1. ¿Kenijkatsa nopa eyij toikniuaj kinextijkej amo kitlauelkauaskiaj Jehová?

XIMOILJUI ipan ni eyi tlamantli: 1) se ichpokatl kikaki nopa tlamachtijketl kiniljuia nochi katli momachtiaj iljuichiuasej ipan se iljuitl. Ya kimati toTeotsij amo kipaktia nopa iljuitl, yeka ika miak tlatlepanitakayotl kiijtoua ya amo iljuichiuas. 2) Se telpokatl katli tlajtolmoyajtinemi asi ichaj seyok telpokatl katli iuaya momachtia uan ya tlauel kinpinajtia Jehová itlajtoltemakauaj. Maske achi majmaui, ya asi kaltentipa uan tlanojnotsa. 3) Se toikni itstok kampa iteki, uan katli kitekimakatok kiiljuia ma kichiua se tlamantli tlen amo xitlauak. Maske kimati uelis ayokmo kitekimakasej, ya kiijtoua kineki kichiuas tlen xitlauak uan kinneltokas tlanauatianij, pampa kimati toTeotsij ya nopa kineki ma tijchiuakaj (Rom. 13:1-4; Heb. 13:18).

2. ¿Tlake tlajtlanili tijnankilisej ipan ni tlamachtili, uan kenke?

² ¿Tlake kuajkuali tlamantli tikijtoskiaj kinextiaj nopa toikniuaj? Uelis tikijtoskiaj amo majmauij uan kichiuaj tlen xitlauak. Uan nojkia kinextiaj seyok tlamantli tlen tlauel ipati: amo kikauaj Jehová. Nochi kichiuaj kampeka amo kiixpanosej uan kineltokasej tlen tlanauatia. ¡Temachtli tijmatij Jehová tlauel yolpaki kema kinita! Tojuantij nojkia tijnekij ma yolpaki ika tlen tijchiuaj. Yeka, ma tijnankilikaj ni tlajtlanili: ¿Tlake kiijtosneki amo tijkauasej toTeotsij? ¿Kenke tlauel moneki kiampa tijchiuasej? ¿Uan tlake techpaleuis nochipa ma tijnekikaj senkistok tijtekipanosej Jehová uan amo tijkauasej maske tijpiasej tlaouijkayotl?

3. 1) ¿Tlake kiijtosneki nopa tlajtoli “amo tijkauasej”? 2) ¿Tlake neskayotl kinextia tlake kiijtosneki amo titekauasej?

³ Amo tijkauasej toTeotsij kiijtosneki tijchiuasej san tlen ya kineki uan san ya tijueyichiuasej. Ipan Biblia, nopa tlajtoli hebreo  “amo tijkauasej” motlajtolkuepa kej senkistok o nejmaxtik uan senkistok kuali. Uejkajkia, nopa Tlanauatili tlen kinmakakej israeleuanij kiijtouayaya kema kimakaskiaj Jehová se tlapiali kej tlakajkaualistli, monekiyaya elis tlen senkistok kuali (Lev. 22:21, 22). * Israeleuanij amo ueliskiaj temakasej se tlapiali tlaj amo kipiayaya se iikxi, se inakas, se iixteyol o tlaj mokokouayaya. Jehová tlauel kipatiitayaya kema kimakayayaj se tlapiali katli nejmaxtik eltoya uan amo mokokouayaya (Mal. 1:6-9). ¿Kenke Jehová kineki ma tijmakakaj nochi tlen senkistok kuali? Ma timoiljuikaj ipan ni tlamantli. Tojuantij amo tijkouaj se kuatlajkayotl tlaj amo nejmaxtik eltok o tlaj lochontok se kentsi. Nochipa tijnekij se tlamantli ma elto senkistok kuali. Nojkia kiampa pano ika Jehová, ya kineki senkistok ma tikiknelikaj uan Amo kema ma tijkauakaj.

4. 1) Xikixtoma kenke amo moneki tielisej tixitlauakej uan kiampa amo tijkauasej Jehová. 2) Kema tikitaj tlen kiijtoua Salmo 103:12-14, ¿tlake amo kema techtlajtlanis Jehová?

