1, 2. 1) ¿Kenke Pablo kiijtok moneki tlauel titeiknelisej? 2) ¿Tlake tlajtlanili tijnankilisej?

 KEMA apóstol Pablo tlanki kiijtoua moneki titlaneltokasej, timotemachisej ipan tlen tijselisej teipa uan titeiknelisej, nojkia kiijtok: “Tlen más ueyi ipati ika ni eyi tlamantli eltok ya ni, moneki titeiknelisej” (1 Cor. 13:13). ¿Kenke kiijtok ni tlamantli? Pampa kema Dios kikualtlalis Tlaltipaktli, ayokmo monekis timotemachisej ipan tlen tijselisej teipa, pero nojua monekis tikiniknelisej Jehová uan toikniuaj. Uan kej panotias tonali, nojua más titeiknelisej.

² Moneki nochipa tikiniknelisej sekinok, yeka ma tijnankilikaj ni eyi tlajtlanili. Se, ¿kenke moneki titeiknelisej? Ome, ¿kenijkatsa moneki tijnextisej titeikneliaj? Uan eyi, ¿tlake uelis tijchiuasej tlaj tijnekij nochipa titeiknelijtosej?

3. ¿Kenke moneki titeiknelisej?

³ Moneki titeiknelisej, pampa kema kiampa tijchiuaj tijnextiaj nelia tielij Cristo itokilijkauaj. Jesús kiniljuik  iapóstoles: “Kiampa nochi kimatisej inmojuantij inelij notokilijkauaj: tlaj inmoikneliaj se ika seyok” (Juan 13:35). Nojkia tlaiknelili techpaleuia kuali ma timouikakaj. Yeka Pablo kiijtok: “Tlaiknelijkayotl techilpia sansejko para ma tijpiakaj sanse toyolo” (Col. 3:14). Apóstol Juan nojkia kiijtok kenke moneki tikiniknelisej toikniuaj, ya kiijtok: “Yajaya tlen nelia kiiknelia Toteko, moneki nojkia ma kinikneli iikniuaj” (1 Juan 4:21). Uajka kema tikinikneliaj toikniuaj, nojkia tijnextiaj tikikneliaj Jehová.

4, 5. Xikijto ika se neskayotl kenke moneki tikiknelisej Dios uan nojkia tikiniknelisej toikniuaj.

⁴ ¿Kenke moneki tikiknelisej Dios uan nojkia tikiniknelisej toikniuaj? Ma timoiljuikaj kenijkatsa toyolo kipaleuia nochi totlakayo. Se tepajtijketl uelis kimatis kenijkatsa eltok iyolo se akajya tlaj kiitskis imakechtsintla uan kimachilis kenijkatsa uitoni itlalo. ¿Tlake techmachtia ni tlamantli?

⁵ Se tepajtijketl uelis kimatis kenijkatsa eltok iyolo se akajya tlaj kimachilis kenijkatsa uitoni itlalo. Tojuantij nojkia uelis tijmatisej tlaj tikikneliaj Jehová, kema tikitaj kenijkatsa tikinikneliaj sekinok. Tlaj tikitaj ayokmo tlauel tikinikneliaj toikniuaj, uajka uelis nojkia ayokmo tlauel tikikneliaj Jehová. Uan tlaj nochipa tijchiuaj kampeka tikiniknelisej toikniuaj, nopa kinextis tlauel tikikneliaj Jehová.

6. ¿Tlake kinextia kema ayokmo tikikneliaj toikniuaj? (1 Juan 4:7-9, 11).

⁶ Tlaj tikitaj ayokmo tlauel tikinikneliaj toikniuaj, nopa kinextia ayokmo kuali timouikaj iuaya Jehová. Juan kiampa kiijtok ipan 1 Juan 4:20: “Aki axkiiknelia se iikni tlen kiitstok, axuelis kiiknelis Toteko tlen axkiitstok”. ¿Tlake techmachtia? San uelis tijyolpakiltisej Jehová, tlaj tikiniknelisej sekinok (xijpoua 1 Juan 4:7-9, 11).

