1. ¿Kenke tikijtouaj amo kema panotoya tlen nama pano?

IPAN ni tonali pano tlen amo kema panotoya. Kej Biblia kiijtojtoya, Jehová kinsentilia tlauel miakej maseualmej “tlen kampa ueli tlaltinij, uan tlen nochi xinachtli tlakamej, uan tlen [...] kamatij nochi tlamantli tlajtoli”. Kinsentilijtok kipano ocho millones tlen maseualmej katli tlauel yolpakij, uan inijuantij “kitekipanouaj youali uan tonali [...] ipan ichaj” (Apoc. [Rev.] 7:9, 15; Is. 60:22). Ipan ni tonali itstokej tlauel miakej maseualmej katli kiikneliaj Jehová uan kinikneliaj sekinok maseualmej. ¡Ni amo kema panotoya!

2. ¿Tlake kichiuaj katli amo kiikneliaj toTeotsij? (Xikita nopa achtoui tlaixkopinkayotl).

² Biblia nojkia kiijtok ipan “itlamia tonali”, maseualmej katli amo kiikneliskiaj Jehová san inijuantij moikneliskiaj. Apóstol Pablo kiijtok ‘san moiknelisej ininseltsitsij’, “kinekisej miak tomij” uan san kinekisej “mopakilismakasej, pero axkitemosej toTeko” (2 Tim. 3:1-4). Maseualmej katli ininselti moikneliaj kinextiaj amo kiikneliaj toTeotsij, uan yeka amo kema yolpakisej. San kichiuaj sekinok amo kuali ma itstokaj uan ma tlaijiyouikaj.

3. ¿Tlake tikitasej ipan ni tlamachtili, uan kenke?

 ³ Pablo kimatiyaya ipan ni tonali tlauel miakej ininselti moikneliskiaj. Uan nopa nojkia ueliskia kinpanos Cristo itokilijkauaj, yeka kiijtok: “Xikintlauelkaua [katli] kej ni kichiuaj” (2 Tim. 3:5). Pampa tiitstokej ipan Tlaltipaktli, kampa ueli tikinpantiaj katli kiampa kichiuaj. Uajka, ¿tlake techpaleuis amo ma tijchiuakaj kej maseualmej uan nojua tlauel tijyolpakiltisej Jehová, katli tlauel teiknelia? Ma tikitakaj kenijkatsa kineki toTeotsij ma titeiknelikaj uan tlake amo tijnekij tijnextisej, kej kiijtoua 2 Timoteo 3:2-4. Ni techpaleuis ma timotlajtlachilikaj uan ma tikitakaj kenijkatsa uelis tijnextisej nopa tlaiknelijkayotl tlen techpaleuis kuali ma tijyolmatikaj uan ma tiyolpakikaj.

4. ¿Kenke tijmatij amo kenijki tlaj tijnextisej timoikneliaj o timopatiitaj?

⁴ Apóstol Pablo kiijtok: “Tlakamej san moiknelisej ininseltitsitsij”. ¿Kiijtosneki amo kinamiki tijnextisej timoikneliaj? Amo, pampa kema Jehová techchijchijki, nojkia kichijki ma tijnextikaj timoikneliaj o timopatiitaj. Uan Jesús kiijtok: “Xikinikneli sekinok keja timoiknelia” (Mar. 12:31). Tlaj tojuantij amo timoikneliaj, uajka amo uelis tikiniknelisej sekinok. Biblia nojkia kiijtoua: “Moneki se tlakatl kiiknelis isiua keja [ya] moiknelia. Yajaya tlen kiiknelia isiua, moiknelia. Pampa axaka kitlauelkaua itlakayo. Nochi [...] kitlamakaj inintlakayo uan kimokuitlauiaj ika teiknelijkayotl” (Efes. 5:28, 29). Uajka amo kenijki tlaj tijnextiaj timoikneliaj o timopatiitaj.

5. ¿Kenijkatsa elij katli san inijuantij moikneliaj?