⁴ Tojuantij tijmatij titlajtlakolejkej uan nochipa timokuapolouaj, yeka uelis timotlajtlaniaj: “¿Moneki tielisej tixitlauakej uan kiampa amo kema tijkauasej Jehová?”. Amo. ¿Kenijkatsa tijmatij nopa? Achtoui pampa Jehová amo mosentlalia ipan totlajtlakoljuaj. Biblia techiljuia: “ToTeko, intla tikilnamikiskia nochi totlajtlakoljuaj, axaka ueliskia moketsas moixtla” (Sal. 130:3). Ya kimati titlajtlakolejkej, uan yeka ika nochi iyolo techtlapojpoljuia (Sal. 86:5). Nojkia, Jehová kimati amo nochi uelis tijchiuasej, yeka amo kema techiljuis ma tijmakakaj se tlenijki tlen amo tiyajatisej (xijpoua Salmo 103:12-14). Uajka, ¿tlake moneki tijchiuasej tlaj tijnekij tielisej kejuak senkistok kuajkualmej iixpa Jehová?

5. ¿Kenke tlaiknelijkayotl techpaleuia amo ma tijkauakaj toTeotsij?

⁵ Tlaj amo tijnekij tijkauasej Jehová, moneki tijpiasej tlaiknelijkayotl. Moneki senkistok tikiknelisej uan amo tijtlauelkauasej toTeotsij. Tlaj nochipa tijpiasej nopa tlaiknelijkayotl maske tijpiasej tlaouijkayotl, uajka tijnextisej amo tijkauaj toTeotsij (1 Crón. 28:9; Mat. 22:37). Sampa ma timoiljuikaj ipan nopa eyij toikniuaj katli tikijtojkej ipan achtoui párrafo. Nopa ichpokatl amo kineki san tlachixtos kema sekij iljuichiuaj, nopa telpokatl amo kineki ma kipinajtikaj kema tlajtolmoyaua, uan nopa toikni amo kineki ma kitekikixtilikaj. Uajka, ¿kenke amo kichiuaj tlen kiniljuiaj? Pampa kimatij tlen Jehová tlanauatia eli xitlauak uan inijuantij kinekij kiyolpakiltisej. Inintlaiknelijkayo kinyololinia ma kitlapejpenikaj kichiuasej tlen Jehová kipaktia. Kiampa kinextiaj amo kema kikauaj.

6. 1) ¿Kenke tlauel moneki amo kema tijkauasej Jehová? 2) ¿Kenijkatsa kinextijkej Adán uan Eva amo senkistok kiikneliyayaj toTeotsij?

⁶ ¿Kenke tlauel moneki sejse tlen tojuantij amo tijkauasej toTeotsij? Pampa Satanás kitlaijiljuijtok Jehová uan nojkia tojuantij. Ipan Edén, nopa iluikaejketl katli tlaixpanok mochijki “Tlaijixnamijketl”. Ya kipinaualtik Jehová pampa kiijtok amo kuali tlanauatiyaya, moueyimatiyaya uan kipaktiyaya kichiuas tlen amo xitlauak. Adán uan Eva kipaleuijkej Satanás uan kiijixnamijkej toTeotsij (Gén. 3:1-6). Kema itstoyaj ipan Edén, miak tlamantli ueltoskia kinpaleuis nojua tlauel ma kiiknelikaj Jehová. Kema Satanás tlaijixnamijki, inijuantij kinextijkej amo senkistok kiikneliyayaj. Kema panok miak xiuitl, kema Job itstoya, sampa moijtok seyok tlamantli: ¿Itstoskiaj maseualmej katli amo kitlauelkauaskiaj  Jehová pampa kiikneliaj? ¿Uelis maseualmej senkistok kitekipanosej Jehová uan amo kema kikauasej?

