1. ¿Kenke tlauel tiyolpakij?

TLAUEL tiyolpakij kema tikitaj kenijkatsa Jehová itlanechikol momiakilia. Nopa kinextia Jehová itekipanojkauaj kichiuaj kejuak ma kauani inintlauil. Se xiuijtlaya tikinmachtijkej kipano diez millones maseualmej. Uan nojkia tlauel miakej maseualmej mosentilijkej kema moilnamijki Cristo imikilis uan kiyekojkej kenijkatsa Jehová kinextik tlauel techiknelia pampa temaktilik iKone (1 Juan 4:9).

2, 3. 1) ¿Tlake tlamantli amo techtsakuilia ma tijchiuakaj kejuak ma kauani totlauil? 2) ¿Tlake tikitasej ipan ni tlamachtili?

² Maske ipan Jehová itlanechikol itstokej miakej maseualmej katli kamanaltij miak tlajtoli, nopa amo techtsakuilia sansejko ma tijueyichiuakaj toTeotsij Jehová (Apoc. [Rev.] 7:9). Maske amo sanse tlajtoli tikamanaltij uan kampa ueli tieuaj, nochi uelis tiitstosej “keja tlauili ipan ni Tlaltipaktli” (Filip. 2:15).

³ Pampa nojua timomiakilijtiauij, tiitstokej sansejko uan nochi tijchiuaj kampeka tlauel titlajtolmoyauasej, kichiua  ma tijueyichiuakaj Jehová. Ipan ni tlamachtili tikitasej eyi tlamantli tlen ika uelis tijchiuasej kejuak ma kauani totlauil (xijpoua Mateo 5:14-16).

4, 5. 1) ¿Kema nojkia uelis tijchiuasej kejuak ma kauani totlauil? 2) ¿Tlake pano kema kuali titenojnotsaj? (Xikita nopa achtoui tlaixkopinkayotl).

⁴ Ipan pilamochtsi Tlen Tematiltia, junio 1, 1925, ipan tlajtoli inglés, nopa tlamachtili “Luz en la oscuridad” kiijtok: “Amo aka uelis kuali kitekipanos toTeko ipan ni itlamia tonali [...] tlaj amo kichiua kampeka kejuak ma kauani itlauil”. Nojkia kiijtok: “Uelis kichiuas ni tlaj kimoyauas nopa kuali tlamachtili kampa ueli ipan Tlaltipaktli uan tlaj monejnemiltis kej toTeotsij kineki”. Uajka, kema titlajtolmoyauaj uan tikinpaleuiaj sekinok nojkia ma mochiuakaj Jesús itokilijkauaj, tijchiuaj kejuak ma kauani totlauil (Mat. 28:19, 20, TNM). Uan nojkia tijueyichiuaj Jehová kema kuali timonejnemiltiaj. Kema titlajtolmoyauaj, maseualmej kiitaj kenijkatsa timonejnemiltiaj, uan tlaj tikinixuetskiliaj uan tikintlajpalouaj, kichiua kuali ma techitakaj uan nojkia titlapaleuiaj ma kitlepanitakaj Jehová.

⁵ Jesús kiniljuik itokilijkauaj: “Kema inkalakisej ipan se kali, xikijtokaj: ‘Ma toTeko inmechteochiua tlen initstokej nikaj’” (Mat. 10:12). Kampa tlajtolmoyauayayaj, maseualmej momajtoyaj kiniljuiaj katli kinpaxalouayayaj ma panokaj kalijtik, maske amo kinixmatiyayaj. Uelis kampa tiitstokej amo kiampa kichiuaj. Miakej maseualmej majmauij o uelis kualanij kema se akajya katli amo kiixmatij ontlanojnotsa ininchaj. Tlaj kuali tikinnojnotsasej uan tijnextisej titlatlepanitaj, uelis kichiuas maseualmej amo ma majmauikaj. Uan uelis tlauel kuali kiyolmatisej tlaj tiixuetskasej. Nojkia kiampa pano kema titlajtolmoyauaj kampa panoj miakej. Katli nopaya tlajtolmoyauaj kiitstokej tlake pano kema kinixuetskiliaj maseualmej. Sekij monechkauiaj, kiuikaj se amatlajkuiloli, uan kemantika kuali kintlakakiliaj.

6. ¿Tlake kichijtokej se toikni iuaya isiua pampa kinekij kejuak ma kauani inintlauil?