⁵ Maseualmej katli kichiuaj kej kiijtoua 2 Timoteo 3:2, kichiuaj se tlamantli tlen amo kinamiki pampa kinekij san inijuantij kuali itstosej. Moiljuiaj san inijuantij tlauel ininpati uan amo kinpatiitaj sekinok (xijpoua Romanos 12:3). San kintekipachoua tlen inijuantij kinpano. Uan kema se tlamantli amo kisa kej kinekiskiaj, kintlajtlakoltiaj sekinok uan amo kinekij kiijtosej inijuantij mokuapolojkej. Se tlakatl kiijtok nopa maseualmej katli san inijuantij moikneliaj elij kej nopa piltlapialtsi tlen itoka erizo. Nopa tlapiali “moololoua, kiampa ika iijtiko mokaua iijuiyo tlen tsotsoltik uan totonik, uan iixko san kinextia iuijtso”. Maseualmej katli san inijuantij moikneliaj amo kema nelnelia yolpakisej.

6. ¿Kenijkatsa techpaleuis tlaj tikiknelisej Jehová?

⁶ Ixtlamatinij kiijtouaj kema Pablo kiijtok kenijkatsa eliskiaj maseualmej ipan itlamia tonali, achtoui kiijtok maseualmej tlauel moikneliskiaj, pampa nopa tlamantli kinyololiniskia ma kichiuakaj nopa sekinok tlamantli tlen Pablo kiijtok teipa. Yeka, katli kiikneliaj toTeotsij kinextiaj kuajkuali tlamantli ipan ininnemilis. Biblia kiijtoua kema tikikneliaj Jehová, nojkia tlauel ‘tiyolpakij, tijpiaj tlayolseuilistli, tijpiaj toyolo, titetlasojtlaj, tikinchiuiliaj sekinok tlen kuali, tiitstokej titemachmej, timoiknonekij uan kuali timonauatiaj’ (Gál. 5:22, 23). Se tlakatl katli kiijkuilok salmos, kiijtok: “Nelia pakij kuali tlakamej tlen kipiaj [Jehová] para ininDios” (Sal. 144:15). ToTeotsij tlauel yolpaki, uan yeka itekipanojkauaj nojkia tlauel yolpakij. Amo kichiuaj kej katli san inijuantij moikneliaj uan san kinekij kiselisej se tlamantli, toTeotsij itekipanojkauaj yolpakij pampa kinpaleuiaj sekinok ika tlen kipiaj (Hech. 20:35).

7. ¿Tlake moneki timotlajtlanisej uan kiampa tijmatisej tlaj tlauel tikikneliaj Jehová?

⁷ ¿Kenijkatsa uelis tijmatisej tlaj pejtok san tojuantij tlauel timoikneliaj uan amo toTeotsij? Ma timoiljuikaj ipan tlen kiijtoua Filipenses 2:3, 4. Nopaya kiijtoua se Cristo itokilijka amo kinamiki kichiuas “se tlamantli  pampa kineki moueyimatis ininixpa sekinok”, kinamiki kinitas “sekinok keja más uejueyij”. Nojkia kiijtoua ma timoiljuikaj “tlen kinpaleuis sekinok” uan amo san tlen tojuantij techpaleuis. Uelis timotlajtlanisej: “¿Nijchiua ni tlamantli? ¿Nijchiua kampeka nijchiuas tlen Jehová kineki? ¿Nijchiua kampeka nimoiljuis kenijkatsa nikinpaleuis toikniuaj uan katli nikinpantia ipan tlajtolmoyaualistli?”. Kemantika ouij tijchiuasej tlen sekinok kinpaleuis. Uelis monekis tijchiuasej se ueyi kampeka o tijkauasej tlamantli tlen tlauel techpaktia. Maske kiampa monekis tijchiuasej, tlauel tiyolpakisej pampa tijmajtosej toTlanauatijka nojkia tlauel yolpaki.

8. ¿Tlake kichijtokej se keskij Cristo itokilijkauaj pampa kiikneliaj Jehová?

