1, 2. ¿Tlake tijyekouaj tijchiuaj kema nojua kuali titlaneltokatiauij? Xikijto se neskayotl.

KEMA se okichpil kimakaj se tlenijki, itatauaj kiiljuiaj: “¿Tlake moneki tikijtos?”, uan ya kiijtoua: “Tlaskamati”, kiampa kiijtoua pampa itatauaj kiiljuiaj. Kema moskaltijti, peua kikuamachilia kenke itatauaj kimachtijkej nochipa ma tetlaskamatili. Kema ya ueyi amo aka kiiljuia ma tetlaskamatili, ya iselti kichiua pampa kiampa kineki. ¿Kenke? Pampa nama moiljuia kej itatauaj uan kiyekojtok moneki tetlaskamatilis.

² Nojkia kiampa pano ika tojuantij. Kema tijmatkej tlen melauak, tijkuamachilijkej nelia tlauel ipati ma tijneltokakaj Jehová itlanauatiljuaj. Uan kema nojua kuali titlaneltokatiauij, nojua kuali tijkuamachiliaj tlen ya moiljuia: tlake kipaktia uan tlake amo, uan kenijkatsa kiita se keski tlamantli. Kema peua timoiljuiaj kej Jehová uan tijkauaj ma techyakana ipan tlen tijchiuaj uan ipan tlen tijtlapejpeniaj, tijnextiaj tijpiaj itlalnamikilis toTeotsij.

3. ¿Kenke kemantika uelis tijmatisej ouij timoiljuisej kej Jehová?

³ Maske techpaktia timoiljuisej kej Jehová, kemantika uelis tijmatisej ouij pampa titlajtlakolejkej. Uelis tijmatisej ouij tijkuamachilisej kenijkatsa kiita toTeotsij se keski tlamantli, kej tijpiasej tonemilis tlapajpaktik, amo tlauel titlapijpiasej, kenijkatsa kinamiki tikitasej estli uan tlajtolmoyaualistli. ¿Tlake techpaleuis nojua ma timoiljuikaj kej Jehová? Uan, ¿kenijkatsa techpaleuis  kuali ma tijtlapejpenikaj tlen tijchiuasej nama uan teipa?

4. ¿Tlake kiijtosneki tijpatlatiasej totlalnamikilis?

⁴ (Xijpoua Romanos 12:2). Ipan ni texto, apóstol Pablo kiixtoma tlake moneki tijchiuasej tlaj tijnekij timoiljuisej kej Jehová. Ipan seyok tlamachtili tlen tikitakej, techpaleuik ma tikitakaj tlaj amo tijnekij tijchiuasej kej “kichiuaj tlakamej ipan ni Tlaltipaktli”, uajka amo moneki ma timoiljuikaj yon ma tijchiuakaj kej inijuantij. Pablo nojkia kiijtok moneki tijpatlatiasej totlalnamikilis. Tlaj tijnekij kiampa tijchiuasej, moneki timomachtisej Biblia uan kiampa tijmatisej tlen toTeotsij moiljuia, nojkia moneki timoyoliljuisej uan timoiljuisej kej ya.

5. ¿Kenke amo sanse timomachtisej uan san titlapouasej?

⁵ Timomachtisej amo kiijtosneki san tijpouasej uan tiuasanisej tlen kinankilia se keski tlajtlanili. Kema timomachtiaj kuali tikitaj tlake techmachtia tlen Jehová, kenijkatsa moiljuia uan kenke kichiua se keski tlamantli. Nojkia tijchiuaj kampeka tijkuamachilisej kenke technauatia ma tijchiuakaj se keski tlamantli uan kenke sekinok kikualankaita. Nojkia timoyoliljuiaj tlake moneki tijpatlasej ipan tonemilis uan ipan totlalnamikilis. Kemantika uelis amo tiuelisej timonejneuilisej ipan nochi ni tlamantli kema timomachtisej. Yeka, nojkia ma timoyoliljuikaj ipan tlen timomachtiaj. Tlaj tiuejkauaj timomachtiaj, uajka kinamiki tiuejkauasej timoyoliljuijtosej ipan tlen timomachtijkej (Sal. 119:97; 1 Tim. 4:15).

