1, 2. Kej kipanok Angelito, ¿tlake moneki tijchiuasej sejse tlen tojuantij?

¿MOTATAUAJ kitekipanouaj Jehová? Tlaj kena, xikilnamiki maske inijuantij kuali mouampojchijtokej iuaya toTeotsij, amo kiijtosneki ta nojkia ya kuali timouikas iuaya. Tlaj kitekipanouaj o amo, ta moselti moneki tijchiuas kampeka kuali timouampojchiuas iuaya Jehová.

² Xikita tlake kipanok se toikni katli itoka Angelito. Maske itatauaj kitekipanouayayaj Jehová, kema nojua telpokatl amo kuali mouikayaya iuaya toTeotsij. Ya kiijtoua: “Nijtekipanouayaya Jehová san pampa nijnekiyaya nijchiuas tlen nochampoyouaj kichiuayayaj”. Teipa mosentlalik kipouas Biblia uan moyoliljuis ipan tlen kipouayaya, uan pejki tlauel momaijtoua. ¿Tlake panok? Angelito kiijtoua: “Nijkuamachilik ueliskia nijyolmatis niitstok inechka Jehová tlaj nelnelia kuali nikixmatis”. Tlen kipanok kichiua ma timotlajtlanikaj ome tlamantli tlen tlauel ipati: ¿kenke amo sanse san tijmatisej se keski tlamantli tlen Jehová uan nelnelia kuali tikixmatisej? Uan, ¿tlake techpaleuis kuali ma tikixmatikaj?

3. ¿Kenke amo eli sanse san tijmatisej se keski tlamantli tlen Jehová uan kuali tikixmatisej?

³ Uelis timoiljuiaj kuali tikixmatij Jehová pampa tijmatij kenijkatsa itoka o pampa tijmatij se keski tlamantli tlen kichijtok o kiijtojtok. Tlaj tijnekij kuali tikixmatisej, moneki  tijchiuasej sekinok tlamantli. Moneki tijkixtisej tonali uan kiampa uelis timomachtisej kenijkatsa eli uan tlake kuajkuali tlamantli kinextia. Kiampa tijkuamachilisej kenke kiijtoua o kichiua se tlenijki. Nopa techpaleuis ma tijmatikaj tlaj kipaktia tlen timoiljuiaj uan tlen tijchiuaj. Uan kema ya tijkuamachilijkej tlen Jehová kineki ma tijchiuakaj, nama moneki tijchiuasej.

4. ¿Kenijkatsa techpaleuis tlaj tikitasej tlen kichijkej se keskij toTeotsij itekipanojkauaj?

⁴ Sekij maseualmej techpinajtiaj pampa tijnekij tijtekipanosej Jehová, uan uelis kinekisej techtlatsakuiltisej kema peuas tiasej tlanechikoli. Tlaj timotemachiaj ipan Jehová, ya amo kema techtlauelkauas. Kej kema tijtsinpeualtiaj se tlenijki, peuas kuali timouampojchiuasej iuaya Jehová uan kiampa tijchijtosej ipan nochi tonemilis. ¿Nelnelia uelis kuali tikixmatisej Jehová? Kena uelis. Tlen kinpanok David uan Moisés kinextia kena uelis. Ma tikitakaj tlake kichijkej uan kenijkatsa kiixmatkej Jehová, uan nojkia kenijkatsa uelis tijchiuasej kej inijuantij.

5. ¿Tlake kinejki kichiuas Moisés?

⁵ Moisés kitlapejpenik kitekipanos toTeotsij. Kema kipixtoya se 40 xiuitl, kinejki kinpaleuis toTeotsij itekipanojkauaj, uan amo kinejki ma kiixmatikaj kej “ikone iichpoka Faraón” (Heb. 11:24). Amo kinejki kiselis se tekitl tlen tlauel ipati. Ya kinpaleuik hebreos, katli kinchiualtiyayaj ma tlatekipanokaj ipan Egipto. Maske faraón, katli moitayaya kej se teotsij, ueliskia tlauel kitlatsakuiltis, Moisés amo majmajki. Kinextik nelnelia tlaneltokayaya uan motemachiyaya ipan Jehová. Pampa motemachik, kipaleuik nochipa ma mouampojchijto iuaya (Prov. 3:5).

6. ¿Tlake techmachtia tlen kichijki Moisés?

