1. ¿Tlake kichijtok Jehová ika sejse tlen tojuantij?

¿KENIJKATSA pejki tijtekipanouaj Jehová? Achtoui monejki se akajya ma techiljui tlen “iTlajtol toTeko”. Uelis techkamanaljuijkej totatauaj, se katli iuaya titekitiyayaj, se katli iuaya timomachtiyayaj o se Jehová itlajtoltemajka katli asito tochaj (Mar. 13:10). Teipa, se akajya monejki kichiuas kampeka techmachtis tlen Biblia kiijtoua, uan uelis kiampa kichijki miak tonali. Nopa techpaleuik ma tikitakaj Jehová techiknelia uan nojkia pejki tikikneliaj. Jehová kichijki ma tikixmatikaj, uan pampa tielij Cristo itokilijkauaj uelis tijpiasej nemilistli tlen axkema tlamis (Juan 6:44). Nelia tlauel tijtlaskamatij pampa Jehová kitekiuik se toikni ma techmachti uan pampa techkaua ma tijtekipanokaj.

2. ¿Tlake tikitasej ipan ni tlamachtili?

² Tojuantij tijmatij tlen melauak, yeka nojkia ma tikinpaleuikaj sekinok ma kipiakaj nopa nemilistli tlen amo kema tlamis. Maske sekij toikniuaj kuali tlajtolmoyauaj kajkalpa, ouij kimatij kiiljuisej se akajya tlaj kineki momachtis Biblia uan tlamachtisej. ¿Nojkia kiampa techpano? Tlauel techpaleuis tlen moixtomas ipan ni tlamachtili. Tikitasej kenke tijnekij tikinpaleuisej maseualmej ma mochiuakaj Cristo itokilijkauaj. Nojkia tikitasej tlake uelis tijchiuasej tlaj amo tiuelij tijmachtiaj se akajya. Achtoui, ma tikitakaj kenke amo kinamiki san titlajtolmoyauasej, uan kenke moneki titlamachtisej.

3. ¿Kenke titlajtolmoyauaj?

³ Kema Jesús itstoya ipan Tlaltipaktli, kinnauatik itokilijkauaj ma kichiuakaj ome tlamantli. Achtoui kinnauatik  ma tlajtolmoyauakaj uan ma teiljuikaj tlen kichiuas toTeotsij iTlanauatijkayo, uan kinmachtik kenijkatsa kichiuaskiaj (Mat. 10:7; Luc. 8:1). Teipa, kiniljuik tlake ueliskiaj kichiuasej kema kuali kintlakakiliskiaj uan kema amo (Luc. 9:2-5). Nojkia, kiijtok itokilijkauaj tlajtolmoyauaskiaj tlauel uejka uan ipan nochi Tlaltipaktli (Mat. 24:14; Hech. 1:8). Maske amo kinekiskiaj kintlakakilisej, inijuantij monekiyaya teiljuisej tlen toTeotsij iTlanauatijkayo kichiuas.

4. Kej kiijtoua Mateo 28:18-20, ¿kenke amo kinamiki san tikiniljuisej maseualmej tlen kichiuas toTeotsij iTlanauatijkayo?

⁴ ¿Tlake seyok tlamantli Jesús kinnauatik itokilijkauaj? Ya kiniljuik ma kinmachtikaj maseualmej tlen ya kinnauatijtoya. ¿San tlajtolmoyauaskiaj uan tlamachtiskiaj ipan achtoui siglo? Amo, Jesús kiijtok nojkia kinmachtiskiaj maseualmej ipan ni tonali “kema tlamis nochi tlamantli tlen amo kuali” (xijpoua Mateo 28:18-20, TNM). * Uelis Jesús kinmakak ni tlanauatili kema monextik kampa itstoyaj kipano 500 itokilijkauaj (1 Cor. 15:6). Uan kejuak ipan se temiktli nojkia kiiljuik apóstol Juan moneki nochi itokilijkauaj ma kinmachtikaj maseualmej tlen Jehová kineki (Apoc. 22:17).

5. ¿Tlake neskayotl kitekiuik Pablo ipan 1 Corintios 3:6-9, kema kiijtok moneki titlajtolmoyauasej uan titlamachtisej?

⁵ Apóstol Pablo kiijtok kema tikinmachtiaj maseualmej eli kej kema se akajya kitoka se xinachtli uan moneki kimokuitlauis. Yeka kiniljuik toikniuaj tlen Corinto: “Nijchijki keja se tlen kitojki se xinachtli, uan iteki Apolos elki keja se tlen kiatekik [...]. Uan inmojuantij initstokej keja imil toTeko kampa titokaj, pero axinmojuantij tomil” (xijpoua 1 Corintios 3:6-9). Katli titekitij ipan “imil toTeko” amo san tijtokaj nopa xinachtli, nojkia kejuak tikatekiaj uan tikitaj kuali ma moskalti (Juan 4:35). Maske kiampa tijchiuaj, tijmatij Jehová kichiua ma moskalti nopa xinachtli.

