1. ¿Tlake kiijtok Jesús tlen nopa tlamantli tlen tlauel ipati katli tijnechikouaj iluikak?

AMO nochi tlen tijpiaj tiuelij tikitaj. Tlamantli tlen nelia tlauel ipati amo nesi uan yeka amo tikitaj. Ipan Sermón del Monte, Jesús kiijtok nopa tlamantli katli tlauel pajpatiyo eltok iluikak, uan yon se tlamantli uelis kiaxilis ipati. Teipa kiijtok: “Kampa tijpixtok tlen tlauel ipati, nojkia nopaya eltos moyolo” (Mat. 6:19-21, TNM). Toyolo kichiuas ma tijtemokaj san tlamantli tlen tlauel tijpatiitaj. Tijnechikouaj “tlen nelia ipati ne iluikak” kema tijchiuaj kampeka kuali tiitstosej iixpa toTeotsij uan kema ya kuali techita. Kej Jesús kiijtok, amo aka uelis kinempolos o kiichtekis nopa tlamantli tlen tlauel ipati.

2. 1) ¿Tlake techiljuia Pablo ipan 2 Corintios 4:17, 18? 2) ¿Tlake tikitasej ipan ni tlamachtili?

² Apóstol Pablo techiljuia ma timosentlalikaj ipan “tlamantli tlen axaka ueli kiita” (xijpoua 2 Corintios 4:17, 18). Se keski tlamantli tlen tlauel ipati katli amo tiuelij tikitaj eli nochi nopa tlateochiualistli tlen tijselisej ipan yankuik Tlaltipaktli. Ipan ni tlamachtili tikitasej naui tlamantli tlen tlauel ipati katli nama tijpiaj: 1) timouampojchijtokej iuaya Jehová, 2) tiuelij timomaijtouaj, 3) toTeotsij itonal uan 4) tlapaleuili tlen techmakaj Jehová, Jesús uan iluikaeuanij kema titlajtolmoyauaj. Uan nojkia tikitasej kenijkatsa uelis tijtlaskamatisej nochi nopa tlamantli tlen amo tikitaj.

3. ¿Tlake nelia tlauel ipati maske amo tikitaj, uan kenke tiuelij tijpiaj nopa tlamantli?

³ San setsi tlamantli nelia tlauel ipati: timouampojchijtosej  iuaya Jehová (Sal. 25:14). ¿Kenijkatsa toTeotsij katli senkistok tlatsejtseloltik ueli mouampojchiua ininuaya maseualmej katli tlauel tlajtlakolejkej? Pampa ika nopa tlaxtlauili tlen Jesús temakak, techkixtilia “nochi totlajtlakoljuaj nochi titlakamej ipan ni Tlaltipaktli” (Juan 1:29). Maske ayamo ualayaya ipan Tlaltipaktli, Jehová kimajtoya iKone amo kema kitlauelkauaskia uan kinmakixtiskia maseualmej. Yeka, uelki mouampojchijki ininuaya maseualmej katli itstoyaj kema Cristo ayamo ualayaya (Rom. 3:25).

4. Xikijto ajkia inijuantij elkej Jehová iuampoyouaj kema Jesús ayamo ualayaya.

⁴ Ma tikinilnamikikaj se keskij katli mouampojchijkej iuaya toTeotsij kema Jesús ayamo ualayaya. Abraham nelia tlauel kuali tlaneltokak. Kema panotoya kipano mil xiuitl, Jehová nojua kiilnamiki uan kiijtok ni: “Abraham tlen noneluampo” (Is. 41:8). Yon mikilistli uelis kiiyokatlalis Jehová tlen iuampoyouaj. Abraham kejuak yoltok ipan itlalnamikilis toTeotsij (Luc. 20:37, 38). Job nojkia elki iuampo. Se tonali, kema iluikaeuanij mosentilijkej ne iluikak, Jehová kiijtok motemachiyaya ipan Job. Kiijtok: “Kichiua nochi tlen xitlauak. Yajaya nechmakasi uan nechtlepanita uan mouejkatlalia tlen nochi tlamantli tlen axkuali” (Job 1:6-8). ¿Uan kenijkatsa kiitayaya Daniel, katli kuali kitekipanok se 80 xiuitl ipan se altepetl kampa kinueyichiuayayaj sekinok teotsitsij? Kema Daniel ueuejtixtoya, iluikaeuanij expa kiiljuijkej: “ToTeko tlauel mitsiknelia”, ni kinextia tlauel kipatiitayayaj (Dan. 9:23; 10:11, 19). Temachtli tijmatij Jehová tlauel kinektok ma asi nopa tonali kema kinyolkuis iuampoyouaj katli tlauel kiniknelia (Job 14:15).