⁶ ¿Tlake techmachtia? Sanse kej Moisés, nochi moneki tijtlapejpenisej se tlamantli tlen tlauel ipati: “¿Tijtekipanosej Jehová uan tiitstosej ipan itlanechikol?”. Tlaj tijtlapejpenisej tijtekipanosej Jehová, uelis monekis tijkauasej se keski tlamantli uan sekinok kinekisej techtlatsakuiltisej. Tlaj timotemachisej ipan toTata, temachtli ya techpaleuis.

7, 8. ¿Tlake nojua kiyekok Moisés?

⁷ Moisés nochipa kiitak nopa kuajkuali tlamantli tlen Jehová kinextia uan kichijki ipakilis. Kema Jehová kiiljuik ma kinmakixti israeleuanij, Moisés moiljuik ya amo ueliskia kichiuas nopa, yeka miakpa kiijtok amo ueliskia. ToTeotsij kinextik tlauel kitlasojtlak uan kipaleuik (Éx. 4:10-16). Yeka, Moisés uelki kiiljuik faraón kenijkatsa kitlatsakuiltiskiaj. Teipa, kiitak kenijkatsa Jehová kitekiuik miak chikaualistli kema kinmakixtik israeleuanij uan kema kimiktik faraón uan itlateuijkauaj ipan ueyi atl Rojo (Éx. 14:26-31; Sal. 136:15).

⁸ Kema Moisés ya kinkixtik israeleuanij tlen Egipto, inijuantij pejkej tlaijixnamikij. Ipan nochi nopa xiuitl, Moisés kiitak kenijkatsa Jehová kipiayaya ueyi iyolo ininuaya (Sal. 78:40-43). Uan nojkia kiitak kenijkatsa tlauel moechkapantlaliyaya, pampa kipatlak tlen moiljuijtoya kichiuas san pampa Moisés kitlajtlanik (Éx. 32:9-14).

9. ¿Kenijkatsa Hebreos 11:27 kinextia Moisés uan Jehová tlauel kuali mouikayayaj?

⁹ Kema ya kistoyaj tlen Egipto, Moisés tlauel kuali mouampojchijki iuaya Jehová, uan yeka kejuak kiitayaya pampa kimajtoya  “itstoya iuaya” (xijpoua Hebreos 11:27). Uan Biblia kiijtoua: “ToTeko kikamanaljuik Moisés, moixtlachiliyayaj keja se tlen kamanalti iuaya iuampo” (Éx. 33:11).

10. ¿Tlake moneki tijchiuasej uan kiampa kuali tikixmatisej toTeotsij?

¹⁰ ¿Tlake techmachtia? Tlaj tijnekij kuali tikixmatisej Jehová, amo san moneki tijmatisej tlake kuajkuali tlamantli kinextia, moneki tijchiuasej tlen ya kipaktia. Uan, ¿tlake kineki ma tijchiuakaj? Biblia kiijtoua: “Pampa yajaya kineki nochi tlakamej ma momakixtikaj uan ma kimatikaj tlen nelia melauak” (1 Tim. 2:3, 4). Kema tikinmachtiaj sekinok maseualmej tijchiuaj tlen ya kineki.

11. ¿Kenke nojua kuali tikixmatij toTeotsij kema tikinmachtiaj sekinok tlen ya?

¹¹ Tikixmatij Jehová kema tikinmachtiaj sekinok maseualmej tlen ya. Tikitaj kenijkatsa Jehová kintlasojtla maseualmej pampa techpaleuia tikinpantisej katli kipiaj kuali ininyolo (Juan 6:44; Hech. 13:48). Nojkia tikitstokej kenijkatsa iTlajtol kipia chikaualistli kema tikitaj katli tikinmachtiaj ayokmo kichiuaj tlen momajtokej uan kenijkatsa kipatlaj ininnemilis (Col. 3:9, 10). Uan pampa Jehová kinpaleuia miakej maseualmej ma kiixmatikaj uan ma momakixtikaj, tikitak kenijkatsa kipia iyolo (Rom. 10:13-15).

12. Kej kiijtoua Éxodo 33:13, ¿tlake tlajtlanki Moisés, uan kenke?

¹² Moisés kipatiitak mouampojchiuas iuaya Jehová. Maske kichijtoya miakpa uejueyi tlamantli ika itlapaleuil toTeotsij, ya kitlajtlanik ika tlatlepanitalistli ma kipaleuia nojua kuali kiixmatis (xijpoua Éxodo 33:13). Maske Moisés kipixtoya kipano 80 xiuitl, ya kuali kimajtoya nojua kipolouayaya kiyekos miak tlen iTata Jehová.