6. ¿Tlake moneki tijchiuasej nochi katli titlamachtiaj?

⁶ Tikintemouaj maseualmej katli kipiaj kuali ininyolo uan kinekij kipiasej nopa nemilistli tlen axkema tlamis (Hech. 13:48). Tlaj tijnekij ma mochiuakaj Cristo itokilijkauaj moneki tikinpaleuisej 1) ma kikuamachilikaj, 2) ma kineltokakaj uan 3) ma kichiuakaj ipan ininnemilis tlen Biblia tlamachtia (Juan 17:3; Col. 2:6, 7; 1 Tes. 2:13). Nochi toikniuaj katli itstokej ipan tlanechikoli uelis kinpaleuisej katli momachtiaj Biblia kema kinextiaj kinikneliaj uan kema kuali kinseliaj ipan tlanechikoli (Juan 13:35). Toikni katli kimachtia se akajya, moneki kichiuas kampeka kipaleuis ma kichiua tlen Biblia tetlajtolmaka uan kuali ma monejnemilti (2 Cor. 10:4, 5). Tlauel tiyolpakisej tlaj katli tijmachtiaj kichiuas ipan inemilis tlen momachtia uan moatsonpoliuiltis, maske kemantika uelis panos miak metstli.

7. ¿Kenke titlajtolmoyauaj uan kenke tikinmachtiaj maseualmej?

⁷ Titlajtolmoyauaj uan titlamachtiaj pampa 1) tikikneliaj Jehová. Kema tijchiuaj kampeka titlajtolmoyauaj uan titlamachtiaj, tijnextiaj tlauel tikikneliaj (1 Juan 5:3). Ma timoiljuikaj: titlajtolmoyauaj kajkalpa pampa tikikneliaj Jehová. ¿Tijmatij ouij tijchiuasej? Uelis amo. Kema achtoui pejki  tlajtolmoyauaj uan monejki titlanojnotsasej ipan se kali, uelis tlauel timajmajkej. Maske kiampa tijyolmatkej, tijchijkej kampeka titlajtolmoyauasej pampa Jesús tlanauatik ma tijchiuakaj. Maske uelis nama ayokmo tlauel timajmauij titlajtolmoyauasej, ¿tijchiuaj kampeka tijmachtisej se akajya? Uelis ouij tijmatij. Tlaj kiampa techpano, ma tikiljuikaj Jehová ma techpaleui amo tlauel timajmauisej uan ma techpaleui tikiljuisej se akajya tlaj kineki momachtis, uan ya techpaleuis.

8. Kej kiijtoua Marcos 6:34, ¿kenke tikinmachtiaj maseualmej tlen melauak?

⁸ Titlamachtiaj pampa 2) tikinikneliaj maseualmej. Se tonali, Jesús uan itokilijkauaj tlauel siajtoyaj pampa se tonal tlajtolmoyajkej, yeka kitemojkej kanke mosiajketsaskiaj. Maske kiampa kinejkej kichiuasej, miakej maseualmej kinchixtoyaj. ¿Tlake kichijki Jesús? Pampa tlauel kinikneliyaya, “pejki kinmachtia miak tlamantli” (xijpoua Marcos 6:34). ¿Kenke Jesús kichijki nopa? Pampa moiljuik ipan tlen kinpanoyaya uan kinejki kinpaleuis. Kimatiyaya tlauel tlaijiyouijtoyaj uan monekiyaya kimatisej tlen toTeotsij kichiuas teipa. Ipan ni tonali maseualmej nojkia moneki ma kinyolchikauakaj, maske nesij yolpaktokej. Inijuantij elij kejuak borregojmej katli mokuapolojtokej uan amo kipiaj katli kinmokuitlauis. Pablo kiijtok inijuantij amo kiixmatij toTeotsij yon motemachiaj ipan tlen teipa kiselisej (Efes. 2:12). Uan yauij ipan “nopa ojtli tlen teuika kampa tetsontlamiltiaj” (Mat. 7:13, TNM). Yeka, kema timoiljuiaj ipan maseualmej kampa titlajtolmoyauaj uan tikitaj kenijkatsa amo kiixmatij toTeotsij, nopa tlaiknelili techpaleuis ma tijnekikaj tikinpaleuisej, uan nojkia pampa tikintlasojtlaj. Yeka, tlauel tikinpaleuiaj kema tikintlatsintokiaj tlaj kinekij momachtisej Biblia.

