1. ¿Tlake moneki kichiuas achtoui se akajya katli kineki mochantis?

XIMOILJUI se tlakatl kineki mochantis, uan kuali kimati kenijkatsa kineki. Uajka, ¿uelis nimantsi yas kikouati nochi tlen kitekiuis uan peuas kalchiuas? Amo, pampa achtoui moneki kimatis se tlamantli tlen tlauel ipati: keski tomij kitekiuis. ¿Kenke tlauel ipati ni? Pampa moneki kiitas tlaj nelia kiaxilis itomij uan kiampa kisenkauas ichaj.

2. Kej kiijtoua Lucas 14:27-30, ¿tlake moneki kuali timonejneuilis tlaj tijneki timoatsonpoliuiltis?

² ¿Tlauel tikiknelia Jehová uan nelia tijtlaskamatilia uan yeka tijneki timoatsonpoliuiltis? Tlaj kena, uajka uelis nojkia mitspano kej nopa tlakatl katli kineki mochantis. ¿Kenke tikijtouaj ni? Kuali ximoiljui ipan tlen Jesús kiijtok ipan Lucas 14:27-30 (xijpoua). Ya kiijtok tlake kiijtosneki tijtokilisej: moneki tikijiyouisej kuesoli uan tijkauasej se keski tlamantli tlen techpaktia (Luc. 9:23-26; 12:51-53). Uajka, tlaj tijneki timoatsonpoliuiltis, achtoui moneki kuali timonejneuilis tlake kiijtosneki tielis Cristo itokilijka. Nopa mitspaleuis nochipa tijtekipanojtos Jehová kema ya timoatsonpoliuiltijtos.

3. ¿Tlake tikitasej ipan ni tlamachtili?

³ Uajka, ¿kualtiaskia timoatsonpoliuiltis maske tikijiyouis kuesoli uan tijkauas miak tlamantli? ¡Tlauel kuali tlaj tijchiuas ni! Tlaj timoatsonpoliuiltis, nochipa tijselis miak tlateochiualistli. Ipan ni tlamachtili, tijnankilisej se keski tlajtlanili tlen tlauel ipati uan kiampa tijkuamachilis tlake kiijtosneki atsonpoliuilistli. Nopa mitspaleuis tijmatis tlaj kena uelis timoatsonpoliuiltis.

4. 1) ¿Tlake kiijtosneki timotemaktilis? 2) Kej kiijtoua Mateo 16:24, ¿tlake kiijtosneki ‘tijtlauelkauasej tlen tojuantij tijnekij’?

⁴ ¿Tlake kiijtosneki timotemaktilis? Ni moneki tijchiuas kema ayamo timoatsonpoliuiltia. Timotemaktilis ika Jehová kiijtosneki  timomaijtos ika nochi moyolo uan tikiljuis nochipa san ya tijtekipanos. Kema se akajya kimaktilia Jehová inemilis, uajka ayokmo kichiuas tlen ya kineki (xijpoua Mateo 16:24). Nopa tonali kema timotemaktilis, tijpias se ueyi tlateochiualistli: nama tielis tiiaxka Jehová (Rom. 14:8). Kema timotemaktilia, tikiljuia Jehová ipan monemilis san ya tlauel tijpatiitas uan ayokmo tijchiuas tlen ta mitspaktia. Kema tijchiua nopa, tijtenkauilia toTeotsij se tlamantli tlen tlauel ipati. Maske ya amo techchiualtia ma tijtenkauilikaj tonemilis, kema kiampa tijchiuaj, ya kineki senkistok ma tijchiuakaj tlen tikiljuijkej (Sal. 116:12, 14).

5. ¿Kenke amo eli sanse timotemaktilis uan timoatsonpoliuiltis?

⁵ ¿Kenke timotemaktilis amo eli sanse ika timoatsonpoliuiltis? Kema timotemaktilis amo aka mitsitas, san ta uan Jehová inkimatisej. Uan kema timoatsonpoliuiltis, miakej mitsitasej, uan ni mochiua ipan uejueyi tlanechikolistli. Kema kiampa tijchiua, tikinnextilia sekinok nelia timotemaktilijtok ika Jehová. * Kejuak tikiniljuia tlauel tikiknelia Jehová ika nochi moyolo, monemilis, motlalnamikilis uan mochikaualis, uan nojkia timosentlalijtok tijtekipanos nochipa (Mar. 12:30).

6, 7. Kej kiijtoua 1 Pedro 3:18-22, ¿tlake ome tlamantli kinextia kinamiki timoatsonpoliuiltisej?