13. ¿Kenijkatsa uelis tijnextisej tijpatiitaj timouampojchijtosej iuaya Jehová?

¹³ ¿Tlake techmachtia? Moneki nochipa tijpatiitasej timouampojchijtosej iuaya Jehová, maske uelis ya uejkajtok tijtekipanojtokej. Uelis tijnextisej ni tlamantli kema timomaijtouaj.

14. ¿Kenke tlauel moneki timomaijtosej tlaj tijnekij tikixmatisej Jehová?

¹⁴ Uelis kuali timouampojchiuasej iuaya se akajya tlaj nochipa timonojnotsaj. Yeka, moneki nochipa timomaijtosej uan kiampa tijnechkauisej Jehová. Amo kinamiki timajmauisej o tipinauasej tikiljuisej tlen timoiljuiaj uan tlen tijyolmatij (Efes. 6:18). Krista, se toikni tlen eua Turquía, kiijtoua: “Nochipa kema nikiljuia Jehová tlen nimoiljuia uan nikita kenijkatsa nechpaleuia, nechyololinia nojua ma nikiknelia uan ma nimotemachi ipan ya. Pampa nochipa nechnankilia, nechpaleuijtok ma nikita kej noTata uan noUampo”.

15. ¿Tlake kiijtok Jehová tlen David?

¹⁵ Maske tlanauatijketl David tlakatki ipan se altepetl kampa nochi kimaktilijtoyaj Jehová ininnemilis, ya amo san tlaueyichijki kej ichampoyouaj kichiuayayaj. Iselti mouampojchijki iuaya toTeotsij, uan Jehová tlauel kiikneliyaya. Yeka, se tonali kiijtok David tlauel kiyolpakiltiyaya (Hech. 13:22). ¿Tlake kichijki David uan kiampa tlauel kuali mouikak iuaya Jehová?

16. ¿Tlake kiyekok David kema kiitayaya nochi tlen Jehová kichijchijtok?

¹⁶ David kiixmatki Jehová ika nochi tlen kichijchijtok. Kema eliyaya telpokatl, kinmokuitlauijtoya itata itlapialjuaj uan yeka tlauel uejkauayaya itstoya tlamayantipa. Uelis uajka pejki moyoliljuia ipan tlen  Jehová kichijchijtoya. Uelis kema tlayoua kitlachiliyaya iluikaktli, amo san kiitayaya miak sitlalimej, ya kiitayaya tlake kuajkuali tlamantli kipixtoya katli kinchijchijtoya. Yeka, kiijtok: “Iueyitilis toTeko monextia ipan nochi tlen kichijtok. Iluikaktli tepouilia iueyitilis toTeko [Jehová]” (Sal. 19:1, 2). Nojkia kiitayaya Jehová tlauel kipia miak tlalnamikilistli kema moyoliljuiyaya kenijkatsa kinchijchijtokej maseualmej (Sal. 139:14). Moiljuiyaya amo tleno ipati kema kiitayaya kenijkatsa tlauel kuali kichijchijtok nochi (Sal. 139:6).

17. ¿Tlake panos tlaj timoyoliljuisej ipan tlen toTeotsij kichijchijtok?

¹⁷ ¿Tlake techmachtia? Kuali ma tikitakaj nochi tlen Jehová kichijchijtok. Amo san kej ueli ma tiitstokaj ipan ni Tlaltipaktli, ma tikitakaj nochi yejyektsitsij tlamantli tlen onka. Mojmostla, kema tijchijtosej se tlenijki, ma timoyoliljuikaj tlake techmachtia tlen toTeotsij nochi tlen eltok tonechka: kuauitl, xiuitl, tlapialmej uan maseualmej. Kiampa, mojmostla tijyekosej miak tlamantli tlen toTata Jehová, katli tlauel teiknelia (Rom. 1:20). Uan nojkia tikitasej kenijkatsa tlauel moskaltia nopa tlaiknelijkayotl tlen tijpialiaj.

18. Kej kinextia Salmo 18, ¿tlake kimatiyaya David?

¹⁸ David kiitak kenijkatsa Jehová kipaleuik. Kema kinmanauik nopa tlapialmej katli kinmokuitlauiyaya tlen se león uan se oso, kimatki uelki kinmiktik nopa tlapialmej katli tlauel mosisiniyayaj pampa toTeotsij kipaleuik. Kema kimiktik Goliat, se uejkapantik tlakatl, nimantsi kimatki Jehová kiyakanayaya (1 Sam. 17:37). Uan nojkia kiitak Jehová kipaleuiyaya kema mochololtik tlen tlanauatijketl Saúl (Sal. 18, tlen kiijtoua kampa peua). Tlaj moueyimajtoskia, kiijtojtoskia ya iselti kichijki nochi nopa tlamantli. David moechkapantlaliyaya uan yeka kiitak kenijkatsa Jehová kipaleuik ipan nochi inemilis (Sal. 138:6).

