“ELTOK keja onka se ueyi pixkistli uan san itstokej se o omej tlakamej para kisentilisej. Xijtlajtlanikaj toTeko Dios ma kintitlani más tekipanouanij para ma tepouilikaj itlajtol pampa nopa pixkistli iaxka” (Luc. 10:2). Ni tlajtoli tlen Jesús kiijtok nechka se 2,000 xiuitl kuali kinextia tlen panotok ipan Myanmar, pampa san itstokej se 4,200 tlajtolmoyauanij uan moneki kinmatiltisej 55 millones tlen maseualmej nopa kuali tlamachtili.

Jehová, katli iaxka nopa pixkistli, kinyololinijtok miakej toikniuaj katli kampa ueli euaj ma yakaj tlapaleuitij ipan nopa altepetl uan kiampa kinpaleuisej maseualmej. ¿Tlake kinyololinijtok ma kikajteuakaj ininaltepe? ¿Tlake kinpaleuik kiampa ma kichiuakaj? ¿Tlake tlateochiualistli kiselijtokej? Ma tikitakaj tlake kiijtouaj.

Namanok, Kazuhiro, se precursor tlen Japón, kipixki se ataque epiléptico, yeka kuatlapolok uan kiuikakej hospital. Nopa tepajtijketl kiiljuik ome xiuitl amo ueliskia kinemiltis yon se carro. Kazuhiro mokuesok uan moiljuik: “¿Tlake nijchiuas? Na tlauel nechpaktia nitlatekipanos kej precursor uan nojua nijneki nijchiuas nopa tekitl”. Yeka, ika nochi iyolo, kitlajtlanik Jehová ma kipaleui nojua tlatekipanojtos kej precursor.

Kazuhiro kiijtoua: “Kema panok se metstli, se nouampo katli tlatekipanouayaya ipan Myanmar kimatki tlen nechpanok. Nechnojnotski uan nechiljuik: ‘Ipan Myanmar nochi nemij ipan autobús. Tlaj tiualas, nojua uelis titlatekipanos kej precursor maske amo tijnemiltis se carro’. Nitlajtlanik nopa tepajtijketl tlaj ueliskia nias Myanmar maske nimokokouayaya. San nimosentlachilik kema nechiljuik: ‘Se tepajtijketl tlen eua Myanmar ualajtok Japón. Uelis tikixmatis, uan tlaj sampa mitspanos kej achtouia, ya uelis mitspajtis’. Nikitak kenijkatsa Jehová nechnankilik”.

Kazuhiro nimantsi kintlajkuiljuilik toikniuaj katli itstoyaj ipan Betel tlen Myanmar, uan kiniljuik ya iuaya isiua kinekiyayaj tlatekipanotij kej precursores. Kema panok makuili tonali, kinnankilijkej: “¡Xiualakaj! Nikaj monekij precursores”. Kazuhiro uan isiua, Mari, kinamakakej nopa ome carros tlen kipixtoyaj, kikixtijkej ininama tlen ika ueliskiaj yasej seyok altepetl uan kikojkej nopa boletos tlen avión. Nama tlauel  yolpaktokej pampa tlatekipanojtokej ipan tlajtoli señas ipan Mandalay. Kazuhiro kiijtoua: “Nochi tlen techpanotok, kichijtok ma timotemachikaj ipan tlen kiijtoua Salmo 37:5: ‘Xijkauili toTeko ma mitsnextili kampa tinemis. Ximotemachi ipan ya, uan yajaya kichiuas’”.

Ipan 2014, Jehová itlajtoltemakauaj tlen Myanmar kinselijkej sekinok toikniuaj kema mochijki se ueyi tlanechikolistli. Miakej ualayayaj tlen sekinok altepemej, kej Monique, se tosiuaikni katli kipia 34 xiuitl uan eua Estados Unidos. Ya kiijtoua: “Kema nitlakuepilik ipan noaltepe, nimomaijtok uan nikiljuik Jehová tlake nijnekiyaya nijchiuas ipan nonemilis. Nojkia nikiniljuik notatauaj tlen nimosentlalijtoya nijchiuas. Nochi timoiljuijkej tlauel kuali tlaj niaskia nitlatekipanoti ipan Myanmar. Kema nijtlapejpeniskia tlaj niaskia, achtoui tlauel miakpa nimomaijtok uan nijkajki ma pano tonali”. Monique techiljuia kenke kiampa kichijki.