⁶ ¿Nelia moneki timoatsonpoliuiltis? Ximoiljui ipan 1 Pedro 3:18-22 * (xijpoua). Sanse kej Noé kinextik nelia kuali tlaneltokayaya kema kichijchijki nopa ueyi akali, ta nojkia tijnextis timotemaktilijtok ika Jehová kema timoatsonpoliuiltis. ¿Nelia moneki kiampa tijchiuas? Kena. Apóstol Pedro kiijtok kenke. Se: “Nojkia inmechmakixtia”. Nopa atsonpoliuilistli uelis techmakixtis tlaj tijnextiaj nelia titlaneltokaj ipan Jesús ika tlen tijchiuaj uan tlaj tijneltokaj nelia techmakixtik kema mijki, moyolkuik uan yajki iluikak, uan nama itstok “inejmak toTeko Dios”.

⁷ Ome, kema timoatsonpoliuiltiaj tijnextiaj tijpiaj ‘kuali totlalnamikilis’. Kema timotemaktiliaj uan timoatsonpoliuiltiaj, peua kuali timouikaj iuaya toTeotsij. Uan pampa nelia timoyolkueptokej tlen totlajtlakoljuaj uan titlaneltokaj ipan Jesús imikilis, Jehová techtlapojpoljuia. Kiampa tijpiaj kuali totlalnamikilis iixpa.

8. ¿Tlake moneki mitsyololinis timoatsonpoliuiltis?

⁸ ¿Tlake moneki mitsyololinis timoatsonpoliuiltis? Pampa kuali timomachtia Biblia, tijyekojtok miak tlamantli tlen Jehová, kenijkatsa eli uan tlake kichiua. Nochi tlen timomachtijtok asitok ipan moyolo uan mitspaleuijtok tlauel tikiknelis. Kinamiki tijnekis timoatsonpoliuiltis pampa nelnelia tlauel tikiknelia Jehová.

9. Kej kiijtoua Mateo 28:19, 20, ¿tlake kiijtosneki kema Jesús kiijtok timoatsonpoliuiltisej “ika noTata itoka uan ika notoka uan ika noTata itonal”?

⁹ Nojkia tlen tijyekojtok ipan Biblia uan tlen tijneltoka uelis mitsyololinis timoatsonpoliuiltis. Ximoiljui kema Jesús tlanauatik ma kinpaleuikaj sekinok ma elikaj itokilijkauaj (xijpoua Mateo 28:19, 20 *). Jesús kiijtok kenijkatsa moneki moatsonpoliuiltisej: “Ika noTata itoka uan ika notoka uan ika noTata itonal”. Ni kinextia moneki kineltokasej ika nochi ininyolo tlen Biblia tlamachtia tlen  Jehová, tlen iKone Jesús uan tlen toTeotsij itonal. Ni tlamachtili kipia miak chikaualistli uan uelis kichiuas ma asi ipan iyolijtik se maseuali (Heb. 4:12). Ma tikitakaj se keski tlamantli.

10, 11. ¿Tlake tlamachtili tlen melauak tijyekojtok uan tijneltokatok tlen toTata?

¹⁰ ¿Tikilnamiki kema tijyekok se keski tlamantli tlen toTata? Tijmatki itoka eli Jehová, san ya tlauel Ueyi ipan “nochi Tlaltipaktli” uan san ya eli toTeotsij katli melauak (Sal. 83:18; Is. 37:16). Nojkia eli toTlachijchijka, uan san ya ‘ueli temakixtiaʼ (Sal. 3:8; 36:9). Nojkia, techmakixtik tlen tlajtlakoli uan mikilistli, uan kichijki ma timotemachikaj uelis tiitstosej nochipa (Juan 17:3). Kema timotemaktilis uan timoatsonpoliuiltis, tijnextis tieli se tlen Jehová itlajtoltemakauaj (Is. 43:10-12). Kiampa, nojkia tielis se tlen miakej Jehová itekipanojkauaj katli kiueyichiuaj itoka uan kinmatiltiaj sekinok (Sal. 86:12).

¹¹ Tijpiaj se ueyi tlateochiualistli pampa tijkuamachiliaj tlen Biblia tlamachtia tlen toTata. Kema tijneltokas nopa tlamachtili, mitsyololinis tijmaktilis Jehová monemilis uan timoatsonpoliuiltis.

12, 13. ¿Tlake tlamachtili tlen melauak tijyekojtok uan tijneltokatok tlen Jesús?

