1. ¿Tlake ueliskia kichiuasej ueuejtlakamej kema se akajya tlajtlakolchiua?

 IPAN tlamachtili 33, Apóstol Pablo kiniljuik toikniuaj tlen Corinto tlake monekiyaya kichiuasej kema se tlakatl tlajtlakolchijki. Nopa tlakatl amo moyolkueptoya, yeka kikixtijkej tlen tlanechikoli. Pero nopa texto tlen moixtomas ipan ni tlamachtili, kiijtoua se akajya kena uelis kipaleuisej ma moyolkuepa (Rom. 2:4). ¿Kenijkatsa Jehová kintekiuia ueuejtlakamej para kipaleuisej ma moyolkuepa se akajya katli tlajtlakolchijtok?

2, 3. ¿Tlake moneki tijchiuasej tlaj tijmatij se toikni kichijki se ueyi tlajtlakoli, uan kenke?

² Ximoiljui tijmatij se toikni tlajtlakolchijki o kichijki se tlamantli tlen ueliskia kichiuas ma kikixtikaj tlen tlanechikoli. ¿Tlake uelis tijchiuasej? Ueuejtlakamej moneki kimatisej tlake panotok uan kiampa uelis kipaleuisej nopa toikni. Yeka, ueliskia tikiljuisej ma kiniljui ueuejtlakamej para ma kipaleuikaj (Is. 1:18; Hech. 20:28; 1 Ped. 5:2).

³ ¿Uan tlaj nopa maseuali amo kineki kiniljuis ueuejtlakamej tlen kichijki? Tojuantij moneki tikiniljuisej pampa tijnekij ma kipaleuikaj. Tlaj kiampa tijchiuaj, tijnextisej tikikneliaj pampa amo tijnekiskiaj ma mouejkatlali tlen Jehová o  sekinok ayokmo kuali ma kiitakaj Jehová itlanechikol. Yeka, maske ouij tijmatisej, moneki amo timajmauisej uan tikiniljuisej ueuejtlakamej, kiampa tijnextisej tikikneliaj Jehová uan nojkia nopa toikni (Sal. 27:14).

¿KENIJKATSA UEUEJTLAKAMEJ KIPALEUIAJ SE TLAJTLAKOLCHIJKETL?

 4. ¿Tlake kinekij kichiuasej ueuejtlakamej kema monechikouaj iuaya se akajya katli kichijtok se ueyi tlajtlakoli?

⁴ Kema se toikni kichiua se ueyi tlajtlakoli, ueuejtlakamej kintlapejpeniaj eyij ueuejtlakamej katli kuali tlalnamiktokej a para ma mokamanaljuikaj iuaya. Inijuantij moneki amo moueyimatisej uan kiilnamiktosej maske kichiuasej kampeka kipaleuisej ma moyolkuepa, amo uelis kichiualtisej kiampa ma kichiua (Deut. 30:19). Ueuejtlakamej kimatij amo nochi kipatlaj inintlalnamikilis uan moyolkuepaj sanse kej kichijki tlanauatijketl David (2 Sam. 12:13). Sekij amo kinekij kineltokasej Jehová iTlanauatiljuaj (Gén. 4:6-8). Pero ueuejtlakamej kinekij kichiuasej kampeka kipaleuisej ma moyolkuepa katli tlajtlakolchijki. ¿Ika tlake textos moyakanaj kema mokamanaljuiaj iuaya katli tlajtlakolchijki?

 5. ¿Tlake moneki kiilnamiktosej ueuejtlakamej kema monechikosej iuaya nopa tlajtlakolchijketl? (2 Timoteo 2:24-26; nojkia xikita tlaixkopinkayotl).

⁵ Ueuejtlakamej kiitaj katli tlajtlakolchijki kej se pilborregojtsi katli mokuapolojtok (Luc. 15:4, 6). Kiampa kinextiaj ika tlen kichiuaj uan ika tlen kiijtouaj kema kamanaltij iuaya. Kema monechikouaj iuaya amo kiajuaj, amo chikauak kitlakaualtiaj uan amo san kinekij kimatisej tlen kichijtok. Inijuantij kinextiaj nopa kuajkuali tlamantli tlen kiijtoua 2 Timoteo 2:24-26 (xijpoua). Kinextiaj kitlasojtlaj, kuali kinojnotsaj uan kikamanaljuiaj ika yamanik tlajtoli para ma asi ipan iyolo tlen kiiljuisej.

 6. ¿Kenijkatsa ueuejtlakamej kikualchijchiuaj ininyolo kema ayamo monechikouaj iuaya nopa tlajtlakolchijketl? (Romanos 2:4).

