JEHOVÁ kiyakana uan kimokuitlauia itlanechikol pampa kineki nojua kuali ma titlaneltokakaj ipan “itlamia tonali” (2 Tim. 3:1). San tojuantij moneki tijtlapejpenisej tlaj tijneltokasej Jehová. Uejkajkia kema israeleuanij itstoyaj ipan uaktok tlali, monekiyaya kichiuasej se keski tlamantli kema kikakiyayaj nopa tlapitsali. Ipan ni tonali nojkia kiampa moneki tijchiuasej.

Jehová kiiljuik Moisés ma kichiua “ome tlapitsali ika plata tlen tlatepacholi ika martillo” uan kiampa israeleuanij kiniljuiskiaj ma “mosentilikaj o para ma kimatikaj kema moneki ma motejpanakaj para kisasej” (Núm. 10:2). Nopa sacerdotes monekiyaya kipajpatlatiasej kej kipitsayayaj nopa tlapitsali, kiampa israeleuanij kimatiskiaj tlake kichiuaskiaj (Núm. 10:3-8). Ipan ni tonali nojkia kiampa pano, toTeotsij kiniljuia itokilijkauaj tlake moneki kichiuasej. Ma tikitakaj eyi tlamantli tlen eliskia kejuak nopa “tlapitsali”: kema techtlaneuij ipan uejueyi tlanechikolistli, kema kinmachtiaj toikniuaj katli tepaxalouaj chijchikuasej metstli uan kema mopatla se tlamantli ipan toTeotsij itlanechikol.

Kema Jehová kinekiyaya israeleuanij ma mosentilikaj nechka tabernáculo, sacerdotes monekiyaya kipitsasej “ome tlapitsali ika sampa” (Núm. 10:3). Nochi israeleuanij katli itstoyaj ipan nopa naui pamitl tlen tabernáculo, kikakiyayaj kema tlapitsayayaj. Uelis katli itstoyaj nechka, nima asiyayaj kampa kinsentiliyayaj uan katli uejka itstoyaj amo nima asiyayaj, yeka monekiyaya kichiuasej kampeka nima asitij. Maske kiampa kinpanoyaya, Jehová kinekiyaya nochi ma mosentilikaj uan kiampa kikakiskiaj tlen kinnauatiskia.

Ipan ni tonali nojkia techtlaneuij ma tiakaj ipan uejueyi tlanechikolistli. Tojuantij amo tiauij ipan se tabernáculo, tiauij ipan uejueyi tlanechikolistli tlen eyi tonali uan ipan sekinok tlanechikoli kampa tijseliaj tlamachtili uan techiljuiaj kenijkatsa timonejnemiltisej. Ipan nochi Tlaltipaktli, toTeotsij itokilijkauaj katli yauij ipan ni uejueyi tlanechikolistli tlauel kinpaleuia, pampa momachtiaj sanse tlamachtili. Maske sekij yauij tlauel uejka uan moneki kichiuasej kampeka, yauij pampa tlauel kinpaleuia nopa tlamachtili.

Toikniuaj katli itstokej uejka nojkia uelis kinpaleuis nopa uejueyi tlanechikolistli. ¿Kenijkatsa kichiuaj? Pampa kistok yajyankuik tlamantli, kinpaleuia nojkia ma kiitakaj tlen tojuantij timomachtiaj, kiampa kiyolmatij kejuak itstokej touaya. Kema se toikni katli uala tlen Ueyi Kali Betel yajki kali Betel tlen Benín, mopanoltik nopa tlamachtili ipan se pilaltepetsi tlen itoka Arlit (Níger), tlen eltok ipan uaktok tlali Sahara. Ipan nopa tonali monechikojkej 21 toikniuaj uan sekinok maseualmej. Maske amo itstoyaj ininuaya  nopa 44,131 toikniuaj katli mosentilijkej ipan nopa tonali, inijuantij kiyolmatkej sansejko itstoyaj ipan nopa ueyi tlanechikoli. Se toikni kiijkuilok: “Tiinmechtlaskamatiliaj pampa tikitakej ni tlamachtili. Tikitaj kenijkatsa tlauel intechikneliaj”.

Kema sacerdotes sempatsi tlapitsayayaj, san mosentiliyayaj ipan nopa yoyonkali kampa tlaueyichiuayayaj, katli “tlayakanaj ipan sejse ueyi familia” tlen Israel (Núm. 10:4). Nopaya Moisés kiniljuiyaya tlake monekiyaya kichiuasej uan kinmachtiyaya, kiampa kuali tlayakanaskiaj. Ximoiljui, tlaj ta tieliskia se tlen nopa tlayakanketl, ¿tijchiuaskia kampeka nopaya tiitstos uan kuali titlakakis?