6. ¿Tlake pano kema peua timoiljuiaj kej toTeotsij?

⁶ Tlauel techpaleuis tlaj timomatisej nochipa timoyoliljuisej ipan tlen kiijtoua toTeotsij iTlajtol, pampa toselti tijkuamachiliaj nochi tlen Jehová moiljuia eli xitlauak. Nojkia peua tijkuamachiliaj kenijkatsa kiita se keski tlamantli uan timoiljuiaj kej ya. Kema tijpatlatiauij totlalnamikilis, kejuak peua tijpiaj se yankuik totlalnamikilis uan yolik peua timoiljuiaj kej Jehová.

7, 8. 1) ¿Kenijkatsa kiita Jehová kema se akajya kineki kipias miak tlamantli? (Xikita nopa achtoui tlaixkopinkayomej). 2) Tlaj timoiljuisej kej ya, ¿tlake tlamantli tikachtouitlalisej ipan tonemilis?

⁷ Tlen timoiljuiaj amo san kichiua ma tijyolmatikaj se keski tlamantli, nojkia techyololinia ma tijchiuakaj se tlenijki (Mar. 7:21-23; Sant. 2:17). Ma tikitakaj se keski tlamantli tlaj tijnekij kuali tijkuamachilisej. Achtoui, ma tikitakaj kenijkatsa kiita Jehová kema se akajya kineki tlapijpias. Ya kintlapejpenik ajkia inijuantij kiiskaltiskiaj iKone ipan Tlaltipaktli, uan katli kintlapejpenik amo tlapijpixtoyaj (Lev. 12:8; Luc. 2:24). Biblia kiijtoua kema Jesús tlakatki, María “kitejki ipan se kuakajo kampa tlakuaj tlapialmej pampa axkipantijkej kampa kochisej ipan se kali para paxalouanij” (Luc. 2:7). Tlaj Jehová kinektoskia, ueltoskia kichiuas iKone ma kiiskaltikaj maseualmej katli kipixtoyaj miak tlamantli. Jehová amo kichijki nopa uan kinejki ma kiiskaltikaj maseualmej katli nochipa kichiuayayaj kampeka kitekipanosej.

⁸ Kema tijpouaj ni tlapoualistli, kichiua ma tijmatikaj kenijkatsa kiita Jehová kema se akajya kineki tlapijpias. Sekij tetajmej kinekij kinmakasej miak tlamantli ininkoneuaj, maske teipa ayokmo kuali tlaneltokaj pampa nama tlauel tekitij. Jehová amo kiampa kichiua pampa ya tlauel kipatiita kema se akajya kuali tlaneltoka. ¿Uan tojuantij? ¿Timoiljuiaj kej ya? ¿Tlake tijnextiaj ika tlen tijtlapejpeniaj tijchiuasej? (Xijpoua Hebreos 13:5).

9, 10. ¿Kenijkatsa tijnextisej timoiljuiaj sanse kej Jehová pampa amo tijnekij sekinok kejuak ma motepotlamikaj?

⁹ Ma tikitakaj nopa ompa tlamantli. ¿Kenijkatsa  kiitas Jehová tlaj tijchiuasej ma tlajtlakolchiua se toikni o ayokmo ma kitekipano? Jesús kiijtok: “Intla akajya kinextilis ma tlajtlakolchiua se tlen ni konemej tlen nechneltokaj, toTeko nelia kitlatsakuiltis. Más kuali intla achtoui kikechilpiliskiaj nopa tlakatl se ueyi metlatl uan kimajkauaskiaj ipan ueyi atl para ma misauis para ma axkichiua nopa ueyi tlajtlakoli” (Mar. 9:42). Nelia Jesús moiljuiyaya tlauel amo kuali tlaj tijchiuaskiaj ni tlamantli. Uan kej tijmatij, Jesús sanse moiljuia kej iTata, yeka uelis timotemachisej Jehová nojkia amo kipaktis tlaj se akajya kichiuas ma tlajtlakolchiua se Cristo itokilijka o ma kitlauelkaua (Juan 14:9).

