1, 2. ¿Tlake kuesoli kipiaj Jehová itekipanojkauaj, uan tlake ueliskia kinpanos?

XIMOILJUI ipan ni eyi tlamantli. Se toikni katli nojua telpokatl kiiljuijkej kipixtoya se kokolistli tlen kichiuaskia ma tlantia ichikaualis. Se toikni katli tekititoya 50 xiuitl kipolok iteki uan amo kipantiyaya seyok tekitl maske kitemouayaya. Se tosiuaikni katli ya ueyi uan amo kitlauelkajtok Jehová, kimati ayokmo tlauel kuali tlatekipanoua.

² Tlaj tijpiaj se tlen ni kuesoli, uelis timoiljuiaj ayokmo tleno topati. Ni kuesoli uelis kichiuas ayokmo ma tiyolpakikaj, ayokmo ma timopatiitakaj uan ayokmo kuali ma timouikakaj ininuaya sekinok.

3. ¿Kenijkatsa Satanás uan maseualmej kiitaj nemilistli?

³ Tlen maseualmej kichiuaj kinextia kenijkatsa Satanás kiita ininnemilis maseualmej. Ya amo kema techpatiitstok. Pampa Satanás amo kuali iyolo, kiiljuik Eva ueliskia kichiuas tlen ya kineki, maske kuali kimajtoya mikiskia tlaj kiixpanoskia toTeotsij. Ya nochipa kiyakantok tlen kichiuaj tlanamakanij, políticos uan katli kiyakanaj religiones. Yeka, amo timosentlachiliaj kema nopa maseualmej kinextiaj amo kipatiitaj yon kitlepanitaj nemilistli yon se kentsi.

4. ¿Tlake tikitasej ipan ni tlamachtili?

⁴ Jehová amo kiampa kichiua, pampa ya kineki kuali ma tijyolmatikaj uan techpaleuia kema tikixnamikij se  kuesoli tlen ueliskia kichiuas ma timoiljuikaj amo tleno topati o amo tiipamej (Sal. 136:23; Rom. 12:3). Ipan ni tlamachtili tikitasej kenijkatsa Jehová techpaleuis ipan ni tlamantli: 1) kema timokokouaj, 2) kema amo tijpiaj tomij uan 3) kema timoiljuiaj ayokmo tleno uelij tijchiuaj ipan Jehová itlanechikol pampa ya tiueuejtixtokej. Achtoui ma tikitakaj kenke moneki timotemachisej Jehová techpatiita.

5. ¿Tlake tlamantli kichiua ma timotemachikaj Jehová tlauel techpatiita?

⁵ Maske Jehová techchijchijki ika tlaltejpoktli, ya tlauel techpatiita (Gén. 2:7). Ma tikitakaj se keski tlamantli tlen kinextia Jehová tlauel techpatiita. Ya kichijki ma tijnextikaj kuajkuali tlamantli kej ya kinextia (Gén. 1:27). Kiampa, Jehová san tojuantij techuejkapantlalik uan yeka kikajki tojuantij ma tijmokuitlauikaj Tlaltipaktli uan tlapialmej (Sal. 8:4-8).

6. ¿Tlake seyok tlamantli kinextia Jehová nelia techpatiita maske titlajtlakolejkej?

⁶ Maske Adán uan Eva tlajtlakolchijkej, Jehová nojua kinpatiitak maseualmej. Nelnelia tlauel techpatiita, uan yeka temakak iKone Jesús uan kiampa techmakixtik tlen totlajtlakoljuaj (1 Juan 4:9, 10). Ika nopa tlaxtlauili, Jehová uelis kinyolkuis katli miktokej pampa Adán tlajtlakolchijki, kinyolkuis “kuajkualmej uan tlen axkuajkualmej” (Hech. 24:15). Biblia kiijtoua Jehová amo techpatiita pampa tijpiaj chikaualistli, titlatominpiaj o pampa tielij titelpokamej o tiichpokamej (Hech. 10:34, 35).

7. ¿Tlake sekinok tlamantli kichiua ma timotemachikaj Jehová nelia techpatiita?

