Nopa achtoui 60 minutos kema se pilkonetsi tlakati nelia tlauel ipati. ¿Kenke? Pampa tlaj se tenaj peuas kinextis kenijkatsa tlauel kiiknelia ipilkone ipan nopa hora, kipaleuis kuali ma moskalti. *

¿Tlake kichiua se siuatl ma kimokuitlaui ika miak tlaiknelili ipilkone tlen ontlakatki? Ipan The Journal of Perinatal Education, nopa tlamachtijketl Jeannette Crenshaw kiijtok kema se siuatl konepia, momiakilia se tlamantli tlen itoka oxitocina uan nopa kichiua “se tenaj nimantsi ma kiikneli ipilkone kema kitlachilia, kiajalaxoua uan kema kichichitia”. Kema kichiua nopa, itlakayo nopa tenaj kichiua ma yoli seyok tlamantli tlen kichiua “kuali ma kiyolmati kema kinojnotsa ipilkone” uan kinpaleuia omej tlauel ma moiknelikaj. ¿Kenke tlauel ipati tijmatisej ni tlamantli?

Se tenaj tlauel moiknelia iuaya ipilkone pampa kiampa kinchijchijki Jehová. * Tlanauatijketl David kitlaskamatilik toTeotsij pampa kichijki ma tlakati uan pampa kichijki inana ma kimokuitlaui. Uan nojkia kiijtok Jehová kimokuitlauik kema tlakatki. Kema momaijtok, kiiljuik: “Kema nitlakatki ya ipa nimotemachijtok ipan ta. Nochi tonali tieltiualajtok tinoTeko” (Salmo 22:9, 10).

XIMOILJUI NI: Tlaj toTeotsij kichijki se tenaj ma kipia se keski tlamantli tlen kichiuaskia ma kiikneli uan ma kimokuitlaui ikone, ¿timoiljuia toTeotsij amo kitekipachoua tlen techpano sejse tlen tojuantij katli tielij tiikoneuaj? (Hechos 17:29).

Jesucristo, katli tlauel kuali kiixmati katli techchijchijtok, kiijtok: “Yonke pilkentsi ininpati piltototsitsij nikaj ipan Tlaltipaktli uan kinnamakaj omej para se centavo, inijuantij ininpati miak iixtla toTeko hasta niyon se axmiki intla toTeko axkikauilia. Pero ika inmojuantij miak más toTeko inmechmokuitlauia hasta kimati keski inmotsonkal inkipiaj. Uajka amo ximomajmatikaj. Miak más inmopati iixtla toTeko que miak totomej” (Mateo 10:29-31).

Tlaj miakej maseualmej amo kintlachiliaj totomej kema itstokej, uajka amo kinitaj yon se kentsi kema mikij. ToTeotsij Jehová amo kiampa kichiua, pampa ya kena kinita sejse tlen nopa totomej. Uan maske tlauel miakej itstokej, toTeotsij amo kema tlauel kinpatiitas kej kinpatiita maseualmej. Uajka, temachtli tijmatij toTeotsij kiita tlen mitspano. Kena, ¡ya tlauel mitspatiita!

 Biblia techiljuia:

• “ToTeko kintlachilijtok nochi tlakamej kampa ueli ipan Tlaltipaktli para kinnextilis iueyi chikaualis inijuantij tlen motemachiaj ipan ya ika nochi ininyolo” (2 CRÓNICAS 16:9).

• “ToTeko kintlachilia tlen nemij xitlauak iixpa, uan san kichia para kinmakas tlen kitlajtlanisej” (SALMO 34:15).

• “Nijpia miak pakilistli pampa tinechiknelia. Ta tikitstok nochi nokuesol, tikixmajtok nochi tlen nopantitok” (SALMO 31:7).

¿Techpaleuia tijmatisej toTeotsij kitekipachoua tlen techpano uan techmokuitlauia ika tlaiknelili? Kena. Hannah, * katli eua Inglaterra, kiijtoua:

“Miakpa nimoiljuik Jehová amo nechikneliyaya. Uan nojkia nimoiljuiyaya amo nechtlakakiliyaya kema nimomaijtouayaya pampa monekiyaya nojua kuali nitlaneltokas. Nimoiljuik nechtlatsakuiltiyaya o amo nechtlakakiliyaya pampa amo tleno nopati. Nijyolmatiyaya amo kitekipachouayaya tlen nechpanoyaya”.

Nama, Hannah temachtli kimati Jehová tlauel kiiknelia uan kitekipachoua tlen kipano. ¿Kenke ayokmo moiljuia kej achtouia? Ya kiijtoua: “Amo nimantsi nijpatlak tlen nijyolmatiyaya. Uejkajkia, nijkajki se tlamachtili kampa moixtonki kenijkatsa Jesús temaktilik inemilis. Tlen nijkajki asik ipan noyolo uan nechpaleuik ma nikita kenijkatsa Jehová tlauel nechiknelia. Nojkia nikitak Jehová nechiknelia kema kinankiliyaya notlamaijtoljuaj, uan nopa kichiuayaya ma nimochokili. Nojkia, pampa nimomachtia Biblia uan nia tlanechikoli, nechpaleuijtok kuali ma nikixmati Jehová uan ma nijmati tlake kiyolmati. Nama nijmati Jehová techiknelia, techpaleuia uan kineki techmokuitlauis”.

¡Tlauel techyolchikaua tlen Hannah kiijtok! Uan ta, ¿kenijkatsa uelis tijmatis tlaj toTeotsij kimati uan kikuamachilia tlen tijyolmati? Ni tlajtlanili monankilia ipan nopa seyok tlamachtili.