Ipan ni tonali ueuejtlakamej amo elij inintlayakankaj toikniuaj yon amo elij “inintekouaj” o ininaxka (1 Ped. 5:1-3). Inijuantij kichiuaj kampeka kuali kinmokuitlauisej toikniuaj. Yeka, kema kintlaneuij kampa kinmachtiaj, kej Kampa kinmachtiaj ueuejtlakamej uan tlapaleuianij, kiseliaj ika miak pakilistli. Nopa kinpaleuia nojua kuali ma kichiuakaj ininteki ipan tlanechikoli. Nojkia, kinpaleuia sekinok toikniuaj nojua ma monechkauikaj iuaya Jehová. Yeka, maske amo tiajtokej kampa kinmachtiaj ueuejtlakamej, nojkia uelis techpaleuis tlen inijuantij momachtijtokej.

Kema sacerdotes amo uejkauayayaj tlapitsaj, kinilnamikiliyaya monekiyaya kisteuasej (Núm. 10:5, 6). Maske tlauel kuali kej kisteuayayaj pampa kichiuayayaj kej Jehová kiniljuiyaya, monekiyaya kichiuasej kampeka. Uelis sekij kimatiyayaj ouij sampa kisteuasej. ¿Kenke?

Uelis pampa moiljuiyayaj tlauel nimantsi sampa tlapitsayayaj maske onasitoyaj uan nojkia pampa amo kinmatiltiyayaj kema sampa tlapitsaskiaj. Biblia kiijtoua kemantika nopa “mixtli moketsayaya tlen se tiotlak hasta ijnalok” uan kemantika israeleuanij mokauayayaj “se ome tonali, o se metstli, o se xiuitl” uan kisteuayayaj kema nopa mixtli motlananayaya (Núm. 9:21, 22). Miakpa monejki kisteuasej kampa itstoyaj. Números capítulo 33, kiijtoua israeleuanij kistejkej uan mochantijkej ipan se 40 altepemej.

Sekij israeleuanij mochantiyayaj kampa tlaekauiaj, nopa kinpaleuiyaya pampa ipan nopa uaktok tlali eliyaya “tlauel ueyi uan temajmati” (Deut. 1:19). Yeka, kemantika moiljuiyayaj tlaj kisteuaskiaj, ayokmo kuali itstoskiaj kampa sampa mochantiskiaj.

Maske nochi israeleuanij kikakiyayaj kema sacerdotes tlapitsayayaj, amo sansejko kisteuayayaj. Yeka, sekij kimatiyayaj ouij mochiasej uan kiampa kisteuasej. Kema amo uejkauayayaj tlapitsaj, kinextiyaya achtoui monekiyaya kisteuasej ichampoyouaj Judá, Isacar uan Zabulón (Núm. 2:3-7; 10:5, 6). Kema ya kistejtoyaj nopa achtoui pamitl, nopa sacerdotes sampa tlapitsayayaj, kiampa kisteuayayaj nopa sekinok pamitl tlen itstoyaj ika sur. Uan kema nochi kistejtoyaj, sacerdotes ayokmo tlapitsayayaj.

Kema Jehová itlanechikol kipatla se keski tlamantli, uelis tijmatij ouij tijchiuasej. Uan techtekipachoua pampa amo timoiljuijtoyaj tlaj kipatlaskiaj. Nojkia, uelis techpaktiyaya kej achtouia mochiuayaya se tlamantli uan amo tijnekiyayaj ma kipatlakaj, uan amo nima timomatij tijchiuaj tlen mopatlatok, yeka moneki tijpiasej toyolo. Maske kiampa techpano, tijnekij tijchiuasej. Jehová tlauel techteochiuas tlaj tijchiuaj kampeka tijchiuasej tlen mopatlatok.

Kema Moisés itstoya, Jehová kinyakanki israeleuanij: tlakamej, siuamej uan konemej. Inijuantij momanauijkej pampa Jehová kinmokuitlauik uan kinyakanki. Pampa tiitstokej ipan itlamia tonali, Jehová nojkia techyakana uan techpaleuia nojua kuali ma titlaneltokakaj. Yeka, sanse kej israeleuanij kichiuayayaj tlen sacerdotes kiniljuiyayaj kema tlapitsayayaj, tojuantij nojkia moneki tijchiuasej kampeka nochipa tijneltokasej tlen toTeotsij kiijtoua.