⁶ Ueuejtlakamej moneki kikualchijchiuasej ininyolo. Inijuantij kimatij tlen Pablo kiijtok: “Dios kipia kuali iyolo uan yeka kitemolia kenijkatsa mitspaleuis ximoyolkuepa” (xijpoua Romanos 2:4). Yeka, ueuejtlakamej kichiuaj kampeka kinextisej teikneliaj kej Jehová kichiua ika katli tlajtlakolchiuaj. Moneki kiilnamikisej inijuantij kinmokuitlauiaj Jehová itekipanojkauaj, moyakanasej ika tlen Jehová itlanechikol kiniljuia uan kichiuasej kej  Jesús (Is. 11:3, 4; Mat. 18:18-20). Kema ayamo monechikouaj iuaya nopa tlajtlakolchijketl, nopa eyij ueuejtlakamej moneki kiiljuisej Jehová ma kinpaleui para kipaleuisej ma moyolkuepa. Kitemouaj tlamachtili ipan Biblia, ipan amatlajkuiloli uan kiiljuiaj Jehová ma kinpaleui para kuali kimatisej tlen kichijtok nopa maseuali uan kikuamachilisej. Kiitaj tlake tlamantli uelis kichijki ma kipatla kej moiljuia uan kej monejnemiltia (Prov. 20:5).

7, 8. ¿Kenijkatsa ueuejtlakamej uelis kinextisej kipiaj ininyolo sanse kej Jehová kema monechikosej iuaya nopa tlajtlakolchijketl?

⁷ Ueuejtlakamej kipiaj ininyolo sanse kej Jehová. Kimatij tlake kichijki Jehová kema itekipanojkauaj tlajtlakolchijkej uejkajkia. Se neskayotl, Jehová kiiljuik Caín ueliskia sampa kuali kiitas tlaj kipatlaskia tlen moiljuijtoya kichiuas. Pero nojkia kiiljuik tlake kipanoskia tlaj amo kipatlaskia (Gén. 4:6, 7). Seyok tonali, kema Jehová kinejki kitlalnamiktis tlanauatijketl David, kititlanki teokamanalojketl Natán para ma kipaleui ma moyolkuepa (2 Sam. 12:1-7). Nojkia, Jehová miakpa kintitlanki iteokamanalojkauaj para ma kintlalnamiktikaj israeleuanij (Jer. 7:24, 25). Amo kichixki achtoui ma moyolkuepakaj uan teipa kinpaleuik, ya kiniljuik ma moyolkuepakaj kema nojua tlajtlakolchijtoyaj.

⁸ ¿Kenijkatsa ueuejtlakamej uelis kichiuasej kej Jehová para kipaleuisej katli tlajtlakolchijtok? Kej kiijtoua 2 Timoteo 4:2 moneki kipiasej ininyolo. Moneki amo kualanisej kema kamanaltisej iuaya uan kuali kinojnotsasej, kiampa uelis kiyololinisej ma kichiua tlen kuali. Tlaj ueuejtlakamej kualanisej, katli tlajtlakolchijki ueliskia ayokmo kinekis kintlakakilis yon kinekis moyolkuepas.

9, 10. ¿Tlake uelis kichiuasej ueuejtlakamej para kipaleuisej nopa toikni ma kikuamachili kenke tlajtlakolchijki?

⁹ Ueuejtlakamej kiitaj tlake tlamantli ayokmo kichijki nopa toikni uan yeka tlajtlakolchijki. ¿Uelis pejki ayokmo momachtia yon kisa tlajtolmoyaua? ¿Ayokmo momaijtok? ¿Kikajki amo kuali tlamantli ma peua moskalti ipan itlalnamikilis? ¿Uelis pejki mouika ininuaya katli amo kitekipanouaj Jehová o pejki moyolpakiltia ika tlen amo kinamiki? ¿Kikuamachilia kenijkatsa kiyolmati Jehová ika tlen kitlapejpenik kichiuas?

¹⁰ Ueuejtlakamej moneki kuali moiljuisej tlake kitlatsintokisej, kiampa amo kitlajtlanisej tlen amo kinamiki. Tlaj kinextisej kiikneliaj nopa toikni, uelis kimatis kenijkatsa kamanaltis, amo kintlatilis tlen kichijki uan kikuamachilis kenke tlajtlakolchijki (Prov. 20:5). Ueuejtlakamej nojkia uelis kichiuasej kej Natán kema kamanaltik iuaya David, kitekiuisej neskayomej para kipaleuisej nopa toikni ma kiita amo kuali tlen kichijki. Uelis kema achtoui monechikosej iuaya, asis ipan iyolo tlen kiiljuisej uan moyolkuepas.