⁶ Se toikni iuaya isiua, katli euaj Inglaterra, ayokmo uelij tlajtolmoyauaj kajkalpa pampa ya ueuejtixtokej uan mokokouaj. Inijuantij mosentlalijtokej kichiuasej kejuak ma kauani inintlauil, yeka nama tlajtolmoyauaj ininkalixpa. Nopaya, kema tetajmej kinonkuij ininkoneuaj ipan escuela, kitlaliaj amatlajkuiloli ipan se mesa. Miakej tetajmej kikuij nopa ome amochtli Los jóvenes preguntan uan se keski pilamochtsitsij pampa tlauel kinpaktia. Se precursora pejki tlajtolmoyaua ininuaya. Uan pampa inijuantij kinextiaj kuali ininyolo, se tlakatl pejki momachtia ika Biblia.

7. ¿Kenijkatsa uelis tikinpaleuisej katli san asitokej ipan toaltepe?

⁷ Ipan se keski xiuitl tlen panotok, miakej maseualmej asitokej ipan miak altepemej. ¿Kenijkatsa uelis tikinpaleuisej ma kiixmatikaj Jehová uan tlen mosentlalijtok kichiuas? Achtoui moneki tijyekosej kenijkatsa tikintlajpalosej ipan inintlajtol. Uelis techpaleuis nopa aplicación JW Language. Nojkia uelis tijyekosej sekinok tlajtoli tlen kinpaktis. Uan teipa tikiniljuisej tlen nopa jw.org uan tikinnextilisej videos uan amatlajkuiloli ipan inintlajtol (Deut. 10:19).

8, 9. 1) ¿Tlake techpaleuia kuali ma titlajtolmoyauakaj? 2) ¿Kenijkatsa tetajmej uelis kinpaleuisej ininkoneuaj?

⁸ Jehová techmakatok nopa tlanechikoli tlen itoka Kej Timonejnemiltiaj uan Titlajtolmoyauaj, kampa techmachtiaj kenijkatsa kuali titlajtolmoyauasej. Tlen nopaya technextiliaj techpaleuia amo ma timajmauikaj  kema sampa tiasej tikinpaxalotij maseualmej uan kema tikinmachtisej.

⁹ Miakej maseualmej katli yauij ipan tlanechikoli tlauel kinpaktia kema kiitaj kenijkatsa konemej nojkia tlanankiliaj. Yeka, tetajmej moneki nochipa kinmachtijtosej ininkoneuaj ma tlanankilikaj san ika se keski tlajtoli uan kiampa nojkia ma kichiuakaj kejuak ma kauani inintlauil. Kema se pilokichpiltsi tlanankilia ika nochi iyolo, kemantika kichiua maseualmej ma kimatikaj nelia kipantijtokej tlen melauak (1 Cor. 14:25).

10. ¿Kenijkatsa kema tetajmej momachtiaj ininuaya ininchampoyouaj kinpaleuia ma itstokaj sansejko?

¹⁰ Nojkia tijchiuaj kejuak ma kauani totlauil kema tijchiuaj kampeka tiitstosej sansejko ininuaya tochampoyouaj uan ininuaya toikniuaj. Yeka, tetajmej tlauel moneki nochipa momachtisej ininuaya ininchampoyouaj. Sekij kitlachiliaj tlen kisa sejse metstli ipan JW Broadcasting. Kema tlamis inkiitasej, kualtiaskia inkiijtosej kenijkatsa inkichiuasej tlen inmomachtijkej. Nojkia tetajmej moneki kiilnamikisej ininpilkoneuaj uan inintelpokauaj amo sanse tlamantli kinpaleuis. Yeka, tetajmej moneki kiijtosej tlen kinpaleuis sejse tlen ininchampoyouaj (Sal. 148:12, 13).

11-13. ¿Kenijkatsa uelis tijchiuasej toikniuaj ma itstokaj sansejko uan kejuak ma kauani inintlauil?

¹¹ Nochi tojuantij, maske sekij nojua titelpokamej, uelis tijchiuasej toikniuaj ipan tlanechikoli ma itstokaj sansejko uan kejuak ma kauani inintlauil. Telpokamej uelis mosentlalisej kinpaleuisej toikniuaj katli ya ueuejtixtokej. Nojkia uelis kiniljuisej ma kiniljuikaj tlen kinpanotok ipan ininnemilis. Kiampa nochi moyolchikauasej uan kichiuasej tlen melauak ma kauani kejuak se tlauili. Uan nochi uelis timosentlalisej kuali tikinselisej katli asij ipan kali kampa timosentiliaj. Uelis tikinixuetskilisej, tikinpaleuisej ma kipantikaj kanke moseuisej uan tijchiuasej sekinok toikniuaj nojkia ma kinixmatikaj. Kiampa kuali kiyolmatisej.