⁷ Onka miak tlamantli tlen kinextia Jehová kinpatiita itekipanojkauaj. Ya kichijtok ma tiitstokaj ipan itlanechikol uan kiitak kenijkatsa tijselijkej nopa kuali tlamachtili (Juan 6:44). Kema pejki tijnechkauiaj Jehová, ya nojkia pejki technechkauia (Sant. 4:8). Nojkia, kitekiuijtok tonali uan ichikaualis pampa kineki techmachtis. Ya kimati kenijkatsa tielij uan tlake uelis tijchiuasej teipa. Uan kinextia tlauel techiknelia kema techtlalnamiktia (Prov. 3:11, 12). ¡Nochi ni kinextia Jehová tlauel techpatiita!

8. ¿Kenijkatsa Salmo 18:27-29 uelis techpaleuis ma tikitakaj kuesoli kej kinamiki?

⁸ Tlanauatijketl David kimatiyaya Jehová kiikneliyaya uan kipaleuiyaya. Tlen kimajtoya kipaleuik ma kiijiyoui kema sekinok kiiljuijkej amo ipa o amo tleno ipati eliyaya (2 Sam. 16:5-7). Kema tlauel timotekipachouaj o tikixnamikij tlaouijkayotl, Jehová techpaleuis ma tikitakaj kej kinamiki uan ma tikijiyouikaj (xijpoua Salmo 18:27-29). Tlaj Jehová techpaleuia, amo tleno techtsakuilis ma tijtekipanokaj ika pakilistli (Rom. 8:31). Ma tikitakaj nopa eyi tlamantli kampa moneki tikilnamikisej Jehová techpatiita uan techiknelia.

9. ¿Tlake uelis panos tlaj timokokouaj?

⁹ Se kokolistli uelis kichiuas ayokmo kuali ma tijyolmatikaj uan ma timoiljuikaj ayokmo tleno uelis tijchiuasej. Uelis tlauel tipinauasej pampa timoiljuisej sekinok kiitaj ayokmo tiuelij tijchiuaj miak tlamantli o moneki ma techpaleuikaj. Uan maske sekij uelis amo kimatij tlaj timokokouaj, uelis tipinauasej pampa ayokmo tijchiuaj tlen achtouia tijchiuayayaj. Kema kiampa techpano uan tlauel timokuesouaj, Jehová techyolchikaua. ¿Kenijkatsa kichiua?

10. Kej kiijtoua Proverbios 12:25, ¿tlake techpaleuis kema timokokouaj?

 ¹⁰ Kema timokokouaj, “se kuali tlajtoli” uelis techyoltlananas (xijpoua Proverbios 12:25). Ipan Biblia, Jehová kichijtok ma moijkuilo kuajkuali tlajtoli tlen techilnamikilia ya techpatiita maske timokokouaj (Sal. 31:19; 41:3). Tlaj tijpouasej iTlajtol uan sampa tikompauisej, ya techpaleuis ayokmo tlauel ma timoyolkokokaj maske timokokouaj.

11. ¿Kenijkatsa kiyolmatki toikni pampa Jehová kipaleuik?

¹¹ Ma tikitakaj tlake kipanok Jorge. Kema nojua eliyaya telpokatl, kipixki se kokolistli tlen kichijtiauiyaya ayokmo ma kipia chikaualistli uan nopa kichijki ma moiljui amo ipa o amo ipati eliyaya. Ya kiijtoua: “Amo kema nimoiljuijtoya tlaj nopa kokolistli kichiuaskia kiampa ma nijyolmati, yeka amo nijmatiyaya tlake nijchiuas. Nipinauayaya pampa nochi nechtlachiliyayaj. Kema nojua tlauel nimokokok, nimoiljuik kenijkatsa mopatlaskia nonemilis. Tlauel nimokuesojtoya, yeka nikiljuik Jehová ma nechpaleui”. ¿Kenijkatsa kimokuitlauik toTeotsij? Ya kiijtoua: “Amo ueliyaya nimoyoliljuia ipan se tlamantli, yeka nechiljuijkej ma nijpoua san se keski textos tlen Salmos tlen amo uejueyi eliyaya, kampa kiijtouayaya kenijkatsa Jehová kitekipachoua tlen kinpano itokilijkauaj. Miakpa nikompauiyaya nopa textos. Uan ni tlauel nechpaleuiyaya uan nechyolseuiyaya. Kema panok se keski tonali, sekinok kiitakej nochipa niixuetskayaya. Sekij kiijtouayayaj nikinyolchikauayaya pampa niyolpakiyaya. Nikitak kenijkatsa Jehová nechnankiliyaya kema nimomaijtouayaya. Nechpaleuik ma nijpatla kej nimoitayaya uan ma nimopatiita. Nimosentlalik ipan tlen Biblia kiijtoua uan kiampa nijmatiyaya kenijkatsa  nechita Jehová maske nimokokoua”.