7, 8. ¿Kenijkatsa uelis tijnextisej tikinikneliaj toikniuaj?

⁷ Ipan Biblia miakpa tijpantiaj ni tlanauatili: “Ximoiknelikaj se ika seyok” (Juan 15:12, 17; Rom. 13:8; 1 Tes. 4:9; 1 Ped. 1:22; 1 Juan 4:11). Nopa tlaiknelili moskaltia ipan toyolo uan amo aka ueli kiita. Uajka, ¿tlake uelis tijchiuasej tlaj tijnekij sekinok ma kiitakaj tlen eltok ipan toyolo? Ika tlen tikijtouaj uan tijchiuaj.

⁸ Uelis tijnextisej tikinikneliaj toikniuaj ipan miak tlamantli. Biblia kiijtoua kenijkatsa uelis tijnextisej: “Ximokamauikaj se ika seyok ika tlajtoli tlen melauak” (Zac. 8:16). “Kuali ximouikakaj ininuaya sekinok” (Mar. 9:50). “Xikintlepanitakaj sekinok” (Rom. 12:10). “Ximoselikaj se ika seyok ika yejyektsi” (Rom. 15:7). “Xikintlapojpoljuikaj” (Col. 3:13). “Ximopaleuikaj se ika seyok ika inmokuesoljuaj” (Gál. 6:2). “Ximoyolchikauakaj” (1 Tes. 4:18). “Ximofuerzajmakakaj” (1 Tes. 5:11). “Ximomaijtokaj ipan Toteko ipampa sejse inmojuantij” (Sant. 5:16).

9. ¿Kenke kema tikinyolchikauaj sekinok, tijnextiaj titeikneliaj? (Nojkia xikita tlaixkopinkayomej).

⁹ Ma tikixtomakaj se texto tlen moijtok ipan párrafo 8. Pablo kiijtok: “Ximoyolchikauakaj”. ¿Kenke kema tikinyolchikauaj sekinok tijnextiaj tikinikneliaj? Se amochtli kiijtoua nopa tlajtoli “ximoyolchikauakaj” tlen Pablo kiijtok, kiijtosneki “tiitstos inechka se akajya katli tlauel mokuesoua uan tijyolchikauas kema kiixnamiki se tlaouijkayotl tlen tlauel ouij”. Yeka, kema tijyolchikauaj se toikni katli tlauel mokuesoua, tijpaleuiaj amo ma kitlauelkaua Jehová.  Uajka kema se toikni o se tosiuaikni kineki mochokilis uan tiitstokej iuaya, tijnextiaj tikikneliaj (2 Cor. 7:6, 7, 13).

10. ¿Kenke tikijtouaj kema se akajya kiyolkokoua tlen kinpano sekinok kineki teyolchikauas?

¹⁰ Kema se akajya kiyolkokoua tlen kinpano sekinok, kineki teyolchikauas. ¿Kenke kiampa tikijtouaj? Pampa tlen kiyolmati, kiyololinia ma kinpaleui sekinok. Uajka, achtoui techyolkokoua tlen kiixnamikij sekinok uan nopa techyololinia ma tikinyolchikauakaj. Jehová nojkia kiampa kichiua. Pablo kiijtok Dios kiyolkokoua tlen kinpano maseualmej uan yeka kinyolchikaua. Nojkia kiijtok Jehová “techtlasojtla uan tlatoktsitsij techyoltlalia” (2 Cor. 1:3, Icamanal Toteco). Ika nopa tlajtoli “techtlasojtla”, Pablo kinextik Jehová tlauel kiyolkokoua tlen techpano. Nojkia kiijtoua Jehová eli toTata “tlen techtlasojtla” pampa san ya kinextia nelia kiyolkokoua tlen techpano. Yeka “techyoltlalia ipan nochi nopa tlaouijkayotl katli techpanotiuala” (2 Cor. 1:4, Icamanal Toteco). Sanse kej atl kiyolseseltia se akajya katli amiki, Jehová nojkia kiyolseseltia uan kiyolchikaua katli tlauel tlaijiyouia. ¿Tlake techpaleuis tijchiuasej kej Jehová? Moneki tijnextisej kuajkuali tlamantli tlen techpaleuis ma titeyolchikauakaj. Ma tikitakaj tlen uelis tijchiuasej.

