiuasej, moneki timomachtijtosej uan tijpiasej kuali totlalnamikilis. Kema tijchiuaj kampeka kuali tikixmatisej Jehová, techpaleuia nojua tlauel ma tikiknelikaj, tikitaj kenijkatsa teiknelia uan kej kichiua se keski tlamantli. Nojkia, techpaleuia ma tijyolpakiltikaj uan amo ma tijyolkokokaj. Uan tijchiuaj kampeka tijchiuasej tlen ya kineki.

5, 6. ¿Tlake seyok tlamantli techpaleuis nojua ma tikiknelikaj Jehová?

⁵ Nojkia techpaleuis ma tikiknelikaj Jehová tlaj tijchiuaj kampeka kuali tikixmatisej iKone, pampa ya kinextia nopa kuajkuali tlamantli sanse kej iTata (Heb. 1:3). Tlaj tijnekij kuali tikixmatisej Jesús, moneki tijpouasej nopa naui amochtli: Mateo, Marcos, Lucas uan Juan. ¿Mojmostla tijpoua Biblia? Tlaj ayamo tijchiua, uelis tijpeualtis. Kema tijpouas tlen kichijki uan tlen kiijtok Jesús, xikita tlake kuajkuali tlamantli kinextik. Ya kipaktiyaya itstos ininuaya sekinok, yeka kinkuanauayaya konemej (Mar. 10:13-16). Nochipa kichiuayaya kuali ma kiyolmatikaj itokilijkauaj, yeka inijuantij kiiljuiyayaj tlen moiljuiyayaj (Mat. 16:22). Jesús kiampa kichiuayaya pampa Jehová nojkia tlauel teiknelia. Yeka ueli tijnojnotsaj uan tikiljuiaj nochi tlen tijyolmatij, uan amo kema timoiljuiaj kualanis o ayokmo kuali techitas. Ya tlauel teiknelia uan kitekipachoua tlen techpano (1 Ped. 5:7).

⁶ Jesús tlauel tetlasojtlayaya. Apóstol Mateo kiijtok: “Kema kinitak nochi nopa miak[ej] tlakamej tlen ualajtoyaj kampa ya para ma kinpaleui, kintlasojtlak pampa nelia miak kuesoli kipixtoyaj hasta moiljuijkej ayok tleno ininpati. Itstoyaj keja borregojmej tlen axkipixkej inintlamokuitlauijka” (Mat. 9:36). ¿Uan kenijkatsa Jehová kinita maseualmej? Jesús kiijtok: “Yajaya axkineki ma mokuapolo niyon se tlen ni konemej” (Mat. 18:14). ¡Tlauel tiyolpakij pampa Jehová tlauel techiknelia! Kema tijchiuaj kampeka kuali tikixmatisej Jesús, techpaleuia nojua tlauel ma tikiknelikaj Jehová.

7. ¿Kenke tlauel mitspaleuis tlaj timouampojchiuas ininuaya katli kuali tlaneltokaj?

⁷ Tlaj kuali timouampojchiuas ininuaya toikniuaj tlen motlanechikol katli kuali tlaneltokaj, nojkia mitspaleuis xikikneli Jehová uan kuali xitlaneltoka. Xikita kenijkatsa nochipa tlauel yolpakij uan amo moyolkokouaj pampa kitlapejpenijkej kitekipanosej Jehová. Xikiniljui ma mitsiljuikaj tlake kuali tlamantli kinpanotok. Uan kema monekis tijtlapejpenis se  tlamantli tlen tlauel ipati, xikamanalti ininuaya. Ma tikilnamikikaj Biblia kiijtoua: “Kema tlakamej [...] kinmakaj kuali consejos, uelis itstosej ika temachili” (Prov. 11:14).

8. ¿Tlake uelis tijchiuas tlaj tijmati ouij tijneltokas tlen Biblia tlamachtia?