7. Kej kiijtoua Job 1:8-11, ¿kenijkatsa Jehová kiitayaya Job, uan kenijkatsa Satanás kiitayaya Job?

⁷ Kema Job itstoya, israeleuanij itstoyaj Egipto. Ipan nopa tonali amo itstoya yon se tlakatl kej ya, katli senkistok kitekipanouayaya toTeotsij. Maske nojkia eliyaya tlajtlakole uan mokuapolouayaya kej tojuantij, Jehová tlauel kiikneliyaya pampa amo kikauayaya. Uelis Satanás ipa kiiljuijtoya Jehová maseualmej amo senkistok kitekipanoskiaj. Yeka, toTeotsij kiiljuik ma kitlachili Job, pampa nochi tlen kichiuayaya kinextiyaya Satanás san istlakati. Uajka, Satanás kiiljuik Jehová ma kikaua kiyejyekos Job uan kinextiskia kena kikauaskia. Jehová tlauel motemachiyaya ipan iuampo Job, yeka kikajki Satanás ma kiyejyeko (xijpoua Job 1:8-11).

8. ¿Kenijkatsa Satanás kitlaijiyouiltik Job?

⁸ Satanás tlauel kipaktia tetlaijiyouiltis uan temiktis. Kikixtilik Job nochi tlen kipixtoya: itomij, itekipanojkauaj uan kichijki sekinok amo kuali ma kiitakaj. Nojkia kinmiktilik matlaktli ikoneuaj katli tlauel kinikneliyaya. Uan teipa kichijki ma kipia se kokolistli tlen tlauel amo kuali, tlen kichiuayaya ipan nochi itlakayo ma kokoti. Isiua tlauel motekipachouayaya uan ayokmo kimatiyaya tlake kichiuas, yeka kiiljuik iueue ayokmo ma kiijiyouijto, ma kitelchiua toTeotsij uan ma miki. Maske Job ayokmo kinekiyaya itstos, ya amo kikajki toTeotsij. Yeka, Satanás kichijki seyok tlamantli. Nama kintekiuik eyij tlakamej katli kiijtouayayaj eliyayaj iuampoyouaj. Inijuantij yajkej kipaxalotoj  se keski tonali uan amo kiyolchikajkej yon se kentsi, san kiajuakej uan kiyolkokojkej. Kiiljuijkej toTeotsij kitlaijiyouiltiyaya. Nojkia kiiljuijkej toTeotsij amo kipatiitayaya tlaj kuali kitekipanouayaya o amo, yeka amo kenijki kiitayaya tlaj kikauaskia o amo. Kiijtojkej ya kichiuayaya tlen amo kuali uan yeka kinamikiyaya ma kitlaijiyouiltikaj (Job 1:13-22; 2:7-11; 15:4, 5; 22:3-6; 25:4-6).

9. ¿Tlake amo kichijki Job maske tlauel tlaijiyouik?

⁹ ¿Tlake kichijki Job? Ya nojkia mokuapolouayaya, yeka kualanki uan kinajuak nopa eyij tlakamej. Maske teipa motlalnamiktik, kiijtok se keski tlamantli tlen amo kinamikiyaya kiijtos. Job san mosentlalik kinextis kichiuayaya tlen xitlauak uan amo kinextis toTeotsij kichiuayaya tlen xitlauak (Job 6:3; 13:4, 5; 32:2; 34:5). Maske kipanok tlen tlauel amo kuali, ya amo kinejki kikauas toTeotsij. Uan amo kineltokak tlen kiiljuijkej nopa eyij tlakamej. Job kiijtok: “¡Amo ximoiljuikaj nikijtos inmojuantij inxitlauakej! ¡Tlaj ayamo nimiktos amo nijkauas nijtekipanos [toTeotsij] ika nochi noyolo!” (Job 27:5, TNM). Ika ni tlajtoli kinejki kiijtos ya mosentlalijtoya amo kikauas Jehová maske kipanoskia tlen tlauel amo kuali. Nochipa kiijiyouik nochi, uan tojuantij nojkia uelis kiampa tijchiuasej.

10. ¿Tlake nojkia kiijtoua Satanás tlen tojuantij?