5. ¿Tlake ome tlamantli moneki tijchiuasej tlaj tijnekij kuali timouampojchiuasej iuaya Jehová?

⁵ Ipan ni tonali, tlauel miakej maseualmej kuali mouampojchijtokej iuaya Jehová. Miakej tlakamej, siuamej uan konemej kinextijtokej kinekij mouampojchiuasej iuaya toTeotsij uan yeka kuali monejnemiltiaj. Biblia kiijtoua “kiniknelia tlen itstokej xitlauakej iixpa”, nopa kiijtosneki kuali mouampojchijtok ininuaya (Prov. 3:32). Kipiaj ni tlamantli tlen tlauel ipati pampa tlaneltokaj ipan Jesús imikilis. Uan ika nopa tlaxtlauili, Jehová techmaka se ueyi tlateochiualistli pampa tiuelij tijmaktiliaj tonemilis uan timoatsonpoliuiltiaj. Kema tijchiuaj ni ome tlamantli tlen tlauel ipati, timosansejkotiliaj ininuaya miakej toikniuaj katli motemaktilijtokej uan moatsonpoliuiltijtokej, katli nojkia kuali mouampojchijtokej iuaya toTeotsij, katli tlauel ueyi.

6. ¿Kenijkatsa tijnextisej nelia tijtlaskamatij pampa timouampojchijtokej iuaya toTeotsij?

⁶ ¿Kenijkatsa uelis tijtlaskamatilisej toTeotsij pampa techkaua ma timouampojchiuakaj iuaya? Moneki tijchiuasej kej Abraham uan Job. Ipan kipano 100 xiuitl, inijuantij amo kema kitlauelkajkej. Tojuantij nojkia kiampa moneki tijchiuasej maske uelis tlauel miak xiuitl tijtekipanojtokej Jehová. Nojkia moneki tijchiuasej kej Daniel uan ma tijpatiitakaj timouampojchijtosej iuaya Jehová uan amo san tijpatiitasej tonemilis (Dan. 6:7, 10, 16, 22). Ika Jehová itlapaleuil, uelis tijtlanisej tlen ueli tlaouijkayotl uan kiampa nojua timouampojchijtosej iuaya (Filip. 4:13).

7. 1) Kej kiijtoua Proverbios 15:8, ¿kenijkatsa kiita Jehová totlamaijtoljuaj? 2) ¿Kenijkatsa technankilia?

⁷ Nojkia techmakatok seyok tlamantli tlen amo tikitaj: tlamaijtoli. Kema se maseuali kuali mouampojchiua iuaya se akajya, moiljuiaj tlen kiyolmatij uan tlen monejneuiliaj. Nojkia kiampa pano kema timouampojchiuaj  iuaya Jehová. Ika iTlajtol techkamanaljuia uan techiljuia tlake moiljuia uan tlake kiyolmati. Uan tojuantij tikamanaltij iuaya kema timomaijtouaj. Kema tijchiuaj nopa, uelis tikiljuisej tlen timonejneuiliaj uan nochi tlen tijpiaj toyolijtik. Jehová tlauel kipaktia techtlakakilis kema timomaijtouaj (xijpoua Proverbios 15:8). Ya se touampo katli tlauel techiknelia, yeka technankilia uan amo san techtlakakilia. Maske kemantika nima technankilia, kemantika moneki timochiasej uan nojua timomaijtojtosej. Tlaj nima o amo, uelis timotemachisej ya technankilis kema kinamikis uan kej ya kiitas kuali. Uan uelis amo technankilis kej tojuantij timoiljuiaj. Maske amo techkixtilis tokuesol, kena techmakas tlalnamikilistli uan chikaualistli, kiampa uelis tikijiyouisej (1 Cor. 10:13, TNM).

