Jehová kineki se tlakatl uan se siuatl katli mosenkajtokej ma yolpakikaj, ma itstokaj sansejko uan ma moiknelikaj (Mat. 19:4-6). Tlaj tijneki timosenkauas, ¿tlake mitspaleuis tijpantis se kuali tlakatl o se kuali siuatl? Jehová kichijki se tlakatl uan se siuatl ma mosenkauakaj, yeka kuali kimati tlake uelis kinpaleuis kema nojua moixmatij uan kema ya mosenkajtosej. Tlauel kinpaleuis tlaj kichiuaj tlen Biblia tetlajtolmaka. Ma tikitakaj se keski textos.

Achtoui, ma tikilnamikikaj ‘toyolo tlakajkayaua uan mosisinia que nochi tlamantli’ (Jer. 17:9). Kema omej kinekij mosenkauasej uan peuaj moixmatij, tlen kiyolmatij uelis kichiuas amo ma kiitakaj se keski tlamantli uan amo ma moiljuikaj kej kinamiki. Tlaj mosenkauaj san pampa kuali kiyolmatij itstosej sansejko, uajka amo yolpakisej (Prov. 28:26). Yeka, kema se tlakatl uan se siuatl peuaj moixmatij, amo kinamiki nima kiijtosej tlen kiyolmatij o motenkauilisej miak tlamantli.

Proverbios 22:3, kiijtoua: “Se tlakatl tlen tlalnamiki nimantsi momaka cuenta intla mauilili kampa youi uan axpano, pero se tlen uiuitik axkichiua cuenta uan kipantia tlen axkuali”. ¿Kenke tlauel amo kuali tlaj tijnekis tikixmatis se akajya ipan Internet uan ipan aplicaciones? Miakej amo kuali kiyolmajtokej uan kinyolkokojtokej pampa kiixmajtokej se akajya ipan Internet. Nojkia, itstokej se keskij maseualmej katli kinkajkayauaj sekinok uan kinixtekiliaj inintomij. Uan kemantika kiijtouaj elij Jehová itlajtoltemakauaj.

Ma tikitakaj seyok tlamantli. Ipan aplicaciones uan ipan Internet, kiijtouaj se telpokatl uelis kiixmatis se ichpokatl tlaj kitekiuia kampa kichijtiauij kejuak sumas. Maske kiampa kiijtouaj, nopa amo nelia, san tlakajkayauaj. Yeka ma timotlatsintokikaj, ¿tijkauaskiaj nopa tlamantli ma kitlapejpeni tlen tlauel ipati tlen tijnekij tijchiuasej, kej kema se akajya kineki mosenkauas? Nopa tepostli amo kema techiljuiskia tlen tlauel techpaleuis, kej Biblia techtlajtolmaka (Prov. 1:7; 3:5-7).

Tlen kiijtoua Proverbios 14:15, tlauel techpaleuia. Nopaya kiijtoua: “Se tlen uiuitik nimantsi kineltoka nochi tlen iuampoyouaj kiiljuiaj ma kichiua, pero se tlakatl tlen tlalnamiki  moiljuia intla kuali para kichiuas se tlamantli o axtle”. Kema se akajya kineki kipantis se kuali tlakatl o se kuali siuatl, achtoui moneki kuali moixmatisej. Uan nopa amo uelis kichiuasej ipan Internet. Nojkia, maske se keskij maseualmej kiijtouaj inintoka, kiijtouaj kanke euaj, tlake kinpaktia uan mojmostla mokamanaljuiaj ipan Internet, ni amo kiijtosneki nelnelia kuali moixmatij. Se keskij katli moiljuijtoyaj kiixmatiyayaj katli kiixtokayayaj ipan Internet, mosentlachilijkej kema nelnelia kinixmatkej.

Se katli kiijkuilok salmo kiijtok: “Axkema ninejnentok ininuaya tlakamej tlen tlakajkayauaj, niyon axnimouikatok ininuaya tlen kipiaj ome ininxayak” (Sal. 26:4). Miakej maseualmej amo kenijki kiitaj kema istlakatij ipan Internet uan amo kuali kitlaliaj se keski tlamantli tlen inijuantij pampa kinekij kuali ma kinitakaj. Kema kiampa kichiuaj uan kema tetlajkuiljuiliaj uelis amo kinextisej kenijkatsa nelnelia elij. Maske uelis sekij kiijtouaj elij Jehová itlajtoltemakauaj, ¿nelia moatsonpoliuiltijtokej? ¿Kuali tlaneltokaj? ¿Kuali mouampojchijtokej ika Jehová? ¿Kuali kinitaj ipan tlanechikoli? ¿Nelnelia uelis elisej kuali touampoyouaj? (1 Cor. 15:33; 2 Tim. 2:20, 21). Yeka, ¿kinamiki iuaya ma mosenkauakaj? Moneki tikintlatsintokisej sekinok katli kuali kiixmatij nopa toikni, kiampa tijmatisej kenijkatsa nelnelia eli (Prov. 15:22). Jehová itekipanojkauaj amo kema mosiuajtiskiaj o monamiktiskiaj iuaya se akajya katli “axkineltoka toTeko” (2 Cor. 6:14; 1 Cor. 7:39).

Kej tikitaj, tlauel mauilili tikixmatisej se akajya ipan Internet o ipan aplicaciones. Uajka, ¿kanke uelis tikixmatisej se tosiuaikni o se toikni katli iuaya uelis timosenkauasej? Kema nojua tiauiyayaj ipan tlanechikoli uan kema tiauiyayaj ipan uejueyi tlanechikolistli, techpaleuiyaya ma tikinixmatikaj sekinok toikniuaj.

Maske ipan ni tonali momoyajtok kokolistli COVID-19 uan amo timosentiliaj kej achtouia, nojua uelis tikinixmatisej sekinok toikniuaj katli ayamo mosenkajtokej pampa nama tijtekiuiaj toteléfono kema timomachtiaj. Nopaya uelis tikinitasej toikniuaj uan tikintlakakilisej kema tlanankiliaj (1 Tim. 6:11, 12). Nojkia, uelis tikamanaltisej ininuaya toikniuaj kema tlamis tlanechikoli. Sekij toikniuaj nojkia monojnotsaj ika Internet uan kiampa moyolpakiltiaj. Kema tijchiuaj ni tlamantli, uelis tikitasej kenijkatsa se toikni monojnotsa ininuaya sekinok uan kenijkatsa nelnelia eli (1 Ped. 3:4). Kej panotias tonali uelis kuali moixmatisej uan nopa omej uelis kiitasej ipan tlake mosentlalijtokej, kenijkatsa elij uan tlaj uelis kuali mouikasej.

Kema se toikni kineki mosenkauas uan kichiua tlen Biblia tetlajtolmaka kema kitemoua se tosiuaikni, kipaleuis ma yolpakikaj kema ya itstosej sansejko. Kiampa kiijtoua Proverbios 18:22: “Se tlakatl tlen mokuilik se siuatl kipantijtok se tlamantli tlen kuali, uan toTeko nelia pakis ika tlen kichijtok”.