¹² Ueuejtlakamej uan tlapaleuianij katli kiyakanaj nopa tlanechikoli kema tiauij titlajtolmoyauaj nojkia uelis kichiuasej toikniuaj katli ya uejueyij nojua ma kinextikaj kejuak kauani inintlauil. Yeka, moneki kiitasej kanke uelis tlajtolmoyauasej.  Kemantika uelis kiiljuisej se telpokatl o ichpokatl ma yaui ininuaya uan ma kinpaleui. Nojkia moneki kinextisej kinikneliaj katli amo uelij nochipa tlajtolmoyauaj pampa mokokouaj o pampa kipiaj sekinok kuesoli. Tlaj kichiuasej nochi ni, kinpaleuisej telpokamej o ueuentsitsij, katli namanok pejtokej tlajtolmoyauaj o katli ya uejkajtokej miak xiuitl, ma tlajtolmoyauakaj ika pakilistli (Lev. 19:32).

¹³ Katli kiijkuilok se salmo, kiijtok: “Xikitakaj, nelia kuali uan yejyektsi nesi para iknimej ma mokauakaj sansejko ika san se ininyolo” (xijpoua Salmo 133:1, 2). Uejkajkia, kema se akajya kitekiliyayaj aceite ipan itsonteko, tlauel kuali kimatiyaya uan kiseseltiyaya. Katli kiijkuilok se salmo kiijtok israeleuanij kiampa kiyolmatiyayaj kema sansejko kiueyichiuayayaj Jehová. Uan tojuantij, ¿ueliskia timosentlalisej tikinpaleuisej nochi toikniuaj ipan tlanechikoli uan nojua tijchiuasej ma itstokaj sansejko? Maske tlauel kuali tlaj kiampa tijchiuaj, ¿nojua uelis tijchiuasej sekinok tlamantli uan kiampa nojua tlauel titlapaleuisej? (2 Cor. 6:11-13).

14. ¿Kenijkatsa uelis tijchiuasej kejuak ma kauani totlauil kampa tiitstokej?

¹⁴ ¿Uelis nojua tijchiuasej kejuak ma kauani tlen Biblia tlamachtia kampa tiitstokej? Tlaj tikintlepanitaj uan kuali tikinnojnotsaj tokalnechkauaj, uelis nojkia kinekisej momachtisej Biblia. Yeka, ma timotlajtlanikaj: “¿Kenijkatsa nechitaj nokalnechkauaj? ¿Kenijkatsa nesi nochaj uan nochi tlen nijpia? ¿Kichiua kuali ma nesi kampa niitstok? ¿Nikinpaleuia sekinok?”. Kema tikamanaltisej ininuaya toikniuaj, ma tikintlajtlanikaj kenijkatsa kej monejnemiltiaj kinpaleuijtok ininkalnechkauaj, ininuikaljuaj uan katli ininuaya momachtiaj o tekitij. Uelis tlen techiljuisej tlauel techyolchikauas (Efes. 5:9).

15. ¿Kenke tlauel moneki kuali titlachixtosej?

¹⁵ Tlaj tijnekij nojua kejuak ma kauanto totlauil, moneki tikilnamiktosej tiitstokej ipan itlamia tonali. Jesús miakpa kiniljuik itokilijkauaj: “Xitlachixtokaj” (Mat. 24:42; 25:13; 26:41). Tlaj timoiljuiaj amo nima panos nopa ueyi tlaijiyouilistli uan kema panos tojuantij ayokmo tiitstosej, uelis timoiljuisej amo tlauel moneki titlajtolmoyauasej (Mat. 24:21). Kejuak ayokmo kauanis totlauil uan teipa uelis seuis.

16, 17. ¿Tlake uelis tijchiuasej tlaj tijnekij kuali titlachixtosej?