Ya kiijtoua: “Jesús kiniljuik itokilijkauaj achtoui kuali ma kiitakaj tlaj ueliskiaj kichiuasej se tlenijki. Yeka nimotlajtlanik: ‘¿Nechaxilis notomij? ¿Uelis nimopanoltis maske san se keski tonali nitekitis?’”. Monique nojua kiijtoua: “Nikitak amo nijpixtoya miak tomij uan amo nechaxiliskia pampa niaskia ipan se altepetl tlen tlauel uejka mokauayaya”. ¿Tlake kichijki? (Luc. 14:28).

Monique kiijtoua: “Se tonali, katli nijtekipanouayaya nechiljuik ma nikitati. Na achi nimajmauiyaya, pampa nimoiljuiyaya nechiljuiskia ayokmo nijtekipanoskia. Ya tlauel nechtlaskamatilik pampa kuali nitekitiyaya uan nechiljuik nechmakaskiaj tomij pampa kuali nijchiuayaya noteki. Uan nechmakakej tlen nechpolouayaya, pampa ika nopa tomij nikixtlajki tlen nitetlauikiliyaya”.

Ipan diciembre 2014, Monique pejki tlatekipanoua ipan Myanmar. ¿Kenijkatsa kiyolmati pampa tlatekipanoua kampa amo itstokej miakej tlajtolmoyauanij? Ya kiijtoua: “Tlauel niyolpaki pampa nikaj niitstok. Eyij maseualmej nikinmachtia ika Biblia. Se siuatl kipia 67 xiuitl, uan nochipa nechixuetskilia uan nechnajnaua kema nechita. Kema kimatki kenijkatsa itoka toTeotsij, pejki choka, uan nechiljuik: ‘Amo kema nijkaktoya itoka toTeotsij. Ta nojua tiichpokatl uan tinechmachtijtok se tlamantli tlen tlauel ipati ipan nonemilis’. Na nojkia nichokak kema nikitak kenijkatsa kiyolmatki. Ni tlamantli kichiua tlauel ma niyolpaki nitlatekipanos kampa monekij tlajtolmoyauanij”. Namanok, Monique yajki Kampa kinmachtiaj tlajtolmoyauanij.

Tlen kiski ipan Anuario de los testigos de Jehová 2013, nojkia kinyololinik miakej ma yakaj ipan altepetl Myanmar. Tosiuaikni Li, katli kipia se 30 xiuitl uan itstoya ipan sureste asíatico, tekitiyaya nochi tonali. Uan tlen kipojki ipan Anuario kichijki ma moiljui tlaj ueliskia yas tlatekipanoti ipan Myanmar. Ya kiijtoua: “Ipan 2014, kema niajki ipan se ueyi tlanechikolistli ipan Yangón, nikixmatki se toikni iuaya isiua katli tlatekipanouayayaj ipan tlajtoli chino ipan Myanmar. Na nijnejki nias nitlapaleuiti nopaya pampa nikamanalti nopa tlajtoli. Monique uan na tijnejkej tiasej titlapaleuitij ipan Mandalay. Jehová tlauel techteochijki pampa tiomej techtekimakakej se keski tonali ipan se escuela, uan nechka tijpantijkej kampa tiitstoskiaj. Maske tlauel tona uan tikixnamikij sekinok tlaouijkayotl, tlauel niyolpaki pampa nikaj nitlatekipanoua. Maseualmej tlen Myanmar amo tlapijpiaj, tlauel kuali ininyolo uan kinekij kimatisej tlen Biblia tlamachtia. Tlauel niyolpaki kema nikita kenijkatsa Jehová kiteochiua tlajtolmoyaualistli. Uan temachtli nijmati ya kineki nojua ma nitlatekipanojto ipan Mandalay”.