¹⁰ ¿Timoiljuiaj sanse kej Jehová uan Jesús? ¿Tlake kinextia tlen tijchiuaj ipan tonemilis? Ma timoiljuikaj sekinok toikniuaj amo kinpaktia o kichiua ma moiljuikaj amo kuali tlamantli kema kiitaj kej timoyoyontiaj o kej timoyejyektlaliaj. ¿Tlake tijchiuasej tlaj tijmatisej nopa? ¿Tijpatlasej o tijkauasej tlen techpaktia pampa tikinikneliaj? (1 Tim. 2:9, 10).

11, 12. ¿Kenijkatsa techpaleuis amo ma titlajtlakolchiuakaj tlaj tikitasej tlen amo kuali kej Jehová kiita uan tlaj kuali timonauatisej?

¹¹ Ma tikitakaj nopa expa tlamantli: Jehová kikualankaita tlamantli tlen amo xitlauak uan tlen amo kuali (Is. 61:8). Maske kimati kemantika techyoltilana tlen amo kuali pampa titlajtlakolejkej, techiljuia ma tijkualankaitakaj tlen amo kuali (xijpoua Salmo 97:10). Tlaj timoyoliljuisej kenke Jehová kikualankaita tlen amo kuali, techpaleuis ma tikitakaj nopa tlamantli kej ya kiita uan nopa techpaleuis amo ma titlajtlakolchiuakaj.

¹² Timoiljuisej kej Jehová techpaleuis ipan seyok tlamantli: tikitasej tlen amo kuali kej ya kiita. Uan maske Biblia amo tleno kiijtoua, techpaleuis ma tijkuamachilikaj kenke se keski tlamantli amo kuali. Ipan ni tonali, miakej maseualmej peua kinpaktia nopa lap dance, kampa kichiuaj tlen amo kinamiki kema mijtotiaj. Sekij moiljuiaj nopa amo kiijtosneki se momekatis, uan yeka amo kenijki tlaj kiampa timijtotisej. * Uan, ¿kenijkatsa kiita Jehová? Ma tikilnamikikaj nochi tlamantli tlen amo kuali ya amo kipaktia. Yeka, ma tijkualankaitakaj tlen Jehová kikualankaita uan kuali ma timonauatikaj, kiampa timouejkatlalisej tlen tlajtlakoli (Rom. 12:9).

13. ¿Kenke tlauel techpaleuis tlaj kuali tijmajtosej kenijkatsa kiita Jehová se keski tlamantli?

¹³ Kema timomachtisej ma timoyoliljuikaj kenijkatsa tlen Jehová moiljuia uelis techpaleuis teipa kema monekis tijtlapejpenisej tlake tijchiuasej. Uan kema monekis nimantsi tijtlapejpenisej se tlenijki o kema techpanos se tlamantli tlen amo timoiljuijtoyaj, nojkia techpaleuis ma tijmatikaj tlake tijchiuasej (Prov. 22:3). Ma tikitakej se keski neskayotl tlen uala ipan Biblia.

14. ¿Tlake tijyekouaj kema timoiljuiaj tlen José kichijki kema Potifar isiua kinekiyaya ma moteka iuaya?