⁸ Miakej Cristo itokilijkauaj kikajtejtokej se tekitl tlen ueltoskia kichiuas ma kitlanikaj miak tomij. Kiampa kichijkej pampa tlauel kiikneliaj Jehová uan tlauel kinekij kitekipanosej. Kiampa kichijki se tosiuaikni katli itoka Ericka. Maske ya eli tepajtijketl, amo kinejki pankisas ipan iteki. Ya kiijtoua: “Pampa titlajtolmoyajtokej ipan seyok tlajtoli, techpanotok miak kuali tlamantli uan nama tikinpiaj miakej touampoyouaj. Nochi nopa kichijtok tlauel ma tiyolpakikaj. Maske nojua nitepajtijketl, nopa amo kichiua ma niyolpaki, tlauel niyolpaki pampa miak tonali nikinmachtia maseualmej tlen Jehová uan pampa nitlapaleuia ipan tlanechikoli”.

9. ¿Kenke amo yolpakij katli kinekij kipiasej miak tomij?

⁹ Pablo nojkia kiijtok sekinok “kinekisej miak tomij”. Namanok, se precursor tlen eua Irlanda kinojnotski se tlakatl pampa kinekiyaya kipouilis tlen toTeotsij. Nopa tlakatl kikixtik icartera uan kiiljuik: “¡Ya ni noteotsij!”. Maske sekij amo kiijtouaj kej nopa tlakatl, nojkia kiampa moiljuiaj. Tlauel kipatiitaj tomij uan nochi tlen uelis kikouasej. Yeka Biblia kiijtoua: “Tlen kineki elis rico, axkema moiljuia para ya kipia miak ricojyotl” (Ecl. 5:10). Katli tlauel kipatiitaj tomij, nochipa kinekisej tlatominpiasej uan san moiljuijtosej kenijkatsa kitlanisej miak. Uan nopa kichiuas ma kipiakaj “miak tlakuajkualojkayotl” (1 Tim. 6:9, 10).

10. Kej kiijtoua Biblia, ¿tlake pano kema se akajya tlauel tlatominpia uan kema se akajya amo kipia miak?

¹⁰ Nochi moneki tijpiasej tomij pampa kiampa uelis timopanoltisej (Ecl. 7:12). Uajka, tlaj se akajya san kipiaskia tlen ika mopanoltis, ¿ueliskia yolpakis? ¡Kena! (xijpoua Eclesiastés 5:12). Agur, ikone Jaqué, kiijtok: “Amo xinechricojtili, niyon amo xinechpobrejchiua. San xinechmaka tlen ika nipanotos mojmostla”. Kuali tijkuamachiliaj kenke kiiljuik Jehová amo kinekiyaya elis tlauel teikneltsi, pampa ya kiijtok ueliskia tlachtekis uan kiixpanoskia toTeotsij. Uajka, ¿kenke kitlajtlanik amo ma kimaka miak tlamantli? Ya kiijtok: “Pampa intla nimoricojchiuas, uelis teipa nimoueyimatis uan nimoiljuis para axmoneki nimotemachis ipan ta” (Prov. 30:8, 9). Uelis tojuantij tikinixmatij maseualmej katli san motemachiaj ipan inintomij uan amo ipan Jehová.

11. ¿Tlake kiijtok Jesús tlen nopa tomij?

¹¹ Katli tlauel kipatiitaj tomij amo uelis kiyolpakiltisej toTeotsij. Jesús kiijtok: “Axaka uelis kintekipanos omej itekojuaj, pampa kikokolis se uan kiiknelis ne se. Uan ika se elis temachtli, pero ne seyok kitlauelkauas. Iuikal eli, axueli inkitekipanosej toTeko intla inkikauiliaj ma inmechyoltilana tomij”. Jesús ipa kiijtojtoya: “Ayokmo xijnechikokaj tlen tlauel patiyo ipan Tlaltipaktli kampa uelis kualos o moxixas, uan kampa kalakij tlachtekinij uan kiichtekij. Uajka, xijnechikokaj tlen nelia ipati ne iluikak kampa amo uelis kualos yon moxixas, uan kampa amo kalakij tlachtekinij uan kiichtekij” (Mat. 6:19, 20, TNM, 24).

12. ¿Kenke kema timosentlaliaj amo tlauel titlatominpiasej techpaleuia tlauel ma tijtekipanokaj Jehová? Xikijto tlen kichijki se toikni.