Miakej toikniuaj katli tlatekipanouaj kampa monekij tlajtolmoyauanij kiitstokej kenijkatsa tlauel kinpaleuia kema momaijtouaj. Jumpei uan isiua Nao, katli  kipiaj kipano 30 xiuitl, tlatekipanouayayaj ipan tlajtoli señas ipan Japón. ¿Kenke yajkej Myanmar? Jumpei kiijtoua: “Nosiua uan na nochipa tijnektoyaj titlatekipanotij ipan seyok altepetl. Se toikni tlen totlanechikol yajtoya Myanmar uan tlapaleuiyaya ipan tlajtoli señas. Uan maske amo tijpixtoyaj miak tomij, nojkia tiajkej ipan mayo 2010. Toikniuaj tlen Myanmar tlauel kuali techselijkej”. ¿Kenijkatsa kiita Jumpei nopa tlajtolmoyaualistli ipan Myanmar? Ya kiijtoua: “Maseualmej tlauel kinpaktia tlen tikinmachtiaj. Kema katli amo tlakakij kiitaj nopa videos ipan tlajtoli señas, tlauel mosentlachiliaj. Tlauel tiyolpakij pampa tijnejkej tiualasej”.

¿Kenijkatsa mopanoltiaj Jumpei uan Nao? Jumpei kiijtoua: “Kema panok eyi xiuitl, tijtekiuijkej nochi totomij uan ayokmo tijpixtoyaj tlen ika tikixtlauaskiaj nopa kali kampa tiitstoyaj. Tlauel miakpa timomaijtojkej. Se tonali, techpanok tlen amo timoiljuijtoyaj, toikniuaj tlen itstokej ipan kali Betel techiljuijkej titlatekipanoskiaj kej precursores especiales. Timotemachijkej ipan Jehová uan ya amo techtlauelkajki. Nochipa techmokuitlauijtok”. Namanok, Jumpei uan Nao yajkej Kampa kinmachtiaj tlajtolmoyauanij.

Simone, katli kipia 43 xiuitl uan eua Italia, iuaya isiua Anna, katli kipia 37 xiuitl uan eua Nueva Zelanda, yajkej Myanmar. ¿Tlake kinyololinik? Anna kiijtoua: “Nopa Anuario 2013, kampa kamanaltik tlen Myanmar”. Simone nojkia kiijtoua: “Nijmati kej se ueyi tlateochiualistli niitstos ipan Myanmar. Nikaj amo titlapijpiaj, yeka miak tonali ueli nijtekipanoua Jehová. Tlauel niyolpaki pampa nikita kenijkatsa Jehová techmokuitlauia kema tijtekipanouaj kampa monekij tlajtolmoyauanij” (Sal. 121:5). Anna nojkia kiijtoua: “Nelia tlauel niyolpaki. Pampa amo titlapijpiaj, niitstok miak tonali iuaya noueue; tlauel kuali timouikaj. Nojkia tikinpiaj kuali touampoyouaj. Uan maseualmej amo kinkualankaitaj Jehová itlajtoltemakauaj uan nojkia tlauel kuali techtlakakiliaj”. ¿Kenke kiijtoua kuali kintlakakiliaj?

Anna kiijtoua: “Se tonali, ipan mercado nikamanaltik iuaya se ichpokatl uan nikiljuik seyok tonali iuaya nimokamanaljuiskia. Kema sampa nikitak, ualajki iuaya se iuampo. Seyok tonali, yajki ininuaya sekinok, uan teipa sekinok ualajkej iuaya. Nama nikinmachtia makuiltij tlen inijuantij”. Simone kiijtoua: “Maseualmej katli tikinkamanaljuiaj tlauel kuali ininyolo uan kinekij kimatisej miak tlamantli. Tlauel kinpaktia kimatisej tlen Biblia tlamachtia. Yeka, amo nochi tiuelij tikinmachtiaj”.