8. ¿Kenijkatsa uelis tijnextisej tijtlaskamatij Jehová pampa tiuelij timomaijtouaj?

⁸ Uelis tijnextisej tijtlaskamatij Jehová pampa tiuelij timomaijtouaj, tlaj tijchiuasej tlen kiijtoua 1 Tesalonicenses 5:17: “Ximomaijtojtinemikaj ika toTeko ajachika”. Jehová amo techchiualtia. Ya techtlepanita uan kikaua tojuantij ma tijtlapejpenikaj. Yeka, san techiljuia: “Mojmostla ximomaijtokaj ika toTeko” (Rom. 12:12). Uajka, uelis tijnextisej tijtlaskamatij toTeotsij tlaj nochipa timomaijtouaj. Nojkia, kema timomaijtosej, moneki nochipa tijtlaskamatisej uan tijueyichiuasej (Sal. 145:2, 3).

9. 1) ¿Kenijkatsa kiita toikni Chris pampa ueli momaijtoua? 2) ¿Kenijkatsa tikita pampa tiueli timomaijtoua?

⁹ Kema miak xiuitl tijtekipanojtiauij Jehová uan tikitaj kenijkatsa technankilia kema timomaijtouaj, techpaleuia nojua tlauel ma tijpatiitakaj tlamaijtoli. Ma tikitakaj tlen kiijtok toikni Chris katli tlatekipanojtok se 47 xiuitl kej precursor, ya kiijtoua: “Nechpaktia nimeuas kualka uan nimomaijtos iuaya Jehová. Kuali tijyolmatis timomaijtos kema tikitas kenijkatsa Tonati itlauil nesi ipan ajuechtli. Kema nikita nochi nopa tlamantli, kichiua ma nijneki nijtlaskamatilis Jehová pampa nechmaka miak tlamantli yejyektsitsij uan  pampa niueli nimomaijtoua. Uan ika tlayoua, kema ya nimomaijtok, tlauel kuali nijyolmati nias nikochiti pampa ya nijtlaskamatilik Jehová”.

10. ¿Kenke moneki tijpatiitasej toTeotsij itonal?

¹⁰ ToTeotsij itonal o ichikaualis eli se nemaktli tlen tlauel ipati tlen nojkia amo tiuelij tikitaj. Jesús kiijtok nochipa ma titlajtlanikaj toTeotsij itonal (Luc. 11:9, 13). Ika itonal, Jehová techmaka “nopa ueyi chikaualistli” (2 Cor. 4:7; Hech. 1:8). Uelis tikijiyouisej tlen ueli kuesoli tlaj tijpiasej toTeotsij itonal.

11. ¿Kenijkatsa techpaleuia toTeotsij itonal?

¹¹ ToTeotsij itonal techpaleuia kuali ma tijchiuakaj tekitl tlen techmakaj ipan toTeotsij itlanechikol. Uelis techpaleuis nojua kuali ma tijchiuakaj se tlenijki tlen ipa tijchijtokej. Uan tijmatij kuali kisa se tlenijki pampa toTeotsij itonal techpaleuia uan amo pampa tojuantij tijmatij kenijkatsa tijchiuasej se tlenijki.

12. Kej kiijtoua Salmo 139:23, 24, ¿tlake uelis titlajtlanisej kema timomaijtosej?

¹² Nojkia uelis tijnextisej tijpatiitaj toTeotsij itonal tlaj tikiljuisej Jehová ma techpaleui tikitasej tlake tlamantli techyoltilana o tlake tlamantli tlen amo kuali timoiljuijtokej (xijpoua Salmo 139:23, 24). Jehová technankilis uan ika itonal techpaleuis ma tikitakaj tlake tlamantli moneki tijpatlasej. Tlaj kena tijpiaj se tlanejneuili tlen amo kuali o techyoltilana se tlenijki, uajka ma tikiljuikaj toTeotsij ma techpaleui ika itonal uan kiampa uelis tijkixtisej tlen totsonteko o toyolo nopa tlamantli tlen amo kuali. Kiampa tijnextilisej Jehová amo tijnekij tijchiuasej yon se tlamantli tlen uelis kichiuas ayokmo ma techpaleui ika itonal (Efes. 4:30).

13. ¿Tlake techpaleuis nojua tlauel ma tijpatiitakaj toTeotsij itonal?