¹² ¿Tlake tijyolmatki kema tijyekok ni tlamantli tlen toTeotsij iKone? Maske amo eli sanse kej iTata, Jesús nojkia eli tlauel ipati. Yaya toTlamakixtijka pampa temaktilik inemilis kema techmakixtik. Kema tijnextiaj ika tlen tijchiuaj nelia titlaneltokaj ipan imikilis, toTeotsij techtlapojpoljuia totlajtlakoljuaj, kuali timouampojchiuaj iuaya uan teipa uelis tijpiasej nemilistli tlen axkema tlamis (Juan 3:16). Jesús nojkia eli Sumo Sacerdote, uan kineki techpaleuis ika nopa tlaxtlauili tlen temakak uan kiampa kuali ma timouikakaj iuaya Jehová (Heb. 4:15; 7:24, 25). Uan pampa eli Tlanauatijketl tlen toTeotsij iTlanauatijkayo, Jehová kinauatis ma kiuejkapantlalili itoka, ma kitlamilti tlen amo kuali uan ma kinteochiua maseualmej katli itstosej ipan Xochimili (Mat. 6:9, 10; Apoc. 11:15). Nojkia, Jesús technextilik kenijkatsa uelis timonejnemiltisej (1 Ped. 2:21). Ipan nochi inemilis, mosentlalik kichiuas san tlen toTeotsij kineki uan kiampa technextilik tlake moneki tijchiuasej (Juan 4:34).

¹³ Kema tijneltokas tlen Biblia tlamachtia tlen Jesús, mitspaleuis nojua tlauel tikiknelis. Nopa tlaiknelili mitsyololinis tijchiuas tlen toTeotsij kineki, sanse kej Jesús kichijki. Tlaj kiampa tijchiuas, tijnekis tijmaktilis monemilis Jehová uan timoatsonpoliuiltis.

14, 15. ¿Tlake tlamachtili tijyekojtok uan tijneltokatok tlen toTeotsij itonal?

¹⁴ ¿Tlake timoiljuik kema tijyekok ni tlamachtili tlen toTeotsij itonal? Tijmatki amo eli se maseuali, eli toTeotsij ichikaualis. Jehová kitekiuik ichikaualis kema kinyakanki tlakamej katli kiijkuilojkej iTlajtol, uan nojkia kitekiuia kema techpaleuia ma tijkuamachilikaj tlen nopaya tlamachtia uan ma tijchiuakaj ipan tonemilis (Juan 14:26; 2 Ped. 1:21). Ika itonal, Jehová techmaka “nopa ueyi chikaualistli tlen tijpiaj” (2 Cor. 4:7). ToTeotsij itonal techmaka chikaualistli uan yeka tiuelij titlajtolmoyauaj, amo tijchiuaj tlen techyoltilana, tiuelij tikijiyouiaj nochi tlaouijkayotl uan amo tijkauaj tekipacholi ma kitlani totlaneltokilis. Nojkia, itonal techpaleuia ma tijnextikaj nopa yejyektsitsij kuajkuali tlamantli ipan tonemilis (Gál. 5:22). ToTeotsij amo itskuimitl kema kinmaka itonal katli kitlajtlaniaj pampa motemachiaj ipan ya (Luc. 11:13).

¹⁵ Tlauel timoyolchikauaj pampa tijmatij toTeotsij itonal nochipa techpaleuis ma tijtekipanojtokaj Jehová. Kema tijneltokas nelia  melauak tlen tijyekojtok tlen toTeotsij itonal, tijnekis timotemaktilis uan timoatsonpoliuiltis.

16. ¿Tlake tikixtontokej ipan ni tlamachtili?

¹⁶ Tlauel ipati tlaj tijtlapejpenis tijmaktilis toTeotsij monemilis uan timoatsonpoliuiltis. Kej tikitstokej, moneki tikijiyouis uan tijnekis tijkauas se keski tlamantli. Tlaj tijchiuas nopa, tikitas tlen tijkajki o tlaouijkayotl tlen tikixnamiki amo tlauel ipati pampa tijselis sekinok miak kuajkuali tlamantli. Tlaj timoatsonpoliuiltis, uelis timomakixtis uan tijpias kuali motlalnamikilis iixpa toTeotsij. Uan kinamiki timoatsonpoliuiltis pampa nelnelia tlauel tikiknelia Jehová. Nojkia moneki tijneltokas ika nochi moyolo nelia melauak nochi tlamachtili tlen toTata, tlen iKone uan tlen toTeotsij itonal. Ika nochi tlen tikitstokej, ¿tikijtoskia kena tiuelis timoatsonpoliuiltis?

