1. ¿Kenijkatsa 2 Corintios 3:1-3 techpaleuia tikitasej kej se tlateochiualistli kema moatsonpoliuiltia katli tijmachtiaj? (Xikita tlaixkopinkayotl ipan ipantsajka).

TLAUEL kuali tijyolmatij kema se akajya katli momachtia Biblia moatsonpoliuiltia (Mat. 28:19, TNM). Uan tlaj tojuantij tijmachtijkej, nojua tlauel tiyolpakij (1 Tes. 2:19, 20). Katli namanok moatsonpoliuiltiaj elij kejuak se “amatlajkuiloli” kampa kiijtoua amo san itlamachtijka kichijki se kuali tekitl, nojkia nochi toikniuaj (xijpoua 2 Corintios 3:1-3).

2. 1) ¿Tlake moneki timotlatsintokisej, uan kenke? 2) ¿Tlake kiijtosneki tijmachtisej se akajya? (Xikita nopa nota).

² Tlauel tiyolpakij tijmatisej ipan ni naui xiuitl tlen panotok, toikniuaj kinmachtiaj * sejse metstli se 10 millones maseualmej ipan nochi Tlaltipaktli, uan moatsonpoliuiltijtokej sejse xiuitl kipano 280,000 maseualmej. Ni kinextia nojua uelis moatsonpoliuiltisej tlauel miakej katli kinmachtiaj. Yeka, ¿tlake uelis tijchiuasej uan kiampa miakej katli tikinmachtiaj uelis moatsonpoliuiltisej? Jehová kipia iyolo uan nojua kinkaua ma mochiuakaj Cristo itokilijkauaj. Tiitstokej ipan itlamia tonali, yeka moneki tijchiuasej kampeka tikinpaleuisej katli tikinmachtiaj kuali ma tlaneltokakaj uan ma moatsonpoliuiltikaj (1 Cor. 7:29; 1 Ped. 4:7).

3. ¿Tlake tikitasej ipan ni tlamachtili?

 ³ Katli kinyakanaj Jehová itlajtoltemakauaj kintlatsintokijkej tlen kali Betel tlake moneki kichiuasej toikniuaj uan kiampa katli kinmachtiaj ika Biblia uelis moatsonpoliuiltisej. Ipan ni uan ipan nopa seyok tlamachtili tikitasej tlake kichijkej toikniuaj katli tepaxalouaj chijchikuasej metstli, misioneros uan precursores (Prov. 11:14; 15:22). * Tlen kiijtouaj techpaleuis uan kinpaleuis katli tikinmachtiaj nojua tlauel ma kinpaleui tlen kiyekouaj. Ipan ni tlamachtili tikitasej makuili tlamantli tlen moneki kichiuasej katli tikinmachtiaj, kiampa moatsonpoliuiltisej uan kenijkatsa katli tlamachtia uelis kipaleuis.

4. ¿Tlake moneki tijmatisej tlaj tikinmachtiaj maseualmej ininkalteno?

⁴ Miakej toikniuaj kinmachtiaj maseualmej ininkalteno. Maske kiampa nojkia kuali kintlakakiliaj, kemantika amo tlauel uejkauaj uan amo nochipa uelij momachtiaj. Uan pampa kinekij nojua kuali ma kintlakakilikaj, toikniuaj kintlajtlaniaj ininnúmero uan teipa kinnojnotsaj o kintitlaniliaj mensajes, kiampa kamanaltij tlen se tlamachtili tlen Biblia. * Kema kiampa kichiuaj maseualmej amo nima kipatlaj se keski tlamantli. Moneki tikilnamikisej nopa maseuali amo nima kimaktilis Jehová inemilis uan moatsonpoliuiltis tlaj amo kichiua kampeka ajachika momachtis uan kichiuas kej kinamiki.

5. ¿Kenijkatsa tlen Jesús kiijtok ipan Lucas 14:28-33 uelis techpaleuis kema tijmachtiaj se akajya?