⁸ Xikita tlaj nelia melauak tlen tijneltoka. Kej tikitakej ipan párrafo 2, Satanás kineki ayokmo kuali xitlaneltoka. Kineki ximoiljui amo melauak tlen Biblia tlamachtia. Se neskayotl, uelis tijkakis se akajya kamanalti tlen evolución, tlen kichiua amo kuali ma kiitakaj Jehová. Maske achtouia amo timoiljuiyaya ipan ni tlamantli, uelis nama pampa ya timotelpokachijki, ipan escuela mitsmachtisej evolución. Maske tlen mitsiljuisej kakistis nelia melauak, uelis amo kema kiitstokej sekinok tlamantli tlen kinextia itstok katli techchijchijki. Xikilnamiki tlen kiijtoua Proverbios 18:17: “Nesi xitlauak tlen kiijtoua nopa achtoui tlakatl tlen monextia iixpa se juez para momanauis, pero teipa uala ne se uan tenextilia para nelia tlaixpanotok”. ¿Tlake techmachtia? Amo kinamiki tijneltokas nochi tlen mitsiljuisej ipan escuela. Moneki nojua kuali timomachtis Biblia uan tijtemos sekinok tlamachtili ipan amatlajkuiloli. Xikamanalti ininuaya toikniuaj katli achtouia kineltokayayaj evolución uan xikintlatsintoki tlake kinpaleuik kineltokasej itstok se tlachijchijketl katli tlauel techiknelia. * Ni mitspaleuis ximotemachi nelia itstok toTeotsij.

9. ¿Tlake uelis tijyekos ika tlen Melissa kichijki?

⁹ Tosiuaikni Melissa * tlauel kipaleuik pampa kitemok se keski tlamachtili tlen kiixtoma itstok katli tlachijchijki. Ya kiijtoua: “Ipan escuela tlamachtiaj evolución kejuak nelia melauak. Achtouia nijmakasiyaya nijtemos se keski tlamachtili pampa nimoiljuiyaya kichiuaskia ayokmo kuali ma nitlaneltoka. Teipa nimoiljuik Jehová nochipa kineki ma tijtekipanokaj pampa kuali titlaneltokaj, yeka pejki nijtemoua se keski tlamachtili tlen nechpaleuiskia. Nijpojki amochtli ¿Existe un Creador que se interese por nosotros? uan pilamochtsitsij ¿Es la vida obra de un Creador? uan El origen  de la vida. Cinco cuestiones dignas de análisis. Tlauel nechpaleuik ni amatlajkuiloli. Tlaj nima nimomachtijtoskia, ya nechpaleuijtoskia”.

10, 11. ¿Tlake mitspaleuis amo xijchiua tlen mitsyoltilana? (1 Tesalonicenses 4:3, 4).

¹⁰ Xijchiua kampeka amo tijchiuas tlen mitsyoltilana. Kema nojua titelpokatl, uelis tlauel tijnekis timotekas iuaya se akajya, o uelis sekinok mitstetsopasej kiampa xijchiua. Satanás kineki xijchiua tlen mitsyoltilana. ¿Tlake mitspaleuis amo kiampa tijchiuas? (Xijpoua 1 Tesalonicenses 4:3, 4). Kema timomaijtos, xikiljui Jehová tlen tijyolmati uan xikiljui ma mitspaleui (Mat. 6:13). Xikilnamiki ya nochipa kineki mitspaleuis uan amo mitsiljuis kenke kiampa timoiljuia (Sal. 103:13, 14). Biblia nojkia uelis mitspaleuis. Melissa, katli tikijtojkej ipan párrafo 9, nojkia kichijki kampeka amo moiljuis tlamantli tlen sokiyo. Ya kiijtoua: “Amo nechtlanki tlen nimoiljuiyaya pampa mojmostla nijpouayaya Biblia. Nopa nechpaleuik ma nikilnamiki nonemilis nijmaktilijtok Jehová uan nijneki nochipa ma eli nouampo” (Sal. 119:9).

¹¹ Tlaj tikixnamiki se kuesoli, uelis tikiniljuis motatauaj ma mitspaleuikaj. Maske uelis tijmatis ouij tikijtos tlen mitspano, tlauel mitspaleuis tlaj kiampa tijchiuas. Melissa kiijtoua: “Nikiljuik Jehová ma nechpaleui amo nimajmauis, teipa nikiljuik notata tlen nechpanoyaya. Nopa kichijki kuali ma nijyolmati. Uan nijmati Jehová kuali nechita”.

12. ¿Tlake mitspaleuis kuali xijtlapejpeni tlen tijchiuas?