¹⁰ Kej uejkajkia kiijtok tlen Job, Satanás nojkia kiijtoua tojuantij amo nelnelia tikikneliaj Jehová uan tijkauasej kema monekis tijmanauisej tonemilis pampa amo senkistok tijtekipanouaj (Job 2:4, 5; Apoc. [Rev.] 12:10). ¿Kenijkatsa tijyolmatij pampa kiijtoua nopa? Nelia techyolkokoua pampa san techistlakauia. Maske pano nopa, Jehová tlauel motemachia ipan tojuantij uan yeka kikaua ma techyejyekokaj, kiampa uelis tijnextisej Satanás eli san se istlakatiketl uan amo kema tijkauasej tijtekipanosej toTeotsij. Nojkia toTeotsij kiijtoua techpaleuis ma tikijiyouikaj (Heb. 13:6). ¡Tlauel kuali tijyolmatij pampa toTeotsij motemachia ipan tojuantij! ¿Tijkuamachiliaj kenke tlauel ipati amo tijkauasej toTeotsij? Pampa kiampa tijnextiaj amo nelia tlen Satanás kiijtoua, tijuejkapantlaliaj itoka Jehová uan tijnextiaj san ya kinamiki tlanauatis. Uajka, ¿tlake uelis techpaleuis Amo kema ma tijkauakaj toTeotsij?

11. ¿Tlake uelis tijyekosej tlen Job?

¹¹ Ipan ni itlamia tonali, kampa tlauel ouij tiitstokej, Satanás tlauel chikauak kinteuia toTeotsij itekipanojkauaj (2 Tim. 3:1). Yeka, ¿tlake uelis tijchiuasej uan kiampa amo kema tijnekisej tijkauasej Jehová? Sampa ma tikitakaj tlake kichijki Job. Kema ayamo tlaijiyouiyaya, miakpa kinextijtoya senkistok kitekipanouayaya toTeotsij uan amo kikauayaya. Ma tikitakaj eyi tlamantli tlen kichijki uan kenijkatsa uelis tijchiuasej kej ya.

12. 1) Kej kiijtoua Job 26:7, 8, 14, ¿tlake kipaleuik Job ma kiikneli uan ma kitlepanita Jehová? 2) ¿Tlake techpaleuis nojkia ma tikiknelikaj uan ma tijtlepanitakaj toTeotsij?

¹² Nojua tlauel kiiknelik Jehová pampa kiitayaya tlen kichijchijtoya. Job nochipa kikixtiyaya tonali uan moyoliljuiyaya ipan tlen Jehová kichijchijtoya (xijpoua Job 26:7, 8, 14). Tlauel mosentlachilik kema moyoliljuik ipan Tlaltipaktli, iluikaktli, mixtli uan tlatomonilotl. Uan kiijtok san kimatiyaya se kentsi tlen nochi tlamantli katli toTeotsij kichijchijtok. Nojkia kipatiitak tlen Jehová kimachtiyaya, uan yeka kiijtok: “Achi más nimopakilismaka ipan itlajtol” (Job 23:12). Nopa tlatlepanitakayotl tlen kipialiyaya Jehová kiyololinik ma kiikneli uan ma kichiua tlen kipaktia. Nochi nopa tlamantli kipaleuik  amo kema ma kikaua. Kej Job, moneki tijkixtisej tonali uan timoyoliljuisej ipan nochi tlamantli tlen Jehová kichijchijtok. Ipan ni tonali tijmatij miak tlamantli tlen Job amo kimatiyaya. Uan nojkia tijpiaj Biblia tlen techpaleuia kuali ma tikixmatikaj toTeotsij. Nochi tlen tijyekosej techpaleuis ma tijpatiitakaj tlen kichijchijtok uan ma tijtlepanitakaj Jehová. Nopa techyololinis ma tikiknelikaj uan ma tijneltokakaj, kiampa amo kema tijkauasej (Job 28:28).

13, 14. 1) Kej kiijtoua Job 31:1, ¿kenijkatsa Job kinextik kineltokayaya toTeotsij? 2) ¿Kenijkatsa uelis tijchiuasej kej Job?