11. ¿Kenijkatsa Jesús kinpaleuik katli tlajtlakolchijkej?

¹¹ Ueuejtlakamej kichiuaj kampeka kichiuasej kej Jesús. Jesús kitlajtlanik Saulo de Tarso: “Saulo, Saulo, ¿kenke tinechtlaijiyouiltia?”. Ika tlen kitlajtlanik, kipaleuik ma kiita kenke amo kuali tlen kichiuayaya (Hech. 9:3-6). Uan ipan Apocalipsis 2:20, 21 kiijtok kichixki miak tonali para Jezabel ma moyolkuepa.

12, 13. ¿Tlake uelis kichiuasej ueuejtlakamej para kipaleuisej nopa tlajtlakolchijketl ma moyolkuepa? (Nojkia xikita tlaixkopinkayomej).

¹² Ueuejtlakamej kichiuaj kej Jesús kema amo nima kiijtouaj nopa tlajtlakolchijketl amo kineki moyolkuepas. Sekij nima moyolkuepaj kema achtoui monechikouaj  ininuaya, pero sekij moneki panos se keski tonali. Yeka, uelis ueuejtlakamej amo sampatsi monechikosej iuaya. Uelis kema ya panotos se keski tonali kema achtoui monechikojkej, moyoliljuis ipan tlen kiiljuijkej uan kiiljuis Jehová ma kitlapojpoljui (Sal. 32:5; 38:18). Uelis kema ika ompa monechikosej iuaya ya kipatlatos itlalnamikilis.

¹³ Ueuejtlakamej moneki kinextisej kiikneliaj uan kikuamachiliaj nopa tlajtlakolchijketl, kiampa uelis kipaleuisej ma moyolkuepa. Kitlajtlaniaj Jehová ma kinpaleui, pampa kinekij nopa maseuali ma kipatla itlalnamikilis (2 Tim. 2:25, 26).

14. Kema se tlajtlakolchijketl moyolkuepa, ¿ajkia kinamiki tijuejkapantlalisej, uan kenke?

¹⁴ Tlauel tiyolpakij kema se tlajtlakolchijketl moyolkuepa (Luc. 15:7, 10). Pero, ¿ajkia kipaleuik ma moyolkuepa? Ma tikilnamikikaj Pablo kiijtok “uelis Dios kinkauas ma moyolkuepakaj” katli tlajtlakolchiuaj (2 Tim. 2:25). Uajka Jehová kipaleuia nopa tlajtlakolchijketl ma kikaua tlen kichiuayaya. Teipa, Pablo kiijtok kenijkatsa kinpaleuia katli moyolkuepaj: Se, kinpaleuia más ma kipatiitakaj tlen melauak, ome, ma motlalnamiktikaj uan eyi, ma mochololtikaj tlen nopa tlamasiltili tlen Diablo kintlalilijtok (2 Tim. 2:26).

15. ¿Kenijkatsa ueuejtlakamej nojua uelis kipaleuisej nopa toikni?

¹⁵ Tlaj nopa maseuali moyolkuepa, ueuejtlakamej moneki nojua kipaxalosej para kipaleuisej ma kitetili itlaneltokilis, ayokmo ma kichiua tlen kiyoltilana uan kuali ma monejnemilti (Heb. 12:12, 13). Nojkia, ueuejtlakamej amo aka kiiljuisej tlen kichijki nopa toikni. Pero, ¿tlake monekiskia kimatisej toikniuaj tlen tlanechikoli?

XIKINTLALNAMIKTI “ININIXPA NOCHI KATLI MOSENTILIJTOKEJ”

16. Tlen kiijtok Pablo ipan 1 Timoteo 5:20, ¿ajkia inijuantij monekiyaya kintlalnamiktisej?

¹⁶ (Xijpoua 1 Timoteo 5:20). Pablo kiiljuik Timoteo, katli nojkia eliyaya  ueuejtlakatl, ma kintlalnamikti tlajtlakolchiuanij “ininixpa nochi katli mosentilijtokej”. ¿Ajkia inijuantij eliyayaj “nochi katli mosentilijtokej”? Amo nochi toikniuaj tlen tlanechikoli, san se keskij katli kimatkej, kiitakej o katli nopa toikni katli tlajtlakolchijki kiniljuik. Ueuejtlakamej san moneki kinmatiltisej nopa toikniuaj para ya kiitakej nopa tlamantli uan kitlalnamiktijkej nopa tlajtlakolchijketl.