¹³ Nojua tlauel tijpatiitasej toTeotsij itonal tlaj timonejneuilisej kenijkatsa tlapaleuijtok ipan ni tonali. Kema Jesús nechka tlakuepiliskia iluikak, kiniljuik itokilijkauaj: “Kema  asis itonal toTeko ipan inmoyolo, inkipiasej chikaualistli uan [...] intlayolmelauatij tlen na hasta kampa más uejuejka pilaltepetsitsij ipan ni Tlaltipaktli” (Hech. 1:8). Tlen kiijtok moaxitijtok. Ika itlapaleuil toTeotsij itonal, ipan nochi Tlaltipaktli, kipano 8 millones uan tlajko mosentlalijtokej kitekipanosej Jehová. Nojkia, kejuak tiitstokej ipan xochimili, pampa toTeotsij itonal techpaleuia ma tijnextikaj kuajkuali tlamantli ipan tonemilis, kej tlaiknelili, pakilistli, tlaseuilistli, tijpiaj toyolo, titetlasojtlaj, kuali toyolo, tlaneltokili, tiyolyamanikej uan timonauatiaj (Gál. 5:22, 23). ¡Nelia techmakatokej se tlamantli tlen tlauel ipati: toTeotsij itonal!

14. Maske amo tikinitaj, ¿ajkia inijuantij techpaleuiaj kema titlajtolmoyauaj?

¹⁴ Tijpiaj seyok tlamantli tlen tlauel ipati katli amo tikitaj: titekitij ika Jehová uan ika itlanechikol tlen eltok iluikak (2 Cor. 6:1). Inijuantij techpaleuiaj kema tikinpaleuiaj sekinok ma mochiuakaj Cristo itokilijkauaj. Pablo kiijtok: “Sansejko titekitij iuaya toTeko” (1 Cor. 3:9). Kema titlajtolmoyauaj, titekitij iuaya Jesús. Uan ma tikilnamikikaj kema Jesús kiniljuik itokilijkauaj ma kinpaleuikaj sekinok ma elikaj “itokilijkauaj tlen nochi altepemej”, Jesús kiijtok: “Mojmostla niitstos inmouaya” (Mat. 28:19, 20). Uan, ¿kenijkatsa titekitij ininuaya iluikaeuanij? Tlauel tijtlaskamatij tlen iluikaeuanij kichiuaj pampa techyakanaj kema tikiniljuiaj “iTlajtol toTeko” maseualmej katli “itstokej ipan Tlaltipaktli” (Apoc. 14:6).

15. ¿Tlake tlapoualistli kinextia Jehová nelia techpaleuia ipan tlajtolmoyaualistli?

¹⁵ ¿Tlake mochijtok ika inintlapaleuil? Kema tijmoyauaj nopa kuali tlamachtili, se keskij katli kuali ininyolo kitlakakiliaj uan peuaj momachtiaj (Mat. 13:18, 23). ¿Ajkia kichiuaj nopa kuali tlamachtili kejuak ma ixua ipan ininyolo maseualmej uan ma temaka itlajka? Jesús kiijtok amo aka ueliskia mochiuas itokilijka tlaj iTata amo kiyoltilanaskia (Juan 6:44). Ipan Biblia tijpantiaj se tlapoualistli tlen kinextia nopa. Se tonali, kema Pablo yajki Filipos, tlajtolmoyajki altepeteno kampa itstoyaj siuamej. Ma tikitakaj tlake kiijtoua Biblia tlen se siuatl katli motokaxtiyaya Lidia: “ToTeko kitlapouilik iyolo para ma kimachili tlen Pablo tlamachtiyaya” (Hech. 16:13-15). Sanse kej kichijki ika Lidia, Jehová nojkia kinyoltilantok tlauel miakej maseualmej ipan itlanechikol.

16. ¿Ajkia kinamiki tijuejkapantlalisej kema kuali techtlakakiliaj kema titlajtolmoyauaj?