12. ¿Tlake uelis tijchiuasej uan kiampa tikitasej kenijkatsa Jehová techpaleuia kema timokokouaj?

¹² Tlaj timokokouaj, uelis timotemachisej Jehová kimati kenijkatsa tijyolmatij. Ma tikiljuikaj Jehová ma techpaleui tikitasej nopa tlaouijkayotl kej kinamiki. Jehová kichijki ma moijkuilo ipan Biblia nopa kuajkuali tlajtoli tlen uelis techpaleuis, yeka nochipa ma tijpouakaj. Kuali ma tijpouakaj kampa kinextia kenijkatsa Jehová tlauel kinpatiita itekipanojkauaj. Tlaj kiampa tijchiuasej, tikitasej kenijkatsa ya kipia kuali iyolo ininuaya itekipanojkauaj katli amo kitlauelkauaj (Sal. 84:11).

13. ¿Tlake uelis panos tlaj se toikni katli kinyakana ichampoyouaj amo kipia tekitl?

¹³ Nochi toikniuaj kinekij kinmakasej ininchampoyouaj tlen ika mopanoltisej. Ma timoiljuikaj se toikni ayokmo kitekimakaj maske amo tleno kichijtok. Kichiua kampeka kitemos seyok tekitl uan amo kiasi. Pampa kiampa kipano, uelis moiljuia amo tleno ipati. ¿Kenijkatsa uelis kipaleuis tlen Jehová kitenkajtok?

14. ¿Kenke Jehová kichiua tlen kitenkajtok?

¹⁴ Jehová nochipa kichiua tlen kitenkajtok (Jos. 21:45; 23:14). ¿Kenke kiampa kichiua? Pampa amo kineki kisokiuis itoka. Ipan Biblia kiijtoua ya kinmokuitlauis itekipanojkauaj katli amo kikauaj, yeka kimati moneki kichiuas tlen kitenkajtok (Sal. 31:1-3). Nojkia, kimati tlauel techyolkokoskia tlaj amo kitekipachoskia tlen techpano pampa tielij ichampoyouaj. Ya kitenkajtok nochipa techmakas tlen ika timopanoltisej uan tlen techpaleuis kuali ma titlaneltokakaj,  uan amo tleno kitsakuilis kiampa ma kichiua (Mat. 6:30-33; 24:45).

15. 1) ¿Tlake tlaouijkayotl kiixnamijkej toikniuaj tlen achtoui siglo? 2) ¿Kenijkatsa Salmo 37:18, 19 techpaleuia ma timotemachikaj ipan Jehová?

¹⁵ Kema tikilnamikij kenke Jehová kichiua tlen kitenkajtok tlauel techpaleuia kema amo tijpiaj tlen ika timopanoltisej. Ma tikilnamikikaj tlen kinpanok toikniuaj tlen achtoui siglo. Toikniuaj tlen Jerusalén “mosemantiajkej kampa ueli” pampa pejkej kintlaijiyouiltiaj (Hech. 8:1). Yeka, uelis amo kipixkej tlen ika mopanoltisej. Uelis kikajtejkej ininchaj, ininteki o kampa tlanamakayayaj. Maske kiampa kinpanok, Jehová amo kema kintlauelkajki uan inijuantij kichijkej kampeka nochipa yolpaktosej (Hech. 8:4; Heb. 13:5, 6; Sant. 1:2, 3). ToTeotsij kinmakak tlen kinpolouayaya, uan tojuantij nojkia techpaleuis (xijpoua Salmo 37:18, 19).