17. Tlaj toikniuaj tlen tlanechikoli kimatisej o kimatij tlen kichijki nopa tlajtlakolchijketl, ¿tlake kinamiki kinmatiltisej toikniuaj, uan kenke?

¹⁷ Kemantika toikniuaj tlen tlanechikoli kimatij o ueliskia kimatisej tlen kichijki nopa tlajtlakolchijketl. Uajka nopa tlajtoli “katli mosentilijtokej” kiijtosneki nochi toikniuaj tlen tlanechikoli. Kema panos nopa tlamantli, se ueuejtlakatl moneki kinmatiltis toikniuaj ipan tlanechikoli nopa toikni o tosiuaikni katli tlajtlakolchijki, ya kitlalnamiktijkej. ¿Kenke kinamiki kiampa mochiuas? Pablo kiijtok: “Kiampa sekinok majmauisej tlajtlakolchiuasej” uan amo kichiuasej nopa tlajtlakoli.

18. ¿Tlake kichiuaj ueuejtlakamej tlaj nopa tlajtlakolchijketl ayamo kiaxitia 18 xiuitl? (Nojkia xikita tlaixkopinkayotl).

¹⁸ ¿Tlake uelis kichiuasej tlaj katli tlajtlakolchijki ayamo kiaxitia 18 xiuitl? Ueuejtlakamej kintlapejpenisej omej ueuejtlakamej para ma monechikokaj iuaya nopa toikni uan itatauaj, katli nojkia kitekipanouaj Jehová. b Nopa ueuejtlakamej kiitasej tlake kichijtokej nopa tetajmej para kipaleuisej ininkone ma moyolkuepa. Tlaj katli tlajtlakolchijki kuali kintlakakilia uan kikaua ma kipaleuikaj  itatauaj, uajka nopa omej ueuejtlakamej uelis kiitasej amo monekis eyij ueuejtlakamej ma monechikokaj ininuaya. Kiampa kichiuaj pampa Jehová kiijtojtok tetajmej kinamiki kintlalnamiktisej ininkoneuaj ika tlaiknelili (Deut. 6:6, 7; Prov. 6:20; 22:6; Efes. 6:2-4). Nojkia, kemantika ueuejtlakamej moneki kamanaltisej ininuaya nopa tetajmej para kimatisej kenijkatsa kipaleuijtiauij ininkone. Pero tlaj nopa tlajtlakolchijketl amo moyolkuepa uan amo kipatla itlalnamikilis, eyij ueuejtlakamej moneki monechikosej iuaya uan itatauaj, katli nojkia kitekipanouaj Jehová.

“JEHOVÁ TLAUEL TEIKNELIA UAN TETLASOJTLA”

19. ¿Kenijkatsa ueuejtlakamej kichiuaj kej Jehová kema kitlalnamiktiaj se akajya katli kichijki se ueyi tlajtlakoli?

¹⁹ Kema eyij ueuejtlakamej kitlalnamiktiaj se tlajtlakolchijketl, kichiuaj pampa amo kinekij ma kinmaua sekinok toikniuaj ipan tlanechikoli uan pampa Jehová kiampa kiniljuijtok ma kichiuakaj (1 Cor. 5:7). Pero nojkia kichiuaj kampeka kipaleuisej nopa tlajtlakolchijketl ma moyolkuepa, yeka toikniuaj kipiaj ininyolo. Tlen kichiuaj kinextiaj sanse kej Jehová, katli “tlauel teiknelia uan tetlasojtla” (Sant. 5:11). Kema apóstol Juan ya ueuejtixtoya, kiijtok ika tlaiknelili: “Nokoneuaj tlen niinmechiknelia, niinmechtlajkuiljuilia nochi ni tlamantli para amo xitlajtlakolchiuakaj. Pero intla se akajya tlajtlakolchiuas, tijpiaj se totlatempaleuijka tlen itstok iixtla Toteko Totata. Totlatempaleuijka yajaya Jesucristo tlen kichiua san tlen senkistok kuali” (1 Juan 2:1).

20. ¿Tlake tikitasej ipan tlamachtili 35?

²⁰ Maske amo tijnekiskiaj, kemantika se toikni katli kichijtok se ueyi tlajtlakoli amo kineki moyolkuepas. Kema kiampa pano, moneki kikixtisej tlen tlanechikoli. ¿Kenijkatsa ueuejtlakamej kitlachiliaj ni tlamantli? Ni tlajtlanili moixtomas ipan tlamachtili 35.