¹⁶ Kej panotias tonali, nojua tlauel amo kuali tiitstosej, yeka tlauel moneki nojua kuali titlachixtosej. Uan temachtli tijmatij Jehová kimatis kema kitlamiltis tlen amo kuali (Mat. 24:42-44). Moneki tijpiasej toyolo uan nochipa kuali titlachixtosej. Mojmostla ma tijpouakaj Biblia uan nochipa ma timomaijtokaj (1 Ped. 4:7). Ma tikitakaj kenijkatsa sekinok toikniuaj nochipa kuali tlachixtokej uan kichiuaj kejuak nojua ma kauani inintlauil. Ipan nopa tlamachtili “Siete décadas aferrado a la falda de un judío”, tlen kiski ipan Tlen Tematiltia, abril 15, 2012, iamayo 18-21, uelis tikitasej tlen kichijki se toikni.

¹⁷ Nochipa tlauel ma tijtekipanojtokaj Jehová, ma tijchiuakaj tlamantli tlen kinpaleuis sekinok uan ma tiitstokaj ininuaya toikniuaj. Kiampa nojua tlauel tiyolpakisej uan tikitasej kenijkatsa nima panotia tonali (Efes. 5:16). Maske uejkajkia toikniuaj tlauel tlajtolmoyajkej, ipan ni tonali tojuantij nojua tlauel titlajtolmoyauaj. Yeka kejuak tlauel chikauak kauani totlauil.

18, 19. ¿Kenijkatsa ueuejtlakamej uelis techpaleuisej kuali ma titlachixtokaj uan nojua ma tijchijtokaj toteki? Xikijto se neskayotl.

¹⁸ Maske timokuapolouaj, Jehová nojua techkaua ma tijtekipanojtokaj. Uan pampa  kineki techpaleuis kuali ma titlachixtokaj uan ma tijtekipanojtokaj, kintlalijtok ueuejtlakamej kejuak eliskiaj “regalos” (xijpoua Efesios 4:8, 11, 12). Yeka, kema se toikni ueuejtlakatl techpaxalos, ma tijchiuakaj kampeka kuali tijtlakakilisej kema techtlajtolmakas uan kiampa techpaleuis ipan tonemilis.

¹⁹ Se toikni iuaya isiua, katli euaj Inglaterra, kiniljuijkej ueuejtlakamej ma kinpaleuikaj pampa kipixtoyaj se keski kuesoli. Nopa tosiuaikni kiijtok amo kuali kiyolmatiyaya pampa kimatiyaya iueue amo sanse tlaneltokayaya kej ya. Uan iueue kiijtok amo kuali tlamachtiyaya uan kemantika amo momachtiyayaj sansejko. Ueuejtlakamej kinpouilijkej tlen Jesús kichijki, katli kinmokuitlauiyaya itokilijkauaj uan nojkia nochipa kiitayaya kenijkatsa kinpaleuis sejse tlen inijuantij. Nopa toikni kiiljuijkej ma kichiua kej Jesús, uan isiua kiiljuijkej nojua ma kipia iyolo. Nojkia kiniljuijkej se keski tlamantli tlen omej ueliskia kichiuasej kema momachtiskiaj ininuaya omej ininkoneuaj (Efes. 5:21-29). Teipa, ueuejtlakamej kiiljuijkej nopa toikni tlauel kuali tlen kichiuayaya. Kiyolchikajkej ma motemachi toTeotsij itonal kipaleuiskia kuali ma kinyakana ichampoyouaj. Pampa ueuejtlakamej kinpaleuijkej, kinextijkej kinikneliyayaj uan kintekipachouayaya tlen kinpanoyaya, nopa toikni iuaya ichampoyouaj kichiuaj nojua kejuak ma kauani inintlauil.

20. ¿Tlake panos tlaj tijchiuasej nojua kejuak ma kauani totlauil?

²⁰ Salmo 128:1 kiijtoua: “Nelia paki nopa tlakatl tlen kimakasi uan kitlepanita toTeko. Kena, paki tlen nemi xitlauak ipan iojui”. Ipan ni tlamachtili tikitstokej kenijkatsa uelis tijchiuasej nojua ma kauanto totlauil: kema tikiniljuiaj maseualmej nojkia ma kitekipanokaj Jehová, kema tijchiuaj kampeka nochipa sansejko tiitstosej uan kema kuali titlachixtokej. Tlaj kiampa tijchiuasej, tlauel tiyolpakisej, sekinok kinpaktis tlen tijchiuaj uan miakej kinekisej kiueyichiuasej toTeotsij Jehová (Mat. 5:16).