⁵ Se tonali Jesús kinnextilik itokilijkauaj se keski neskayotl kampa kiniljuik tlake moneki kichiuas se akajya tlaj kineki elis itokilijka. Kiijtok se tlakatl kinekiyaya kichijchiuas “se ueyi kali” uan se tlanauatijketl kinekiyaya yas tlateuiti. Jesús kiijtok tlaj se tlakatl kineki kichiuas se kali, achtoui moneki “moseuis uan kipouas keski tomij monekis para kimatis intla kiaxilia para kitlamiltis”, uan se tlanauatijketl achtoui moneki moiljuis tlaj itlateuijkauaj uelis tlatlanisej (xijpoua Lucas 14:28-33). Jesús kimatiyaya sanse kej ni omej tlakamej, se akajya katli kineki elis itokilijka achtoui moneki  moiljuis tlake kichiuas. Tlaj se maseuali kineki kichiuas tlen Jesús kiijtok, moneki tikiljuisej tlauel ipati timomachtisej sejse semana. ¿Kenijkatsa uelis tijchiuasej?

6. ¿Tlake uelis tijchiuasej tlaj katli tijmachtiaj tijnekij ma kipatla se keski tlamantli ipan inemilis?

⁶ Kema tijmachtiaj se akajya ipan ikalteno, amo moneki san tikixtomilisej se kentsi tlamachtili. Ma tijchiuakaj kampeka nojua timomachtisej se keski versículos tlen Biblia kema tijpaxalouaj. Tlaj nopa maseuali ya momatki achi tiuejkauaj, uelis tijtlatsintokisej tlaj uelis timoseuisej, kiampa nojua tikixtomilisej nopa tlamachtili. Tlen kiijtos techpaleuis ma tikitakaj tlaj nelia kipatiita momachtis. Teipa uelis tijtlatsintokisej tlaj kinekiskia momachtis ompa ipan se semana. Kiampa nopa tlamachtili kipaleuis nima ma kipatla inemilis. Ma tikitakaj nopa ompa tlamantli tlen moneki kichiuas katli tijmachtiaj.

7. ¿Kenijkatsa moneki timokualchijchiuasej kema titlamachtiaj?

⁷ Moneki kuali timokualchijchiuasej kema tijmachtiaj se akajya. ¿Kenijkatsa uelis tijchiuasej? Moneki tijpouasej nopa tlamachtili, tijtemosej textos uan tikitasej tlake tlamantli tlauel ipati. Nojkia, ma tikitakaj kenijkatsa itoka, kenijkatsa moxejxelojtok, tlatsintokilmej, textos kampa kiijtoua “xijpoua”, tlaixkopinkayomej uan videos tlen techpaleuis kuali ma tikixtomakaj nopa tlamachtili. Teipa ma timoiljuikaj kenijkatsa itstok nopa maseuali uan kenijkatsa tikixtomasej nopa tlamachtili uan kiampa amo ouij kikuamachilis uan kichiuas ipan inemilis (Neh. 8:8; Prov. 15:28).

8. Kej kiijtoua Colosenses 1:9, 10, ¿tlake tlamantli moneki tijchiuasej tlaj tijnekij tijpaleuisej katli tijmachtiaj?

⁸ Nojkia kema timokualchijchiuaj moneki timomaijtosej uan tikiljuisej Jehová tlake tlamantli kipoloua katli tijmachtiaj, uan ma tikiljuikaj ma techpaleui kuali tijtekiuisej Biblia, kiampa uelis asis ipan iyolo nopa tlamachtili (xijpoua Colosenses 1:9, 10). Ximoiljui tlake ouij kikuamachilia o kichiuas ipan inemilis. Moneki tikilnamikisej tijpaleuiaj pampa tijnekij ma moatsonpoliuilti.

9. ¿Tlake uelis tijchiuasej uan kiampa kuali mokualchijchiuas katli tijmachtiaj?

⁹ Pampa ajachika tijmachtiaj se akajya, tijnekij ma kipatiita tlen Jehová uan Jesús  kichijtokej uan ma kineki kimatis sekinok tlamantli (Mat. 5:3 TNM, 6). Yeka, tlaj katli tijmachtiaj kineki kikuamachilis tlen momachtia, moneki mosentlalis ipan nopa tlamachtili uan amo kichiuas sekinok tlamantli. Tlauel ipati tikiljuisej achtoui moneki mokualchijchiuas iselti uan moiljuis kenijkatsa uelis kichiuas ipan inemilis. Uelis ipan se tlamachtili sansejko timokualchijchiuasej, kiampa kiitas kenijkatsa tijchiuaj. * Ma tijmachtikaj kenijkatsa monankilia se tlajtlanili uan ma kiuasani se keski tlajtoli tlen kipaleuis amo ma kiilkaua tlen tlanankilis. Teipa ma tikiljuikaj ma tlanankili san ika se keski tlajtoli. Kiampa tijmatisej tlaj kikuamachilik nopa tlamachtili. Ma tikitakaj nopa expa tlamantli tlen moneki kichiuas katli tijmachtiaj.