¹⁴ Ma timoiljuikaj tlen kipanok José. Maske Potifar isiua kinekiyaya ma moteka iuaya, ya amo kinejki. Kiampa kinextik kenijkatsa Jehová kineki ma motlepanitakaj katli mosenkajtokej (xijpoua Génesis 39:8, 9). Ma tikilnamikikaj tlen kiiljuik isiua Potifar: “¿Kejatsa uelis nitlajtlakolchiuas ika toTeko Dios uan mouaya nijchiuas se tlamantli tlen tlauel fiero?”. Kiampa kinextik ya  moiljuiyaya kej Jehová. Nama ma timoiljuikaj ipan tojuantij. Ximoiljui se akajya katli iuaya titekiti peua mitsajasi o ipan moteléfono mitstlajkuiljuilia tlen amo kinamiki o mitstitlanilia se tlaixkopinkayotl kampa nesij momekatiaj. * Amo tikixpanosej Jehová tlaj achtoui kuali timonejneuilisej kenijkatsa kiita ni tlamantli, tlaj timoiljuisej kej ya uan tlaj kuali tijmajtosej tlake tijchiuasej.

15. ¿Kenijkatsa tojuantij uelis tijchiuasej kej nopa eyij telpokamej hebreos kema sekinok kinekisej ma tijtlauelkauakaj Jehová?

¹⁵ Nama ma tikitakaj tlen kichijkej nopa eyij telpokamej hebreos: Sadrac, Mesac uan Abed Nego. Tlanauatijketl Nabucodonosor kiijtok ma kichijchiuakaj ika oro se teteyotl uan tlanauatik ma kiueyichiuakaj. Nopa eyij telpokamej amo kinejkej kichiuasej nopa. Kej kinankilijkej nopa tlanauatijketl kinextik inijuantij kuali kimatiyayaj tlake kiijtosneki amo tijtlauelkauasej Jehová (Éx. 20:4, 5; Dan. 3:4-6, 12, 16-18). Ma timoiljuikaj katli tijtekipanouaj techiljuia ma titemakakaj tomij pampa mochiuas se iljuitl tlen kichiuaj ipan religiones tlen amo melauak. ¿Tlake tijchiuaskiaj? Amo moneki tijchiasej ma techpano nopa tlamantli, nama moneki timoyoliljuisej kenijkatsa kiita Jehová nopa tlamantli. Uan kiampa amo ouij tijmatisej tijchiuasej uan tikijtosej tlen kinamiki, kej kichijkej nopa eyij telpokamej.

16. Tlaj kuali tijkuamachiliaj tlen Jehová moiljuia, ¿kenijkatsa techpaleuis kema techpanos se tlamantli tlen amo kuali?

¹⁶ Tlaj achtoui kuali timoiljuisej kenke tlauel moneki amo tijtlauelkauasej Jehová, techpaleuis kema tlauel timokokosej o kema techpanos se tlamantli tlen amo kuali. Tojuantij amo tijnekij ma techtlalilikaj estli o se tlen nopa naui tlamantli tlen kipia estli (Hech. 15:28, 29). Tlaj kinekisej techpajtisej ika pajtli tlen kipia se kentsi estli, moneki toselti tijtlapejpenisej tlake tijchiuasej. Yeka moneki tikitasej tlake kiijtoua Biblia uan kiampa tijmatisej tlake moiljuia toTeotsij. Amo moneki timoiljuijtosej tlake tijchiuasej kema tiitstosej ipan hospital uan tlauel titlaijiyouijtokej o kema sekinok techiljuisej nimantsi ma tijtlapejpenikaj tlake tijchiuasej.  Moneki nama kuali timomachtisej tlen nopa tlamantli, tikijkuilosej tlake tijnekij ipan se amatl (Declaración previa de voluntad para la atención médica) uan tikamanaltisej iuaya se tepajtijketl. *

17-19. ¿Kenke tlauel moneki nama ma tijyekokaj kenijkatsa moiljuia Jehová? Xikijto kema monekis tijnextis kuali timokualchijchijtok.

¹⁷ Ma timoiljuikaj tlen Jesús kinankilik Pedro kema kiiljuik: “Ximoikneli noTeko”. Jesús kuali kimatiyaya tlake kinekiyaya Jehová ma kichiua uan moiljuijtoya ipan tlajtolpanextili tlen kiijtojtoya tlake kipanoskia uan kenijkatsa mikiskia. Nopa kipaleuik ma mosentlali amo kitlauelkauas Jehová uan ma temaktili inemilis (xijpoua Mateo 16:21; 16:22, TNM *; 16: 23).