19. ¿Tlake techmachtia tlen kichijki David?

¹⁹ ¿Tlake techmachtia? Amo san moneki tijtlajtlanisej Jehová ma techpaleui, moneki tijchiuasej kampeka tikitasej kenijkatsa uan kema techpaleuia. Tlaj timoechkapantlaliaj uan tikilnamikij tojuantij amo nochi tiuelij tijchiuaj se tlenijki, uajka nimantsi tikitasej kenijkatsa Jehová techpaleuia. Uan nochipa kema tikitasej nopa, techpaleuis nojua tlauel kuali ma timouampojchiuakaj iuaya. Kiampa kipanok Isaac, se toikni tlen Fiyi, katli miak xiuitl kitekipanojtok Jehová. Ya kiijtoua: “Kema nimoiljuia nochi tlen nechpanotok, nikita kenijkatsa Jehová nochipa nechpaleuijtok. Pejki kiampa kichiua kema nijpeualtik nimomachtia Biblia. Nopa nechpaleuijtok ma nijmati nelnelia itstok”.

20. ¿Kenijkatsa kipaleuik David pampa kuali mouikayaya iuaya toTeotsij, uan tlake tijyekouaj?

²⁰ David kinextik kuajkuali tlamantli kej Jehová. ToTeotsij kuali techchijchijki, yeka ueli tijnextiaj kuajkuali tlamantli kej ya (Gén. 1:26). Kema nojua kuali tikixmatij, techpaleuia nojua tijchiuasej kej ya. David kichiuayaya sanse kej iTata Jehová ika sekinok maseualmej pampa kuali kiixmatiyaya. Ximoiljui kema nopa tlanauatijketl kiixpanok Jehová, kema momekatik iuaya Bat-Seba uan teipa tlanauatik ma kimiktikaj iueue. Maske kiampa kichijki, Jehová kitlasojtlak (2 Sam. 11:1-4, 15). ¿Kenke? Pampa kimatiyaya David kichiuayaya kej ya uan nojkia kintlasojtlatoya sekinok. David kuali mouampojchijtoya iuaya Jehová, yeka elki se tlanauatijketl tlen Jehová tlauel kiikneliyaya. ToTeotsij nochipa kinilnamikilik sekinok tlanauatianij kenijkatsa  tlauel kuali kitekipanojtoya (1 Rey. 15:11; 2 Rey. 14:1-3).

21. Kej kiijtoua Efesios 4:24 uan 5:1, ¿kenijkatsa techpaleuia tijchiuasej kej Jehová?

²¹ ¿Tlake techmachtia? Moneki tijchiuasej kej toTeotsij, uan kema tijchiuaj nopa techpaleuia uan nojkia techpaleuia kuali tikixmatisej. Kema tijchiuaj kampeka tijnextisej nopa kuajkuali tlamantli ipan tonemilis, tijnextiaj tielij ikoneuaj (xijpoua Efesios 4:24; 5:1).

22, 23. ¿Tlake panos tlaj tijchiuaj nochi tlen tijyekouaj tlen Jehová?

²² Kej tikitstokej, Jehová techiljuia ajkia eli ika tlen kichijchijtok uan ika tlen kiijtoua iTlajtol. Ipan Biblia nesi tlen kichijkej itekipanojkauaj uan tojuantij uelis tijchiuasej kej inijuantij, kej Moisés uan David. Jehová kichijtok miak tlamantli pampa kineki ma tikixmatikaj, nama moneki tojuantij nojkia tijchiuasej kampeka kuali tikixmatisej.

²³ Nochipa tijyekojtiasej miak tlamantli tlen Jehová (Ecl. 3:11). Maske uelis tijmatisej miak tlamantli, san techpaleuis tlaj tijtekiuiaj tlen tijmatij. Tlaj tijchiuasej tlen timomachtiaj uan tijnextisej kuajkuali tlamantli tlen Jehová kinextia, ya nojua kinekis technechkauis (Sant. 4:8). Ipan iTlajtol techiljuia ya amo kema kintlauelkauas katli kitemouaj.