¿Tlake tlamantli kichijkej se keskij toikniuaj katli kinejkej yasej Myanmar? Mizuho, katli eua Japón, kiijtoua: “Maske noueue, Sachio, uan na nochipa tijnektoyaj tiasej kampa monekij tlajtolmoyauanij, amo tijmatiyayaj kanke tiasej. Tlen kiski ipan Anuario 2013 tlauel  techyololinik, yeka timoiljuijkej tiasej titlatekipanotij ipan Myanmar”. Sachio kiijtoua: “Tiajkej se semana ipan Yangón, se ueyi altepetl tlen eltok ipan Myanmar. Achtoui tijnekiyayaj tikixmatisej nopa altepetl. Tlen tijchijkej techpaleuik ma tijnekikaj tiasej titlatekipanotij nopaya”.

Rodney uan isiua Jane euaj Australia uan kipiaj se 50 xiuitl. Ipan 2010, pejkej tlatekipanouaj ipan Myanmar ininuaya ininkone Jordan uan ininichpoka Danica. Rodney kiijtoua: “Kema tikitakej maseualmej tlen Myanmar amo kiixmatij toTeotsij, tlauel tikintlasojtlakej. Na nikiniljuia toikniuaj ininuaya ininchampoyouaj ma yakaj tlatekipanotij ipan se altepetl kej Myanmar”. ¿Kenke kiampa kiijtoua? Rodney nojua kiijtoua: “Tlauel miak tlateochiualistli tijselijtokej pampa nikaj titlatekipanouaj. Miakej telpokamej kinekij kipiasej teléfonos, carros, kanke tekitisej uan sekinok tlamantli. Uan tokoneuaj kichiuaj kampeka kiyekosej sekinok tlajtoli tlen kitekiuisej ipan tlajtolmoyaualistli. Kinekij kinmachtisej maseualmej tlen Biblia kiijtoua uan tlanankilisej ipan tlanechikoli. Inijuantij mosentlalijtokej ipan ni uan nojkia ipan sekinok tlamantli tlen tlauel ipati”.

Oliver, se toikni katli kipia 37 xiuitl uan eua Estados Unidos, kiijtoua kenke kipaktia tlatekipanos kampa monekij tlajtolmoyauanij: “Tlauel nechpaleuijtok nijtekipanos Jehová ipan seyok altepetl, pampa nama nijchiua sekinok tlamantli tlen achtouia amo nijchiuayaya. Uan nojkia nechpaleuijtok kuali ma nitlaneltoka uan ma nimotemachi ipan Jehová, maske kemantika nikixnamiki tlaouijkayotl. Pampa nitlatekipanoua ininuaya maseualmej katli nojkia kineltokaj tlen na nijneltoka, maske amo nikinixmatiyaya, nechpaleuijtok ma nijmati san toTeotsij iTlanauatijkayo tlauel ipati pampa techsansejkotilia”. Ipan ni tonali, Oliver uan isiua Anna, kinmachtiaj ika miak pakilistli maseualmej katli kamanaltij tlajtoli chino.

Ipan 2004, Trazel, se tosiuaikni katli kipia 52 xiuitl uan eua Australia, pejki tlatekipanoua ipan Myanmar. Ya kiijtoua: “Nochi katli inuelij, niinmechiljuia xiakaj xitlatekipanotij kampa monekij tlajtolmoyauanij. Nikitstok kenijkatsa Jehová kinteochiua katli kichiuaj kampeka kitekipanosej. Amo kema nimoiljuijtoya tlaj nikaj nitlatekipanoskia. Tlauel niyolpaki pampa nijchiua ni tekitl ipan nonemilis”.

Tijnekiskiaj nochi tlen kiijtouaj ni toikniuaj ma inmechpaleui ximoiljuikaj tlaj uelis inyasej intlajtolmoyauatij ipan seyok altepetl kampa itstokej maseualmej katli kuali ininyolo uan amo kinkamanaljuijtokej. Toikniuaj katli uejka tlatekipanouaj kejuak inmechiljuiaj: “¡Xiualakaj Myanmar uan xitechpaleuikij!”.