 ¹² Miakej mosentlalijtokej amo tlauel tlatominpiasej, uan nopa kinpaleuijtok ma yolpakikaj uan ma mosentlalikaj tlauel kitekipanosej Jehová. Ipan Estados Unidos, se toikni katli itoka Jack kipixtoya se ueyi kali uan nojkia se kuali tekitl. Kinamakak nochi pampa kinekiyaya tlatekipanos kej precursor ika isiua. Ya kiijtoua: “Ouij tijmatkej tijnamakasej tochaj uan totlal. Kema niasiyaya nochaj nochipa nimotekipachouayaya pampa nijpiayaya kuesoli ipan noteki. Miak xiuitl kiampa nechpanok. Nosiua eliyaya precursora, uan nochipa yolpaktoya. Ya kiijtouayaya: ‘Amo itstok seyok kej katli na nijtekipanoua’. Nama nieli precursor uan tiomej san Jehová tijtekipanouaj”.

13. ¿Tlake techpaleuis ma tijmatikaj tlaj tlauel tijpatiitaj tomij?

¹³ ¿Tlake techpaleuis ma tijmatikaj kenijkatsa tikitaj tomij? Moneki kuali timoiljuisej ipan ni tlajtlanili: “¿Nijnextia ipan nonemilis nelia nijneltoka tlen Biblia kiijtoua tlen nopa tomij? ¿San nimosentlalia nijtlanis miak tomij? ¿San nechtekipachoua tlamantli tlen nijpia uan amo nimoiljuia kenijkatsa nimouampojchiuas iuaya Jehová uan ika toikniuaj? ¿Nelia nimotemachia Jehová nechmakas tlen moneki?”. Uelis timotemachisej Jehová amo kema kintlauelkauas katli motemachiaj ipan ya (Mat. 6:33).

14. ¿Kenijkatsa kinamiki tikitasej tlen ika timoyolpakiltiaj?

¹⁴ Ipan itlamia tonali nojkia itstoskiaj miakej maseualmej katli ‘kitemoskiaj san tlen ika mopakilismakasejʼ. Amo kenijki tlaj tijnextiaj timoikneliaj o tlaj tikitaj tomij kej kinamiki, uan nojkia amo kenijki tlaj timoyolpakiltiaj kej kinamiki. Maske sekij maseualmej kiijtouaj moneki tijkauasej miak tlamantli tlen ika timoyolpakiltiaj, Jehová amo techmachtia nopa. Biblia kiniljuia nochi katli xitlauak kitekipanouaj toTeotsij: “Xia xitlakuati uan xikiti moxokomekaatl ika pakilistli ipan moyolo” (Ecl. 9:7).

15. ¿Tlake kiijtosneki nopa tlajtoli “kitemosej san tlen ika uelis mopakilismakasej”?

¹⁵ 2 Timoteo 3:4 kiijtoua sekij maseualmej san kinpaktia moyolpakiltisej pampa amo kinekij kitekipanosej toTeotsij. Ipan nopa texto amo kiijtoua san kinekiskiaj  tlauel moyolpakiltisej uan amo tlauel kiiknelisej toTeotsij, pampa uajka kena kiikneliskiaj se kentsi. Nopaya kiijtoua san kitemoskiaj ‘tlen ika uelis mopakilismakasej, pero axkitemoskiaj toTeko’. Se tlakatl tlen tlauel momachtia kiijtok: “Ni [texto] amo kiijtosneki nopa maseualmej nojkia kiikneliskiaj toTeotsij se kentsi. Kiijtosneki yon se kentsi kiikneliskiaj”. Ni kinextia tlake kinpanos katli san kinekij moyolpakiltisej. Nopa tlajtoli “kitemosej san tlen ika uelis mopakilismakasej” kuali kinixnextia katli san “kinekij kipiasej nochi tlen kinyolpaktia” (Luc. 8:14).

16, 17. ¿Kenijkatsa kiitayaya Jesús tlen ika se moyolpakiltia?