¹² Xijkaua ma mitsyakana tlen Biblia tetlajtolmaka. Kej panotias xiuitl, mitskauasej moselti xijtlapejpeni se keski tlamantli. Maske kiampa tijchiuas, xikilnamiki ayamo tijmati miak tlamantli. ¿Tlake mitspaleuis amo tijyolkokos Jehová ika tlen tijtlapejpenis? (Prov. 22:3). Tosiuaikni Kari kiilnamiki tlake kipaleuik kuali kitlapejpenis tlen kichiuaskia. Ya kiitak kema se akajya kuali tlaneltoka, amo moneki kinauatijtosej sejse tlamantli tlen moneki kichiuas. Kari kiijtoua: “Monekiyaya achtoui nikitas kenijkatsa Jehová kiita se keski tlamantli uan amo san nijchiuas tlen nechnauatiaj”. Kema tijpouas Biblia, uelis timotlatsintokis: “¿Tlake nechmachtia ni tlapoualistli tlen kenijkatsa moiljuia Jehová? ¿Onka se texto tlen nechpaleuis nijchiuas tlen kuali? ¿Kenijkatsa nechpaleuis tlaj nijchiuas tlen Biblia tetlajtolmaka?” (Sal. 19:7; Is. 48:17, 18). Tlaj tijpouas Biblia uan timoyoliljuis ipan tlen kiijtoua, mitspaleuis xijtlapejpeni tlen kiyolpakiltis Jehová. Uan kema kuali titlaneltokatias, tikitas amo moneki ma mitsiljuijtokaj sejse tlamantli tlen moneki tijchiuas. Nopa kinextis nelia kuali titlaneltoka.

13. Kej kiijtoua Proverbios 13:20, ¿kenijkatsa uelis mitspaleuisej mouampoyouaj?

¹³ Ximouampojchiua ininuaya katli tlauel kiikneliaj Jehová. Ipan párrafo 7 tikitakej mouampoyouaj uelis mitspaleuisej nojua kuali xitlaneltoka (xijpoua Proverbios 13:20). Xikita tlen kipanok se tosiuaikni katli itoka Sara. Maske ayokmo yolpakiyaya kitekipanos Jehová, kipaleuik se tlamantli. Ya kiijtoua: “Nikinpantik kuali nouampoyouaj kema tlauel monekiyaya ma nechpaleuikaj. Sejse semana nimomachtiyaya Tlen Tematiltia iuaya se tosiuaikni ichpokatl, uan seyok nouampo nechpaleuik ma nitlanankili ipan tlanechikoli. Nouampoyouaj tlauel nechpaleuijtokej ma nijpatiita nimomachtis noselti uan ma nimomaijto. Teipa yolik kuali  nimouampojchijtiajki iuaya Jehová uan sampa pejki niyolpaki”.

14. ¿Kenijkatsa Julien kinpantik kuali iuampoyouaj?

¹⁴ ¿Tlake uelis tijchiuas uan kiampa uelis tikinpias kuali mouampoyouaj? Se toikni katli itoka Julien uan nama tlatekipanoua kej ueuejtlakatl, kiijtoua: “Kema nojua nieliyaya telpokatl, kuali nimouampojchijki ininuaya sekinok kema titlajtolmoyauayayaj. Tlauel yolpakiyayaj uan nechpaleuijkej ma nikita kema titlajtolmoyauaj kichiua tlauel ma tiyolpakikaj. Yeka, pejki nimoiljuia ueliskia senkistok nitlatekipanos. Nojkia nikitak san nimouampojchiuayaya ininuaya katli kipiayayaj noxiui uan amo ininuaya sekinok katli nojkia nechpaleuiskiaj. Teipa kema pejki nitlatekipanoua Betel, nikinpixki kuali nouampoyouaj. Inijuantij nechpaleuijkej kuali ma nijtlapejpeni tlen ika nimoyolpakiltis, uan nopa nechpaleuik nojua kuali ma nimouampojchiua iuaya Jehová”.