¹³ Kichijki kampeka kineltokas toTeotsij ipan nochi tlamantli. Job kimajtoya tlaj amo kinekiyaya kikauas Jehová, monekiyaya nochipa kineltokas. Nochipa kema tijneltokaj toTeotsij techpaleuia amo ma tijkauakaj. Job kichijki kampeka kineltokas toTeotsij ipan nochi tlen kichiuayaya. Yeka, nochipa kintlepanitak siuamej (xijpoua Job 31:1). Ya kipixtoya isiua, yeka kimajtoya amo kinamikiyaya kitlachilis seyok siuatl. Ipan ni tonali, tlauel miak tlamantli techyoltilana ma timomekatikaj. ¿Tijchiuasej kej Job uan kiampa amo kema tijtlachilisej o tikixtokasej seyok siuatl o seyok tlakatl? ¿Tijchiuasej kampeka amo tijtlachilisej yon se tlaixkopinkayotl tlen techyoltilanaskia ma tijchiuakaj tlen amo kuali yon amo kema tikitasej pornografía? (Mat. 5:28). Tlaj mojmostla timonauatisej, techpaleuis Amo kema ma tijkauakaj Jehová.

¹⁴ Job nojkia kineltokak Jehová kema kiitayaya tomij kej kinamiki. Ya kiijtok tlauel amo kuali tlaj motemachiskia ipan tlamantli tlen kipixtoya uan kinamikiyaya ma kitlajtolsenkauakaj tlaj kiampa kichiuaskia (Job 31:24, 25, 28). Ipan ni tonali miakej maseualmej san mosentlaliaj tlapijpiasej. Tlaj tikitasej tomij uan sekinok tlamantli kej kinamiki, kej Biblia techtlajtolmaka, techpaleuis Amo kema ma tijkauakaj toTeotsij (Prov. 30:8, 9; Mat. 6:19-21).

15. 1) ¿Tlake kipaleuik Job amo ma kikaua Jehová? 2) ¿Kenke moneki tikilnamiktosej Jehová techteochiuas teipa?

 ¹⁵ Mosentlalik motemachis teipa toTeotsij kiteochiuaskia. Job kuali kimajtoya toTeotsij kena kinekiyaya kiitas tlaj kikauaskia o amo (Job 31:6). Maske kipixtoya miak tlaouijkayotl, motemachik teipa Jehová kiteochiuaskia, uan nopa kipaleuik amo kema ma kikaua. Jehová nelia yolpajki ika tlen kichijki Job, uan yeka tlauel kiteochijki ika miak kuajkuali tlamantli maske nojua eliyaya tlajtlakole (Job 42:12-17; Sant. 5:11). Uan teipa, ipan Xochimili, nojua kiselis miak tlateochiualistli. Uan tojuantij, ¿nojkia timotemachiaj ika nochi toyolo Jehová techteochiuas pampa amo tijkauaj? ToTeotsij amo moyolpatlatok (Mal. 3:6). Tlaj tikilnamikisej Jehová techpatiita pampa amo tijkauaj, techpaleuis ma timotemachijtokaj teipa tlauel techteochiuas (1 Tes. 5:8, 9).

16. ¿Tlake kinamiki timosentlalijtosej tijchiuasej?

¹⁶ Moneki timosentlalijtosej amo kema tijkauasej toTeotsij. Uelis kemantika timoiljuisej san tojuantij tijchiuaj kampeka. Kema techpanos nopa, moneki tikilnamikisej amo toselti tiitstokej, pampa ipan nochi Tlaltipaktli tlauel miakej toikniuaj kichiuaj kampeka amo kikauasej Jehová. Uan nojkia, teipa uelis tiitstosej ininuaya siuamej uan tlakamej katli uejkajkia itstoyaj, katli nojkia amo kema kikajkej Jehová, maske sekij kinmiktijkej (Heb. 11:36-38; 12:1). Nochi tojuantij ma tijchiuakaj kej Job uan ma tikijtokaj kej ya: “¡Tlaj ayamo nimiktos amo nijkauas nijtekipanos [toTeotsij] ika nochi noyolo!”. Uan nochipa ma tijuejkapantlalikaj Jehová pampa amo kema tijtlauelkauaj.