11. Kej kiijtoua Colosenses 3:12 uan 1 Pedro 3:8, ¿tlake techpaleuis tijnextisej tikinikneliaj toikniuaj uan tikinyolchikauasej?

¹¹ ¿Tlake techpaleuis nojua ma titeiknelijtokaj uan ma titeyolchikajtokaj? Tlauel techpaleuis tlaj tijnextiaj kuajkuali tlamantli kej tijyolmatisej tlen sekinok kiyolmatij, titeiknelisej uan titetlasojtlasej (xijpoua Colosenses 3:12; 1 Pedro 3:8). Kema techyolkokoua tlen kinpano toikniuaj uan tijnextiaj kuajkuali tlamantli ipan tonemilis, techyololinia ma tikinyolchikauakaj kema kiixnamikij tlaouijkayotl. Kiampa kiijtok Jesús: “Tlen tikijtouaj, ya nopa eltok ipan toyolo. Se akajya katli yolkuali, kiijtoua tlen kuali” (Mat. 12:34, 35). Kej tikitstokej, kema tikinyolchikauaj toikniuaj tijnextiaj tikinikneliaj.

12. 1) ¿Kenke moneki timomokuitlauisej? 2) ¿Tlake tlajtlanili tijnankilisej?

¹² Nochi tijnekij tijchiuasej tlen kiijtoua 1 Juan 4:7: “Ma timoiknelijtinemikaj se ika seyok”. Pero nojkia moneki tikilnamikisej tlen Jesús kiijtok: “Miakej ayokmo teiknelisej” (Mat. 24:12). Jesús amo kinejki kiijtos miakej itokilijkauaj ayokmo moikneliskiaj. Maske amo kinejki kiijtos nopa tlamantli, moneki timomokuitlauisej pampa ipan ni tonali miakej maseualmej amo teikneliaj. Ika tlen tikitstokej, ma tijnankilikaj ni tlajtlanili: ¿Kenijkatsa uelis tijmatisej tlaj nelnelia tikinikneliaj toikniuaj?

13. ¿Kenijkatsa uelis tijmatisej tlaj nelia titeikneliaj?

¹³ Tlaj tijnekij tijmatisej tlaj nelia tikinikneliaj toikniuaj, moneki tikitasej tlake tijchiuaj kema techpano se tlenijki (2 Cor. 8:8). Pedro kiijtok kenijkatsa uelis tijnextisej. Ya kiijtok: “Moneki ximoiknelikaj miak se ika seyok, pampa se tlen kiiknelia ne seyok kitlapojpoljuia yonke nopa seyok kiixpano miak uelta” (1 Ped. 4:8). Uajka, uelis tikitasej tlaj nelia titeikneliaj kema se toikni mokuapoloua o techixpano.

14. Kej kiijtoua 1 Pedro 4:8, ¿kenijkatsa moneki titeiknelisej? Xikijto se neskayotl.

¹⁴ Ma tikixtomakaj tlen Pedro kiijtok. Kampa peua versículo 8 kiijtoua kenijkatsa moneki titeiknelisej. Nopaya kiijtoua: “Moneki ximoiknelikaj miak”. Kema Pedro kiijtok  “miak”, ika griego kiijtosneki “xijxoyaua” o “xijpajpatlaua”. Nopa seyok tlajko tlen ni versículo kiixtoma tlake kichiua se akajya katli tlauel teiknelia: tetlapojpoljuia. Nopa tlaiknelili eli kejuak se yoyomitl tlen uelis tijpatlauasej uan tlen techpaleuis ma titetlapojpoljuikaj maske miakpa techixpanosej. Kena, sanse kej yoyomitl ueli kiixtsakua kampa sokiyo, tlaiknelili kejuak kiixtsakuas kema sekinok techixpanoj o techyolkokouaj.

15. ¿Kenijkatsa techpaleuia kema tlauel tikinikneliaj sekinok? (Colosenses 3:13).