17. Xikijto se keski tlamantli tlen moneki kichiuas katli kineki moatsonpoliuiltis.

¹⁷ Uelis timoiljuia kena tiuelis timoatsonpoliuiltis pampa ya tijchijtok se keski tlamantli tlen mitspaleuijtok kuali timouampojchiuas iuaya Jehová. * Pampa nochipa timomachtia Biblia, tijyekojtok miak tlamantli tlen Jehová uan Jesús, uan nopa mitspaleuijtok kuali titlaneltokas (Heb. 11:6). Timotemachia nelia moaxitis tlen Jehová kitenkajtok ipan Biblia uan temachtli tijmati Jesús imikilis uelis mitsmakixtis tlen tlajtlakoli uan mikilistli. Nojkia timoyolkueptok tlen motlajtlakoljuaj uan timoyolkokoua pampa tijchijki nopa, yeka tikiljuijtok Jehová ma mitstlapojpoljui. Uan ‘timokueptok ika toTekoʼ pampa ayokmo tijchiua kej achtouia, nama san tijchiua tlen toTeotsij kipaktia (Hech. 3:19). Tlauel tijneki tikiniljuis sekinok nochi tlen ta tijyekojtok. Nama ya titlajtolmoyaua ininuaya toikniuaj maske ayamo timoatsonpoliuiltia (Mat. 24:14). Jehová tlauel kuali kiita tlen tijchiua uan tlauel yolpaki pampa tijchijtok nochi nopa tlamantli tlen tikijtojkej (Prov. 27:11).

18. ¿Tlake nojkia moneki tijchiuas tlaj tijneki timoatsonpoliuiltis?

¹⁸ Tlaj tijneki timoatsonpoliuiltis, achtoui moneki tijchiuas se keski tlamantli. Kej tikitstokej, moneki timotemaktilis ika toTeotsij, yeka moneki moselti timomaijtos uan ika nochi moyolo tijtenkauilis toTeotsij tijchiuas san tlen ya kineki ipan nochi monemilis (1 Ped. 4:2). Teipa xikiljui katli kinyakana ueuejtlakamej tijneki timoatsonpoliuiltis. Ya kiniljuis se keskij ueuejtlakamej ma kamanaltikaj mouaya. Amo ximomajmati, inijuantij kuali mitsixmatij uan tlauel mitsikneliaj. Inijuantij kiompauisej mouaya se keski tlamachtili uan kiampa kiitasej tlaj kena kuali tijkuamachilia uan tlaj tijmati kenke tlauel ipati timotemaktilis uan timoatsonpoliuiltis.  Tlaj kiitasej kena uelis timoatsonpoliuiltis, uajka mitsiljuisej uelis kiampa tijchiuas ipan se ueyi tlanechikolistli.

19, 20. ¿Tlake moneki tijchiuas kema ya timoatsonpoliuiltijtos, uan tlake mitspaleuis?

¹⁹ Kema ya timoatsonpoliuiltis, ¿tlake moneki tijchiuas? * Xikilnamiki kema timotemaktilik, tijtenkauilik Jehová se tlamantli tlen tlauel ipati uan ya kineki xijchiua tlen tikiljuik. Yeka, kema ya timoatsonpoliuiltijtos, moneki tijchiuas tlen tijtenkauilik. ¿Tlake uelis mitspaleuis?

²⁰ Amo xijkaua tlanechikoli. Kema timoatsonpoliuiltis, tikinpias miakej moikniuaj (1 Ped. 2:17). Katli itstokej ipan tlanechikoli elisej kejuak mochampoyouaj. Tlaj nochipa tias tlanechikoli, mitspaleuis kuali timouikas ininuaya. Nojkia, mojmostla xijpoua Biblia uan ximoyoliljui ipan tlen tijpoua (Sal. 1:1, 2). Nopa kiijtosneki kema tijpojtias, moneki timoketstias uan timoyoliljuijtias ipan tlen tijpoua, kiampa asis ipan moyolo. Uan kej Jesús kiijtok, nojkia moneki nochipa timomaijtos (Mat. 26:41). Tlaj timomaijtos ika nochi moyolo, mitspaleuis nojua ximonechkaui ika Jehová. Uan nojkia ximosentlali tikachtouitlalis toTeotsij iTlanauatijkayo (Mat. 6:33). Ni uelis tijchiuas tlaj tikachtouitlalis tlajtolmoyaualistli ipan monemilis. Tlaj nochipa titlajtolmoyauas, motlaneltokilis kuali eltos uan uelis tikinpaleuis sekinok nojkia ma kipiakaj se nemilistli tlen axkema tlamis (1 Tim. 4:16).

21. ¿Tlake tlateochiualistli tijselis pampa timoatsonpoliuiltis?

²¹ Ipan nochi monemilis, san setsi tlamantli tlauel ipati tlen tijtlapejpenis: timotemaktilis uan timoatsonpoliuiltis. Maske tijkauas se keski tlamantli, amo san tlapik tlaj timoatsonpoliuiltis. Nochi tlaouijkayotl tlen tikixnamikis ipan ni tonali amo uejkauas (2 Cor. 4:17). Uan pampa timoatsonpoliuiltik, tlauel tiyolpakis ipan ni tonali uan nojkia teipa, kema tijpias “nopa yolistli tlen nelnelia kuali” (1 Tim. 6:19). Uajka, kuali ximoiljui tlake tijchiuas, ximomaijto uan xijnankili ni tlajtlanili: “¿Uelis nimoatsonpoliuiltis?”.