10. ¿Kenke katli tijmachtiaj moneki mojmostla kipouas Biblia, uan tlake moneki kichiuas tlaj kineki ma kipaleui?

¹⁰ Maske nopa maseuali tijmachtiaj sejse semana, moneki mojmostla iselti kichiuas se keski tlamantli. Monojnotsas ika Jehová, uan ni kichiuas kema kitlakakilis uan kema momaijtos. Tlaj kineki kitlakakilis Jehová moneki mojmostla kipouas Biblia (Jos. 1:8; Sal. 1:1-3). Ma tijnextilikaj kenijkatsa kitekiuis nopa pilamochtsi Kej uelis tijpouas Biblia mojmostla tlen eltok ipan jw.org uan uelis kikixtis ipan amatl. * Yeka, tlaj kineki ma kipaleui Biblia, moneki tijmachtisej ma moyoliljui tlake kimachtia tlen Jehová uan kenijkatsa kichiuas ipan inemilis tlen momachtijtok (Hech. 17:11; Sant. 1:25).

11. ¿Kenijkatsa uelis momaijtos katli tijmachtiaj, uan kenke moneki nochipa ma kichiua?

¹¹ Ma tikiljuikaj katli tijmachtiaj mojmostla ma momaijto, kiampa monojnotsas iuaya Jehová. Moneki timomaijtosej ika nochi toyolo kema peuas tijmachtisej uan kema titlamisej, nojkia kema timomaijtouaj moneki tijtokaxtisej katli tijmachtiaj. Kiampa ika nochi iyolo monojnotsas ika Jehová uan kichiuas ika itoka Jesucristo (Mat. 6:9; Juan 15:16). Tlauel monechkauis ika Jehová tlaj kitlakakilis kema kipouas Biblia mojmostla uan tlaj monojnotsas iuaya ika tlamaijtoli (Sant. 4:8). Tlaj nochipa kiampa kichiuas, kipaleuis ma kimaktili Jehová  inemilis uan ma moatsonpoliuilti. Ma tikitakaj nopa najpa tlamantli.

12. ¿Kenijkatsa uelis tijpaleuisej katli tijmachtiaj ma mouampojchiua ika Jehová?

¹² Nochi tlamantli tlen kiyekojtia katli tijmachtiaj amo san moneki ma asi ipan itlalnamikilis, nojkia moneki asis ipan iyolo. ¿Kenke? Pampa toyolo techpaleuia ma tijnekikaj tijchiuasej se tlamantli uan kuali ma tijyolmatikaj. Maske nopa maseualmej kikuamachiliyayaj tlen Jesús tlamachtiyaya pampa amo ouij kichiuayaya, inijuantij kitokiliyayaj pampa nopa tlamachtili asiyaya ipan ininyolo (Luc. 24:15, 27, 32). Katli tijmachtiaj moneki kiitas Jehová kej se akajya katli nelnelia itstok uan katli uelis elis kej iTata, iTeotsij uan iUampo (Sal. 25:4, 5). Kema tijmachtijtosej se akajya moneki nochipa tikiljuisej nopa kuajkuali tlamantli tlen Jehová kinextia (Éx. 34:5, 6; 1 Ped. 5:6, 7). Nochipa ma tijnextilikaj kenijkatsa eli Jehová maske amo timomachtijtosej o kema tikiljuiaj seyok tlamantli. Xijpaleui ma kipatiita itlaiknelil toTeotsij, itlasojtlalis uan pampa kitekipachoua tlen sekinok kiyolmatij. Jesús kiijtok moneki tikiknelisej toTeotsij ika nochi toyolo, pampa ni eli “nopa tlanauatili tlen más ueyi” (Mat. 22:37, 38). Ma tijchiuakaj kampeka uan kiampa katli tijmachtiaj nojkia kiiknelis Jehová ika nochi iyolo.