¹⁵ Tlauel moneki tikiniknelisej toikniuaj, pampa nopa techpaleuis ma tikintlapojpoljuikaj kema techixpanosej maske tijmatisej ouij (xijpoua Colosenses 3:13). Kema titetlapojpoljuiaj, tijnextiaj nelia titeikneliaj uan tijnekij tijyolpakiltisej Jehová. ¿Tlake seyok tlamantli techpaleuis ma titetlapojpoljuikaj uan amo nima ma tikualanikaj ika tlen kichiuaj sekinok?

16, 17. ¿Tlake techpaleuis ma tikilkauakaj kema toikniuaj mokuapolouaj? Xikijto se neskayotl. (Nojkia xikita tlaixkopinkayomej).

¹⁶ Ximosentlali san ipan nopa kuali tlamantli tlen kichiuaj sekinok. Ximoiljui  tiitstok ininuaya sekinok toikniuaj uan tlauel inyolpaktokej yeka inmoixkopinaj. Tijneki tikilnamikis tlen inkichijkej ipan nopa tonali, yeka expa titlaixkopina pampa tijneki nochi kuali ma kisakaj. Pero teipa tikita se toikni amo kuali kistok. ¿Tlake tijchiuas ika nopa tlaixkopinkayotl? Tikixpolos uan tijkauas san nopa ome kampa nesi nochi ixuetskatokej.

¹⁷ Nopa tlaixkopinkayotl tlen tikajoktokej eli kejuak nochi tlen tikilnamikij. Uelis nochi tikilnamikij kema tiitstoyaj ininuaya toikniuaj uan tlauel tiyolpajkej. Pero uelis ipan nopa tonali se toikni kiijtok o kichijki se tlamantli tlen amo techpaktik. ¿Tlake tijchiuaskia ika tlen kichijki? ¿Tikixpoloskia kej se tlaixkopinkayotl? (Prov. 19:11; Efes. 4:32). Maske ipan nopa tonali toikni kichijki tlen amo techpaktik, uelis tikilkauasej tlen kichijki pampa miakpa kichijtok tlen kuali. Moneki tikilnamikisej san nopa kuali tlamantli tlen kichiuaj toikniuaj, kiampa kejuak san tikajokuisej nopa “yejyektsitsij tlaixkopinkayotl”.

18. ¿Tlake tikitakej ipan ni tlamachtili?

¹⁸ ¿Kenke tijnekij nojua tlauel tikiniknelisej toikniuaj? Pampa kema kiampa tijchiuaj, tijnextiaj tikikneliaj Jehová. ¿Kenijkatsa uelis tijnextisej tikinikneliaj toikniuaj?  Kema tijchiuaj kampeka tikinyolchikauasej. Tlaj tijnekij kiampa tijchijtosej, moneki tijnextisej techyolkokoua tlen kinpano. ¿Tlake uelis tijchiuasej tlaj tijnekij nojua titeiknelijtosej? Moneki tijchiuasej kampeka tikintlapojpoljuisej kema techixpanoj.

19. ¿Kenke moneki tlauel titeiknelisej ipan ni tonali?

¹⁹ Moneki tlauel titeiknelisej ipan ni tonali. ¿Kenke? Ma tikitakaj tlen Pedro kiijtok: “Ya monechkauia nopa tonali kema tlamis tlaltipaktli. Uajka [ . . . ] moneki ximoiknelikaj miak se ika seyok” (1 Ped. 4:7, 8). ¿Tlake panos pampa monechkauijtia itlamia tonali? Jesús kiniljuik itokilijkauaj: “Nochi altepemej inmechkualankaitasej pampa inelij notokilijkauaj” (Mat. 24:9). Tlaj amo tijnekij tijtlauelkauasej Jehová maske sekij techkualankaitasej, moneki tijchiuasej kampeka kuali timouikasej ininuaya toikniuaj. Tlaj titeikneliaj, Satanás amo uelis techxelos “pampa tlaiknelijkayotl techilpia sansejko para ma tijpiakaj sanse toyolo” (Col. 3:14; Filip. 2:1, 2).