¹⁶ Jesús amo kenijki kiitayaya tlaj moyolpakiltiskia. Se tonali yajki ipan “se tlakualistli tlen nenamiktili” uan ipan “se ueyi iljuitl” (Juan 2:1-10; Luc. 5:29). Kema tlanki vino ipan nopa iljuitl, ya kichijki atl ma mokuepa vino. Uan seyok tonali, kema maseualmej kiijilnamijkej pampa kiijtojkej san tlakuayaya uan tlaiyaya, ya kiniljuik amo kuali tlen inijuantij moiljuiyayaj (Luc. 7:33-36).

¹⁷ Maske moyolpakiltik, Jesús amo san mosentlalik ipan nopa tlamantli. Ya mosentlalik kitekipanos Jehová uan kichijki kampeka kinpaleuis miakej maseualmej. Nojkia kinejki tlaijiyouis ipan se kuauitl uan ma kimiktikaj pampa kinekiyaya maseualmej ma momakixtikaj. Nochi katli kitokiliskiaj kiniljuik: “Xipakikaj kema sekinok inmechpinajtiaj uan inmechtlaijiyouiltiaj uan inmechistlakauiaj pampa innechneltokaj. Kena, xipakikaj uan amo ximokuesokaj pampa toTeko ueyi inmechtlaxtlauis nepa iluikak. Kej nopa tlakamej nojkia kintlatsakuiltijkej iteokamanalojkauaj toTeko uejkajkia” (Mat. 5:11, 12).

18. ¿Tlake techpaleuis ma tijmatikaj tlaj san timosentlaliaj timoyolpakiltisej?

¹⁸ ¿Tlake techpaleuis ma tijmatikaj tlaj san timosentlaliaj timoyolpakiltisej? Ma timotlajtlanikaj: “¿San nechpaktia tlauel nimoyolpakiltis uan amo nias tlanechikoli yon nitlajtolmoyauas? ¿Nijneki nijkauas se keski tlamantli tlen nechpaktia pampa nijneki nijtekipanos toTeotsij? Kema nijtlapejpenia tlen ika nimoyolpakiltis, ¿nimoiljuia tlaj kipaktis Jehová?”. Tlaj nelnelia tikikneliaj Jehová, uajka amo timoyolpakiltisej ika tlen kikualankaita, yon ika se tlamantli tlen timoiljuiaj amo kipaktis (xijpoua Mateo 22:37, 38).

19. ¿Ajkia inijuantij amo kema nelnelia tlauel yolpakisej?

¹⁹ Ipan 6,000 xiuitl tlen panotok, Satanás tlauel kintlaijiyouiltijtok maseualmej. Uan ipan ni itlamia tonali, maseualmej san inijuantij mopatiitaj o moikneliaj, uan san moiljuiaj kenijkatsa tlauel tlatominpiasej uan moyolpakiltisej. San mosentlaliaj kichiuasej uan kipiasej tlen inijuantij kinekij. Nopa maseualmej amo kema nelnelia tlauel yolpakisej. Biblia kiijtoua ajkia inijuantij kena yolpakiskiaj: “Nelia paki nopa tlakatl tlen kipixtok keja itlapaleuijka yajaya tlen iTeko Jacob, uan san ipan toTeko iDios motemachia para kimokuitlauis” (Sal. 146:5).

20. ¿Kenijkatsa kichijtok tlauel xiyolpaki pampa tikiknelia toTeotsij?

²⁰ Kej panotia tonali, toTeotsij itekipanojkauaj nojua tlauel kiiknelijtiauij Jehová. Uan sejse xiuitl, miakej maseualmej kiixmatij uan kiikneliaj toTeotsij. Ni kinextia toTeotsij iTlanauatijkayo tekichijtok uan toTeotsij nechka tlauel techteochiuas ika nopa tlanauatijkayotl. Nelnelia tlauel tiyolpakij pampa tijmatij tijchiuaj tlen Jehová kineki uan pampa tijmatij nojkia tijyolpakiltiaj. Ipan nopa seyok tlamachtili tikitasej ome tlamantli tlen amo sanse: tlake amo kuali tlamantli kinextiaj katli san ininselti moikneliaj uan tlake kuajkuali tlamantli kinextiaj Jehová itekipanojkauaj.