9. Kej kiijtoua Filipenses 2:13, ¿kenijkatsa techpaleuia Jehová?

⁹ Uelis tijmatij ouij tikiniljuisej sekinok tlaj kinekij momachtisej Biblia pampa tijmatij moneki tijkixtisej tonali uan kiampa tikinmachtisej. Tlaj kiampa techpano, ma tikiljuikaj Jehová kenijkatsa tijyolmatij uan ma techpaleui tijnekisej tijpantisej se akajya katli kineki momachtis (xijpoua Filipenses 2:13). Juan kiijtok toTeotsij temachtli techtlakakilis tlaj tijtlajtlaniaj tlen “kinamiki ika tlen yajaya kineki” (1 Juan 5:14, 15). Yeka, uelis timotemachisej Jehová uelis techpaleuis nojua ma tijnekikaj tikinpaleuisej sekinok ma elikaj Cristo itokilijkauaj.

10, 11. ¿Kenke kemantika amo tijnekij titlamachtisej?

¹⁰ Maske tijmatij tlauel ipati tikinpaleuisej sekinok ma elikaj Cristo itokilijkauaj, kemantika uelis onkas se keski tlamantli tlen kichiuas amo tlauel ma titlajtolmoyauakaj kej tojuantij tijnekiskiaj. Ma tikitakaj se keski tlamantli uan tlake uelis techpaleuis.

¹¹ Timoiljuiaj amo uelis tlauel titlajtolmoyauasej pampa mopatlatok kej tiitstokej. Se neskayotl, sekij toikniuaj ya ueuejtixtokej uan sekij mokokouaj. Tlaj kiampa techpano, ma tikilnamikikaj tlen tijyekojtokej ipan ni tonali kema onkatok nopa kokolistli COVID-19: nama titlamachtiaj ika teléfono o ika Internet. Yeka maske tiitstokej tochaj, uelis tijpeualtisej tijmachtisej se akajya o nojua tijmachtijtosej. Uan sekij maske kinekij momachtisej Biblia, amo uelij ipan nopa tonali kema toikniuaj tlajtolmoyauaj. ¿Uelis tikiniljuisej tojuantij tikinmachtisej kema inijuantij amo motekiuijtosej, uelis ika ijnalok o ika tiotlak? Ma tikilnamikikaj, Jesús kimachtik  Nicodemo ika tlayoua pampa kiampa kiiljuik (Juan 3:1, 2).

12. Tlaj timoiljuiaj amo tiuelij titlamachtiaj, ¿tlake eyi tlamantli techpaleuis?

¹² Uelis timoiljuiaj amo tiuelij titlamachtiaj. Uelis timoiljuiaj nojua moneki timomachtisej o ayamo kuali titlamachtiaj. Ma timoiljuikaj ipan eyi tlamantli tlen techpaleuis. 1) Jehová moiljuia kena uelis tijchiuasej nopa tekitl (2 Cor. 3:5). 2) Jesús, katli kimakatokej “nochi tlanauatili ipan iluikak uan ipan Tlaltipaktli”, technauatia titlamachtisej (Mat. 28:18). Uan 3) amo tiitstokej toselti. Sanse kej Jesús, uelis timotemachisej Jehová techpaleuis tijmatisej tlen tikijtosej (Juan 8:28; 12:49). Nojkia, uelis tikiljuisej se ueuejtlakatl katli kiyakana tlajtolmoyaualistli, se precursor o se toikni katli kuali tlamachtia ma techpaleui tijpeualtisej tijmachtisej se akajya o kuali tlamachtisej. Tlaj ininuaya titlamachtiaj, techpaleuis tijmatisej kenijkatsa tijchiuasej.

13. ¿Kenke moneki tijpatlasej kej timomajtoyaj titlamachtiaj?

¹³ Tijmatij ouij titlamachtisej kej nama techiljuijtokej uan tijtekiuisej tlen yankuik kistok. Mopatlatok kej tijmachtiaj se akajya. Ika nopa amatlajkuiloli tlen ika titlamachtiaj, Nochipa xiitsto, techpaleuia achtoui ma timokualchijchiuakaj kema tijmachtisej se akajya uan techpaleuia ayokmo ma titlamachtikaj kej achtouia. Nama nojua tlauel tikamanaltij iuaya katli tijmachtiaj uan ayokmo tijpouaj miak párrafos. Tlauel tijtekiuiaj videos uan sekinok tlamantli, kej JW Library^®. Tlaj tijmatij ouij tijtekiuisej ni tlamantli uelis tikiljuisej se toikni ma techpaleui. Maske nochi tijmatij ouij timomatisej tijchiuasej se yankuik tlamantli uan nojua tijnekiskiaj titlamachtisej kej achtouia, Jehová uan toikniuaj techpaleuisej ma tijpatlakaj kej titlamachtiaj uan nojua ma tiyolpakikaj. Se precursor kiijtok: “Nama, kej titlamachtiaj tlauel techpaleuia uan tlauel kinpaleuia katli tikinmachtiaj”.