¹⁸ Ipan ni tonali, Jehová kineki ma tielikaj iuampoyouaj uan ma timosentlalikaj tijtekipanosej (Mat. 6:33; 28:19, 20; Sant. 4:8). Uelis nojkia techpanos kej Jesús kema se akajya katli moiljuia kuali techtlajtolmaka kinekis ma tijpatlakaj tlen timosentlalijtokej tijchiuasej. Ma timoiljuikaj katli tijtekipanouaj techtenkauilia se tekitl tlen ika uelis tijtlanisej miak tomij. Tlaj tijselisej nopa tekitl, kichiuas ayokmo ma timosentlalikaj tijtekipanosej Jehová. Tlaj tieli titelpokatl, ximoiljui kinekij mitspaleuisej uan kiampa nojua uelis timomachtis. Tlaj kena tijnekis, uajka ayokmo tiitstos ininuaya mochampoyouaj. ¿Ipan nopa tonali kinamikiskia tikiljuis Jehová ma mitsyakana, tijtemos tlamachtili ipan amatlajkuiloli uan tikamanaltis ininuaya mochampoyouaj uan ueuejtlakamej, uan kiampa tijtlapejpenis tlake tijchiuas? Kualtiaskia nama kuali timomachtis tlen Jehová moiljuia uan tijchiuas kampeka timoiljuis kej ya. Tlaj kiampa tijchiuasej teipa ayokmo tikitasej kej se tlayejyekoli kema techpanos sekinok tlamantli pampa ya tijmajtosej tlake tijnekij uan ya nopa timosentlalijtosej tijchiuasej. Uajka san monekis tijchiuasej tlen ya tijyekojtokej.

¹⁹ Uelis timoiljuisej ipan sekinok tlamantli tlen nojkia ueliskia techpanos maske amo timoiljuijtoyaj tlaj panoskia. Maske amo uelis tijmatisej nochi tlen ueliskia techpanos, kema timomachtisej toselti uelis timoyoliljuisej kenijkatsa moiljuia Jehová, kiampa teipa uelis tikilnamikisej tlen timomachtijkej uan tijchiuasej ipan tonemilis tlen tijyekojtokej. Yeka, ma tijchiuakaj kampeka tijmatisej kenijkatsa moiljuia Jehová, ma timoiljuikaj kej ya uan kenijkatsa techpaleuis kuali ma tijtlapejpenikaj tlen tijchiuasej nama uan teipa tlaj timoiljuisej kej Jehová.

20, 21. 1) ¿Kenke ipan yankuik Tlaltipaktli amo toselti tijtlapejpenisej tlen tijchiuasej? 2) ¿Kenijkatsa uelis tiyolpakisej ipan ni tonali?

²⁰ Nochi ya tijnekij tiitstosej ipan yankuik Tlaltipaktli. Miakej tlen tojuantij timotemachiaj tiitstosej kema Tlaltipaktli mochiuas se xochimili. ITlanauatijkayo toTeotsij kitlamiltis nochi tlamantli tlen nama techtlaijiyouiltia. Ipan nopa tonali, nojua monekis tijtlapejpenisej tlake tijchiuasej, uan tijtlapejpenisej tlen techpaktia uan tlen tijnekij tijchiuasej.

²¹ Maseualmej katli itstosej ipan Xochimili, amo ininselti kitlapejpenisej tlake kichiuasej pampa kema kitlapejpenisej tlake kuali o tlake amo, monekis ma moyakanakaj ika Jehová itlanauatiljuaj uan ika tlen ya moiljuia. Nopa kichiuas tlauel ma yolpakikaj uan ma itstokaj ika tlaseuilistli (Sal. 37:11). Uan ipan ni tonali nojkia uelis tiyolpakisej tlaj timoiljuisej kej Jehová.