13. Xikijto ika se neskayotl kenijkatsa katli tijmachtiaj uelis kiitas nopa kuali tlamantli tlen Jehová kinextia.

¹³ Kema tikamanaltisej iuaya katli tijmachtiaj, uelis tikiljuisej kenke tlauel tikikneliaj Jehová. Ni tlamantli uelis kichiuas ma kiita ya nojkia moneki kuali mouampojchiuas iuaya uan kiiknelis (Sal. 73:28). Se neskayotl, ma timoiljuikaj tikixtomiliaj se tlamantli tlen se amatlajkuiloli o ipan se texto katli asi ipan toyolo, uelis kej itlaiknelil toTeotsij, itlalnamikilis, ixitlaualis o ichikaualis. Kema kiampa panos uelis tikiljuisej nopa eli se tlamantli tlen kichiua tlauel ma tikiknelikaj Jehová. Nama ma tikitakaj nopa makuilpa tlamantli tlen moneki kichiuas katli tijmachtiaj uan kiampa uelis moatsonpoliuiltis.

14. Kej kiijtoua Hebreos 10:24, 25, ¿tlake kipaleuis katli tijmachtiaj nima ma kipatla se keski tlamantli ipan inemilis?

¹⁴ Nochi tijnekij katli tikinmachtiaj ma moatsonpoliuiltikaj. Se tlamantli tlen kinpaleuis eli tikiniljuisej tlauel ipati yasej  ipan tlanechikoli. Toikniuaj katli kipiaj miak xiuitl tlajtolmoyauaj, kiijtouaj katli peuaj yauij ipan tlanechikoli nima kipatlaj ininnemilis (Sal. 111:1). Sekij toikniuaj kiniljuiaj katli kinmachtiaj, ipan tlanechikoli nojua kiyekosej sekinok tlamantli tlen amo kiitasej kema sansejko momachtisej. Uelis tijpouilis Hebreos 10:24, 25 (xijpoua) uan tikiljuis kenijkatsa tlauel kipaleuis tlaj yas ipan tlanechikoli. Nojkia uelis tijnextilis nopa video ¿Tlake tijchiuaj ipan kali kampa timosentiliaj? * uan ma tikiljuikaj katli tijmachtiaj ma mosentlali yas ipan tlanechikoli sejse semana.

15. ¿Tlake tlamantli uelis tijchiuasej uan kiampa katli tijmachtiaj yas ipan tlanechikoli sejse semana?

¹⁵ ¿Tlake uelis tijchiuasej tlaj katli tijmachtiaj ayamo yajtok ipan se tlanechikoli o san kemantika yaui? Uelis tijpouilisej se tlamachtili tlen tlauel techpaktik tlen se tlanechikoli katli namanok tijpixkej. Tlaj kiampa tijchiuasej tlauel kipaleuis uan amo kej kema san tijtlaneuij ma yaui. Ma tijmakakaj pilamochtsi Tlen Tematiltia o Tlen tijchiuasej ipan tlanechikoli tlen timomachtijtosej ipan nopa metstli. Ma tijnextilikaj tlen moixtomas ipan nopa seyok tlamachtili uan ma tijtlatsintokikaj tlake tlamantli tlauel kipaktik. Tlauel kipaktis tlen kiitas kema yas ipan tlanechikoli, pampa ipan sekinok religiones amo kiampa kichiuaj (1 Cor. 14:24, 25). Nojkia kinixmatis sekinok toikniuaj katli kuali monejnemiltiaj uan uelis kipaleuis nima ma moatsonpoliuilti.

16. 1) ¿Tlake moneki tijchiuasej tlaj tijnekij ma moatsonpoliuilti katli tijmachtiaj? 2) ¿Tlake tikitasej ipan nopa seyok tlamachtili?

¹⁶ ¿Kenijkatsa uelis tijpaleuisej ma moatsonpoliuilti se akajya katli tijmachtiaj? Tlaj tijnekij ma kipatiita nopa tlamachtili, moneki tikiljuisej tlauel ipati timomachtisej sejse semana, iselti mokualchijchiuas, tijpaleuisej ma monojnotsa ika Jehová, ma mouampojchiua iuaya uan tijtlaneuisej ma yaui tlanechikoli (xikita nopa recuadro “ Tlen moneki kichiuas katli tijmachtia”). Ipan nopa seyok tlamachtili tikitasej makuili tlamantli tlen moneki kichiuasej toikniuaj katli tlamachtiaj uan kiampa kinpaleuisej katli kinmachtiaj ma moatsonpoliuiltikaj.