¹⁶ Kema kuali techtlakakiliaj ipan tlajtolmoyaualistli, ¿ajkia kinamiki tijueyichiuasej? Pablo kiijtok ajkia kema kiniljuik toikniuaj katli itstoyaj Corinto: “Nijchijki keja se tlen kitojki se xinachtli, uan iteki Apolos elki keja se tlen kiatekik, pero elki toTeko tlen kichijki nopa xinachtli ma moskalti. Uajka axipati ajkeya kitojki nopa xinachtli, niyon ajkeya kiatekik, pero ueyi ipati toTeko tlen kichijki ma moskalti” (1 Cor. 3:6, 7). Kej Pablo kichijki, kema titlajtolmoyauaj uan kuali techtlakakiliaj, moneki tijuejkapantlalisej Jehová.

17. ¿Kenijkatsa uelis tijnextisej tijtlaskamatij titekitisej ika Jehová, Jesús uan iluikaeuanij?

¹⁷ Uelis tijnextisej tijtlaskamatij titekitisej ika Jehová, Jesús uan iluikaeuanij tlaj tijchiuaj kampeka tikinkamanaljuisej nochi maseualmej tlen nopa kuali tlamachtili. Uan ni uelis tijchiuasej kej kampa nemij miakej uan “ipan sejse kali” (Hech. 20:20). Miakej toikniuaj kinpaktia kampa ueli tlajtolmoyauasej. Kema kipantiaj se akajya katli amo kiixmatij,  kuali kitlajpalouaj uan peuaj monojnotsaj iuaya. Tlaj nopa maseuali kineki kintlakakilis, kikamanaljuiaj tlen toTeotsij iTlanauatijkayo ika tlatlepanitakayotl.

18, 19. 1) ¿Kenijkatsa kejuak tikatekiaj nopa xinachtli tlen tijtokaj? 2) ¿Kenijkatsa Jehová kipaleuik Raphalalani kema momachtiyaya Biblia?

¹⁸ Tojuantij “sansejko titekitij iuaya toTeko”, yeka amo san ma tijtokakaj nopa xinachtli, moneki kejuak tikatekisej. Kema se maseuali kuali techtlakakilis, tijnekij tijchiuasej kampeka nima sampa tijpaxalotij o tikiljuisej seyok toikni ma kiitati uan kiampa uelis peuas momachtis ika Biblia. Kema se akajya katli momachtia kipatla inemilis uan kineki mochiuas Cristo itokilijka, tojuantij tlauel tiyolpakij pampa tikitaj kenijkatsa Jehová kipaleuia ma kipatla itlalnamikilis uan iyolo.

¹⁹ Ma tikitakaj tlen kipanok Raphalalani, katli eua Sudáfrica uan eliyaya tetlajchiuijketl. Maske kipaktiyaya tlen momachtiyaya ipan Biblia, tlauel ouij kimatki kema kiitak Biblia tlamachtiyaya toTeotsij “axkineki kinitas” katli kinnojnotsaj mijkatsitsij (Deut. 18:10-12). Yolik, kikajki toTeotsij ma kipatilijtia itlalnamikilis. Uan teipa, maske ya nopa eliyaya iteki, ayokmo elki se tetlajchiuijketl. Raphalalani, katli nama kipia 60 xiuitl, kiijtoua: “Nikintlaskamatilia Jehová itlajtoltemakauaj pampa nechpaleuijkej ipan miak tlamantli, kej kema nechtemolijkej se tekitl. Uan nelia tlauel nijtlaskamatilia Jehová pampa nechpaleuik ma nijpatla nonemilis. Nimoatsonpoliuiltik uan nama nitlajtolmoyaua kej se tlen Jehová itlajtoltemakauaj”.

20. ¿Tlake timosentlalijtokej tijchiuasej?

²⁰ Ipan ni tlamachtili tikitakej naui yejyejtsitsij tlamantli tlen amo tikitaj. Maske nochi ipati, san setsi nelia tlauel pankisa: timouampojchijtosej iuaya Jehová. Pampa kuali timouampojchijtokej iuaya, tiuelij tijseliaj sekinok tlateochiualistli tlen amo tikitaj: timomaijtouaj, tijpiaj toTeotsij itonal uan kema titlajtolmoyauaj techpaleuiaj Jehová, Jesús uan iluikaeuanij. Yeka, timosentlalijtokej nojua tlauel tijpatiitasej ni tlamantli tlen amo tikitaj. Uan nochipa tijtlaskamatilisej Jehová pampa eli touampo.