15. Kej kiijtoua 2 Timoteo 2:20-22, ¿tlake kiiljuik Pablo ma kichiua Timoteo?

¹⁵ ¿Tlake moneki tijchiuas tlaj tikitas ipan motlanechikol itstok se akajya katli amo mitspaleuia kuali xitlaneltoka? Ipan achtoui siglo, Pablo kiitak ipan tlanechikoli itstoyaj se keskij katli amo kuali monejnemiltiyayaj. Yeka kiiljuik Timoteo amo ma mouampojchiua ininuaya (xijpoua 2 Timoteo 2:20-22). Tlauel tijpatiitaj timouampojchijtosej iuaya toTata Jehová. Tijmatij tijchijtokej kampeka kuali timouikasej iuaya, yeka amo ma tijkauakaj yon se tlamantli ma techuejkatlali (Sal. 26:4).

16. ¿Tlake ueliskia timosentlalis tijchiuas?

¹⁶ Ximosentlali tijchiuas tlen nelia mitspaleuis. Uelis tijchiuas tlen mitspaleuis nojua kuali xitlaneltoka uan kuali ximonejnemilti (Efes. 3:16). Xijchiua kampeka nojua kuali timomachtis moselti uan tijpouas Biblia (Sal. 1:2, 3). O timomaijtos nochipa uan tijchiuas ika nochi moyolo. Nojkia tikitas ika tlake timoyolpakiltia uan kenijkatsa kuali tijtekiuis tonali (Efes. 5:15, 16). Jehová tlauel yolpaki kema kiita tijchiua kampeka nojua kuali titlaneltokas.

17. ¿Tlake tijselis tlaj tikinpaleuis sekinok?

 ¹⁷ Kema tikinpaleuis sekinok, mitspaleuis nojua kuali xitlaneltoka. Jesús kiijtok: “Más pakilistli kiselia tlen temaka se tlenijki, uan axkeja tlen kiselia” (Hech. 20:35). Tlauel mitspaleuis tlaj tijtekiuia tonali uan mochikaualis uan kiampa tikinpaleuia sekinok. ¿Tlake ueliskia tijchiuas? Uelis tikintlakouiti toikniuaj katli ya uejueyij o katli mokokouaj, o tikinnextilis kenijkatsa kitekiuisej inincelular. Tlaj tieli telpokatl uan ya timoatsonpoliuiltik, ximosentlali titlatekipanos kej tlapaleuijketl, kiampa tikinpaleuis toikniuaj (Filip. 2:4). Nojkia, tijnextia tikiniknelia maseualmej kema tijmoyaua nopa kuali tlamachtili (Mat. 9:36, 37). Uan tlaj tiueli, ximosentlali senkistok titlatekipanos.

18. ¿Kenijkatsa mitspaleuis tlaj timosentlalis senkistok titlatekipanos?

¹⁸ Tlauel mitspaleuis nojua kuali xitlaneltoka tlaj senkistok titlatekipanos. Tlaj timochiuas precursor uelis tias Kampa kinmachtiaj katli senkistok tlatekipanouaj, titlatekipanos Betel o kampa kichijchiuaj kali kampa titlaueyichiuaj. Xikita tlen kiijtoua Kaitlyn, se ichpokatl katli eli precursora: “Kema ya nimoatsonpoliuiltijtoya, tlauel nechpaleuik nojua kuali ma nitlaneltoka kema nitlatekipanok ininuaya toikniuaj katli miak xiuitl tlatekipanojtokej. Tlen kichiuayayaj nechpaleuik nojua kuali ma nimomachti Biblia uan kuali ma nitlamachti”.

19. ¿Tlake tlateochiualistli tijselis tlaj nojua kuali titlaneltokas?

¹⁹ Tijpias miak tlateochiualistli tlaj nojua tijchiuas kampeka kuali titlaneltokas. Amo timotonalpolos ika tlen amo mitspaleuis (1 Juan 2:17). Nojkia amo tijpias kuesoli tlen kiixnamikij katli amo kuali kitlapejpeniaj tlen kichiuaj. Tiyolpakis uan kuali tiitstos (Prov. 16:3). Tlen tijchiuas kinpaleuis sekinok telpokamej uan toikniuaj katli ya uejueyij (1 Tim. 4:12). Uan tlauel kuali tijyolmatis pampa Jehová kuali mitsitas uan timouampojchijtos iuaya (Prov. 23:15, 16).