16. ¿Tlake ueliskia kichiuas ma timoiljuikaj Jehová amo kipatiita tlen tijchiuaj?

¹⁶ Kema tiueuejtiaj, uelis peuas timoiljuisej ayokmo tleno uelis tijmakasej Jehová. Uelis tlanauatijketl David nojkia kitekipachouayaya nopa tlamantli (Sal. 71:9). ¿Kenijkatsa techpaleuia Jehová kema kiampa tijyolmatij?

17. ¿Tlake techmachtia tlen kipanok toikni Jheri?

¹⁷ Ma tikitakaj tlen kipanok tosiuaikni Jheri. Kema kitlanejkej ma yaui kampa kinmachtiskiaj kenijkatsa kimokuitlauisej kali kampa timosentiliaj, amo kinekiyaya yas. Ya kiijtok: “Ya ninanatsi, ayokmo nijpia noueue uan amo niueli nijchiua yon se tlamantli. Ayokmo niipa”. Tlayoua momaijtok uan kiiljuik Jehová nochi tlen kiyolmatiyaya. Ualmostla, kema asito kampa kinmachtiskiaj,  nojua moiljuiyaya kenke yajki. Nopaya, toikni katli tlamachtik kiijtok tlauel kuali tlen tijchiuaj pampa tijkauaj Jehová ma techmachti. Jheri kiilnamiki: “Nimoiljuik: ‘Na kena nijneki ma nechmachti Jehováʼ. Pejki nimochokilia pampa nikitak Jehová nechtlakakilik kema nimomaijtok. Nikitak kena ueliskia nijmakas se tlenijki uan ya kinekiyaya nechmachtis”. Jheri kiilnamiki tlen panok uan kiijtoua: “Maske kema niasito tlauel nimajmauiyaya, nimoyolkokojtoya uan tlauel nimotekipachojtoya, kema nikiski tlauel nimoyolchikajtoya, niitstoya nitemachtli uan nijmatiyaya kena nojua uelis nitlatekipanos”.

18. ¿Kenijkatsa kinextia Biblia Jehová nojua kipatiita tlen tijchiuaj maske ya tiueuejtixtokej?

¹⁸ Maske tiueuejtiaj, uelis timotemachisej Jehová nojua techmakas se tekitl tlen kena uelis tijchiuasej (Sal. 92:12-15). Jesús tlamachtik Jehová kipatiita tlen tijchiuaj maske timoiljuiaj amo tlauel ipati o maske ayokmo tiuelij tijchiuaj miak tlamantli (Luc. 21:2-4). Yeka, ma timosentlalikaj ipan tlamantli tlen kena uelis tijchiuasej, kej tikinkamanaljuisej maseualmej tlen toTeotsij, tikiljuisej Jehová ma kinpaleui toikniuaj uan tikinpaleuisej toikniuaj amo ma kitlauelkauakaj. Jehová techita kej tiitlapaleuijkauaj pampa tijnekij tijneltokasej uan amo pampa tijchiuaj miak tlamantli (1 Cor. 3:5-9).

19. ¿Ipan tlake tlamantli techpaleuia ma timotemachikaj Romanos 8:38, 39?

¹⁹ Tlauel tijtlaskamatiliaj Jehová pampa techkaua san ya ma tijueyichiuakaj, uan ya tlauel kinpatiita katli kitekipanouaj. Ya kichijki ma tijnekikaj tijchiuasej ipakilis uan tlauel tiyolpakij pampa tijueyichiuaj Jehová kej kinamiki (Apoc. 4:11). Maske uelis sekinok maseualmej moiljuiaj amo tleno topati o amo tiipamej, Jehová amo kema kiampa moiljuia (Heb. 11:16, 38). Kema tlauel timokuesouaj pampa timokokouaj, pampa amo tijpiaj tlen ika timopanoltisej o pampa ya tiueuejtixtokej, ma tikilnamikikaj amo tleno uelis techuejkatlalis “tlen iteiknelijkayo toTeko” (xijpoua Romanos 8:38, 39).