14. 1) ¿Tlake moneki tikilnamikisej tlaj tijmatij ouij titlamachtisej kampa titlajtolmoyauaj? 2) ¿Kenijkatsa techpaleuia 1 Corintios 3:6, 7?

¹⁴ Tijmatij ouij tijmachtisej se akajya kampa titlajtolmoyauaj. Uelis se keskij maseualmej amo kinekij momachtisej Biblia o amo kinekij kinitasej Jehová itlajtoltemakauaj. ¿Tlake techpaleuis nojua tiyolpaktosej kema titlajtolmoyauaj? Ma tikilnamikikaj maseualmej kipatlaj kej moiljuiaj pampa mopatla kej itstokej, yeka uelis teipa kinekisej techtlakakilisej uan kinekisej momachtisej (Mat. 5:3). Miakej maseualmej katli amo kinekiyayaj kiselisej amatlajkuiloli, teipa kena kinejkej momachtisej. Nojkia, ma tikilnamikikaj Jehová kiyakana tlajtolmoyaualistli (Mat. 9:38). Maske Jehová kineki nojua ma tikintemokaj maseualmej uan sampa ma tikinnojnotsakaj, ya kinpaleuis ma kitekipanokaj (1 Cor. 3:6, 7). Uan maske nama amo tijmachtiaj yon se maseuali, tlauel techpaleuia tikilnamikisej Jehová tlauel techteochiuas pampa tijchiuaj kampeka tikintemosej maseualmej. *

15. ¿Kenijkatsa kiyolmati Jehová kema momachtia se akajya uan kichiua tlen kiyekojtia?

¹⁵ Jehová tlauel yolpaki kema se akajya peua momachtia Biblia uan kiniljuia sekinok tlen kiyekojtia (Prov. 23:15, 16). Nojkia, tlauel yolpaki pampa toikniuaj nojua tlauel tlajtolmoyauaj uan tlamachtiaj ipan ni tonali. Se neskayotl, maske ipan xiuitl 2020 momoyajki nopa kokolistli COVID-19, momachtijkej  se 7,705,765 maseualmej, uan se 241,994 maseualmej kimaktilijkej Jehová ininnemilis uan moatsonpoliuiltijkej. Inijuantij nojkia kinmachtisej sekinok maseualmej uan nojkia kinpaleuisej ma moatsonpoliuiltikaj (Luc. 6:40). Jehová tlauel yolpaki kema titlajtolmoyauaj uan tikinmachtiaj.

16. ¿Tlake nojua uelis timosentlalisej tijchiuasej?

¹⁶ Maske ouij tijpaleuisej se akajya ma kiikneli Jehová, ya nochipa techpaleuis ma tikinpaleuikaj sekinok ma elikaj Cristo itokilijkauaj. ¿Uelis tijchiuasej kampeka tijpeualtisej tijmachtisej se akajya? Tlaj tikitaj kinamiki, uelis tikintlatsintokisej katli ininuaya tikamanaltij tlaj kinekij momachtisej Biblia, uan uelis kena kinekisej momachtisej. Ma timotemachikaj Jehová kiteochiuas tlen tijchiuasej.

17. ¿Kenijkatsa tijyolmatisej tlaj tijmachtisej se akajya?

¹⁷ Kema titlajtolmoyauaj uan tikinmachtiaj maseualmej tlen Biblia kiijtoua tikitaj kej se ueyi tlateochiualistli. Uan ni tekitl nojkia kichiua tlauel ma tiyolpakikaj. Pablo, katli kinpaleuik miakej maseualmej tlen Tesalónica ma kitekipanokaj Jehová, kiijtok: “Intechmakaj ueyi pakilistli. Ipan nopa tonal kema toueyiTeko Jesús sampa ualas, uan timoketsasej iixpa, tijpiasej ueyi pakilistli pampa initstosej nepa touaya” (1 Tes. 2:19, 20; Hech. 17:1-4). Ipan ni tonali, nojkia miakej toikniuaj tlauel yolpakij pampa kinpaleuiaj sekinok ma kitekipanokaj Jehová. Stéphanie iuaya iueue kinpaleuijtokej miakej ma moatsonpoliuiltikaj. Ya kiijtoua: “Nelia tlauel tiyolpakis tlaj tikinpaleuis sekinok nojkia ma kitekipanokaj Jehová”.